Actes 2
2
Mshkè Mèzhèɓ Zhiklè nkezlaʼa
1Aman pats Pentecôte a mshkè ma, ta zhè tèlèba a sam staɗ. 2Tsam tsam skwi ngiɗè a mshkè te zhiklè, a nkuɗau ara kozlar mbiaʼa, a nʼndha gi tèlèba man ta nza te pa. 3A nèʼènhai, ara nèʼèn vogwa, a ta rkè, ta kezla gèɗ, a ta nza a gèɗ ndo staɗ staɗ. 4A ndav tengaʼa tèlèba nʼndha a Mèzhèɓ Zhiklè nkezlaʼa, a ta hüno ngèɗè a daʼai tsad tsaɗ, staɗ staɗ daʼai ngiɗè, ara Mèzhèɓ Zhiklè a va na.
5Te kokwar Jérusalem ndohi Juif ta zhè, man ta gi zlau Zhiklè, man ta shkè te verzi ndohi herkeda tsaɗ tsaɗ. 6Aman ta tsena ma haha, ta haya va kumba, gèɗ ta ndzakaɓa, aman ta tsena staɗ staɗ a gèɗè a daʼai kokwar ta. 7A ta rzl ta, a ta hur a vata, a ta gaɗa: na, haha mè? Ndohi man ta gèɗè a haha, ndohi Galilée ka ɓi dè? 8A nga tsena ma tengaʼa a daʼai kokwar nga èhèmè? 9Parthes, Mèdes, Elamites, ndohi kokwar Mésopotamie, Judée, Cappadoce, Pont, Asie, 10Phrygie, Pamphylie, Egypte, Libye ndul ndul a ma Cyrène, a ndohi man ta shkè te kokwar Rome, ndohi Juif a gwoli Juif, 11a ndohi Crête a Arabes, nga tsena ara man ta gèɗè a géɗ nrkedi Zhiklè mbiaʼa a daʼai nga èhèmè? 12Ta tèlèba ta rzl ta, gèɗ tengaʼa ndzakaɓa, a ta goɗ a va ta: Skwi haha a da ndikè ta ahngwa? 13Aman ndohi ngiɗè ta ngwoshè a pa, a ta gaɗa: Ndohi haha, ndohi zom.
Njè-ma Pierre a géɗ Pentecôte
14A Pierre a nslambaɗa a nda tengahia 11, a nhüno man a gaɗa ta: Kinè, ndohi Juif a ndohi kokwar Jérusalem tèlèba! I woy a i ngreda kinè skwi haha, va-fa na zlembaɗ a ma ga! 15Zom a keɗ ta ndohi haha azɓai, ara man kin huro; prèk di genè ma! 16Aman nengaʼa skwi man Joel, ndo nhadka ma, a ngaɗa: 17Zhiklè a gaɗa: A pats ndikèma skwai i woya man a i bèdè Mèzhèɓ ga a géɗ ndohi tèlèba, a wudahi kinè a dalahi kinè ta da hèdè ma Zhiklè; golahi kinè ta da rka skwi man a ma, a ndohi kinè nhalaʼa ta ngècè nshu-nè. 18A pats nasa i woy a i bèdè Mèzhèɓ ga a géɗ ɓèlèlihi ga, ko nguraʼa ko ngwoz, a ta hèdè ma Zhiklè. 19I woya man a i ngrédè nrkedi te zhiklè te géɗèʼa, a i ngré-dè skwi tʼhai tʼherkeda, Pombaz a vogwa, a vodzok. 20Pats a da ngwèdè va na a ruva, a kia a da ngwèdè va na a Pombaz; te deɓaʼa pats kita Bi Zhiklè a shkè, pats mbiaʼa a nʼnjèlè. 21Te deɓaʼa ko wawa man a tsi rai a nzlembaɗ Bi Zhiklè, a mbél na.
