Luc 20

Ta jhèɗè wuɗi-bi Yèsu

(Mt. 21,23-27; Marc 11,27-33)

1Te deɓ nasa, aman a senda ta ndohi te gi Zhiklè, a njè ta ma mbelaʼa, ndohi mvi skwi a Zhiklè mbibihiaʼa, a malamhai, a tsuvom ndohai, ta shkè, a ta gaɗa na: 2Ngra nga, ka gi skwi haha a wuɗi ngè? A mva ka wuɗi haha wa? 3A nengaʼa a mʼmbeɗa ta a ma: Ko i ba, i woya man i dzhaɗ kinè: Va-mendayè! 4Baptême Jean a shkè te zhiklè te gèɗèʼa ɗè, ɗè te ndo ɗè? 5Aman tengaʼa ta goɗ a va ta: Aman nga gaɗa: te zhiklè, nengaʼa a da gaɗa nga: Kin co ma nengaʼa a ndav kinè ɓi èhèmè? 6Aman nga gaɗa: te ndo — ndohi tèlèba ta da kal nga a kwa, aman tèlèba ta huro, Jean ndo nhadka ma. 7A ta mbeɗa na a ma: Nga sun ɓai. 8A Yèsu a ngaɗa ta: I ba i ngreda kinè azɓai, a wuɗi ngè man i gi skwi haha.

Ngèlègèɗ-ma a géɗ gi wof barassa a ndohi mizlinè nengaʼa

(Mt. 21,33-46; Marc 12,1-12)

9Te deɓaʼa a nhüno man a ngaɗa ta ndohi a ngèlègèɗ-ma haha: Ndo ngiɗè a ngu gi wof barassa, a mva na a ri a ndohi mizlinè nengaʼa, a njèkeda kokwar; a ndo nshèwèlè nʼnzi kètè. 10A pats man skwi nʼndha, a nzlündo ɓèl nengaʼa staɗ a sam ndohi mizlinè, aman ta porko na ny i wof. Aman ndohi mizlinè ta tsau, a ta zlündo a deɓa adai. 11A nengaʼa a nzlinda ɓèl nengaʼa ngiɗè; a ta tsau, a ta durdo, a ta zlinda a deɓa adai. 12A nengaʼa a nzlündo mamakaraʼa; aman ta ga na mblè a va nengaʼa ba, a ta kolkoɗauda. 13A bi gi wof barassa a ngaɗa: I da gi ma kè? I woya man i zlindè kra ga man i woya a ndav ga. Man ta rka nengaʼa, wa ngiɗè ba, ta gi horai. 14Aman ndohi mizlinè ta rkaʼa, ta goɗ a va ta: Nengaʼa ndo nʼndi gai. Vo-washkè, nga-kuɗokoya, a nga ndi gi nengaʼa! 15A ta dzarɗauda a dal gi wof barassa, a ta keɗaʼa. Gar haha bi gi wof barassa a da ga ta mè? 16Nengaʼa a shkè, a bazl ta ndohi mizlinè haha, a vi gi wof barassa nengaʼa a ri a ndohi ngiɗè.

Aman ta tsenaʼa, ta gaɗa: Skwi haha da gu arsa ɓai. 17A nengaʼa a mpa ta dai, a ngaɗa: Na haha, ma mè, man ta Windo: Kwa man ndohi nrèm gai ta kwolaʼa, nʼngaʼa a kwa nte verziaʼa?

18A ndo man a kèlèhi a géɗ kwa haha, va nengaʼa a mpasl na. A ndo man kwa a nkala na a gèɗ, a hasleda a pa.

19A malamhai a ndohi mvi skwi a Zhiklè mbibihiaʼa ta hosso a pats nasa, aman ta fi ri a Yèsu. Aman ta gu zlau ndohai. Ta suna, Yèsu a ngoɗ ngèlègèâ-ma haha a géɗ tengaʼa.

