ዶመ 18
18
ሄዙ እማቱዋ
1አብራሃመ ማምረ ዎላቱዋ ዎጋቱዋ ጋርሳን ባረ ዱንካንያ ፐንግያን ሴታ ጋላስ ኡት ደእሽን፥ መና ጎዳይ አዉ ቆንጬዳ። 2አብራሃመ ቁ ጊደ ጼሊደ ሄዙ አሳቱ አ ማታን ኤቄዳዋንታ በኤዳ፤ ኡንቱንቱና ጋከታናዉ ባረ ዱንካንያ ፐንግያፐ ደንድ ዎጼዳ፤ ጋኪደ፥ ገድያን ሆኪደ፥ ኡንቱንቱ ስንን ጎይኔዳ።#እብራ. 13:2 3ስሚደ እ፥ “አቤት ታ ጎዳው፥ ታን ነ ስንን ናሸቴዳዋ ግዶፐ፥ ታና ነ ቆማ አጋደ አፓ። 4ሀያና ጉ ሃይ ዮ፤ ህንተንቱ ገዲ ሜጨትና፥ ሀ ም ኩዋን ሸምፕ አክተ። 5ህንተንቱ ሀእ ታኮ ህንተንቱ ቆማኮ ዬዳ ድራዉ፥ ካምእ ጊደ ህንተንቱ ብያሳኣ ባና ማላ፥ ታን ህንተንቶ ምያዋ አሀይ” ያጌዳ።
ኡንቱንቱ፥ “ዳሮ ሎአ፤ ኔን ግያዋዳን ኦ” ያጌድኖ።
6አብራሃመ ዱንካንያ ግዶ ሳርኮ ኤሌል ቢደ፥ “ኤሌላደ ሊቆ ልያፐ ሄዙ ከረ ግድያዋ አካ ሙናቃደ ኡክ ኡካ” ያጌዳ። 7ቃይ፥ አብራሃመ ባረ መህያኮ ዎጽ ቢደ፥ ሎኦ ቦልትቦልታ ቦልትቦልታ ማራ ዶሪደ፥ እት ቆማዉ እምና፥ እ ኤሌል ሹኪደ ጊግሴዳ። 8ያትና አብራሃመ መኤዳ ማነ ጊግሴዳ ማራ አሹዋ እማቱዋ ስን አዳ፤ ኡንቱንቱ ሚሽን፥ እ ሄ ም ጋርሳን ኡንቱንቱ ማታን ኤቄዳ።
9ኡንቱንቱ አ፥ “ነ ማቻታ ሳራ ሀቃኔ?” ያጊደ ኦቼድኖ።
እዛ፥ “ህን ዱንካንያ ግዱዋን ደአዉ” ያጌዳ።
10መና ጎዳይ አ፥ “ታን ላይ ሀኖደ ቱሙ ኔኮ ስማና፤ ሄ ዎደ ነ ማቻታ ሳራ አቱማ ናኣ የላና” ያጌዳ።
ሳራ ሄ ዎደ አፐ ጉየ ባጋና ደእያ ዱንካንያ ፐንግያን ደእያና ሄዋ ስሳዱ።#ሮመ 9:9 11አብራሃመነ ሳራ ባረንቱ ላይ ሎይ ሱጊደ ጭሜድኖ። ሳርዉ ፒላይ ይያዋ አጌዳ። 12ሄዋ ድራዉ ሳራ ባረ ዎዛናን፥ “ታን ሀእ ጭማ ዉራ ክቾዋፐ ጉይያንነ ታ ጎዳይ ጭሞዋፐ ጉየ፥ ሀእ ታዉ አቱማ አሳና ጋከትያዌ ዋን ሀናኔ?” ያጋደ ሚጫዱ።#1 ጰጽ. 3:6
13መና ጎዳይ አብራሃመ ሄ ዎደ፥ “ ‘ታን ጭማ ክቾዋፐ ጉየ፥ ቱሙ ናኣ የላንታየ?’ ጋደ፥ ሳራ አያዉ ሚጫደ? 14መና ጎዳዉ ዳንዳየተናባይ ቱሙ ደኢ? ላይ ሀኖደ ታን ኔኮ ስማና፤ ሄ ዎደ ሳራ አቱማ ናኣ የላና” ያጌዳ።#ሉቃሳ 1:37
15ሳራ ሎይ ያዬዳ ድራዉ፥ “ታን ሚጫበይከ” ያጋደ ላካዱ።
ሽን እ፥ “ኤ፥ ኔን ቱሙ ሚጫዳ” ያጌዳ።
አብራሃመ ሶዶማ ድራዉ ጋናቴዳ
