ከሳ 30

እጻና ጩዋይያ ሚሻ

(37:25-28)

1“እጻና ጩዋይያ ሚሻ ኦዶሮቱዋፐ መ፤ 2አዉ ኦይዱ ጋጻይ ደኦ፤ አዱሳተይ እት ዋ፥ ጎምፓይ እት ዋ፥ ጌሳይ ላኡ ዋ ግዶ፤ ካጨቱካ አናና እቱዋ ግዲደ ኦይቀት መትኖ። 3አዉ ቦላ ዶና፥ ኦይዱ ባጋ ኡባነ አ ካጨቱዋ ዋላካይ ባይና ዎርቃን ሼሻ፤ አ ዩሹዋንካ ዎርቃ ትገ ዩሻ አ። 4ሄ ዎርቃ ትገፐ ጋርሳና እጻና ጩዋይያ ሳጽንያዉ ዎርቃፐ ላኡ ሳጋየቱዋ መ፤ ያታደ ያ ባጋናነ ሀ ባጋና ላኡዋ ላኡዋ ኦይ። ሄዋንታ ቶክያ ዎደ ካሱዋ አናዉ ማዳናሳ። 5ካሶቱዋ ኦዶሮቱዋፐ ከሳደ፥ ኡንቱንታ ዎርቃን ሼሻ። 6ሀ ያርሽያ ሚሻ ቃላ ጫቁዋ ታቦታ ስንን ካቀቴዳ ጋርዱዋፐ ካረ ባጋና፥ ሄዋካ ታን ኔናና ጋከትያ ቃላ ጫቁዋ ታቦታ ቦላ ደእያ አቶ ግያ ሳኣ ቁምእያ ስንን ዎ።

7“አሮነ ዎንታ ዎንታ ጾምፐቱዋ ጊግሳናዉ ይያ ዎደ፥ ሳዊያ እጻና ያርሽያ ሳኣን ጩዋዮ። 8አሮነ ኦማርስ ጾምፐቱዋ ፖእስያ ዎደ፥ ዛረደካ እጻና ጩዋዮ፤ ያቶፐ፥ እጻናይ መና ጎዳ ስንን ይያ የለታዉ ኡባደ ጩዋታና። 9ሀ እጻና ጩውስያ ሚሻን ሀራ አይ እጻናነ፥ ዎይ ጹግያ ያርሹዋ፥ ዎይ ካ ያርሹዋ ያርሾፓ፤ ኡሻ ያርሹዋካ አ ቦላ ትጎፖ። 10አሮነ ላይፐ እት ገደ ናጋራፐ ማረታናዉ ሹክያ መህያ ሱ አኪደ፥ ሄ ያርሽያ ሳኣ ቦላ ደእያ ካጨቱዋ ቦላ ዎ። ያቲደ ጌሽያ ዎጋ ፖሎ። ሀ ዎጋይ ስንና ያና ዎደቱዋ ኡባን ላይን ላይን ፖለቶ። ሀ እጻናይ ጩውያ ሚሻይ መና ጎዳዉ ዱማት ሎይ ጌዬዳዋ ግዶ” ያጌዳ።

ዱንካንያዉ ሺቅያ ሚሻ

11ሄዋፐ ጉይያን መና ጎዳይ ሙሳ ሀዋዳን ያጌዳ፤ 12“ኔን እስራኤልያ አሳ ፓይዱዋን አካናዉ ኡንቱንታ ፓይድያ ዎደ፥ እት እት ኡራይ ፓይደቲደ፥ ባረ ሸምፑዋ ዎዛናዉ መና ጎዳዉ ሻሉዋ ጭጎ። ኔን ኡንቱንታ ፓይድያ ዎደ፥ ኡንቱንቱ ቦላ ቦሻይ ዬና። 13ፓይዱዋን ገልያ አሳይ ሁጲያን ሁጲያን ዱንካንያን ኤረትያ ሚዛና ልክያን ብራ ጭጎ። እት እት ኡራይ ሀዋ መና ጎዳዉ እሞታ ኦደ እሞ።#ከሳ 38:25-26፤ ማቶሳ 17:24 14ፓይዱዋን ገልያ አሳይ ላይይ ላታሙ ኩሜዳዌነ ሄዋፐ ቦላ ኡባይ፥ መና ጎዳዉ እምያዋ አሆ። 15ህንተንቱ ህንተንቱ ናጋራፐ ማረታናዉ መና ጎዳዉ እሙዋ እምሽን፥ ዱሪካ ማንቁካ እት ልክያ እማናፐ አትና፥ ዱሪ ዳርሲደ ዎይ ማንቁ ላፈደ እሞፖ። 16ናጋራፐ ማረታናዉ ጭግያ ሻሉዋ እስራኤልያ አሳፐ አካደ፥ መና ጎዳ ዱንካንያ ግዶ ኦሶ ፔሻ። ሀ ሻሉ ህንተንቱ ናጋራፐ ማረታናዉ፥ መና ጎዳ ስንን እስራኤልያ አሳዋ ሀሳይያዋ ግዳናዋ” ያጌዳ።

