ዶመ 22
22
ይሳቃ ባረዉ ያርሻናዳን ጾሳይ አብራሃማ አዛዜዳ
1ሄዋፐ ስሚደ፥ ጾሳይ አብራሃማ ፓጬዳ፤ እ አ፥ “አብራሃሜ” ያጊደ ጼሴዳ።
እ፥ “አቤ” ያጊደ ኮዬዳ።#እብራ. 11:17-19
2ጾሳይ፥ “ኔን ሲቅያ ነ መጽ እት ናኣ ይሳቃ አካደ፥ ሞርያ ግያ ጋድያ ባ፤ ያን ታን ነዉ ኦድያ እት ደርያ ቦላን አ ጹግያ ያርሹዋ ኦደ ታዉ ያርሻ” ያጌዳ።#2 ኦዱዋ 3:1
3ዎንተ ጋላስ አብራሃመ ጉራን ደንዲደ፥ ባረ ሀርያ ጫኔዳ፤ ባረ ቆማቱዋፐ ላኡዋነ ባረ ናኣ ይሳቃ ባረናና አኪደ፥ ጹግያ ያርሹዋ ም ጳልቂ አኪደ፥ ጾሳይ አዉ ኦዴዳ ሳኣ ባናዉ ደንዴዳ። 4ቢደ ሄዘን ጋላስ አብራሃመ ቁ ጊደ፥ ሄ ሳኣ ሃኩዋን በኤዳ። 5አብራሃመ ባረ ቆማቱዋ፥ “ሀ ሀርያና ሀዋን ደእሽተ፤ ታንነ ታ ናአይ ያ ቢደ ጾሳዉ ጎይኒደ፥ ህንተንቱኮ ስማና” ያጌዳ።
6አብራሃመ ያርሹዋ ም ደንደ፥ ባረ ናኣ ይሳቃ ቶሴዳ፤ ታማነ ማሻ እ ባረዉ ኦይቄዳ። ኡንቱንቱ ላኡ እትፐ ቢሽን፥ 7ይሳቅ ባረ አዉዋ አብራሃማ፥ “ታ አዎ” ያጌዳ።
አብራሃመ፥ “አቤ፥ ታ ናአዉ” ያጌዳ።
እ፥ “ታማይነ ምይ ሀዌሽ፤ ሽን ጹጊደ ያርሽያ ዶርሳ ማራይ ሀቃኔ?” ያጌዳ።
8አብራሃመ፥ “ታ ናአዉ፥ ጹጊደ ያርሽያ ዶርሳ ማራ ጾሳይ ጊግሳና” ያጌዳ። ኡንቱንቱ ላኡ እትፐ ቤድኖ።
9ኡንቱንቱ ጾሳይ አዉ ኦዴዳ ሳኣ ጋኬዳ ዎደ፥ አብራሃመ ያርሹዋ ያርሽያ ሳኣ ያን ግምቢደ፥ ም ማር የጌዳ፤ ባረ ናኣ ይሳቃ ቃቺደ፥ ሄ ም ቦላን ግስሴዳ።#ያቆባ 2:21 10አብራሃመ ባረ ናኣ ሹካናዉ ባረ ኩሽያ የዲደ ማሻ አኬዳ። 11ሽን መና ጎዳ ኪታንቻይ ሳሉዋፐ አ፥ “አብራሃሜ፥ አብራሃሜ” ያጊደ ጼሴዳ።
እ፥ “አቤ” ጊደ ኮዬዳ።
12አ፥ “ናኣ ቦላን ነ ኩሽያ ዎፓ፤ አ አይነ ኦፓ፤ ኔን ነ መጽ እት ናኣካ ታና ድጋቤና ድራዉ፥ ኔን ጾሳዉ ያይያዋ ግድያዋ ታን ሀእ ኤራይ” ያጌዳ።
13አብራሃመ ቁ ግ ጼሊደ፥ ሄዋን ዶርሳ እቱ ካጪ ቡራን ገል ቃጸት ኡቴዳዋ በኤዳ። አብራሃመ ቢደ ሄ ዶርሳ አኪደ፥ ባረ ናኣ ድራዉ ጹግያ ያርሹዋ ኦደ ያርሽ ባሼዳ። 14ሄዋ ድራዉ አብራሃመ፥ “መና ጎዳይ እማና”#22:14 መና ጎዳይ እማና፦ መና ጎዳይ ጼሌ። ያጊደ ሄ ሳኣ ሱንዳ፤ ሀቼ ጋካናስካ፥ “መና ጎዳ ደርያን እመታና” ጌተቴ።
15መና ጎዳ ኪታንቻይ ሳሉዋፐ ላኤንደ አብራሃማ ጼሲደ ያጌዳ፤ 16“መና ጎዳይ፥ ‘ሀዋዳን ያጋደ ነዉ ታን ታ ሁጲያን ጫቃይ፤ ኔን ሀዋ ኦዳ ድራዉነ ነ መጽ እት ናኣካ ታና ድጋቤና ድራዉ፥#እብራ. 6:13-14 17ታን ኔና ቱሙ አንጃና፤ ነ ዘረካ ታን ሳሉዋ ጾልንትያ ኬናነ አባ ዶና ሻፍያ ኬና ኦደ ጮርሳና። ነ ዘረቱ ባረንቱ ሞርከቱዋ ካታማቱዋ ላታና።#እብራ. 11:12 18ኔን ታዉ አዛዘቴዳ ድራዉ፥ ሀ ሳኣ ካዉተቱ ኡባይ ነ ዘረ ባጋና አንጀታና’ ያጌ” ያጌዳ።#ኪታ 3:25
19ሄዋፐ ጉየ፥ አብራሃመ ባረ ቆማቱዋኮ ስሚደ፥ ኡንቱንቱ ኡባይ እትፐ በርሳበሄ ደንዲደ ቤድኖ። አብራሃመ በርሳበሄን ደኤዳ።
ናኮራ የለታ
20ሄዋፐ ስሚደ አብራሃመዉ፥ “ምልካ ነ እሻ ናኮራዉ ናና የላዱ፤ 21ኡንቱንቱነ ባይራይ ኡጻ፤ ኡጻ እሻቱ ቡዛ፥ 22አራማ አዉዋ ቃሙኤላ፥ ኬሳደ፥ ሃዞ፥ ፕልዳሻ፥ ይድላፋነ ባቱኤላ። 23ሀዋንታ ሀ ሆስፑን ናናካ ምልካ አብራሃመ እሻ ናኮራዉ የላዱ፤ ባቱኤል ርብቆ የሌዳ። 24ራኡማ ግያ አ ቆማታ ቃይ ጸባሀ፥ ጋሃማ፥ ታሃሻነ ማእካ የላዱ” ያጊደ ኦዴድኖ።
Currently Selected:
ዶመ 22: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