16ሄዋፐ ጉየ አሳቱ ደንዲደ ብ፥ ሶዶማ ካታማ ዱገ ዛር ጼሌድኖ፤ አብራሃመነ ኡንቱንታ ሞይዚደ ኡንቱንቱና ቤዳ። 17መና ጎዳይ ሄ ዎደ፥ “ታን ታ ኦናዉ ሀንያባ አብራሃመፐ ቆስከ። 18አብራሃመ ቱሙፐ ግታነ ዎልቃማ ካዉተ ግዳና፤ ሀ ሳኣ ካዉተቱ ኡባይ አ ባጋና አንጀታና።#18:18: ካዉተ ኡባይ አ ባጋና አንጀታና፦ ካዉተይ ኡባይ ኔና አንጆዋዳን ባረናካ አንጃናዳን ታና ዎሳናዋንታ ግያዋ። 19አያዉ ጎፐ፥ ጽሎተነ ፕርዳ ኦደ፥ መና ጎዳ ኦግያ ናጋናዳን ባረ ናናነ ባረፐ ጉየ፥ ባረ ሶ አሳ እ ዞራና ማላ፥ ታን አ ዶራድ፤ ሄዌነ መና ጎዳይ አብራሃመዉ እማና ጌዳዋ ኡባ ፖላናሳ” ያጌዳ።
20-21መና ጎዳይ አብራሃመ፥ “ሶዶማፐነ ጋሞራፐ ዋስያ ዋሱ ሎይ ዳሬዳ ድራዉነ ኡንቱንቱ ናጋራይ ሎይ ዴጼዳ ድራዉ፥ ኡንቱንቱ ኦዳባይ ታኮ ጋኬዳ ዋሱዋ ኬሻ ኢተንቶነ በአናዉ አነ ታን ዱገ ዎይ፤ ሄዋ ማላ ኢታ ግዳና ይንቶነ ኤራና” ያጌዳ።
22ሄዋፐ ጉየ፥ ላኡ አሳቱ ሶዶማኮ ስሚደ ቤድኖ፤ ሽን አብራሃመ መና ጎዳ ስንን ዎስ ደኤ። 23ሄ ዎደ አብራሃመ መና ጎዳኮ ሺቂደ ያጌዳ፤ “ቱሙ ኔን ጽሎቱዋ ኢታቱዋና ይሳይ? 24ሄ ዎልቃማ ካታማን እሻታሙ ጽሎቱ ደእንቶካ፥ ኔን ይሳይ? ኔን አን ደእያ እሻታሙ ጽሎቱዋ ድራዉ ሄ ካታማ አሽኪ? 25ሄዌ ኔፐ ሃኮ፤ ጽሎቱዋ ኢታቱዋና ዎያዌነ ጽሎቱዋነ ኢታቱዋ እት አይፍያን ጼልያዌ ኔፐ ሃኮ። ሀ ሳኣ ኡባ ፕርድያዌ ጽሉዋ ፕርደኔየ?” ያጌዳ።
26መና ጎዳይ፥ “ሄ ሶዶማ ካታማን እሻታሙ ጽሎቱ ደኦፐ፥ ሄ ሳኣ ኡባ ኡንቱንቱ ድራዉ ታን አሻና” ያጌዳ።
27ሄዋፐ ጉየ አብራሃመ፥ “ታን ቢታነ ብድን ግዳደ ታ ጎዳና ጻላደ ሃሳያናዉ ስም ዶማ ክቻድ፤ 28እሻታሙ ጽሎቱዋፐ እቼሹ ፓጭንቶ፥ ኔን ሄ እቼሻቱዋ ድራዉ ሄ ካታማ ኡባ ይሳይ?” ያጌዳ።
መና ጎዳይ፥ “ታን ያን ኦይታማነ እቼሹ ጽሎቱዋ ደምንቶ፥ ሄ ካታማ ይስከ” ያጌዳ።
29አብራሃመ ዛረደካ፥ “ያን ኦይታሙ ጻላላይ ቤትንቶ ሽን?” ያጌዳ።
እ፥ “ታን ሄ ኦይታማቱዋ ድራዉ፥ ሄ ካታማ ይስከ” ያጌዳ።
30ሄዋፐ ጉየ እ፥ “ሀይ ጎዳይ ታዉ ሀንቀቶፖ፤ ታን ጉጃደካ ሃሳያይ። ያን ሀታሙ ጻላላይ ቤትንቶ ሽን?” ያጌዳ።
መና ጎዳይ፥ “ታን ያን ሀታሙዋ ደምንቶ፥ ሄ ካታማ ይስከ” ያጌዳ።
31አብራሃመ ቃይካ፥ “ታን ጎዳና ጻላደ ሃሳያናዉ ዶማ ክቻድ፤ ያን ላታሙዋ ጻላላይ ቤትንቶ ሽን?” ያጌዳ።
መና ጎዳይ፥ “ሄ ላታማቱዋ ድራዉ ታን አ ይስከ” ያጌዳ።
32ሄዋፐ ጉየ አብራሃመ፥ “ሀይ ጎዳይ ታዉ ሀንቀቶፖ፤ ታን መጽ እት ገደ ሃሳያይ፤ ያን ታሙ ጻላላይ ቤትንቶ ሽን?” ያጌዳ።
መና ጎዳይ፥ “ሄ ታማቱዋ ድራዉ ታን ሄ ካታማ ይስከ” ያጌዳ።
33መና ጎዳይ አብራሃመና ሃሳያ ዉርሴዳዋፐ ጉየ ቤዳ፤ አብራሃመካ ባረ ሶ ስሜዳ።
Currently Selected:
ዶመ 18: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
