ዮሃንሳ ምሽራቹዋ 11

አልኣዛራ ሀይቁዋ

1ቢታንያ ግያ ቄር ካታማን አልኣዛራ ግያ እት ብታኒ ሀርጌዳ፤ ሄ ካታማይ ማይራማነ እዝ ምቻታ ማርታ ደኤዳ ካታማ። 2ጎዳ ገድያ ሽቱዋ ኦካደ፥ ባረ ብናናን አ ገድያ ቁጬዳዉና ሄ ማይራሞ፤ ሀርጌዳዌ ቃይ እዝ እሻ አልኣዛራ። 3ሄዋ ድራዉ፥ ምቻቱ፥ “ጎዳዉ፥ ኔን ሲቅያዌ ሀርጌዳ” ጊደ የሱሳዉ ኪቴድኖ።

4የሱስ ሄዋ ስሴዳ ዎደ፥ “ታን ጾሳ ናአይ ሀርግያ ጋሱዋን ቦንቼታና ማላ፥ ጾሳ ቦንቾ ሀ ሀርጊ አልኣዛራ ኦይቄዳፐ አትን፥ ዎያ ሀርግያ ግደና” ያጌዳ።

5የሱስ ማርቶ፥ እዝ ምቻቶነ አልኣዛራ ሲቄ፤ 6አልኣዛር ሀርጌዳዋ የሱስ ስሴዳ ዎደ፥ ባረ ደእያ ሳኣን ላኡ ጋላሳ ፔሼዳ። 7ሄዋፐ ጉይያን፥ የሱስ ባረና ካልያዋንታ “ላኤንዋ ይሁዳ ጋድያ ቦይተ” ያጌዳ።

8የሱሳ ካልያዋንቱ ዛሪደ፥ “ታማርስያዎ፥ ጉ ዎድያፐ ካሰ አይሁዳቱ ኔና ሹቻን ጫዳናዉ ኮዬድኖ፤ ቃይካ ያ ባኒ?” ያጌድኖ።

9የሱስ፥ “እት ጋላሳን ታማነ ላኡ ሳቲ ደኤኔየ? ጋላስ ሀመትያ አሳይ በተና፤ አያዉ ጎፐ፥ እ ሀ ሳኣ ፖኡዋ በኤ። 10ሽን ቃማ ሀመትያ ኡራይ ደኦፐ፥ ፖኡ አን ባይና ድራዉ፥ በቴ” ያጌዳ። 11የሱስ ሄዋ ጌዳዋፐ ጉይያን፥ ቃይካ ኡንቱንቶ፥ “ኑ ዳቡ አልኣዛር ገምእሼዳ፤ ሽን ገምእሹዋፐ አ ደንናዉ ታን ባይ” ያጌዳ።

12የሱሳ ካልያዋንቱ ዛሪደ፥ “ጎዳዉ፥ እ ገምእሼዳዋ ግዶፐ፥ አዉ ሎአናዋ” ያጌድኖ።

13አልኣዛር ሀይቄዳዋ የሱስ ኦዴዳ፤ ሽን አልኣዛር ገምእሺደ ግሴዳዋ ኦዴዳ ጊደ፥ ኡንቱንቱ ቆፔድኖ። 14ሄዋ ድራዉ፥ የሱስ ጌሺደ ኡንቱንታ፥ “አልኣዛር ሀይቄዳ። 15ህንተንቱ አማናና ማላ፥ ታን ሄ ሳኣን ደኤናዎ፥ ህንተንቱ ድራዉ ናሸታይ። ሽን ደንድተ፤ አኮ ቦይተ” ያጌዳ።

16ሄዋፐ ጉይያን፥ ማንትያ ጌተትያ ቶማስ ባረ ላገቱዋ የሱሳ ካልያዋንታ፥ “የሱሳና ሀይቃናዉ ኑንካ ቃይ ቦይተ!” ያጌዳ።

የሱስ፥ ደንዱዋነ ደኡዋ

17የሱስ ጋክያ ዎደ፥ አልኣዛራዉ ሞገቶደፐ ኦይዱ ጋላሳ ግዴዳዋ ደሜዳ። 18ቢታንያ ካታማይ የሩሳላመፐ ሄዙ ኪሎ ሚትርያ ኬና ሃኬ። 19ዳሮ አይሁዳቱ ማርቶነ ማይራሞ ኡንቱንቱ እሻይ ሀይቄዳዎ መንናዉ ዬድኖ።

20ማርታ የሱስ ዬዳዋ ስሳደ፥ አ ሞካናዉ ከሳዱ፤ ሽን ማይራማ ጎለን አታዱ። 21ማርታ የሱሳ፥ “ጎዳዉ፥ ኔን ሀዋን ደኤዳዋ ግድንቶ፥ ታ እሻይ ሀይቀና። 22ሽን ኔን ዎስያዋ አይ ግዶፐነ፥ ጾሳይ ነዉ ሀራይ አቶ ሀእካ እማናዋ ታን ኤራይ” ያጋዱ።

