ከሳ 14

ዞኦ አባ ፕኔድኖ

1-2ሄዋፐ ጉይያን ሙሳ መና ጎዳይ፤ “ኡንቱንቱ ጉየ ስሚደ ምግዶላፐነ አባፐ ግዱዋን፥ ፕሃህሮታ ማታን ኡታናዳን ኦዳ፤ ኡንቱንቱ አባ ላንቂያን ባኣል-ጻፎና ስን መላ ቢታን ኡትኖ ያጌዳ። 3ካቲ፥ ‘እስራኤላቱ መላ ቢታይ ጎርድና፥ ሀንያባ ዪደ ቢታን ጮ ቶይላካቲኖ’ ያጊደ ቆፓናዋ። 4ታን ካትያ ዎዛና ዶንጭልሳና፤ እ ኡንቱንታ የደርሳና፤ ታን ካትያንነ አ ኦላንቻቱዋ ኡባን ቦንቼታና፤ ግብጼቱካ ታን መና ጎዳ ግድያዋ ኤራና” ያጌዳ። እስራኤላቱ እ ኦዴዳዋዳን ኦድኖ።

እስራኤላቱዋ ካትያ ፓራይ ካሌዳ

5አሳይ ባቃት ድጌዳዋ ግብጼ ካትያዉ ኦድና፥ እነ አ ሱንቱ እስራኤላቶ ቆፔዳ ባረንቱ ቆፋ ላሚደ፥ “ኑን ሀዋ ዋቴቶ? ኑን እስራኤላቱዋ የዲደ፥ ኡንቱንቱ ኑዉ ኦያ ዎልቃፐ መላ አቴዶ” ያጌድኖ። 6ሄዋ ድራዉ፥ እ ባረ ፓራ ጋርያ ኮሪደ፥ ባረ ኦላንቻቱዋ ባረናና አኪደ ደንዴዳ። 7እ ኡሱፑን ጼቱ ዶረቴዳ ፓራ ጋረቱዋ፥ ግብጼ ጋድያን ደእያ ሀራ ጋረቱዋ ኡባና፥ ኡንቱንቱ ኡባዉ ካፑዋ ካፑዋ ሱንደ አኪደ ቤዳ። 8መና ጎዳይ ግብጼ ጋደ ካትያ፥ ዎዛና ልስና፥ ጾሳ ዎልቃን ከሳ ቦላ ደእያ እስራኤልያ አሳ የደርሴዳ። 9ሄዋፐ ጉይያን ግብጼ አሳቱ፥ ካትያ ፓራቱ ኡባይነ ፓራ ጋረቱ፥ ፓራ አሳቱነ ኦላንቻቱ እስራኤላቱዋ ካሊደ የደርሴድኖ። አባ ዶናን ባኣል-ጻፎና ስን ባዙዋን ደእያ ፕሃህሮታ ማታን ኡንቱንቱ ኡቴዳዋንታ ደሜድኖ።

10ካቲ ማት ድግና፥ እስራኤላቱ ቁ ግ ጼልያ ዎደ፥ ግብጼቱ ኡንቱንቱ ጌዱዋ ካሊደ ዬዳዋ በኤድኖ፤ ያቲደ ዳሮፐ ያዪደ፥ መና ጎዳኮ ዋሴድኖ። 11ኡንቱንቱ ሙሳ፥ “ኔን ኑና ግብጼን ዱፉ ይና መላ ቢታን ሀይቃናዳን ከሳዲየ? ኑና ግብጼፐ አያዉ አሃድ? 12ግብጼን ደኢደ ኑን፥ ‘ኑና አጋ ባሻ፤ ኑን ግብጼቶ ሞደታና’ ያጊደ ነዉ ኦድበይኮየ? መላ ቢታን ሀይቃናፐ ኡንቱንቶ ሞደትያዌ ኑዉ ሎአ ሽን” ያጌድኖ።

13ሽን ሙሴ አሳ፥ “ያዮፕተ፤ ምን ኤቂተ፤ መና ጎዳይ ሀቼ ህንተንታ አሽያ አሹዋ ህንተንቱ በአና። ሀቼ ህንተንቱ በእያ ግብጼቱዋ ላኤን ኡባካ በእክታ። 14ህንተንቱ ድራዉ መና ጎዳይ ኦለታናዋ፤ ህንተንቱፐ ኮየትያዌ ጮኡ ጉሳ ጻላላ” ያጌዳ።

15መና ጎዳይ ሙሳ፥ “ኔን ታኮ አያዉ ዋሳይ? እስራኤላቱ ስንዉ ሀመታና ማላ ኦዳ። 16ነ ጻምኣ ደንደ አባ ቦላ ምጫ፤ ሃይ ላኡ ከሲደ ሻከታናዋ፤ እስራኤላቱካ መላ ቢታና አባ ፕኒደ ባናዋንታ። 17ታን ግብጼቱዋ ዎዛና ዶንጭልስና፥ ኡንቱንቱ ህንተንቱ ጌዱዋ ካሊደ አባን ገላናዋንታ። ታን ካትያነ አ ኦላንቻቱዋ ኡባ ቦላን፥ አ ፓራ ጋረቱዋነ አ ፓራ አሳቱዋ ቦላን ቦንቹዋ ታዉ ደማና። 18ታን ካትያ ቦላን፥ አ ፓራ ጋረቱዋ ቦላንነ አ ፓራ አሳቱዋ ቦላን ታዉ ቦንቹዋ ደሜዳ ዎደ፥ ታን መና ጎዳ ግድያዋ ግብጼቱ ኤራናዋንታ” ያጌዳ።

