Luc 7
7
Yèsu a mbela ɓèl bi soje te matakwan
(Mt. 8,5-13)
1Aman a ndeva ma nengaʼa tèlèba a sam ndohi ma, a mdo a kokwar Capernaum.
2Ɓèl bi sojè ngiɗè, man ambaha bi nengaʼa, mbelakaɓai, a woya mʼmetsai. 3Aman a ntsena labar ma Yèsu, bi nengaʼa a nzlinde ta ndohi nhalaʼa te va ndohi Juif a sam na, a ntsu riaʼa, aman a ndè, a nda mbela ɓèl nengaʼa. 4Aman tengaʼa ta shkè a sam Yèsu, ta tsa na ri a vata, a ta gaɗa: Amba aman ka takaha arsa. 5Nengaʼa a woy ndohi nga, a nrama nga gi njèngè ma Zhiklè nga. 6A Yèsu a ndo a nda tengaʼa. Aman a zhè ndul a ntamagai, bi sojè a nzlinde ta mandalahi nengaʼa a sam na, a ngaɗa na: Bai, da gaka ka matakwan ɓai, i gi huyokokoʼa, i ndo man a ka shkè a gi ga ka ɓai. 7I ndo ndè a tsagi ngaya ka ɓai. Sèi goɗ ma ngaya staɗ, a gol ga a mbél na. 8Aman iyè ba, wuɗi-bi ngiɗè a zhè a géɗ ga, a sojèhi ga ta zhè, man i kwor ta. Aman i gaɗa na staɗ te va tengaʼa: Do! A dè. Aman i gaɗa na ngiɗè: Washkè! A shkè. A sam ɓèl ga: Gu arsa! A giaʼa. 9Aman Yèsu a ntsena ma haha, a rzl na a géɗ nengaʼa a ngaɗa ta ndohi rèdèdèa, man ta dzodzora: I gaɗa kinè, ko te kokwar Israel i ngatsa ncè-a-ndav mbiaʼa ar haha ɓai. 10Aman ndohi man a zlinde ta, to do a deɓa a gai, ta ngots ɓèlè, mʼmbela ma.
Yèsu a nslambaɗ da kra ngwoz mazi te Nain
11Te deɓ nasa, Yèsu a mdo a kokwar mbiaʼa ngiɗè, zlembaɗ na Nain. A golahi nengaʼa kumba, a ndohi rèdèdèʼa to do a nda nengaʼa. 12Aman ndulndul a ma kokwar, na haha ta zuɓkoɗi nckondo auda te kokwar. Nengaʼa kra nstaɗaʼa, man mam na a myau. Mam na, ngwoz mazai. Ndohi kokwar kumba ta zhè a sam na. 13A Bai Yèsu a nrkaʼa, a nsau te va, a ngaɗa na: Ka kuɗ ɓai! 14A mdo, a nlama na telai, man ta manda a pa. A ndohi man ta zuɓkoɗai, ta zlatsahai. A Yèsu a ngaɗa: Masli ga, i gaɗa ka, slambaɗa! 15A ndo mʼmetsaʼa a nslambaɗa, a nʼnza a verzai, a hüno ngèɗè. A Yèsu a nco, a mva na a deɓa a mam na. 16Tèlèba ta rzl ta, a ta slubordo Zhiklè, a ta gaɗa: Ndo nhadka ma mbiaʼa a nslambaɗa te ndev nga. A Zhiklè a mshkè a sam ndohi na. 17A ma haha, man ta goɗ a géɗ nengaʼa, a ndasseda kokwar Judée tèlèba, a tsagi kokwar tèlèba.
Ndohi sak Jean Baptiste
(Mt. 11,2-19)
18A golahi Jean ta menda na ma haha tèlèba a Jean. 19A Jean a nzlinde ta golahi nengaʼa cèw a sam Yèsu, aman ta gaɗa na: Ka nengaʼa man ndohi ta gaɗa a da shke ɗè, ɗè nga zhér ndo ngiɗè di de? 20Aman ndohi ta shkè a sam Yèsu, ta gaɗa na: Jean Baptiste a nzlindeka nga a sam ngaya, a ngaɗa: Ka nengaʼa man ndohi ta gaɗa a da shkè dè, dè nga zhér ndo ngiɗè di dè? 21A pats nasa Yèsu a mʼmbel ta ndohi kumba te ri matakwan, a skwi ndzi tsaɗ tsaɗ, a mèzhèɓhi ambaɓihiaʼa, a ngu aman mandazlihi ta rka dai. 22A Yèsu a mʼmbeɗa ta a ma: Vo-do, a kin gaɗa na Jean skwi man kin rkaʼa, a kin tsenaʼa: Mandazlihai ta rka dai; ndohi vedal ta dè a sak ta; ndohi hutsoɗ ta suɗ ta; ndaɓazlamhai ta tsena zlembaɗ; ndohi mʼmetsaʼa ta slambaɗ ta, a ndohi ta njè ta ma mbelaʼa ndohi ntawassaʼa. 23Mwuffè a sam ndo man sak nengaʼa a slèfèɗè azɓai a géɗ ga.
