ከሳ 5

ሙሴነ አሮነ ፓሮና ስንን

(5:1—11:10)

1ሄዋፐ ጉይያን ሙሴነ አሮነ ግብጼ ካትያኮ ዪደ አ፥ “መና ጎዳይ፥ እስራኤልያ ጾሳይ ሀዋዳን ያጌ፤ ‘ታ አሳይ ታዉ መላ ቢታን ባላ ቦንቻና ማላ፥ ኡንቱንታ የዳ’ ያጌ” ያጌድኖ። 2ካቲ፥ “ታን አዉ አዛዘታደ እስራኤልያ የዳናዉ ሄ መና ጎዳይ ኦኔ? ታን መና ጎዳ ኤርከ፤ እስራኤልያካ የድከ” ያጌዳ። 3ሄዋፐ ጉይያን ኡንቱንቱ፥ “እብራዌቱዋ ጾሳይ ኑናና ጋከቴዳ። ሀእ ኑን መና ጎዳ፥ ኑ ጾሳዉ፥ ያርሹዋ ያርሻናዉ ሄዙ ጋላሳ ኦግያ መላ ቢታ ግዶ ባናዉ ኑና የዳርኪ፤ ሄዌ ዮፐ፥ እ ኑና ኢታ ሀርግያን ዎይ ኦላን ዎናዋ” ያጌድኖ።

4ሽን ግብጼ ካቲ ያጌዳ፤ “ሙሴ! አሮና! አሳ አያዉ ኪታ ድጊቴ? ህንተንቱ ኪታዉ ስሚደ ቢተ” ያጌዳ። 5ካቲ ሄ ዎደ፥ “በእተ፥ ሀ ጋድያን አሳይ ጮራቴዳ፤ ቃይ ህንተንቱ ኡንቱንታ ኪታ ድጊታ” ያጌዳ። 6ካቲ ሄ ጋላስ ግብጼቱዋ ካፖቱዋነ እስራኤለቱዋ ዳጉዋ ሱንቱዋ አዛዚደ፥ 7“ሀሮደዋዳን ጹብያ መያ ኡቱላ አሳዉ እሞፕተ፤ ኡንቱንቱ ኡቱላ ባረንቶ ቢደ ሺሽኖ፤ 8ሽን ኡንቱንቱ ፓይዱዋን ካሰዋ ኬሻ ጹብያ መደ፥ ሼናዳን አዛዝተ፤ ሄ ፓይዱዋፐ ፓጭሶፕተ፤ አያዉ ጎፐ፥ ኡንቱንቱ አዛላ፤ ኡንቱንቱ፥ ‘ኑን ኑ ጾሳዉ ያርሹዋ ያርሻና ማላ፥ ኑና የዳርኪ’ ያጊደ ዋስያዌ ሀዋሳ። 9ኡንቱንቱ ኪታን ሼካና ማላነ ዎርዱዋ ሃሳያ ስሰናን አጋና ማላ፥ ኡንቱንቶ ኦሱዋ ዴጽስተ” ያጊደ አዛዜዳ።

10ሄዋፐ ጉይያን፥ ሄ ካፖቱነ ሄ ሱንቱ ከሲደ አሳ፥ “ካቲ ሀዋዳን ያጌ፤ ‘ስም ታን ህንተንቶ ኡባካ ኡቱላ እምከ፤ 11ህንተንቱ ኡቱላ ደማና ዳንዳይያሳፐ ህንተንቱ ሁጲያዉ ሺሽተ፤ ሽን ህንተንቱ ሼያ ጹብያ ፓይዱ ኡባካ ፓጨና’ ያጌዳ” ያጌድኖ። 12አሳይ ኡቱላዉ ሀንያዋ ሺሻናዉ ግብጼ ቢታ ኡባን ላለቴዳ። 13ግብጼቱዋ ካፖቱ ኡንቱንታ፥ “ህንተንቶ ኡቱላ እምያ ዎደ ህንተንቱ ሀቼ ሀቼ ኦያዋ ኬሻ ኦተ” ያጊደ ኡንቱንታ ጎደቴድኖ። 14ግብጼቱዋ ካፖቱ እስራኤለቱዋ ዳጉዋ ሱንቱዋ ዋደ፥ “ህንተንቱ ካሰ ኦያዋ ኬሻ ጹብያ ዝኖ ዎይ ሀቼ አያዉ ኦ ዉርስበይክቴ?” ያጊደ ኦቼድኖ።

15ሄዋፐ ጉይያን እስራኤልያ ሱንቱ ቢደ ካትያዉ ማጋኔድኖ፤ ኡንቱንቱ ባረንቱ መቱዋፐ ደንዶዋን አ፥ “ኔን ነ ቆማቱዋ ሀዋዳን አያዉ ኦይ? 16ነ ቆማቶ ኡቱላ እምክኖ፤ ሽን፥ ‘ጹብያ መተ’ ያጊኖ፤ ኑና ነ ቆማቱዋ ዋኖ፤ ሽን ባላይ ነ አሳ ቦላና” ያጌድኖ። 17ሽን ካቲ ኡንቱንታ፥ “ሀ አዛላቱ! ህንተንቱ አዛላ! ሄዋ ድራዉ፥ ህንተንቱ ዛር ዛሪደ፥ ‘ኑን መና ጎዳዉ ያርሻና ባናዉ ኑና የዳርኪ’ ያጊታ። 18ሀእ ቢተ፤ ኦተ፤ ኡንቱንቱ ህንተንቶ አይ ኡቱላካ እምክኖ፤ ሽን ህንተንቱ ካሰዋ ኬሻ ጹብያ መታ” ያጌዳ። 19እስራኤላቱዋ ሱንቱ፥ “ህንተንቱ ሀቼ ሀቼ መያ ጹብያ ፓይዱዋ ካሰዋፐ ፓጭሶፕተ” ጌዳ ዎደ፥ ኡንቱንቱ መቱዋን ገሌዳዋ አኬኬድኖ። 20ኡንቱንቱ ካትያ ማታፐ ከሲደ፥ ሙሴነ አሮነ ኡንቱንቱና ጋከታናዉ ናግያዋንታ ደሜድኖ። 21ኡንቱንቱ፥ “ህንተና መና ጎዳይ ጼሎ! ህንተንቱ ቦላ እ ፕርዶ! ህንተንቱ ኑና ካትያናነ አ ኦሳንቻቱዋን እጽሴድታ፤ ቃይ ኡንቱንቱ ኑና ዎና ማላ፥ ማሻ ኡንቱንቱ ኩሽያን ዎድታ” ያጌድኖ።

ሙሴ ጾሳዉ ማጋኔዳ

22ሙሴ መና ጎዳኮ ስሚደ፥ “አቤት ጎዳዉ፥ ኔን ሀ አሳ ቦላ መቱዋ አያዉ አሃዲ? ኔን ታና ኪቴዳዌ ሀዋሴ? 23ታን ነ ሱንን ካትያዉ ሃሳያናዉ ቤዳ ዎደፐ ዶምና፥ እ ሀ አሳ ቦላ መቱዋ አሄዳ። ቃይ ኔንካ ነ አሳ ሙለ አሻባካ” ያጌዳ።

Currently Selected:

ከሳ 5: DFBE

Highlight

Compare

Copy