ዎጋ 16
16
ናጋራይ አቶ ጌተትያ ጋላሳ
(16:1-34)
1አሮና አቱማ ናናይ ላኡ መና ጎዳ ስን ሺቂደ ሀይቄዳዋፐ ጉይያን፥ መና ጎዳይ ሙሳ ሀዋዳን ያጌዳ። 2“መና ጎዳይ ሙሳ፥ ነ እሻይ አሮን ታቦታ ቦላን ደእያ አቶ ግያ ሳኣ ቁምእያ ስንን ጋርዱዋፐ ጉየ ባጋና ደእያ ኡባፐ አዳ ጌሻ ሳኣ ኡባ ዎደ ጮ ገለናዳን አዉ ኦዳ። ጮ ገሎፐ እ ሀይቃና፤ አያዉ ጎፐ፥ ታን ሻርያ ግዶና አቶ ግያ ሳኣ ቁምእያ ቦላን ቆንጫይ።#እብራ. 6:19 3አሮን ናጋራ ያርሾ እት ኮሩማነ ቃይ ጹግያ ያርሾ እት ዶርሳ ኦርግያ አኪደ፥ ሄ ኡባፐ አዳ ጌሻ ሳኣ ገሎ።#እብራ. 9:7
4“አሮን ሊኑዋፐ ኦሰቴዳ ጌሻ ቃምሽያነ ሊኑዋፐ ኦሰቴዳ ጋርሳና ማይያ ማዩዋ ማዮ። ቃይ ሊኑዋፐ ኦሰቴዳ ዳንጩዋ ዳንጮ፤ ሄዋዳንካ ቃይ ባረ ሁጲያን ሊኑዋፐ ኦሰቴዳ ሻሽያ ኤንጩርሳ ዎ። ሀዋንቱ ጌሻ ማዮቱዋ ግድያ ድራዉ፥ እ ባረ ቦላ ሃን ሜጨት ክቺደ ማዮ።
5“እስራኤልያ አሳ ማባራይ ናጋራ ያርሾ ላኡ ዴሻ ኮለቱዋ፥ ጹግያ ያርሾካ እት ዶርሳ ኮልያ አሮናዉ አይኖ። 6አሮን ባረ ናጋራነ ባረ ሶ አሳ ናጋራ አቶ ጊሳናዉ ኮሩማ ያርሾ። 7ሄዋፐ ጉይያን፥ ላኡ ዴሻ ኮለቱዋ አፊደ፥ መና ጎዳ ዱንካንያ ፐንግያን መና ጎዳ ስንን ኤሶ። 8ያቲደ ሄ ላኡ ዴሻቱዋን ሳማ የግና እቱ መና ጎዳሳ፤ እቱ ቃይ ባዙዋ የድያዋ ግዴ። 9አሮን መና ጎዳዉ ሳማይ ከሴዳ ዴሻ አሂደ፥ ናጋራ ያርሾ ኦደ ያርሾ። 10ሽን ባዙዋ የድያ ሳማይ ከሴዳ ዴሻ ፓጻ ደእሽን መና ጎዳዉ ሺሾ፤ ባዙዋ አ የደርስያ ዎደ፥ አሳ ናጋራ አቶ ጊሴ።
11“አሮን ባረ ናጋራነ ባረ ሶ አሳ ናጋራ አቶ ጊሳናዉ፥ እት ኮሩማ ናጋራ ያርሹዋ ኦደ ሺሾ። ያቲደ ባረ ናጋራ ያርሾ ሄ ኮሩማ ሹኮ። 12ቃይ መና ጎዳ ስንን ደእያ ያርሽያ ሳኣፐ እጻና ጩውስያ ሚሻ ኩመን ቦንቁዋነ፥ ሊቅ ጋጨቴዳ ላኡ ኮጵያ ሳዊያ እጻና አኪደ፥ ጋርዱዋ ግዶ አሆ። 13እ ሀይቀናዳን፥ እጻና ጩዋይ ታቦታ ቦላን ደእያ አቶ ግያ ሳኣ ቁምእያ ካማና ማላ፥ እጻና መና ጎዳ ስንን ደእያ ታማን ዎ። 14ቃይ ሄ ኦርግያ ሱፐ ጉ አኪደ፥ ባረ ብራያ አን ናቂደ፥ አቶ ግያ ሳኣ ቁምእያዉ ስን ባጋ ጫጫፎ፤ ቃይ አቶ ግያ ሳኣ ቁምእያፐ ስን ባጋና ደእያ ሳኣካ ላፑ ገደ ጫጫፎ።
