ከሳ 1

እስራኤልያ አሳይ ግብጼፐ ከሱሳ

(1:1—15:21)

ግብጼን አይለተ

(1:1-22)

1ያቆባና ግብጼ ቤዳ እስራኤልያ አቱማ ናና ሱንይ ሀዋፐ ካሊደ ጻፈቴዳ፤ ኡንቱንቱ ኡባይካ ባረንቱ ሶይ አሳ አኪደ ቤድኖ።#ዶመ 46:8-27 2ሄዋንቱካ: ሮቤላ፥ ስሞና፥ ሌዋ፥ ይሁዳ፥ 3ይሳኮራ፥ ዛብሎና፥ ቢንያማ፥ 4ዳና፥ ንፍታሌማ፥ ጋዳነ አሴራ። 5ያቆባ ዘረቱ ኡባይ ላፑን ታማ፤ ዮሴፎ ካሰካ ግብጼ ብ ኡቴዳ። 6ዮሴፎ፥ አ እሻቱነ ሄ የለታ ኡባይ ሀይቄዳ፤ 7ሽን እስራኤልያ ዘረይ አይፌድኖነ ሎይ ዳሬድኖ፤ ሄ ቢታ ኩማና ጋካናዉ ኡንቱንቱ ሎይ ጮራቴድኖ።#ኪታ 7:17

8ሄዋፐ ጉይያን፥ ዮሴፎ ኤረና ኦራ ካቲ ግብጼ ጋድያን ደንዴዳ።#ኪታ 7:18 9እ ባረ አሳ፥ “በእተ፤ ሀ እስራኤላቱ ኑፐ ሎይ ጮራቴድኖነ ዎልቃሜድኖ። 10ሃ ዪተ፥ አነ ኑን ኡንቱንታ ሂላን ኦይቆይተ፤ ሄዌ ዮፐ ኡንቱንቱ ካሰዋፐ ያ ዳራና። ኦን ኤር ኦላይ ደንዶፐ፥ ኡንቱንቱ ኑ ሞርከቱዋና ዳንደ፥ ኑና ኦላናነ ጋድያ የጊደ ከስ አኪደ ባናዋንታ” ያጌዳ።#ኪታ 7:19

11ሄዋ ድራዉ፥ ዴጾ ኪታን ኡንቱንታ ቱጋያና ማላ፥ ኡንቱንቱ ቦላ መቀ ባይና ካፖቱዋ ሱንድኖ። ኡንቱንቱ ካትያዉ ፒቶማነ ራምሳ ጌተትያ ሚሻ ምንጅያ ካታማቱዋ ኬጼድኖ። 12ሽን ግብጼቱ ኡንቱንታ ኡንኡዋ ዳርያ ዎደ፥ ኡንቱንቱ ጮራት የለቴድኖነ ቢታ ጋኬድኖ። ሄዋ ድራዉ፥ ግብጼቱ እስራኤላቶ ያዬድኖ፤ 13ቃረታይ ባይና ሀኖታን አይለተን ኪትሴድኖ። 14ቃረታይ ባይና ዎልቃማ ኪታን፥ ስምንቱዋንነ ጹብያ መዋን፥ ቃይ ሾይቃን ኦያ ኡባ ቆሞ ኪታን፥ ኡንቱንቱ ደኡዋ ጫምሴድኖ።

15ግብጼ ካቲ እብራዌ ማጫዋንታ ማርስያ ጽፓሮነ ፑሆ ጌተትያ ላኡ ማጫዋንታ ሀዋዳን ያጌዳ፤ 16“እብራዌ ማጫ አሳቱ የልያ ዎደ ህንተንቱ ማርሲደ፥ የልሶዌ አቱማ ናኣ ግዶፐ፥ ዎተ፤ ሽን ማጫ ናቶ ግዶፐ ዎፕተ” ያጌዳ። 17ሽን ማርስያዋንቱ ጾሳዉ ያዪደ፥ ግብጼ ካቲ ኡንቱንታ አዛዜዳዋዳን ኦበይክኖ። ኡንቱንቱ አቱማ ናና ሸምፑዋና አሼድኖ። 18ሄዋፐ ጉይያን ግብጼ ካቲ ሄ ማርስያዋንታ ጼሲደ፥ “ህንተንቱ አያዉ ሀዋዳን ኦቴ? አቱማ ናና አያዉ ሸምፑዋና አጊቴ?” ያጊደ ኡንቱንታ ኦቼዳ። 19ማርስያዋንቱ ዛሪደ፥ “እብራዌ ማጫ አሳቱ ግብጼ ማጫዋንቱ ማላ ግድክኖ፤ ኡንቱንቱ ምና ግድያ ድራዉ፥ ማርስያዋንቱ ጋካናፐ ካሰቲደ የል ድጊኖ” ያጌድኖ። 20ሄዋ ድራዉ፥ ጾሳይ ማርስያዋንቶ ኬኬዳ። አሳ ፓይዱካ ጉጅ ጉጅ ቢደ፥ ካሰዋፐ ያ ጮራቴዳ። 21ቃይ ማርስያዋንቱ ጾሳዉ ያዬዳ ድራዉ፥ ጾሳይ ኡንቱንቶ ሎኦባ ኦዳ። እቶ እቶካ ሶ አሳ እሜዳ።

22ሄዋፐ ጉይያን ካቲ ባረ አሳ ኡባ፥ “እብራዋቱዋፐ የለትያ አቱማ ናና ኡባ ናይለ ሻፋ ሃን ኦልተ፤ ሽን ማጫ ናናይ የለቶፐ፥ ሸምፑዋና አግ ባሽተ” ያጊደ አዛዜዳ።#ኪታ 7:19

Currently Selected:

ከሳ 1: DFBE

Highlight

Compare

Copy