19ሄዋፐ ጉይያን ጾሳ ኪታንቻይ፥ እስራኤልያ ኦላንቻቱዋፐ ስንና ሀመትያዌ፥ ጉየ አደ ኡንቱንቱፐ ጉየና ሀመቴዳ። ሻርያ ቱሳይካ ኡንቱንቱ ስንን ደእያ ሳኣፐ ጉየ ባጋ ዩዪደ፥ 20ግብጼቱዋ ኦላንቻቱዋፐነ እስራኤለቱዋ ኦላንቻቱዋፐ ግዱዋን ኤቄዳ። ሄ ሻሪ ቃማ ኡባን እት ባጋና ምሲደ፥ ህንኮ ባጋና ፖእሴዳ፤ ያትና ቃማ ኡባ እቱ እቱዋኮ ሺቅበይክኖ።

21ሄዋፐ ጉይያን ሙሴ አባ ቦላን ባረ ኩሽያ ምጬዳ፤ መና ጎዳይ ሄ ጋላስ ቃማ ኡባን አዋይ ዶልያ ባጋፐ ዎልቃማ ጫርኩዋ የዲደ፥ አባ ጉየ ዛሪደ መላ ቢታ ከሴዳ። ሃይ ሻከቴዳ። 22እስራኤለቱ አባ ግዱዋና መላ ቢታን ሀመቲደ፥ ሃይ ኡንቱንቶ ኡሸቻናነ ሀድርሳና ጎዳዳን ኤቂና ቤድኖ።#1 ቆሮ. 10:1-2፤ እብራ. 11:29 23ግብጼቱ ኡንቱንታ የደርሴድኖ፤ ካትያ ፓራ ኡባቱ፥ አ ፓራ ጋረቱነ አ ፓራ አሳቱ ኡንቱንታ ካሊደ፥ አባ ግዶ ገሌድኖ። 24ብሮ ዎንታ ባካሊ ዶላናፐ ካሰቲደ፥ መና ጎዳይ ታማነ ሻርያ ቱሳፐ ዱገ ዛሪደ፥ ግብጼቱዋ ኦላንቻቱዋ ጼሌዳ፤ ኡንቱንቱ ዎዛና ባይዜዳ። 25ላጋይ ኡንቱንታ ዋይሳና ማላ፥ መና ጎዳይ ኡንቱንቱ ፓራ ጋረቱዋ ጎማ ቃዋ ድግና ግብጼቱ፥ “መና ጎዳይ ኡንቱንታ ማዲደ ግብጻ ኦልያ ድራዉ፥ አነ ኑን እስራኤልያ አሳፐ ባቃቶይተ” ያጌድኖ።

26መና ጎዳይ ሙሳ፥ “ሃይ ግብጼቱዋ ቦላ፥ ኡንቱንቱ ፓራ ጋረቱዋ ቦላነ ኡንቱንቱ ፓራ አሳቱዋ ቦላ ጉየ ጎጋና ማላ፥ ነ ኩሽያ አባ ቦላን ምጫ” ያጌዳ። 27ሙሴ ባረ ኩሽያ አባ ቦላን ምጬዳ፤ ሳአይ ዎንትሽን፥ አባይ ባረ ካሰ ሳኣ ጉየ ስሜዳ፤ ግብጼቱ ያ አ ግዶ ባቃትሽን፥ መና ጎዳይ ግብጼቱዋ አባ ግዱዋን አ የጌዳ። 28ሃይ ጉየ ስሚደ፥ ፓራ ጋረቱዋ ፓራ አሳቱዋና እስራኤላቱዋ ካሊደ አባ ገሌዳ ካትያ ኦላንቻቱዋ ኡባ ምት ባሼዳ፤ ኡንቱንቱፐ እቱነ አትቤና። 29ሽን እስራኤለቱ አባ ግዱዋና መላ ቢታን ሀመቲደ፥ ሃይ ኡንቱንቶ ኡሸቻናነ ሀድርሳና ጎዳዳን ኤቂና ቤድኖ። 30መና ጎዳይ ሄ ጋላስ እስራኤልያ አሳ ግብጼቱዋ ኩሽያፐ ሀዋዳን አሼዳ። ቃይ እስራኤለቱ ግብጼቱ ሀይቂደ ግሴዳዋንታ አባ ዶናን በኤድኖ። 31እስራኤላቱካ መና ጎዳይ ግብጼቱዋ ቦላ በሴዳ ዎልቃማ ዎልቃ በኤዳ ዎደ፥ አሳይ መና ጎዳዉ ያዪደ አካ አ ቆማ ሙሳካ አማኔዳ።

Currently Selected:

ከሳ 14: DFBE

Highlight

Compare

Copy