15“ሄዋፐ ጉይያን አሳ ናጋራ ያርሾ ግድያ ዴሻ ሹኪደ፥ አ ሱ ጋርዱዋ ግዶ አሆ፤ ኮሩማ ሱ ጫጫፌዳዋዳን፥ አቶ ግያ ሳኣ ቁምእያ ስንነ አቶ ግያ ሳኣ ቁምእያፐ ስን ባጋና ደእያ ሳኣ ጫጫፎ።#እብራ. 9:12 16ያቲደ ኡባፐ አዳ ጌሻ ሳኣ እስራኤልያ አሳ ቱናተፐነ ናጋራፐ ጌሼ። ቃይ ኡንቱንቱ ቱናባ ኦሽን፥ ኡንቱንቱ ግዶን ደእያ ጾሳ ዱንካንያካ ሄዋዳን ኦደ ጌሾ። 17እ ኡባፐ አዳ ጌሻ ሳኣ ገሊደ፥ ባረ ናጋራ፥ ባረ ሶ አሳ ናጋራነ ኩመን እስራኤልያ አሳ ናጋራ አቶ ጊሲደ ከሳና ጋካናዉ፥ ኦንነ ጾሳ ዱንካንያ ግዶን ደኦፖ።
18“ሄዋፐ ጉይያን እ መና ጎዳ ስንን ደእያ ያርሽያ ሳኣ ዪደ አ ናጋራ አቶ ጊሶ። ኮሩማ ሱፐነ ዴሻ ሱፐ ጉ ጉ አኪደ፥ ያርሽያ ሳኣ ዩሹዋን ደእያ ካጨቱዋ ኦኮ። 19ቃይ ሄ ሱፐ ጉ ባረ ብራያን አኪደ፥ ላፑ ገደ ያርሹዋ ሳኣ ቦላ ጫጫፊደ፥ እስራኤልያ አሳ ቱናተፐ ሄ ያርሹዋ ሳኣ ጌሾ።
ዎራ የድያ ዴሻ
20“አሮን ኡባፐ አዳ ጌሻ ሳኣ፥ ጾሳ ዱንካንያነ ያርሽያ ሳኣ ጌሽያ ዎጋ ፖሌዳዋፐ ጉይያን፥ ፓጻ ደእያ ዴሻ ሺሾ። 21አሮን ባረ ላኡ ኩሸቱዋ ፓጻ ደእያ ዴሻ ሁጲያን ዎደ፥ እስራኤልያ አሳ ናቁዋ ኡባ፥ ኡንቱንቱ ማካላ ኡባ፥ ኡንቱንቱ ናጋራ ኡባ ፓጾ፤ ያቲደ ሄ ዴሻ ሁጲያን ሄዋ ቶሲደ ሄ ዴሻ አፋናዳን ጊግሴዳ አሳ ቦላን ባዙዋ የዶ። 22እ ዴሻ ባዙዋ የድና፥ ዴሻይ ኡንቱንቱ ናጋራ ኡባ ቶኪደ፥ አሳይ ባይና ሳኣ ባዙዋ ቦ።
23“ሄዋፐ ጉይያን፥ አሮን ጾሳ ዱንካንያ ቢደ ኡባፐ አዳ ጌሻ ሳኣ ገሌዳ ዎደ፥ ካሰ ባረ ማዬዳ ሊኑዋፐ ኦሰቴዳ ማዩዋ ቃሪደ ሄዋን ዎ።#ህዝ. 44:19 24ጌሻ ሳኣን እ ባረ ቦላ ሃን ሜጨቲደ፥ ሀራ ማዩዋ ማዪደ ከሶ፤ ያቲደ ጹግያ ያርሹዋ ባረዋነ አሳዋ ያርሺደ፥ ባረ ናጋራነ አሳ ናጋራ አቶ ጊሴ። 25ቃይ ሄዋዳንካ ናጋራ ያርሹዋ ሀንዳ ያርሽያ ሳኣ ቦላን ዎደ ጹጎ።