Budu bai

(Mt. 22,15-22; Marc 12,13-17)

20A ta wèrèʼa, a ta zlinde ta ndohi nko-tèʼa; ta ngwoda va ta a ndohi nzuraʼa, a ta zeɓiaʼa: a gi mali te ma na ɗè? A ta woy a ta pinèʼa a sam ndohi mbibihiaʼa a kita ngomna. 21A ta dzhoɗo; Ndo njèngè ma, nga suna, ka gèɗè ma a ka senda nga zuraʼa. Ka gi zlau ndo azɓai, sèi ka njè civèɗ Zhiklè zuraʼa. 22Amba aman nga pi budu a bi dè, dè ambaɓi dè? 23Aman Yèsu a sun maya shèwa tengaʼa, a ngaɗa: 24Va-ngray Suli staɗ! Gèd ngè, man ta vèhda a pa? A ta gaɗa na: A bai. A nengaʼa a ngaɗa ta: 25Gar haha, va-va na skwi bai a bai, a skwi Bi Zhiklè a Bi Zhiklè! 26A ta slaha ta gshèʼa a géɗ ma nengaʼa ɓai, a ta rzl ta a géɗ ma nengaʼa, a ta nza tètè.

Njhèɗè-ma a géɗ nslambaɗkaɗauda te ndev ndohi mʼmetsaʼa

(Mt. 22,23-33; Marc 12,18-27)

27Te deɓaʼa ndohi sadducée ngiɗè ta shkè. Tengaʼa ta gaɗa, nslambaɗkaɗauda te mʼmetsi azɓai. 28A ta dzhoɗo, a ta gaɗa: Ndo njèngè ma, Moise a winda nga: Man kramam ndo ngiɗè a mʼmets na, ngwoz na a zhè, aman wuda na azɓai, kramam na da co a ngwoz mazai, aman a ya na kra a kramam na. 29A kramamhi tsaraɗ ta zhè. Tsuvomaʼa a nco ngwoz, a mʼmets na, wuda na azɓai. 30Mbegédèʼa a nco a ngwoz, a mʼmets na, wuda na azɓai. 31Mamakaraʼa a nco, lèmèlèmè ta tsaraɗ tèlèba, wuda ta azɓai, a ta bazl ta. 32Te deɓ tengaʼa tèlèba, ngwoz ba a mʼmets na. 33A sam nslambaɗkaɗauda, a ngi a ngwoz te va 7 haha wa? Aman ta 7 tèlèba ta co a ngwoz. 34A Yèsu a ngaɗa ta: Wudahi herkeda haha ta cè ngwoz, a ta dè ngwoz. 35Aman tengahi man ta slaha ta ngècè nshèffè te zhiklè, a ta slambaɗkaɗauda te mʼmetsai, ta cè ngwoz azɓai, a ta dè ngwoz azɓai. 36Ta slaha a ta metsi te deɓaʼa azɓai, aman ta gi lèmèlèmè ara golahi Zhiklè. Ta wudahi Zhiklè, a géɗ man ta wudahi nslambaɗkaɗauda te mʼmetsai. 37Aman ko Moise a ngreda nga, ndohi mʼmetsaʼa ta slèmbèɗè. A sam vatak wondar, a mbaha na Bai, Zhiklè Abraham, Zhiklè Isaac, a Zhiklè Jacob, 38Nengaʼa Zhiklè ndohi mʼmetsaʼa ka ɓai, aman Zhiklè ndohi a nshèffè; a géɗ man te nengaʼa tèlèba ta nzi a nshèffè. 39A malamhi ngiɗè ta mbeɗa na a ma: Ndo njèngè ma, ka goɗ amba. 40A ta gu zlau, aman ta jhèdè ma ngiɗè a vaʼa.

Njhèɗè-ma a géɗ kra David

(Mt. 22,41-46; Marc 12,35-37)

41A nengaʼa a ngaɗa ta: Na haha mè, aman ta gaɗa: Kristi kra David. 42A David a ri na, a ngoɗ te ɗèlèwèr Psaume: Bai a ngaɗa na bi ga: 43Nzahai a civèɗ ri mandi ga, ha i pe ta mayamhi ngaya a hwaɗ sak ngaya. 44Aman David a ri na a baha na Bai, kos verzi na èhèmè?

Maya maya a sam malamhai!

(Mt. 23,1-36; Marc 12,38-40; Luc 11,37-54)

45Aman ndohi tèlèba ta tsenaʼa, a ngaɗa ta golahi nengaʼa: 46Va-gu maya a sam malamhai! Ta woy a ta shèwèlè a dawar a va, a ta woya ndohi ngiɗè ta ga ta mbalai a luma, a ta woy sam nʼnzi a ma te gi njèngè ma Zhiklè, a sam nʼnzi mbelaʼa a ma, te ngolala. 47A ta ndi gi ngwozi mazihai, a ta gi ara man ta tsi ri kumba, a sam di ndohai. Kita tengaʼa a gi wuɗitpa holholaʼa.

Currently Selected:

Luc 20: MOF89

Highlight

Copy