Genèse 15
15
Zhiklè a mpasla na ri a ma Abram
1Te deɓaʼa Ndo nzi pèc pècèk a ngaɗa na Abram te nshunè: Abram, ka gu zlau bai, i gambar ngaya. Skwi ntul ngaya mbiaʼa a zhè a ma. 2Abram a ngeɗa na: Ndo nzi pèc pècèk, Zhiklè ga, ka woy a ka da vay mè? Anai i hèl ga cèw cèw a i metsi ga, kra ga azbai. A Eliézer te Damas a da ndi gi ga. 3A Abram a ngaɗa: Ka vay kra ɓai, a ɓèl ga a da ndi gi ga. 4A Ndo nzi pèc pècèk a ngaɗa na: Nengaʼa ka bai; kra hwaɗ ngaya da ndu gi ngaya! 5A nda auda, a ngaɗa: Ced gèɗ a zhiklè, ngur bantihai ka slaha ka nger ta ɗè? A ngaɗa na: Ndohi verzi ngaya ta da gi kumba arsa. 6A Abram a nco ma Zhiklè a ndav, a Ndo nzi pèc pècèk a nfa a ngi-zuraʼa. 7A Bi Zhiklè a ngaɗa na: I Ndo nzi pèc pècèk, man i cka ka auda te kokwar Ur te Chaldée, aman i da va ka herkeda haha. 8A nengaʼa a ngaɗa: Ndo nzi pèc pècèk, Zhiklè ga, aman skwi haha a ga ga, i da shinè te mè? 9A njhèɗèʼa: Ckoy zlè matsamakaɗ, ɓok mvi na makar, drok mvi na makar, mbakala staɗ a kra nkuɗhom staɗ. 10A Abram a mva na skwi tèlèba, a ntserah ta, rèta te civèɗ ngiɗè, rèta te civèɗ ngiɗè. Aman ɗiakihai a ntseraha ɓai. 11A mohodokihai ta shkè a sam skwi mbazlaʼa; aman Abram a ndzam ta.
12Aman pats a woya a nkèlè, nzhunè a ngsama na dai a Abram, a ruva mbiaʼa a ntèuda a pa. 13A Bi Zhiklè a ngaɗa na Abram: A woy ka suna, ndohi verzi ngaya ta da nzi a mbrok te herkeda man a tengaʼa ka bai. A ta gi ɓèlè te pa, a ta ga ta matakwan mvi 400. 14Aman i woy a i da ga ta kita a ndohi man ta da ga ta a ɓèlè. Te deɓaʼa ta da dè auda a skwi mèshèlè te ri kumba. 15Aman ka, sèi ka da metsi a va babhi ngaya, a ta da re ka a vèvèɗ, aman ka hala hurnjüfnjüfa ma. 16Sèi kra kra kra ngaya a da shkè a deɓa a haha. Aman mali ndohi Amor tiɗè di ka ɓai.
17Aman pats nkala ma, sam nkezawa ma; a vodzok a ɗüzhè, a skwi ntiv vogwa a shèwèlè te ndev zluèd ntserahahiaʼa. 18A pats sa, Ndo nzi pèc pècèk ta derzla ma ta a Abram, a ngaɗa: I da va ta herkeda haha a ndohi te verzi ngaya, a hinè te woyam Egypte, ha ndè a ma woyam mbiaʼa, Euphrate. 19Herkeda ndohi Ken, Keniz, Kadmon, 20Heth, Phérez, Rephaim, 21Amor, Canaan, Guirgasi, a Jébus.
Currently Selected:
Genèse 15: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