24Aman ndohi sak Jean to do ta ma, Yèsu a hüno man a ngaɗa ta ndohi rèdè-dèa a géɗ Jean: Kin do a hèshèkèɗ, a kin da war mè? Pandar man kozlar a gidè dè? 25Kin do, a kin da war mè? Ndo man maslaka mbelaʼa a va dè? Na haha, ndohi man ta feda maslaka mbelaʼa a va, ta ndi skwi mbelmbelaʼa ntèngèlè ntèngèlè, ta te gi bihai. 26A kin do, a kin da war mè? Ndo nhadka ma dè? I gaɗa kinè, nengaʼa a fena ndo nhadka ma. 27Aman nengaʼa ndo man ta windeda ɗèlèwèr Zhiklè: Na haha, i zlindè gol ga a ma ngaya, a ntil civèɗ a ma ngaya. 28I gaɗa kinè, te va ndohi man ngwozi ta yau, ndo man a fena Jean azɓai. Aman ndo man ta sla na ndo nkèshèa te kokwar Bi Zhiklè, mba nengaʼa a Jean. 29A ndohi tèlèba man ta tsenaʼa, a ndohi ncèkèlè skwai, ta gaɗa Zhiklè zuraʼa, a ta gau baptême Jean. 30A ndohi pharisie a ndohi njèngè ma kita ta kwola skwi man Zhiklè a woya a va ta ndohai, a ta ga baptême ɓai.
31Yèsu a goɗ zaʼa: I lèmdè ndohi a géɗ herkeda haha a mè? Ta lèmèlèmè ara mè? 32Ta lèmèlèmè ara wudahai, man ta mbèhwali a luma, a ta baha ta mandalahi tengaʼa, a ta gaɗa: Nga voɗ shingelèk, a kin gatsa ɓai. Nga tsu nguzlah, a kin ga wobau ɓai.
33Aman Jean a mshkè, a nʼnda movar ɓai, a nsa zom ɓai, a kin gaɗa: Madzagi a ga na. 34A kra-ndo a mshkè, a ndi skwai, a si skwai, a kin gaɗa: Na haha, ndo nʼndi skwi ham-hamaʼa, ndo zom, mandal ndohi ncèkèlè skwai, a ndohi malihai. 35Aman maya Zhiklè nʼngreda auda zuraʼa a sam wudahi na.
Yèsu te gi Simon, ndo pharisie
36Ndo pharisie ngiɗè a ndzhoɗo, aman a dè, a ndi skwi te gi nengaʼa. A Yèsu a ndo a gi ndo pharisie, aman a ndi skwai. 37Na haha, ngwoz ngiɗè a zhè te kokwar, fali ngwoz. Aman nengaʼa a ntsenaʼa, Yèsu a ndi skwi nʼndai te gi ndo pharisie, a ncko koloba ɓurdi. 38A nzlatsa na a deɓa, a sam sak na, a kuɗai, a hüno mpèn sak Yèsu a kuda, a ntokwolama na sak a gwots gèɗ nengaʼa, a nsemɗama na sak, a nfaɗa na ɓurdi a pa. 39Aman ndo pharisie a nrkaʼa, nengaʼa man a baha na Yèsu a gi na, a nhuro, a ngaɗa: Man agassa ndo haha ndo nhadka ma, ar a sun ngwoz man a lama na haha. Nengaʼa fali ngwoz. 40A Yèsu a mʼmbeɗa na a ma: Simon, i woya man i gaɗa ka ma ga kètè. A nengaʼa a ngaɗa na: Ndo njèngè ma, goɗ gene! 41Bab skwi ngiɗè a nʼngots ndohi godèrè cèw, staɗ godèrè nengaʼa Suli 5.000, ngiɗè 500. 42A ta ngatsa Suli ɓai, aman ta pil godèrè, a nengaʼa a njèka ta godèrè cèw ba. Te ndev ndohi haha, man a woya bab skwi holholaʼa wa? 43Simon a mʼmbeɗa na a ma: I huro, nengaʼa man a jèka na godèrè mbiaʼa. A Yèsu a ngaɗa na: Ka ɗölko zuraʼa. 44Te deɓaʼa a nʼngwoda na ma a ngwoz, a nʼngreda na Simon: Ka rka ngwoz haha dè? I shkè a gi ngaya, ka vay iyam man i pènè sak ga a vna ɓai, aman nengaʼa a panay sak ga a kuda nengaʼa, a ntokwolay sak a gwots gèɗ nengaʼa. 45Ka kelaway ri a daʼai ɓai, aman nengaʼa daga man i shkè a gi ngaya, ha antanta, a njèkeda ɓai, a nsemɗamay sak genè. 46Ka faɗay mbar a gèɗ ga ɓai, aman nengaʼa a faɗda ɓurdi a sak ga. 47Gar haha i gaɗa ka: Mali nengaʼa mbia sa, mpraʼa. Aman nengaʼa a woy iyè a ndav a vata. Aman a ndo man ta pra na kètè, nengaʼa a woya a ndav kètè. 48A Yèsu a ngaɗa na ngwoz: Malihi ngaya ta pra ma! 49A tengahi man ta nza a sam skwi nʼndi a vna, ta hüno, a ta gèɗè te ndav ta. Nengaʼa wa, man a prè malihi ba? 50A Yèsu a ngaɗa na ngwoz: Ncè-a-ndav ngaya a mʼmbel ka ma. Do ngaya a gumai!
Currently Selected:
Luc 7: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