26“ዎራ የድያ ዴሻ አፌዳ ብታኒካ ባረ ማዩዋ ሜጮ፤ ባረ ቦላካ ሃን ሜጨቶ። ያት ስሚደ ዱንካኔዳሳ ዮ።
27“ናጋራ አቶ ጊሳናዉ አሮን ኡባፐ አያ ጌሻ ሳኣ ገሌዳ ዎደ፥ ናጋራ ያርሹዋ ኮሩማ ሱነ ዴሻ ሱ አኪደ ገሌዳ፤ ሀእ ህንተ ሄ ኮሩማነ ሄ ዴሻነ ዱንካኔዳ ሳኣፐ ጋጻ ከስተ። ኡንቱንቱ ጋልባ፥ ኡንቱንቱ አሹዋነ ኡንቱንቱ ቶጭያ ታማን ጹግተ።#እብራ. 13:11 28ሄዋ ታማን ጹጌዳ ብታኒ ባረ ማዩዋ ሜጮ፤ ባረ ቦላካ ሃን ሜጨቶ፤ ሄዋፐ ጉይያን፥ ዱንካኔዳ ሳኣ ዮ።
ናጋራ አቶ ጊስያ ጋላሳ ቦንችያዋ
29“ሀዌ ህንተንቶ መናዉካ ዎጋ ግዶ: ላፑን አግናይ ገሌዳ ታሙን ጋላሳን ህንተ ሁጲያ ካዉሽተ፤ እስራኤልያ አሳ ግድና ዎይ ቃይ ህንተ ግዶን ደእያ ሀራ ቢታ አሳ ግድናካ፥ አይ ኦሶነ ኦፕተ።#ዎጋ 23:26-32፤ ፓይ. 29:7-11 30አያዉ ጎፐ፥ ህንተና ጌሻናዉ፥ ህንተ ናጋራ አቶ ጊስያ ጋላሳይ ሄ ጋላሳ። ህንተካ መና ጎዳ ስንን ህንተ ናጋራ ኡባፐ ጌያና። 31ሄዌ ህንተ ዋና ሸምፑዋ ሸምፕያ ሳምባታ ጋላሳ። ሄ ጋላሳን ህንተ ሁጲያ ካዉሽተ፤ ሄዌ ህንተንቶ መናዉካ ዎጋ ግዶ። 32ቃይ ባረ አዉዋ ኮታን ቄሰ ግዳናዳን ኦከትያዌነ ዱማትያ አሳይ ጌሻ ግዴዳ ሊኑዋፐ ዳደቴዳ ማዩዋ ማዪደ፥ ናጋራ አቶ ጊስያ ዎጋ ፖሎ። 33እ ኡባፐ አያ ጌሻ ሳኣ፥ ጾሳ ዱንካንያ፥ ያርሽያ ሳኣ፥ ቄሳቱ ዋነ እስራኤልያ አሳ ኡባ ጌሾ። 34እስራኤልያ አሳ ናጋራ ኡባ አቶ ጊስያ ዎጋ ህንተ ላይን ላይን እት ገደ ኦናዳን፥ ሀዌ ህንተንቶ መናዉካ ዎጋ ግዶ” ያጌዳ። ሙሴ መና ጎዳይ አዛዜዳዋዳን ኦዳ።
Currently Selected:
ዎጋ 16: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia