ከሳ 21

አይለቱዋ ኦይቂያ ዎጋ

(ዶመ 15:12-18)

1“ኔን ኡንቱንቶ እማና ዎጋይ ሀዋ። 2ኔን እብራዌ አይልያ ሻሞፐ፥ እ ነዉ ኡሱፑን ላይ ኦ፤ ሽን ላፑን ላይን እ አይነ ቃንጸናን፥ አይለተፐ ጮ ከሲደ ቦ።#ዎጋ 25:39-46 3እ ባረካ ዬዳዋ ግዶፐ ባረካ ቦ፤ ባረ ማቻትና ዬዳዋ ግዶፐ፥ አ ማቻታካ አናና ቡ። 4አ ጎዳይ አዉ ማቻቶ እሜዳዋ ግዶፐነ ማቻታ አዉ አቱማ ናና ዎይ ማጫ ናና የሌዳዋ ግዶፐ፥ ሄ ማቻታነ እዝ ናናይ አ ጎዳዋ፤ እ ባረካ ከሲደ ቦ። 5ሽን ሄ አይሊ፥ ‘ታን ታ ጎዳ፥ ታ ማቻቶነ ታ ናና ሲቃይ፤ ታን አይለተፐ ከስከ ጎፐ፥’ 6አ ጎዳይ አ ፕርድያዋንቱ ስን አ፤ ሄዋፐ ጉይያን ፐንገ ዎይ ፐንገ ማቃንያኮ አ አፊደ፥ አ ሀይ ጎን ሉኮ። ስም እ ባረ ደኡዋ ላይ ኡባን አዉ አይልያ ግዳናዋ።

7“አሳይ ባረ ማጫ ናቶ አይለተዉ ዛልኦፐ፥ አቱማ አይለቱ አይለተፐ ከስያዋዳን እዛ ከሱፑ። 8እዛ ባረና ማቼተዉ ዶሪደ አፌዳ ጎዳዉ ሎአና ዮፐ፥ ጎዳይ እዞ ዎዝሳናዉ ኮሼ። እ እዝዉ አማነትቤና ድራዉ፥ እዞ አላጋዉ ዛልአናዉ አዉ ማታይ ባዋ። 9እ እዞ ባረ ናአዉ እማናዉ ዶሮፐ፥ ማጫ ናትዉ በስያዋ እዝዉ ኦ። 10እ ባረዉ ሀራ ማቻቶ አኮፐ፥ ኮይሮ ማቻትዉ ቁማ፥ ማዩዋ ዎይ አስናተነ ማቼተ ማታ ፓጭሶፖ። 11እ ሀ ሄዙባቱዋ እዝዉ እማና ዮፐ፥ አይነ ሻሉዋ ጭገናን አይለተፐ ከሳደ ቡ።

ኢታቱ ሙረትያ ዎጋ

12“አሳ ሾጪደ ዎያ አሳ ቱሙፐ ዎናዉ በሴ።#ዎጋ 24:17 13ሽን ኤሪደ ግደናን እ ዎያ ዎደ፥ ታን፥ ጾሳይ ጮኡ ጌዳዋ ግዶፐ፥ እ ባቃታና ሳኣ ኡንቱንቶ ታን ጊግሳና።#ፓይ. 35:10-34፤ ዛረ. 19:1-13፤ ኢያሳ 20:1-9 14ሽን ኦነ ቆፒደ ኤሪደ ሀራ ብታንያ ዎፐ፥ ሄ ኡራ ታ ያርሹዋ ሳኣፐ ድጋደ፥ ሀራ ሳኣን ዎ።

15“ባረ አባ ዎይ ባረ ዳዮ ደችያ ኡራይ ኦንነ ቱሙፐ ሀይቆ።

16“አሳ ዎልቃን ኦይቂደ ዛልእያ ኡራይ ዎይ ዎልቃን ኦይቄዳ አሳይ አ ኩሽያን ቤቴዳ አሳይ ቱሙፐ ሀይቃናዉ በሴ።#ዛረ. 24:7

17“ባረ አባ ዎይ ባረ ዳዮ ሸቂያዌ ቱሙፐ ሀይቆ።#ዎጋ 20:9፤ ማቶሳ 15:4፤ ማር. 7:10

18-19“ላኡ አሳቱ ዋላቀቶፐ፥ እቱ የንኩዋ ሹቻን ጫዶፐ ዎይ ቦክሶፐ፥ ሄ ደሸቴዳዌ ሀይቀናን አቶዋ ግዶፐነ ሀርጊደ ግሱዋን ጋምኦፐ፥ ደንዲደ ጉፍያና ካረ ሄራን ሀመቶፐ፥ ሄ ደቼዳዌ ሀይቁዋፐ አቴ፤ ግዶፐነ እ አ ኪታ ድጌዳ ድራዉ፥ ሻሉዋ ጭጋናዉነ አ ፓናዉ ማዳና ኮሼ።

20“አሳይ ባረ አቱማ አይልያ ዎይ ማጫ አይላቶ ጻምአን ሾጮፐነ ሄዋ ጋሱዋን ሄ ኡራይ ሄ ጎዳ ኩሽያን ሀይቂንቶ፥ ሾጬዳዌ ቱሙፐ ሙረታናዉ በሴ። 21ሽን ሄ ደሸቴዳዌ እት ዎይ ላኡ ጋላሳን ደንዶፐ፥ ሄ አይሊ አ ሚሻ ግድያ ድራዉ፥ እ ሙረተና።

22“ላኡ አሳቱ እቱ እቱዋና ዋቲደ ሻሃራ ምሽራቶ ደቾፐነ እዛ ቦሸቶፐ፥ ሄዋፐ ሀራ ኢታ ደሸይ ዮፐ፥ ሄ ምሽራት አስናይ ኦቼዳዋነ ዳናቱ ፕርዴዳዋ አያነ ጭጎ። 23ሽን እዝዉ ደሸይ ዳሮፐ፥ ሸምፑ ሀይቂንቶ ሸምፑዋ፥ 24አይፍያ ድራዉ አይፍያ፥ አቻ ድራዉ አቻ፥ ኩሽያ ድራዉ ኩሽያ፥ ገድያ ድራዉ ገድያ፥ 25ጹገ ድራዉ ጹገ፥ ማዱ ድራዉ ማዱ፥ ቆኤዳ ድራዉ ቆኡዋ አካናዉ ኮሼ።#ዎጋ 24:19-20፤ ዛረ. 19:21፤ ማቶሳ 5:38

26“እት አሳይ ባረ አቱማ አይልያዉ ዎይ ማጫ አይላትዉ አይፍያ ባቂደ ቶይሶፐ፥ ሄ አይፍያ ድራዉ አይለተፐ ከስ የዶ። 27ሄዋዳንካ፥ ባረ አይልያ አቻ ዎይ ባረ አይላት አቻ መንፐ፥ ሄ አቻ ድራዉ አይለተፐ ከስ የዶ።

መህያ ጎዳቱ ፖልያባቱዋ

28“ቦራይ ማጫ አሳ ዎይ አቱማ አሳ ቃይጪደ ዎፐ፥ ሄ ቦራይ ሹቻን ጫደቲደ ሀይቆ፤ አ አሹ ሜተቶፖ። ሽን ቦራ ጎዳይ ሙረቶፖ። 29ሽን ቦራይ ካሰካ ቃይጭያ ሜዚ ደእያዋ ግዲና፥ አሳይ አ ጎዳዉ ኦድ ዎና፥ አ ጎዳይ ቃቼናን እጽና፥ ቦራይ አቱማ አሳ ዎይ ማጫ አሳ ዎፐ፥ ሄ ቦራይ ሹቻን ጫደቲደ ሀይቆ፤ ቃይ አ ጎዳይካ ሀይቆ። 30ሽን እ ባረና ዎዛናዳን ኦሸቶፐ፥ ኡንቱንቱ ኦቼዳዋ አያነ ጭጊደ፥ ባረ ሸምፑዋ ዎዞ። 31ቦራይ አቱማ ናኣ ዎይ ማጫ ናቶ ቃይጪደ ዎፐካ፥ ፕርዳይ እት ማላ ግዶ። 32ቦራይ አቱማ አይልያ ዎይ ማጫ አይላቶ ቃይጪደ ዎፐ፥ ቦራ ጎዳይ አይልያ ጎዳዉ ሀታሙ ብራ ሳንትምያ ጭጎ። ቦራይ ሹቻን ጫደቲደ ሀይቆ።

33“እት አሳይ ኦላ ቁምእያ ፖኪደ፥ ዎይ ኦላ ቦኪደ ቁምኤናን አጎፐ፥ ቦራይ ዎይ ሀሪ ሄ ኦላን ኩንዶፐ፥ 34ሄ ኦላ ጎዳይ መህያ ጋትያ ጭጎ። እ አ ጎዳዉ ጋትያ ጭጊደ፥ ሀይቄዳ መህያ ባረዉ አኮ።

35“እት አሳ ቦራይ ሀራ ቦራ ቃይጪደ ዎፐ፥ ፓጻ ቦራ ዛልኢደ፥ አ ጋትያነ ሀይቄዳ ቦራ ልክያን ሻክ አክኖ። 36ሽን ሄ ቦራይ ቃይጭያዋ ግድያዌ ካሰት ኤረትሽን፥ አ ጎዳይ አ ቃቼናን አጌዳዋ ግዶፐ፥ አ ጎዳይ ቦራ ጭጎ። ያቲደ ሄ ሀይቄዳዋ ባረዉ አኮ።

Currently Selected:

ከሳ 21: DFBE

Highlight

Copy

Compare