ከሳ 7
7
1ሄዋፐ ጉይያን መና ጎዳይ ሙሳ፥ “በአ፤ ታን ኔና ግብጼ ካትያዉ ጾሳ ማላ ኦድ፤ ነ እሻይ አሮነ ነ ናብያዳን ግዳናዋ፤ 2ታን ኔና አዛዜዳ ኡባ ኔን አዉ ኦዳሳ፤ ነ እሻ አሮነ እስራኤላቱዋ ባረ ጋድያፐ ከስ የዳና ማላ፥ ካትያዉ ኦዴ። 3ሽን ታን ካትያ ዎዛና ልሳና፤ ታን ግብጼ ጋድያን ታ ጮራ ማላታነ ማላልስያባ ዳርሳደ ኦንቶካ፥#ኪታ 7:36 4እ ህንተንቱ ኦድያዋ ስሰና። ሄ ዎደ ታን ታ ኩሽያ ግብጼቱዋ ቦላ ደንና፤ ታን ታ ጩጉዋ፥ ታ አሳ እስራኤልያ፥ ግብጼ አሳ ቦላን ዎልቃማ ፕርዳ አሃደ ከሳና። 5ሄዋፐ ጉይያን ግብጼቱ፥ ታን ታ ኩሽያ ግብጼ ቦላ ደንደ፥ እስራኤላቱዋ ኡንቱንቱ ግዶፐ ከሴዳ ዎደ፥ ታን መና ጎዳ ግድያዋ ኡንቱንቱ ኤራናዋንታ” ያጌዳ።
6ሙሴነ አሮነ ልከ መና ጎዳይ ኡንቱንታ አዛዜዳዋዳን ኦድኖ። 7ኡንቱንቱ ካትያዉ ኦድያ ዎደ፥ ሙሴ ሆስፑን ታሙ ላይ አሳ፤ አሮነ ቃይ ሆስፑን ታማነ ሄዙ ላይ አሳ።
አሮና ጻምአይ ሾሻ ግዴዳ
8መና ጎዳይ ሙሳነ አሮና ሀዋዳን ያጌዳ፤ 9“ካቲ ህንተንታ፥ ‘ጾሳይ ኦያ ማላታ ታና በስተ’ ግያ ዎደ፥ ኔን አሮና፥ ‘ነ ጻምኣ አካደ፥ ካትያ ስንን ኦላ’ ያጋ፤ ያቶፐ እ ሾሻ ከሳና” ያጌዳ። 10ሙሴነ አሮነ ካትያኮ ገሊደ መና ጎዳይ ኡንቱንታ አዛዜዳዋዳን ኦድኖ፤ አሮነ ባረ ጻምኣ ካትያ ስንንነ አ ኦሳንቻቱዋ ስንን ኦልና ሾሻ ከሴዳ። 11ሄዋፐ ጉይያን ካቲ ኤራንቻቱዋነ ብትያዋንታ ጼስስና ኡንቱንቱካ፥ ሀ ግብጼቱዋ ሻሬቾቱ ባረንቱ ማሹዋን ሄዋዳን ኦድኖ። 12ኡንቱንቱ ኡባይካ ባረንቱ ጻምኣ ጻምኣ ኦልና፥ ጻምአቱ ሾሻ ከሴድኖ፤ ሽን አሮና ጻምአይ ኡንቱንቱ ጻምአቱዋ ምቴዳ። 13ግዶፐነ መና ጎዳይ ኦዴዳዋዳንካ ካትያ ዎዛናይ ዶንጭሌዳ፤ እ ኡንቱንቱ ኦዱዋ ስሰናን እጼዳ።
ሃይ ሱዉ ላመቴዳ
14መና ጎዳይ ሙሳ፥ “ካትያ ዎዛናይ ዶንጭሌዳ፤ አሳ እ የደናን እጼዳ። 15ካቲ ሃኮ ብያ ዎደ፥ ጉራደ ኔን አኮ ባደ አናና ጋከታናዉ ናይለ ሻፋ ዶናን ኤአ፤ ሾሻዉ ላመቴዳ ጻምኣ ኦይቃ አካደ ባ። 16ኔን አ፥ ‘መና ጎዳይ፥ እብራዌቱዋ ጾሳይ ኔና፥ መላ ቢታን ታዉ ጎይናና ማላ፥ ታ አሳ የዳ ያጊደ፥ ታና ኔኮ ኪቴዳ፤ ሽን ሀኖ ጋካናዉ ኔን ስሳበይካ። 17መና ጎዳይ፥ ታን መና ጎዳ ግድያዋ ኔን ሀዋን ኤራና። ታን ናይለ ሻፋ ሃ ታ ኩሽያን ደእያ ጻምአን ሾጭና ሃይ ሱዉ ላመታናዋ።#ሳፃ 16:4 18ናይለ ሻፋ ሞሊካ ሀይቃናዋ፤ ሻፋይካ ጽንቃናዋ፤ ግብጼቱ ሄ ሻፋ ሃ ኡሻናዉ ዳንዳይክኖ’ ያጋደ ኦዳ” ያጌዳ።
19መና ጎዳይ ሙሳ ሀዋዳን ያጌዳ፤ “ኔን አሮና፥ ‘ነ ጻምኣ ኦይቃደ ግብጼ ሃቱዋ ቦላ፥ ሻፋቱዋ ቦላ፥ ዜሬቶ ሃቱዋ ቦላ፥ ድኡዋ ኦላ ቦላን ነ ኩሽያ ምጫ’ ያጋ፤ እ ምጭና ኡንቱንቱ ሱዉ ላመታናዋ፤ ግብጼ ቢታ ኡባን፥ ሀራይ አትና፥ ምፐነ ሹቻፐ ዎጪደ ከሴዳ ሃ ትግያ ሚሻ ኡባ ጋርሳን ደእያ ሃይ ሱዉ ላመታና” ያጌዳ።
20ሙሴነ አሮነ መና ጎዳይ አዛዜዳዋዳን ኦድኖ። ካትያ ስንንነ አ ኦሳንቻቱዋ ስንን እ ባረ ጻምኣ ደንደ፥ ሻፋ ሃ ሾጭና ሃ ኡባይ ሱዉ ላመቴዳ። 21ሄ ሻፋ ሃ ግዱዋን ደእያ ሞለቱ ሀይቄድኖ፤ ሻፋ ሃይ ሎይ ዜኤዳ ድራዉ፥ ግብጼ አሳይ ኡሻናዉ ዳንዳይቤና። ግብጼን ኡባ ሳን ሱይ ኩሜዳ። 22ግብጼ ሻሬቾቱካ ባረንቱ ማሹዋን ሄዋዳን ኦድኖ፤ መና ጎዳይ ኦዴዳዋዳንካ ካትያ ዎዛናይ ዶንጭልና፥ ሙሴነ አሮነ ኦዴዳዋ ስሰናን እጼዳ። 23ሄዋፐ ጉይያን ካቲ ሀዎ አይነ ህርገናን ባረ ሶ ስሚደ ቤዳ። 24ግብጼ አሳይ ኡባይ ናይለ ሻፋ ሃ ኡሻናዉ ዳንዳይቤና ድራዉ፥ ኡሽያ ሃ ደማናዉ ናይለ ሻፋ ጋጻን ኦላ ቦኬድኖ።
25መና ጎዳይ ሃ ሾጮደፐ ላፑን ጋላሳ ግዴዳ።
Currently Selected:
ከሳ 7: DFBE
Highlight
Share
Compare
Copy
Want to have your highlights saved across all your devices? Sign up or sign in
The Word for the World Ethiopia