22Kinè, ndohi Israel, va-tsena ma ga! Yèsu ndo Nazareth, nasa ndo man Zhiklè a nfau a mizlinè a nrkedai a skwi man Zhiklè a gau a nengaʼa a sam kinè (ara man kinè ba kin suna). 23Te deɓaʼa, aman ta feda a kita ma, ara Zhiklè a nhur zlèzlèa a woya a ngiaʼa, kin gezlalaʼa, a kin va ta a ri a ndohi malihai a ta keɗaʼa. 24Zhiklè a nslambaɗkaɗauda, a mprokoɗauda te matakwan mʼmetsai. Mʼmetsi a slaha man a ngsa ɓai. 25Aman David a goɗ a géɗ nengaʼa: Bi Zhiklè a zhè a sam di ga pèc pècèk, na zhè a tsagi ga, aman i gidè va azɓai. 26Gar haha ndav ga langlangaʼa, a i gèɗè ma mwuffe, a gèɗ man ko va ga a nʼnza, a i zhèrè te ndav. 27Aman ka jèkeda ndav ga a ri a kokwar-Bi-mʼmetsi azɓai, a ka gi aman ndo ngaya nkezlaʼa a huslè azɓai. 28Ka ngray civèɗ nshèffè, a ka da ndha ndav ga a mwuffe a sam di ngaya.
29Kinè, dalahimam ga, i woya aman i njè kinè ma auda tèlè, a géɗ David, babab nga halaʼa. 30Nengaʼa ba a mʼmets na, a ta raʼa. Gi dzavi nengaʼa a zhè a sam nga, ha patsna. Nengaʼa ndo nhadka ma, a suna Zhiklè a ngaɗa na a mbèɗè, a woya a ngi aman verzi nengaʼa a nzi a géɗ sam nʼnzi bi nengaʼa. 31A hod ma a géɗ nslambaɗkaɗa Kristi, man a gaɗa: Zhiklè a njèkeda a sam mʼmetsi ɓai, a zluèɗ va nengaʼa a nhusla ɓai. 32Yèsu haha, Zhiklè a nslambaɗda. Nga tèlèba ndohi malwuɗihi a géɗ skwi sa. 33Antanta ri mandi Zhiklè a nzalaʼa, a nʼngots Mèzhèɓ Zhiklè nkezlaʼa, man Bab Zhiklè a mpasla na rai, a foko nga skwi haha man kin rkaʼa, a kin tsenaʼa. 34David a nda a zhiklè ɓai. Nengaʼa a ngaɗa: ɓai a ngaâa na Bi ga: nzahai a civèɗ ri mandi ga, 35ha pats man i ge ta ndohi mayamhi ngaya a skwi nfi sak ngaya.
36Gar haha ndohi Israel tèlèba sèi da suna a vava, Zhiklè a nʼnga Yèsu haha, man kin gezlalaʼa, a Bai a Kristi.
37Aman ta tsena ma haha, a mʼmbeɗama ta ndav, a ta gaɗa na Pierre a ndohi sak ngiɗè: Dalahimam nga, nga da gi ma kè? 38A Pierre a ngaɗa ta: Va-ngwoda ndav kinè, va-gu baptême staɗ staɗ tèlèba a nzlembaɗ Yèsu Kristi a mpra mali kinè, a kin ngècè Mèzhèɓ Zhiklè nkezlaʼa. 39Skwi man Zhiklè a mpasla kinè rai, skwi kinè, a wudahi kinè, a ndohi tèlèba man ta dra, tèlèba man Bai, Zhiklè nga, a woy a mbaha ta. 40Ma haha, a ma ngiɗè tsaɗ tsaɗ a nʼngreda ta, a mbid ta, a ngaɗa ta: Va-gu aman kin mbél kinè te ndev ndohi ambaɓihiaʼa haha a géɗ herkeda!
41A ndohi man ta co ma nengaʼa, ta gu baptême. A ta shkè na va va. A pats nasa ndohi ngu baptême gozhèm makar.
42A ta slebau ma ndohi sak, a to do a ma ma te pa, a ta humda va, a ta tsaka movar, a ta tsu rai.
Maya nshèffè ndohi Zhiklè
43A zlau a ndza ta ndohi tèlèba, a ta rka nrkedi kumba, a skwi man ndohi sak ta ngreda ta tsaɗ tsaɗ. 44Aman ndohi téléba man ta co a ndav, ta nza a sam staɗ, a ta humda skwi ta tèlèba. 45Skwi tengaʼa, a kolongwi tengaʼa, ta preda ma, a ta kezla ta ndohi man ta ngatsa skwa ɓai. 46A nciɗ sam a nciɗ sam ta ɓiceda va a gi Zhiklè, ta mba ma ta, ta ndau skwi nʼndai a mwuffe te gi ngiɗè te gi ngiɗè, 47a ta slubordo Bi Zhiklè, a ta ngots pombai a sam ndohi tèlèba. Aman a nciɗ sam a nciɗ sam Zhiklè a mpe ta ndohi man a mbel ta a va mpi ndohi Zhiklè.