ሜቻ ከርያ

17ሄዋፐ ጉይያን መና ጎዳይ ሙሳ ሀዋዳን ያጌዳ፤ 18“ሜቻ ከርያነ አ ዎያዋ ናሃስያፐ መደ ጾሳ ዱንካንያፐነ ያርሽያ ሳኣፐ ግዱዋን ዎ፤ አን ሃ ትጋ።#ከሳ 38:8 19አሮነነ አ ናናይ ባረንቱ ኩሽያነ ባረንቱ ገድያ ሜጨታና። 20ኡንቱንቱ ሀይቀና ማላ፥ ጾሳ ዱንካንያ ገልያ ዎደ፥ አዉደነ ሄ ሃን ሜጨትኖ። ቃይ መና ጎዳዉ ታማን ያርሹዋ ያርሻናዉ ያርሽያ ሳኣ ማታ ሺቄዳ ዎደ፥ 21ኡንቱንቱ ሀይቀና ማላ፥ ባረንቱ ኩሽያነ ባረንቱ ገድያ ሜጨትኖ። ሀዌ አሮናዉነ አ ዛረቶ፥ ይያ የለታ ኡባዉ መናዉ ዎጋ ግዳናዋ” ያጌዳ።

ኦከትያ ዛይትያ

22መና ጎዳይ ሙሳ ሀዋዳን ያጌዳ፤#ከሳ 37:29 23“ሙሩታ ቅማመቱዋ፥ ሄዋንቱካ፥ ኡሱፑን ኪሎ ግራመ ጉክያ ካርቢያ፥ ሄዙ ኪሎ ግራመ ሳዊያ ቃራፋ፥ ሄዙ ኪሎ ግራመ ሳዊያ ጉንጨቻነ 24ኡሱፑን ኪሎ ግራመ ዝምባኑዋ አካ። ሀ ኡባይካ ዱንካንያን ኤረትያ ሚዛና ልክያን ግዶ። ሄዋ ቦላካ ኦይዱ ሊትሮ ዎጋራ ዛይትያ ጉጃ። 25ሀዋንታ ሽቱዋ ኦያ ኤራን ዋላካደ፥ ሳዊያ ጌሻ ኦክያ ዛይተ ከሳ። 26ያታደ ጾሳ ዱንካንያ፥ ቃላ ጫቁዋ ታቦታ፥ 27ጻርጴዛነ አ ቦላ ዎያ ሚሻ ኡባ፥ ጾምፕያ ዎያ ባላነ አ ሚሻቱዋ፥ እጻና ጩዋይያ ሚሻ፥ 28ጹግያ ያርሹዋ ያርሽያ ሳኣነ አን ደእያ ኡባ ሚሻቱዋ፥ ሜቻ ከርያነ አ ዎያዋ ኦካ። 29ኡንቱንቱ ሎይ ጌሻ ግዳና ማላ፥ ኔን ኡንቱንታ ዱማያ፤ ኡንቱንታ ቦችያዌ ኡባይካ ጌሻ ግዳናዋ።

30“ሄዋፐ ጉይያን አሮነነ አ ናናይ ቄሳቱዋ ግዲደ ታዉ ኦና ማላ፥ ኡንቱንታ ኦካደ ዱማያ፤ 31እስራኤልያ አሳዉ ሀዋዳን ያጋደ ኦዳ፤ ‘ሀዌ ይያ የለታዉካ ኦከትያ ታ ጌሻ ዛይተ ግዶ፤ 32ሀ ዛይትያ አሳ ቦላን ጉሶፓ፤ ቃይ አይ ዛይቲካ ሄዋ ኦዳ ልክያን ኦፓ። እ ጌሻ ግዴዳ ድራዉ፥ ህንተንቱካ አ ጌሻባዳን ቆፕተ። 33ሀዋ ማላ ሽቱዋ ጊግስያ ኡራይነ ቄሳቱዋ ግደና ሀራ አሳ ኦክያ ኡራይ ኦንነ ባረ አሳ ግዶፐ ቦሄቶ’ ያጋ” ያጌዳ።

እጻናባ

34ሄዋፐ ጉየ መና ጎዳይ ሙሳ ሀዋዳን ያጌዳ፤ “ሳዊያ ቅማመቱዋ: ም ጮሻ፥ ያ ጎለን ደእያ ሽቱዋ፥ ሳዊያ ሽድያነ ሳዊያ ጌሻ እጻና አካ፤ ኡንቱንቱ ኡባ ዴጹካ እት ልከ ግዶ። 35ሽቱዋዳን ዋላከቴዳ እጻና ኦደ፥ ኡንቱንቱን ጎኤታ፤ ዋላካይ ባይናዋነ ጌሻ ግዳናዳን፥ አን ማጽንያ የጋ። 36አፐ አማሬዳዋ አካደ ሊቅሳደ ጫዳ፤ ያታደ ታን ኔናና ጋከትያ ጾሳ ዱንካንያ ግዶን ቃላ ጫቁዋ ታቦታ ስንን ዎ። እ ነዉ ሎይ ጌሻ ግዳናዋ። 37ሀዋ መዳዋ ልክያን ሀራ እጻና መፕተ። ሄዌ መና ጎዳዉ ዱማ ጌሻ ግድያዋ ኤርተ። 38ሀዋ ማላትያዋ መደ፥ አ ሳዉዋ ስንጊደ ናሸታናዉ ኮይያ ኡራይ ደኦፐ፥ እ ባረ አሳ ግዶፐ ቦሄቶ” ያጌዳ።

Currently Selected:

ከሳ 30: DFBE

Highlight

Copy

Compare