Luc 17
17
Mali a pe nga a wai
(Mt. 18,6-7, 21-22; Marc 9,42)
1A Yèsu a ngaɗa ta golahi nengaʼa: Skwi man a slafadama ta sak a ndohi a zhè genè! Aman Woba a nengaʼa, man a slafadama ta sak a ndohai! 2Dara ta mana na vova a daʼai, a ta kalda a drav iyam, a géɗ man a slafadama na sak a kra nkèshèʼa staɗ haha. Va-gu maya a géɗ va kinè. 3Aman kramam ngaya a gi malai, ngatsa na maya! Aman a hér mali na, pra na malai.
4Aman a gi mali a sam ngaya, a gi tsaraɗ, pats staɗ, a mʼmenkaɗa deɓa sak tsaraɗ, a gaɗa: I hér mali ga, sèi ka pra na mali nengaʼa.
Ncè-a-ndav nga do do a ma ma
5A ndohi sak ta gaɗa na Bai: Zledaha ncè-a-ndav nga! 6A Bai a ngaɗa: Aman kin cè a ndav kèshkata, ara tser gevda, nkütèkütèʼa, ar kin da gaɗa na wof kslor haha: Ca na va ngaya auda, a ka kala a woyam mbiaʼa, a nengaʼa a fi gèɗ a ma kinè.
Mizlinè ɓèl Zhiklè
7Te ndev kinè wa, man ɓèl na a zhè, a pizhè, a wèr skwai, te deɓaʼa man a shkè ngwai te gi dau, a ngaɗa na: Washkè a ka ndau skwi tsam tsam? Sèi a gaɗa na: 8Tila skwi nʼndi ga, mana maslaka ngaya a ka takahayè! Aman i nda skwi ma, i sa skwi ma, te deɓaʼa ka ba ka ndi skwai, a ka si skwai. 9A shida na gèɗ a ɓèl ɗè, aman a gi skwi ara man a gaɗa na? Arsa ka ɓai. 10Lèmèlèmè kinè, aman kin gu skwi tèlèba, man ta gaɗa kinè, sèi kin gaɗa: Nga ɓèlèlihi ambalai, nga ga skwi man ta gaɗa nga genè.
Yèsu a suɗa ndohi hutsoɗ kula
11Te deɓaʼa, aman a ndo a kokwar Jérusalem, a mbeza a ndev kokwar Samarie a Galilée. 12Aman a mdo a kokwar ngiɗè staɗ, ta zlü gèɗ a ndohi hutsoɗ kula, man ta zlatsa dra. 13A ta hüno a ta boho a wuɗai, a ta gaɗa: Yèsu, Bai, nga da se ka te va! 14Aman a rka ta, a ngaɗa ta: Vo-do, a kin ngra ta va kinè a ndohi mvi skwi a Zhiklè! A tengaʼa, man to do, ta suɗ ta. 15Staɗ te va tengaʼa, aman a rkaʼa, a nsuɗ na ma, a mʼmenkaɗa deɓa, a hèzlèwè a vata, a nslubordo Zhiklè. 16A nkalahi a deɓ sak Yèsu, a nshida na gèɗ. Nengaʼa ndo Samarie. 17A Yèsu a mʼmbeɗa na a ma: Ta kula, man ta suɗ ta ka ɓi dè? Tengahia cüd, ta tema? 18Ndohi ngiɗè ta shkè a deɓa aman ta slébèrdè Zhiklè azɓi ɗè, sèi ndo man verzi na tsaɗ haha dè? 19A nengaʼa a ngaɗa na: Slambaɗa, a ko do, ncè-a-ndav ngaya a mʼmbel ka ma!
Mshkè kokwar Bi Zhiklè
(Mt. 24,23-28, 36-41)
20Aman ndohi pharisie ta dzhoɗo: Kokwar Bi Zhiklè a shkè a ngèmè? Yèsu a mʼmbeɗa ta a ma, a ngaɗa: Kokwar Bi Zhiklè a shkè azɓai, aman ndohi ta slaha ta rkaʼa. 21A ta gèɗè azɓai: Na haha, na ahngata! Aman na haha, kokwar Bi Zhiklè a zhè te ndev kinè.
22A ngaɗa ta golahi nengaʼa: Aman a pats ngiɗè kin woy a kin rka pats kra-ndo; aman kin da rka azɓai. 23A ta gaɗa kinè: Na ahngata, na haha! Kin do ɓai, kin dzodzor ma tengaʼa ɓai! 24Lèmèlèmè ara ntsi iyam a hél sam tèlèba tʼhwaɗ giɗfèk, lèmèlèmè kra-ndo a da gi arsa a pats nengaʼa. 25Aman sèi skwa a dza na a vata nshèlèkuraʼa dai, a ndohi a gèɗ herkeda haha ta da kwolaʼa.
26Lèmèlèmè ara man ta gu a pats Noé, lèmèlèmè ta da gia a pats kra-ndo. 27Ta ndau, ta sau, ta co ngwoz, to do ngwoz, ha pats man Noé a ndo a wurom, a iyam mbiaʼa a mshkè, a mbazl ta tèlèba. 28Lèmèlèmè a pats Lot: Ta ndau, ta sau, ta sum skwai, ta pro skwai, ta zlekau, ta rom gai, 29aman a pats man Lot a njèke-da Sodome, vogwa a mshkèhai te zhiklè, a skwi nvècè vogwa, ara iyam, a mbazl ta tèlèba. 30Lèmèlèmè a da gia a pats nasa, aman kra-ndo a gudko va a dai.
31A pats nasa – ndo man a zhè a gèɗ gai, a skwi nengaʼa a zhè te gai, da shkèhi ɓai, aman a dè hilèʼa. A ndo man a zhè te gi dau, da mena a deɓa a ngwi ɓai. 32Va-hur ma ngwoz Lot! 33Ndo man a woya a mbél nshèffe na a ri na, a da zede nshèf-fè na. Ndo man a da zede nshèffè na, a da ngècè a deɓa. 34I gaɗa kinè: cèw ta mana a sam staɗ, staɗ ta cèʼa, ngiɗè ta jèkeda. 35Ngwozi cèw ta shidè, staɗ ta cèʼa, ngiɗè ta jèkeda. 36Te va ndohi cèw te gi dau, staɗ ta cèʼa, ngiɗè ta jèkeda.
37A ta gaɗa na: Bai, tema? A nengaʼa a mʼmbeɗa ta a ma: A sam skwi mʼmetsaʼa, mohodokihi ta haya a pa.
Currently Selected:
Luc 17: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
