Jean 12

Ngwoz a faɗa na mbar a sak Yèsu te Béthanie

(Mt. 26,6-13; Marc 14,3-9)

1Mʼmèn mokwa, ga ngolala Pâque, Yèsu a mshkè a kokwar Béthanie, man Lazare te pa, ndo man Yèsu a nslambaɗdekaɗauda te va ndohi mʼmetsaʼa. 2Te pa ta tila skwi nʼndai. Marthe a ntakaha ta. Lazare te va tengaʼa, man ta ndau skwi a vna. 3A Marie a nco ɓurdi, gani nengaʼa kumba, a gi ndèlèk staɗ, a nfaɗa na a sak a Yèsu, a ntokwolama na sak a gwots gèɗ nengaʼa. A gi nʼndhe na a nzhkè ɓurdi. 4A Judas Iscariot, kra Simon, staɗ te va golahi Yèsu, nengaʼa man te deɓaʼa a nʼnga na ri a gèɗ Yèsu, a ngaɗa: 5Ta preda ɓurdi haha a ma a Suli 3.000, a ta va ta ndohi ntawassaʼa bi èhèmè? 6Ma haha a goɗ a gèɗ man a woya a ntakaha ta ndohi ntawassaʼa ka ɓai, aman a gèɗ man nengaʼa ndo metsar, gozhèm Suli te ri na, a ɓer skwi man ta ngotso. 7A Yèsu a ngaɗa na: Jèkeda! Skwi arsa a gu, aman a hér pats man ta da riyè a vèvèɗ. 8Ndohi ntawassaʼa ta zhè a sam kinè pèc pècèk; aman iyè, i nzi a sam kinè pèc pècèk azɓai.

Nvhè ma a géɗ Lazare

9Ndohi kumba te ndev ndohi Juif ta tsenaʼa, a zhè te pa. A ta shkè a sam Yèsu genè ka ɓai. Aman ta woy a ta rka Lazare ba, ndo man Yèsu a nslambaɗdekaɗauda te ndev ndohi mʼmetsaʼa. 10Aman ndohi mvi skwi a Zhiklè mbibihiaʼa ta woy maya, a ta woy a ta kéɗè Lazare ba. 11A gèɗ Lazare ndohi Juifs kumba ta jèke ta, ta co Yèsu a ndav ta.

Yèsu a dè a kokwar Jérusalem ara Bai

(Mt. 21,1-11; Marc 11,1-11; Luc 19,28-40)

12Te mangoslèmaʼa, aman ndohi kumba ta dè ngolala, ta tsenaʼa, Yèsu a dè Jérusalem. 13A ta burzl vah gangar, a to do aman ta zli gèɗ a vna, a ta goɗ a wuɗai: Va-nzalaʼa! Nga slébèrdè nengaʼa man a shkè a nzlembaɗ Bi Zhiklè, bi Israel! 14A Yèsu a nʼngots gol kɗèh, a nʼnza a deɓaʼa, ara man ta Windo: 15Ka gu zlau ɓai, kokwar Sion! Na haha, bi ngaya a shkè a deɓ gol kɗèh.

16Nshèlèkuraʼa, golahi Yèsu ta tsena verzi ma haha di ɓai. Aman a pats man Yèsu a ngots nʼnjèlè ma, ta huro, ma haha a Windo a géɗ nengaʼa, a ta ga na ar naha.

17Aman ndohi man ta zhè a sam man a baha na Lazare auda te dzavi na, a nslambaɗdekaɗauda te ndev ndohi mʼmetsaʼa, ta gu malwuɗihi. 18Gar haha ndohi kumba to do, aman ta zli gèɗ a vna, te man ta tsena skwi malwuɗi man a gau. 19A ndohi pharisie ta goɗ a va ta: Kin rkaʼa, kin slaha nengaʼa ɓai! Ndohi tèlèba ta dè a verzi nengaʼa.

Ndohi Grec ngiɗè ta woy Yèsu

20Te va ndohi man to do ngolala, aman ta tsi rai, ndohi Grec kètè ta zhè. 21A ta shkè a sam Philippe, te kokwar Béthsaida te Galilee, a ta gaɗa na: Bi ga, nga woy a nga rka Yèsu. 22A Philippe a mshkè, a ngaɗa na Andrè, a nda Philippe a Andrè ta menda na a Yèsu. 23Aman Yèsu a mʼmbeɗa ta a ma: Tiɗè sama ma, aman kra-ndo a ngècè nʼnjèl na. 24A vava, a vava, i gaɗa kinè: Sèi tser dau a kèlèhi a herkeda, a verzi na a nhusl na, man ɓai a nzi a géɗ na. Aman a husl na, a yi wuda kumba. 25Ndo man a woy nshèffè na, nshèffè nengaʼa a zi na. Ndo man a woya nshèffè na man a géɗ herkeda haha ɓai, a ɓer nshèffè man a nzi a mèdèp. 26Ndo man a woya a ntakahayè, sèi a dzadzar-kayè. A sam man iyè a pa, ndo ntakahayè ba a pa. Ndo man a takahayè, Bab ga a slébèrdèʼa.

