ዎጋ 19
19
ጌሻተነ ልከ ፕርዳ ህገቱዋ
1መና ጎዳይ ሙሳ ሀዋዳን ያጌዳ፤ 2“እስራኤልያ አሳዉ ኡባዉ ሀዋዳን ያጋደ ኦዳ፤ ‘ታን፥ መና ጎዳይ፥ ህንተ ጾሳይ ጌሻ ግድያ ድራዉ፥ ህንተካ ጌሻ ግድተ።#ዎጋ 11:44-45፤ 1 ጰጽ. 1:16
3“ ‘ህንተፐ እቱነ አተናን ባረ አባነ ባረ ዳዮ ቦንቾ፤ ታ ሳምባታቱዋካ ቦንችተ። ታን፥ ጾሳይ፥ ህንተ ጾሳ።#ከሳ 20:8፣ 12፤ ዛረ. 5:12፣ 16
4“ ‘ታና አጊደ ኤቃቶ ጎይኖፕተ፤ ዎይ ቃይ ብራታፐ ሲልሴዳ፥ ጾሳቱዋ ህንተንቶ መፕተ። ታን፥ መና ጎዳይ፥ ህንተ ጾሳ።#ዎጋ 26:1፤ ከሳ 20:23፤ 34:17፤ ዛረ. 27:15
5“ ‘ህንተ እትፐተ ያርሹዋ መና ጎዳዉ ያርሽያ ዎደ፥ ሄ ያርሹ ህንተ ድራዉ አከታናዳን፥ በስያዋዳን ያርሽተ። 6ሄ ያርሹ ህንተ ያርሼዳ ጋላሳን ዎይ ዎንተ ጋላሳን ሜተቶ፤ ሄዘን ጋላሳይ ጋካናዉ አቴዳዌ ደኦፐ ሄዌ ጹገቶ። 7ሄዛን ጋላሳን አ ሞፐ፥ ሄዌ ሸነይያባ፤ ታን ሄዋ አክከ። 8ሄዋ ምያ ኦንነ ባረ ናጋራን ኦሸቴ፤ አያዉ ጎፐ፥ እ መና ጎዳዉ ጌሻ ግዴዳዋ ቱንሴዳ። ሄ አሳይ ባረ አሳ ግዶፐ ቦሄቶ።
9“ ‘ህንተ ጋድያን ሞኬዳ ካ ህንተ ጫክያ ዎደ፥ ጋድያ ጋጻ ጋካናዉ ጫኮፕተ፤ ቃይ ጫካፐ ስምና ደእያ ቃርምያካ ቃርሞፕተ።#ዎጋ 23:22፤ ዛረ. 24:19-22 10ነ ዎይንያ አይፍያ ሙለ ማጻደ ም ካሎዮፓ፤ ሳኣን ዎዳ ዎይንያ አይፍያካ ማጾፓ፤ ሄዋ ህዬሳቶነ በተቶ አጋ። ታን፥ መና ጎዳይ፥ ህንተ ጾሳ።
11“ ‘ህንተ ዉኦፕተ።
“ ‘ዎርዶቶፕተ።
“ ‘እቱ እቱዋ ጭሞፕተ።#ከሳ 20:15፣ 16፤ ዛረ. 5:19፣ 20
12“ ‘ታ ሱንን ዎርዱዋን ጫቆፕተ፤ ያቲደ ህንተ ጾሳ ሱን ቱንሶፕተ። ታን መና ጎዳ።#ከሳ 20:7፤ ዛረ. 5:11፤ ማቶሳ 5:33
13“ ‘ነ ሾሩዋ ሱጎፓ፤ ዎይ ቦንቆፓ።
“ ‘ከራ ኦያ ብታንያ ድርጉዋ ድጋደ፥ እት ቃማነ ነ ማታን አይሶፓ።#ዛረ. 24:14-15
14“ ‘ቱልያ ሸቆፓ፤ ዎይ ቃይ ቆቅያ ስንን ቢያዋ ዎፓ፤ ሽን ኔን ጾሳዉ ያያ። ታን መና ጎዳ።#ዛረ. 27:18
15“ ‘ፕርዳ ፕርዳደ ደሽሶፓ፤ ህዬሳ አ ህዬሳተ ድራዉ ማዳደ ፕርዶፓ፤ ዱርያካ አ ዱረተ ድራዉ ያያደ አጎፓ። ሽን ነ ሾሮ ቱማተን ፕርዳ።#ከሳ 23:6-8፤ ዛረ. 16:19
16“ ‘ነ አሳ ግዶን ኢታ ዝግርሳ አካደ ዩዮፓ።
“ ‘ነ ሾሩዋ ዎያዋ አያነ ኦፓ። ታን መና ጎዳ።
17“ ‘ነ እሻ ነ ዎዛናን እጾፓ።
“ ‘ነ ሾሩዋ ጋሱዋን ኔን ናጋራ ኦና ማላ፥ አ ሴራ።
18“ ‘ኩሽያ ጭጎፓ፤ ቃይ ነ አሳፐ እቶነ ኡሉዋን ቅምያ ኦይቆፓ። ሽን ነ ሾሩዋ ነ ሁጲያዳን ሲቃ። ታን መና ጎዳ።#ማቶሳ 5:43፤ 19:19፤ 22:39፤ ማር. 12:31፤ ሉቃሳ 10:27፤ ሮመ 13:9፤ ጋላ. 5:14፤ ያቆባ 2:8
19“ ‘ታ አዛዞቱዋ ናጋ።
“ ‘ነ መህያፐ እት ቆሞ መህያ ሀራ ቆሞ ዱማ መህያን ብራስሶፓ።
“ ‘እት ሾይቃን ላኡ ቆሞ ዘረ ዘሮፓ።
“ ‘ቃይ ላኡ ቆሙዋፐ ዳደቴዳ ማዩዋ ማዮፓ።#ዛረ. 22:9-11