23የሱስ፥ “ነ እሻይ ሀይቁዋፐ ደንዳና” ያጌዳ።

24ማርታ፥ “ዎድያ ዉርሰን#11:24 ዎድያ ዉርሰን፦ ጾሳይ አሳ ዘረ ኡባ ፕርዳዉ ሺሽያ ዎደ ጉሳ። ደንዱዋ ጋላስ፥ እ ሀይቁዋፐ ደንዳናዋ ታን ኤራይ” ያጋዱ።

25የሱስ እዝዉ፥ “ታን ደንዱዋነ ደኡዋ፤ ታና አማንያ ኡራይ ሀራይ አቶ፥ ሀይቆፐካ ደኡዋን ደአናዋ። 26ቃይ ደኡዋን ደእያ ኡራይነ ታና አማንያ ኡራይ ኡባይ ኡባካ ሀይቀና፤ ሄዋ ኔን አማናይ?” ያጌዳ።

27ማርታ ዛራደ፥ “ጎዳዉ፥ ኤ ታን አማናይ፤ ኔን ጾሳ ናኣ፥ ሳኣ ያናዉ ደእያ ክርስቶሳ ግድያዋ ታን አማናይ” ያጋዱ።

28ማርታ ሄዋ ጌዳዋፐ ጉይያን፥ ባደ ባረ ምቻትዉ ጌማን ጼሳደ፥ “ታማርስያዌ ዪደ፥ ኔና ኮዬ” ያጋዱ። 29ማይራማ ሄዋ ስሴዳ ዎደ፥ ኤሌላ ደንዳ ኤቃደ የሱሳኮ ባዱ። 30የሱስ ማርታ አ ሞኬዳ ሳኣን ደኤፐ አትን፥ ብሮ ቄር ካታማ ጋክቤና። 31ማይራሞ መንደ፥ ጎለን እዝና ደእያ አይሁዳቱ፥ እዛ ኤለካ ደንዳ ኤቃደ ካረ ከስያዋ በኢደ፥ አልኣዛር ሞገቴዳ ዱፉዋ ባደ ያን ዬካናዉ ሀናዉ ያጊደ፥ እዞ ካሊደ ከሴድኖ።

32ማይራማ የሱስ ደኢያሳ ባደ የሱሳ በኤዳ ዎደ፥ አ ገድያ ቦላን ኩንዳዱ፤ “ጎዳዉ፥ ኔን ሀዋን ደኤዳዋ ግድንቶ፥ ታ እሻይ ሀይቀና ሽን!” ያጋዱ።

33የሱስ እዛ ዬክያዋነ ቃይ እዝና ዬዳ አይሁዳቱካ ዬክያዋ በኢደ፥ ባረ ዎዛናን ዳሮ ሴለቴዳ፤ ቃይ ቶክ ሸምፔዳ። 34ኡንቱንታ፥ “ሀቃን ሞጌድቴ?” ያጊደ ኦችና፥ “ጎዳዉ፥ ያደ በአ” ያጊደ ዛሬድኖ።

35የሱስ አፎጼዳ። 36ሄዋ ድራዉ፥ አይሁዳቱ፥ “አልኣዛራ እ አይ ኬና ሲቅንቶ በእተ!” ያጌድኖ።

37ሽን ኡንቱንቱፐ እቱ እቱ፥ “ሀዌ ቆቃ ብታንያ ጼልሴዳዌ ሀ ብታኒ ሀይቀናዳን ኡዳናዉ ዳንዳየኔ?” ያጌድኖ።

የሱስ አልኣዛራ ሀይቁዋፐ ደንዳ

38የሱስ ቃይካ ዎዛናፐ ቃረቲደ፥ አልኣዛር ሞገቴዳ ዱፉዋኮ ቤዳ፤ ሄ ዱፉ ጎንጎሉዋ ግዲደ ሹቻን ቁምኤት ኡቴዳ። 39የሱስ፥ “ሹቻ ድግተ!” ያጊደ አዛዜዳ።