Sèi ta zlècèdè kra-ndo

27Antanta ndav ga a kuɗai, a i gèɗè ma kè? Bab ga, mbelkay auda te sam nta! Aman i shkè a sam nta a géɗ nengaʼa. 28Bab ga, nzala nzlembaɗ ngaya! A ngèɗè staɗ a ntsenkaɗi te zhiklè: I nzalaʼa ma, a i woya man a i nzalaʼa a vaʼa. 29A ndohi man ta zlatsa a pa, ta tsenaʼa, a ta gaɗa: Ntsi-iyam! Ndohi ngiɗè ta gaɗa: Ta goɗ a gol Bi Zhiklè! 30A Yèsu a ʼmbeɗa ta a ma: Ngèdè haha a gu a géɗ ga ka bai, aman a géɗ kinè. 31Aman antanta kita a gi a géɗ herkeda haha. Antanta ta da jèr bi herkeda haha. 32A iyè, man ta zlatse-dyè a géɗ herkeda, i woy man i vitka ta ndohi tèlèba a sam ga. 33Ma haha a goɗo, a ngréɗè mʼmetsi nengaʼa, ara man a da metsi na. 34A ndohi ta gaɗa na: Nga tsena te ma kita Zhiklè, Kristi a nzi a mèdèp. Ka, ka gaɗ ke: Sèi ta zlècèdè krando. Kra-ndo haha wa? 35A Yèsu a ngaɗa ta: Skwi nhel sam a zhe a sam kinè kètè dai. Vo-do, man skwi nhél sam azhè a sam kinè dai, ruva da ga kinè a gèɗ ɓai! Ndo man a dè te ndev ruva, a sun sam man a dè a pa ɓai. 36Vo-co skwi nhél sam a ndav kinè, a pats man ani a zhè a sam kinè, a kin ndi a wudahi skwi nhél sam!

Ndohi Juif ta cè a ndav azɓai

A Yèsu a ngoɗ ma ar haha, a mdo na, a nʼngheda va na a sam di ta. 37Ko a ngu nrkedi arsa kumba, a sam di ta, ta ca a ndav ta ɓai. 38A ngu ara man Esaie, ndo nhadka ma, a gaɗa: Bai, nco ma man nga njèʼa, wa? Wuɗi Ndo nzi pèc pècèk a ngudoko na va a di a wa? 39Gar haha ta slaha a ta ca a ndav ɓai, aman a sam ngiɗè Esaie a gaɗa: 40Nengaʼa a ndèma ta dai, a nsassaya ndav ta, a ta rka di ɓai, a ta da menkada deɓa asaɓai, aman i mbel ta azɓai.

41Ma haha Esaie a goɗ a géɗ man a rka nʼnjèl nengaʼa, a ngoɗ a géɗèʼa. 42Ko ndohi mbibihiaʼa kumba ta co a ndav ta. Aman a géɗ ndohi pharisie ta ngreda auda ɓai, ta gu zlau, ta da dzar ta auda te gi njèngè ma Zhiklè. 43Ta woy nʼnjèlè a sam ndohai, a fena man a Zhiklè.

Yèsu a gi kita

44A Yèsu a mboho, a ngaɗa: Ndo man a ciyè a ndav na, a ciyè ka ɓai, aman nengaʼa man a zlindekayè. 45A ndo man a rkayè, a rka nengaʼa man a zlindekayè. 46I shkè a herkeda, i skwi nhél sam. Aman ko wawa man a ciyè a ndav na, a nzi te ruva azɓai. 47Ndo man a tsena ma ga, aman a cè azɓai, iyè a ngi kita nengaʼa ka ɓai. I shkè ɓai, aman i gi kita herkeda; aman i shkè, aman i mbél herkeda. 48Ndo man a kwolyè, a cè ma ga azɓai, kita nengaʼa a zhè ma. Ma man i gèɗèʼa, nengaʼa a gi a kita na, a pats nʼndikèma skwai. 49I goɗ ma te gèɗ ga ka ɓai. Aman Bab ga man a zlindekayè, nengaʼa a mvayè ma nkwèrè man i gèɗèʼa. 50A i suna, ma nkwèr nengaʼa, nshèffè a mèdèp. Anai, skwi man i gèɗè, i gèɗèʼa ara man Bab ga a ngrayè.

Currently Selected:

Jean 12: MOF89

Highlight

Copy