Currently Selected:
Actes 2: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
Actes 2
2
Mshkè Mèzhèɓ Zhiklè nkezlaʼa
1Aman pats Pentecôte a mshkè ma, ta zhè tèlèba a sam staɗ. 2Tsam tsam skwi ngiɗè a mshkè te zhiklè, a nkuɗau ara kozlar mbiaʼa, a nʼndha gi tèlèba man ta nza te pa. 3A nèʼènhai, ara nèʼèn vogwa, a ta rkè, ta kezla gèɗ, a ta nza a gèɗ ndo staɗ staɗ. 4A ndav tengaʼa tèlèba nʼndha a Mèzhèɓ Zhiklè nkezlaʼa, a ta hüno ngèɗè a daʼai tsad tsaɗ, staɗ staɗ daʼai ngiɗè, ara Mèzhèɓ Zhiklè a va na.
5Te kokwar Jérusalem ndohi Juif ta zhè, man ta gi zlau Zhiklè, man ta shkè te verzi ndohi herkeda tsaɗ tsaɗ. 6Aman ta tsena ma haha, ta haya va kumba, gèɗ ta ndzakaɓa, aman ta tsena staɗ staɗ a gèɗè a daʼai kokwar ta. 7A ta rzl ta, a ta hur a vata, a ta gaɗa: na, haha mè? Ndohi man ta gèɗè a haha, ndohi Galilée ka ɓi dè? 8A nga tsena ma tengaʼa a daʼai kokwar nga èhèmè? 9Parthes, Mèdes, Elamites, ndohi kokwar Mésopotamie, Judée, Cappadoce, Pont, Asie, 10Phrygie, Pamphylie, Egypte, Libye ndul ndul a ma Cyrène, a ndohi man ta shkè te kokwar Rome, ndohi Juif a gwoli Juif, 11a ndohi Crête a Arabes, nga tsena ara man ta gèɗè a géɗ nrkedi Zhiklè mbiaʼa a daʼai nga èhèmè? 12Ta tèlèba ta rzl ta, gèɗ tengaʼa ndzakaɓa, a ta goɗ a va ta: Skwi haha a da ndikè ta ahngwa? 13Aman ndohi ngiɗè ta ngwoshè a pa, a ta gaɗa: Ndohi haha, ndohi zom.
Njè-ma Pierre a géɗ Pentecôte
14A Pierre a nslambaɗa a nda tengahia 11, a nhüno man a gaɗa ta: Kinè, ndohi Juif a ndohi kokwar Jérusalem tèlèba! I woy a i ngreda kinè skwi haha, va-fa na zlembaɗ a ma ga! 15Zom a keɗ ta ndohi haha azɓai, ara man kin huro; prèk di genè ma! 16Aman nengaʼa skwi man Joel, ndo nhadka ma, a ngaɗa: 17Zhiklè a gaɗa: A pats ndikèma skwai i woya man a i bèdè Mèzhèɓ ga a géɗ ndohi tèlèba, a wudahi kinè a dalahi kinè ta da hèdè ma Zhiklè; golahi kinè ta da rka skwi man a ma, a ndohi kinè nhalaʼa ta ngècè nshu-nè. 18A pats nasa i woy a i bèdè Mèzhèɓ ga a géɗ ɓèlèlihi ga, ko nguraʼa ko ngwoz, a ta hèdè ma Zhiklè. 19I woya man a i ngrédè nrkedi te zhiklè te géɗèʼa, a i ngré-dè skwi tʼhai tʼherkeda, Pombaz a vogwa, a vodzok. 20Pats a da ngwèdè va na a ruva, a kia a da ngwèdè va na a Pombaz; te deɓaʼa pats kita Bi Zhiklè a shkè, pats mbiaʼa a nʼnjèlè. 21Te deɓaʼa ko wawa man a tsi rai a nzlembaɗ Bi Zhiklè, a mbél na.
