Genèse 11
11
Gi mbiaʼa te Babel
1Herkeda tèlèba, a nèʼèn ta staɗ, a daʼai ta staɗ. 2Aman ta shkè te man a civèɗ mvèng pats, ta ngots dala te kokwar Shinear, a ta nza a pa. 3A ta goɗ a va ta: Yowa, ngo-romokoy wujèɗ ara kwa, a ngo-ndorokoya zuraʼa! A ta rom staɗ staɗ tèlèba ara kwa, a ta poɗ mpèɗè a bitume. 4A ta gada: Ngo-ɗüzlokoy kokwar, gi staɗ te va mbiaʼa, géɗ nengaʼa da lamka na giɗfèk! Da nda a skwi nslébèrdè nga, a nga vindè gèɗ a géɗ herkeda asaɓai. 5Te deɓaʼa Ndo nzi pèc pècèk a mshkèhai, a nrka kokwar mbiaʼa, a gi ngurèa, man ndohi herkeda ta roma. 6A Ndo nzi pèc pèck a ngaɗa: Na haha, ndohi kokwar staɗ, a daʼai ta staɗ, a ta hinè ngi aranta di genè; anai ta da dè a ma ma, a ta gi skwi man ta hérèʼa. 7Yowa, ngo-do a hai, ngo-dzokoɓokoy nèʼèn ta, a ngiɗè a tsena daʼai ngiɗè ɓai, ngiɗè a tsena daʼai ngiɗè bai. 8A Ndo nzi pèc pècèk a venda ta gèd a géɗ herkeda tèlèba aranta, a ta jèkeda nɗizl kokwar mbiaʼa. 9Gar haha nzlembaɗ kokwar sa, Babel, a géɗ man Ndo nzi pèc pècèk a ndzakaɓama ta nèʼèn a ndohi herkeda tèlèba te pa, a venda ta gèd a géɗ herkeda tèlèba.
Verzi ndohi Sem
10Na haha verzi ndohi Sem. Aman mvi Sem 100, a myu Arpacshad, mvi cèw te deɓ iyam nchè nchè mbiaʼa. 11Te deɓ nyi Arpacshad, a nʼnza a nshèffê mvi 500 dai, a myu wudahi a dalahai. 12Aman mvi Arpacshad 35, a myu Shélach. 13Te deɓ nyi Shélach, a nʼnza a nshèffè mvi 403 dai, a myu wudahi a dalahai. 14Aman mvi Shélach 30, a myu Héber. 15Te deɓ nyi Héber, a nʼnza a nshèffê mvi 403 dai, a myu wudahi a dalahai. 16Aman mvi Héber 34, a myu Péleg. 17Te deɓ nyi Péleg, Héber a nʼnza a nshèffê mvi 430 dai, a myu wudahi a dalahai. 18Aman mvi Péleg 30, a myu Rehu. 19Te deɓ nyi Rehu, Péleg a nʼnza a nshèffè mvi 209 dai, a myu wudahi a dalahai. 20Aman mvi Rehu 32, a myu Serug. 21Te deɓ nyi Serug, Rehu a nʼnza a nshèffê mvi 207 dai, a myu wudahi a dalahai. 22Aman mvi Serug 30, a myu Nachor. 23Te deɓ nyi Nachor, Serug a nʼnza a nshèffê mvi 200 dai, a myu wudahi a dalahai. 24Aman mvi Nachor 29, a myu Térach. 25Te deɓ nyi Térach, Nachor a nʼnza a nshèffê mvi 119 dai, a myu wudahi a dalahai. 26Aman mvi Térach 70, a myu Abram, Nachor a Haran.
Verzi ndohi Térach
27Na haha ndohi te verzi Térach. Térach a myu Abram, Nachor a Haran. 28Haran a myu Lot. A Haran a mʼmets na, aman Térach, bab nengaʼa a zhè a nshèffê dai, te kokwar Ur, te Chaldée, kokwar bab na. 29A Abram a Nachor ta hul ngwozai: nzlembaɗ ngwoz Abram, Sarai. Nzlembaɗ ngwoz Nachor, Milca, dem Haran, bab Milca a bab Jisca. 30Sarai delai, a yi kra azbai. 31Térach a nhul Abram, kra na, a Lot, kra Haran, kra kra na, a Sarai, ngwoz kra na, ngwoz Abram, kra na, a nde ta auda te kokwar Ur te Chaldée, aman ta de a kokwar Canaan. A ta shkè Charan, a ta nza te pa. 32Mvi Térach 205, a Térach a mʼmets na te Charan.
Currently Selected:
Genèse 11: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
