ከሳ 33

1ሄዋፐ ጉይያን መና ጎዳይ ሙሳ ሀዋዳን ያጌዳ፤ “ኔንነ ኔን ግብጼፐ ከሴዳ አሳይ ሀ ሳኣፐ ደንድተ፤ ‘ታን ህንተንቱ ያራቶ እማና’ ያጋደ ዎዳ ጋድያ ቢተ። ሄ ጋዲ ታን አብራሃመዉ፥ ይሳቃዉነ ያቆባዉ እማና ያጋደ ጫቃ ዎዳ ጋድያ።#ዶመ 12:7፤ 26:3፤ 28:13 2ታን ህንተንቱ ስንን ኪታንቻ ኪታደ፥ ካናነቱዋ፥ አሞረቱዋ፥ ሂተቱዋ፥ ፓርዘቱዋ፥ ሂዌቱዋነ ያቡሳቱዋ የደርሳና። 3ማይነ ኤሳይ ጎግያ ሄ ጋድያ ቢተ። ሽን ህንተንቱ ሞርጊ ሌፋቶ አሳ ግዴዳ ድራዉ፥ ታን ህንተንታ ኦግያን ይሳናዉ፥ ህንተናና ቢከ” ያጌዳ።

4አሳይ ሄ ያሽያ ኦዱዋ ስሲደ ሎይ ዬኬዳ። ሄ ዎድያፐ ዶሚደ ኡባይካ ባረ አሌቁዋ አያዋ አግ ባሼዳ። 5አያዉ ጎፐ፥ መና ጎዳይ ሙሳ ሀዋዳን ያግ ዎዳ፤ “እስራኤልያ ሀዋዳን ያጋ፤ ‘ህንተ ሞርጊ ሌፋቶ አሳ። ታን ህንተናና ሀራይ አቶ ጉ ዎድያ ብንቶካ፥ ታን ህንተንታ ይሳና። ሀእ ስም ህንተንቱ አሌቁዋ ከስ ድግተ፤ ያቶፐ ታን ህንተንታ ኦናባ ቃቻና’ ያጋ” ያጌዳ። 6እስራኤላቱ ሲና ደርያፐ ዶሚደ ባረንቱ አሌቆቱዋ ከስ ዎድኖ።

ጋከትያ ዱንካንያ

7ሙሴ ዱንካንያ አክ አፊደ፥ አሳይ ዱንካኖ ሳኣፐ ካረና ሃሲደ ጌዳ። ሄ ዱንካኒ፥ “ጋከትያ ዱንካንያ” ጌተቲደ ጼሰቴዳ። መና ጎዳ ኦቻናዉ ኮይያ ኡባይ ዱንካኖ ሳኣፐ ካረና ደእያ ጋከትያ ዱንካንያ ቤ። 8ሙሴ ሄ ዱንካንያ ቤዳ ዎደ፥ አዉደነ አሳይ ኡባይ ደንዲደ፥ ባረ ዱንካንያ ፐንግያን ፐንግያን ኤቄ፤ ሙሴ ሄ ዱንካንያ ገላና ጋካናዉ አ ጼሌ። 9ሙሴ ጋከትያ ዱንካንያ ግዶ ገሌዳ ዎደ፥ ሻርያ ቱሳይ ዱገ ዎ፤ መና ጎዳይ ሙሴና ሻርያፐ ሃሳይሽን፥ ሄ ዱንካንያ ፐንግያን ጋምኤ። 10ሻርያ ቱሳ ሄ ዱንካንያ ገልያ ፐንግያን በኤዳ ዎደ ኡባን፥ አሳይ ኡባይ ባረ ዱንካንያ ፐንግያን ፐንግያን ጾሳዉ ጎይኔ። 11አሳይ ባረ ላግያና ሃሳይያዋዳን መና ጎዳይ ሙሴና ስንን ኤቂደ፥ ሃሳዬ። ሄዋፐ ጉይያን ሙሴ አሳይ ዱንካኔዳ ሳኣ ጉየ ስሜ፤ ሽን አ ማድያ ያላጋይ፥ ነዊ ናኣ ኢያሱ፥ ጋከትያ ዱንካንያፐ ሻከተና።

ሙሳነ መና ጎዳ ቦንቹዋ

12ሙሴ መና ጎዳ ሀዋዳን ያጌዳ፤ “ኔን ታና፥ ‘ሀ አሳ ካለ’ ያጋዳ፤ ሽን ታናና ኔን ኦና ኪታንንቶ፥ ታና ኤርሳበይካ። ኔን፥ ‘ታን ኔና ሱንን ኤራይ፤ ቃይካ ኔን ታናን ናሸታዳ’ ያጋዳ። 13ኔን ታና ናሼዳዋ ግዶፐ፥ ታን ኔና ኤራና ማላነ ስንዉካ ኔና ናሸቻደ ደአና ማላ፥ ነ ኦግያ ታና በሳ። ሀ አሳይ ነ አሳ ግድያዋ ሀሳያ” ያጌዳ።

14መና ጎዳይ ዛሪደ፥ “ታን ኔናና ባና፤ ታን ኔና ሸምፕሳና” ያጌዳ።

15ያትና ሙሴ አ፥ “ኔን ኑናና ቤናዋ ግዶፐ፥ ሀዋፐ ኑና የዶፓ። 16ኔን ኑናና ቤናን ዮፐ፥ ታናንነ ነ አሳን ኔን ናሸቴዳዋ አሳይ ኡባይ ዎት ኤራናዌ? ቢታ ኡባን ደእያ ሀራ አሳ ኡባፐ ታናነ ነ አሳ ዱማይያዌ ሀራባይ አዬ?” ያጌዳ።

17መና ጎዳይ ሙሳ፥ “ታን ኔናን ናሸቴዳ ድራዉነ ኔና ነ ሱንን ኤርያ ድራዉ፥ ኔን ታና ኦቼዳ ሀ የዉዋ ታን ኦና” ያጌዳ።

18ያትና ሙሴ፥ “ነ ቦንቹዋ ታና በሳርኪ?” ያጌዳ።

19መና ጎዳይ፥ “ታን ታ ሎኦተ ኡባ ነ ስንና አና፤ ታ ጌሻ ሱንካ ነ ስንን አዋያና። ታን መና ጎዳ፤ ታን ሎአናዉ ኮይያዋንቶ ሎአና፤ ቃይ ቃረታናዉ ኮይያዋንቶካ ቃረታና።#ሮመ 9:15 20ሽን ኔን ታ ዴሙዋ በአካ፤ አያዉ ጎፐ፥ ኦንነ ታና በኢደ ሸምፑዋና ደኤና” ያጌዳ።

21ሄዋፐ ጉይያን መና ጎዳይ፥ “ኔን ዛላ ቦላ ኤቃናዉ ሀዋን ታ ማታን ሳአይ ደኤ። 22ታ ቦንቹ አያ ዎደ፥ ታን ኔና ጳልቀቴዳ ዛላ ግዶን ዎና፤ ታን አና ጋካናዉ፥ ታ ኩሽያን ኔና ካማና። 23ሄዋፐ ጉይያን ታን ታ ኩሽያ ድግና፥ ኔን ታ ዞኪያ በአናሳ፤ ሽን ታ ሶምእ በኤተና” ያጌዳ።

Currently Selected:

ከሳ 33: DFBE

Highlight

Copy

Compare