ሀይቄዳ ብታንያ ምቻታ ማርታ፥ “ጎዳዉ፥ እ ሀይቆደፐ ኦይዱ ጋላሳ ግዴዳ ድራዉ፥ ሀእ ጽንቃናዋ!” ያጋዱ።

40የሱስ ማርቶ፥ “አማንያዋ ግዶፐ፥ ኔን ጾሳ ቦንቹዋ በአናዋ ታን ነዉ ኦዳበይክታ?” ያጌዳ። 41ኡንቱንቱ ሹቻ ደንድኖ፤ የሱስ ሳሉዋ ፑደ ጼሊደ፥ “አዎ፥ ታን ግያዋ ኔን ስሴዳ ድራዉ፥ ኔና ጋላታይ። 42ኔን ኡባ ዎደ ስስያዋ ታን ኤራይ፤ ሽን ሀዋን ዩይ አደ ኤቄዳ አሳይ ኔን ታና ኪቴዳዋ አማናና ማላ፥ ሀዋ ታን ኡንቱንቱ ድራዉ ጋይ” ያጌዳ። 43የሱስ ሄዋ ጌዳዋፐ ጉይያን፥ ባረ ቃላ ቁ ኦደ፥ “አልኣዛራ፥ ሃ ከሳ!” ያጌዳ። 44ሀይቄዳ አልኣዛራ ኩሺነ ገዲ ሻሉዋን ቃሸት ኡቲደ አ ዴሙካ አፍላን ካመት ኡቴዳዌ ከስና የሱስ ኡንቱንታ፥ “ብል አግተ! ቦ!” ያጌዳ።

ክርስቶሳ ቦላ ማቀቴድኖ

(ማቶሳ 26:1-5፤ ማር. 14:1-2፤ ሉቃሳ 22:1-2)

45ሄዋ ድራዉ፥ ማይራምኮ ዬዳ አይሁዳቱዋፐ ጮራቱ የሱስ ኦዳዋ በኢደ፥ አ አማኔድኖ። 46ሽን ኡንቱንቱፐ እቱ እቱ ፓርሳዋቱዋኮ ቢደ፥ የሱስ ኦዳዋ ኡንቱንቶ ኦዴድኖ። 47ሄዋፐ ጉይያን፥ ቄሳቱዋ ካፓቱነ ፓርሳዋቱ ሽቁዋ ሺሺደ፥ “ሀ ብታኒ ዳሮ ዎልቃማ ማላታ ኦያ ድራዉ፥ አያ ኦኔ? 48ኑን አ ጮኡ ጊደ፥ አጎፐ፥ አሳይ ኡባይ አ አማናናዋ፤ ቃይ ሮመ ጋድያ አሳቱ ዪደ፥ ኑ ጌሻ ጎልያነ ኑ አሳ ይሳና” ያጌድኖ።

49ኡንቱንቱፐ እቱ ቃያፋ ግያ፥ ሄ ላይ ቄሳቱዋ ኡባቱዋ ካፖ ግዴዳዌ፥ “ህንተንቱ አይነ ኤርክታ! 50አሳይ ኡባይ ይያዋፐ አሳ ኡባ ድራዉ፥ እት አሳይ ሀይቂያዌ ሎአ ግድያዋ ህንተንቱ አኬክተ?” ያጌዳ። 51እ ሄዋ ባረፐ ግቤና፤ ሽን ሄ ላይ ቄሳቱዋ ኡባቱዋ ካፖ ግድያ ድራዉ፥ የሱስ አይሁዳ አሳ ድራዉ ሀይቃናዉ በስያዋ ናቢ ኦዴዳ። 52ቃይ የሱስ አይሁዳ አሳ ጻላላዉ ሀይቀና፤ ሽን ላለት ደእያ ጾሳ ናና እቱዋ ኦ ሺሻናዉ ሀይቃናዋ።

53ሄ ጋላሳፐ ዶሚደ፥ ኡንቱንቱ አ ዎናዉ ማቀቴድኖ። 54ሄዋ ድራዉ፥ የሱስ አይሁዳቱ ግዱዋን ቆንጭያን ያ ሃ ሀመትቤና፤ ሽን መላ ቢታ ጋጻን ደእያ ጋድያ፥ ኤፍሬማ ጌተትያ ካታማ ቤዳ። ባረና ካልያዋንቱና ሄዋን ታኬዳ።

55አይሁዳቱ ፓስጋ ቦንችያ ጋላሳይ ማቴዳ፤ ቃይ ዳሮ አሳይ ባረና ጌሻናዉ፥ ፓስጋ ቦንችያ ጋላሳይ ጋካናፐ ካሰ ዱማ ዱማ ሳፐ የሩሳላመ ቤዳ። 56ኡንቱንቱ የሱሳ ኮዪኖ፤ ጌሻ ጎልያን ኤቂደ፥ “አያ ቆፒቴ? ፓስጋ ቦንችያሳ የሱስ ዬኔ?” ያጊደ እቱ እቱዋ ኦቼድኖ። 57ቃይ ቄሳቱዋ ካፓቱነ ፓርሳዋቱ የሱሳ ቃቻናዉ፥ እ ደኢያሳ ኤርያዌ ኦንነ ባረንቶ ኦዳና ማላ አዛዜድኖ።

Currently Selected:

ዮሃንሳ ምሽራቹዋ 11: DFBE

Highlight

Copy