22Kinè, ndohi Israel, va-tsena ma ga! Yèsu ndo Nazareth, nasa ndo man Zhiklè a nfau a mizlinè a nrkedai a skwi man Zhiklè a gau a nengaʼa a sam kinè (ara man kinè ba kin suna). 23Te deɓaʼa, aman ta feda a kita ma, ara Zhiklè a nhur zlèzlèa a woya a ngiaʼa, kin gezlalaʼa, a kin va ta a ri a ndohi malihai a ta keɗaʼa. 24Zhiklè a nslambaɗkaɗauda, a mprokoɗauda te matakwan mʼmetsai. Mʼmetsi a slaha man a ngsa ɓai. 25Aman David a goɗ a géɗ nengaʼa: Bi Zhiklè a zhè a sam di ga pèc pècèk, na zhè a tsagi ga, aman i gidè va azɓai. 26Gar haha ndav ga langlangaʼa, a i gèɗè ma mwuffe, a gèɗ man ko va ga a nʼnza, a i zhèrè te ndav. 27Aman ka jèkeda ndav ga a ri a kokwar-Bi-mʼmetsi azɓai, a ka gi aman ndo ngaya nkezlaʼa a huslè azɓai. 28Ka ngray civèɗ nshèffè, a ka da ndha ndav ga a mwuffe a sam di ngaya.
29Kinè, dalahimam ga, i woya aman i njè kinè ma auda tèlè, a géɗ David, babab nga halaʼa. 30Nengaʼa ba a mʼmets na, a ta raʼa. Gi dzavi nengaʼa a zhè a sam nga, ha patsna. Nengaʼa ndo nhadka ma, a suna Zhiklè a ngaɗa na a mbèɗè, a woya a ngi aman verzi nengaʼa a nzi a géɗ sam nʼnzi bi nengaʼa. 31A hod ma a géɗ nslambaɗkaɗa Kristi, man a gaɗa: Zhiklè a njèkeda a sam mʼmetsi ɓai, a zluèɗ va nengaʼa a nhusla ɓai. 32Yèsu haha, Zhiklè a nslambaɗda. Nga tèlèba ndohi malwuɗihi a géɗ skwi sa. 33Antanta ri mandi Zhiklè a nzalaʼa, a nʼngots Mèzhèɓ Zhiklè nkezlaʼa, man Bab Zhiklè a mpasla na rai, a foko nga skwi haha man kin rkaʼa, a kin tsenaʼa. 34David a nda a zhiklè ɓai. Nengaʼa a ngaɗa: ɓai a ngaâa na Bi ga: nzahai a civèɗ ri mandi ga, 35ha pats man i ge ta ndohi mayamhi ngaya a skwi nfi sak ngaya.
36Gar haha ndohi Israel tèlèba sèi da suna a vava, Zhiklè a nʼnga Yèsu haha, man kin gezlalaʼa, a Bai a Kristi.
37Aman ta tsena ma haha, a mʼmbeɗama ta ndav, a ta gaɗa na Pierre a ndohi sak ngiɗè: Dalahimam nga, nga da gi ma kè? 38A Pierre a ngaɗa ta: Va-ngwoda ndav kinè, va-gu baptême staɗ staɗ tèlèba a nzlembaɗ Yèsu Kristi a mpra mali kinè, a kin ngècè Mèzhèɓ Zhiklè nkezlaʼa. 39Skwi man Zhiklè a mpasla kinè rai, skwi kinè, a wudahi kinè, a ndohi tèlèba man ta dra, tèlèba man Bai, Zhiklè nga, a woy a mbaha ta. 40Ma haha, a ma ngiɗè tsaɗ tsaɗ a nʼngreda ta, a mbid ta, a ngaɗa ta: Va-gu aman kin mbél kinè te ndev ndohi ambaɓihiaʼa haha a géɗ herkeda!
41A ndohi man ta co ma nengaʼa, ta gu baptême. A ta shkè na va va. A pats nasa ndohi ngu baptême gozhèm makar.
42A ta slebau ma ndohi sak, a to do a ma ma te pa, a ta humda va, a ta tsaka movar, a ta tsu rai.
Maya nshèffè ndohi Zhiklè
43A zlau a ndza ta ndohi tèlèba, a ta rka nrkedi kumba, a skwi man ndohi sak ta ngreda ta tsaɗ tsaɗ. 44Aman ndohi téléba man ta co a ndav, ta nza a sam staɗ, a ta humda skwi ta tèlèba. 45Skwi tengaʼa, a kolongwi tengaʼa, ta preda ma, a ta kezla ta ndohi man ta ngatsa skwa ɓai. 46A nciɗ sam a nciɗ sam ta ɓiceda va a gi Zhiklè, ta mba ma ta, ta ndau skwi nʼndai a mwuffe te gi ngiɗè te gi ngiɗè, 47a ta slubordo Bi Zhiklè, a ta ngots pombai a sam ndohi tèlèba. Aman a nciɗ sam a nciɗ sam Zhiklè a mpe ta ndohi man a mbel ta a va mpi ndohi Zhiklè.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989