20“ ‘እት አሳይ ሀራ አሳ ገላናዉ ጊጋ ኡቴዳ ዳንጋጽራትና ግሶፐ፥ ቃይ ሄ ዳንጋጽራታካ ባረ ዳንጋጽረተፐ ዎዘታቤናኖ ግዶፐ፥ ኡንቱንቱ ሙረታናዉ በሴ፤ ሽን እዛ ባረ ዳንጋጽረተፐ ዎዘታቤና ድራዉ፥ ኡንቱንታ ዎናዉ ኮሸና። 21ግዶፐነ ሄ ብታኒ ባረ ናቁዋ ያርሾ ግድያ ዶርሳ ኦርግያ ጾሳ ዱንካንያኮ መና ጎዳ ስን አሆ። 22ቄሲ ሄ ናቁዋ ያርሹዋ ዶርሳ አኪደ፥ ብታኒ ኦዳ ናጋራ መና ጎዳ ስንን አቶ ጊሴ፤ እ ኦዳ ናጋራይካ አቶ ጌተታና።
23“ ‘ህንተ ካናነ ቢታ ገልያ ዎደ፥ አይፍያ ምያ አይ ቆሞ ም ቶኮፐካ፥ ሄ ም አይፍያ ሜተተናዋዳን ፓይድተ፤ ሄዙ ላይይ ዉራናዉ ሄ ም አይፊ ሜተተና፤ አ ሞፕተ። 24ኦይደን ላይን ሄ ም አይፊ ኡባይ መና ጎዳዉ ጋላታ ሺሽያ ጌሻ ያርሹዋ ግዳናዋ። 25ሽን ሄ ም አይፊ ህንተንቶ ሎይ ዳራና ማላ፥ እቼሸን ላይ አይፍያ ሚተ። ህንተ ሀዋዳን ኦፐ፥ ህንተ ም አይፊ ዳራና። ታን መና ጎዳይ ህንተ ጾሳ።
26“ ‘ሱይ አ ግዶን ደእያ አይ አሹዋካ ሞፕተ።
“ ‘ካዮፕተ ዎይ ሻሬቾፕተ።#ዶመ 9:4፤ ዎጋ 7:26-27፤ 17:10-14፤ ዛረ. 12:16፣ 23፤ 15:23፤ 18:10
27“ ‘ህንተ ሁጲያ ብናና ጋርሳና ዩሽ አደ ቃንጾፕተ፤ ቃይ ህንተ ቡቻካ ዩሽ አደ ቃንጾፕተ።#ዎጋ 2:5፤ ዛረ. 14:1
28“ ‘ሀይቄዳ አሳ ድራዉ ህንተ ቦላ ቃንጸሬፕተ፤ ዎይ ጫቻ ማላታ ህንተ ቦላን ከሶፕተ። ታን መና ጎዳ።
29“ ‘ቢታይ ዎዳላ ቱናተን ኩሜዳዋ ግደና ማላ፥ ነ ናቶ ሻርሙጻ ኦሶ አ እማደ ቱንሶፓ።#ዛረ. 23:17
30“ ‘ታ ሳምባታቱዋ ቦንችተ፤ ታዉ ጎይንያ ሳኣካ ቦንችተ። ታን መና ጎዳ።#ዎጋ 26:2
31“ ‘ሞይትልያ ሃሳይስያዋንቱኮነ ሻሬቾቱዋኮ ቦፕተ፤ ህንተ ቱነና ማላ ኡንቱንታ ኮዮፕተ። ታን፥ መና ጎዳይ፥ ህንተ ጾሳ።#ዛረ. 18:11፤ 1 ሳሜላ 28:3፤ 2 ካታ. 23:4፤ ኢሳ. 8:19
32“ ‘ፑሉሜዳ አሳነ ጭሜዳ አሳ በእያ ዎደ ኡቴዳ ሳኣፐ ደንዳ ኤቃ፤ ኡንቱንታ ቦንቻ፤ ነ ጾሳዉ ያያ። ታን መና ጎዳ።
33“ ‘ህንተ ጋድያን ህንተናና ደእያ በተቱዋ ቦላን ሱገባ ኦፕተ።#ከሳ 22:21፤ ዛረ. 24:17-18፤ 27:19 34ህንተ ጋድያን ህንተናና ደእያ በተ አሳ ህንተ ቢታ አሳዳን ጼልተ፤ አ ህንተ ሁጲያዳን ሲቅተ። አያዉ ጎፐ፥ ህንተካ ካሰ ግብጼ ጋድያን በተ ግዲደ ደኤድታ። ታን፥ መና ጎዳይ፥ ህንተ ጾሳ።
35“ ‘ህንተ ጌሳ ልክያባን፥ ሚዛናን ዎደ ልክያባንነ ማክያባን ዎርዶቶፕተ።#ዛረ. 25:13-16፤ ሌም. 20:10፤ ህዝ. 45:10 36ህንተ ኪሉዋ ሚዛናይ፥ ህንተ ማክያባይነ ልክያ ሚሻቱ ኡባይ ልከ ግድኖ። ታን ህንተና ግብጼ ጋድያፐ ከሳደ አሄዳ መና ጎዳ ህንተ ጾሳ። 37ህንተ ታ ህግያነ ታ አዛዙዋ ኡባ ናግተነ ኦተ። ታን መና ጎዳ ያጋ’ ” ያጌዳ።
Currently Selected:
ዎጋ 19: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia