ዎጋ 21
21
ቄሳቱዋ ጌሻተ
1መና ጎዳይ ሙሳ ሀዋዳን ያጌዳ፥ “ቄስያ ግድያ አሮና አቱማ ናናቶ ሀዋዳን ያጋደ ኦዳ፤ ‘ህንተፐ ኦንነ 2ባረ ማታ ዳቦ፥ ባረ ዳይ፥ ባረ አዉዋ፥ ባረ አቱማ ናኣ፥ ባረ ማጫ ናት፥ ባረ እሻ፥ 3ዎይ አስና ገለናን፥ ደእያ ባረ ምቻት አሃ ግዳና ዮፐ፥ ሀይቄዳ አሳ አሃ ኦዋነ ቦቺደ፥ ባረና ቱንሶፖ። 4ቃይ አኩዋንነ ገሉዋን ዳቦቴዳ አሳ አሃ ቦቺደካ ባረና ቱንሶፖ።
5“ ‘ቄሳቱ ሀይቄዳዎ ካዮታናዉ ባረንቱ ሁጲያ ሜደቶፕኖ፤ ባረንቱ ቡቻካ ቃንን ቃንጾፕኖ፤ ዎይ ቃይ ባረንቱ ቦላካ ቃንጸሬፕኖ።#ዎጋ 19:27-28፤ ዛረ. 14:1 6ኡንቱንቱ ባረንቱ ጾሳዉ ጌሻ ግድኖ፤ ቃይ ባረንቱ ጾሳ ሱንካ ቱንሶፕኖ። አያዉ ጎፐ ኡንቱንቱ መና ጎዳዉ ታማን ጹጊደ ያርሽያ፥ ቁማ ያርሹዋ ሺሽያዋንታ፤ ሄዋ ድራዉ፥ ኡንቱንቱ ጌሻ ግዳናዉ በሴ።
7“ ‘ቃይካ ቄሳቱ ሻርሙጻ ማጫ አሳ፥ ዎዶሮተይ አከት ድጌዳ ማጫ አሳ፥ ዎይ አስናይ የዴዳ ማጫ አሳ አኮፕኖ። አያዉ ጎፐ፥ ቄሳቱ ባረንቱ ጾሳዉ ጌሻ። 8ቄሲ ህንተ ጾሳዉ ቁማ ያርሹዋ ሺሽያዋ ግድያ ድራዉ፥ እ ሀራ አሳፐ ዱማቶ። ታን ህንተና ጌሽያ ህንተ መና ጎዳይ ጌሻ ግድያ ድራዉ፥ እካ ጌሻ ግዶ። 9አይ ቄስያ ናቶ ግዶፐካ ሻርሙጻደ ባረና ቱንሶፐ፥ ሄና ባረ አዉዋ ካዉሻዱ። እዛ ታማን ጹገታደ ሀይቁ።
10“ ‘ቄስያ ኡባቱዋ ካፑ፥ አ ሁጲያን ኦከትያ ዛይቲ ጉኬዳ ድራዉነ እ ቄሰተ ማዩዋ ማያናዉ ዱማቴዳ አሳ ግድያ ድራዉ፥ ባረ ሁጲያ ብናና ካሎ ዎፖ፤ ዎይ ባረ ማዩዋካ ፔፖ። 11አይ አሃ ግዶፐካ፥ ደእያ ሳኣ እ ገሎፖ፤ ሀራይ አቶ ባረ አዉዋ ዎይ ባረ ዳይ አሃ ግዶፐካ፥ ባረና ሄዋን ቱንሶፖ። 12አ ጌሻናዉ ኦክያ ጾሳ ዛይቲ አ ቦላን ደእያ ድራዉ፥ ቄሲ ጾሳ ዱንካንያፐ ከሶፖ፤ ጾሳ ዱንካንያካ ቱንሶፖ። ታን መና ጎዳ።
13“ ‘ቄሲ ዎዶሮ ማጫ ናቶ አኮ። 14አስናይ ሀይቄዳ ምሽራቶ፥ ዎይ አስናይ የዴዳ ምሽራቶ፥ ዎይ ዎሹማ ምሽራቶ አኮፖ። ሽን ባረ አሳ ግዶፐ ዎዶሮ ማጫ ናቶ ዶሪደ አኮ። 15ያናና ዮፐ፥ እ ባረ አሳ ግዶን ባረ ዘረ ግድያ ባረ ናናቱዋ ቱንሳና። ታን አ ጌሽያዌ፥ መና ጎዳ ያጋ’ ” ያጌዳ።
16መና ጎዳይ ሙሳ፥ ሀዋዳን ያጌዳ፤ 17“ኔን አሮናዉ ሀዋዳን ያጋደ ኦዳ፤ ‘ስንና ይያ ነ ዘረፐ ቦላይ ትላ ግደና አሳይ ኦንነ ቁማ ያርሹዋ ታዉ እማናዉ ሺቆፖ። 18አያዉ ጎፐ ቦላይ ትላ ግደና አሳይ ኦንነ ሺቃናዉ በሰና። ቆቃ፥ ዎይ ዎባ፥ ዎይ ደሙ ናርጰቴዳ፥ ዎይ ፓጫ ቦላይ ደእያ አሳይ፥ 19ዎይ ገድያ ዎይ ኩሽያ ስላይ፥ 20ዎይ ቁናይ፥ ዎይ ድንኪ፥ ዎይ አይፊ ሳክያ አሳይ፥ ዎይ ፑሱ ኦይቄዳ አሳይ፥ ዎይ እላሁ ኦይቄዳ አሳይ፥ ዎይ ጎይሮ ግድናካ ቦላይ ትላ ግደና አሳይ፥ ኦንነ ሺቆፖ። 21ቄስያ አሮና ዛርያፐ ቦላይ ትላ ግደና አሳይ ኦንነ መና ጎዳዉ ታማን ጹግያ ያርሹዋ ሺሻናዉ ሺቆፖ። አዉ ቦላይ ትላ ግደናዋ ግዶዋፐ ህን ባጋን፥ ባረ ጾሳዉ ቁማ ያርሹዋ ሺሻናዉ እ በሰና። 22እ ጌሻ ቁማነ ቃይ ጌሻ ኡባፐ እቱዋ ግዴዳ ጌሻ ያርሹዋ ባረ ጾሳ ቁማካ ማናዉ ዳንዳዬ። 23ሽን አዉ ቦላይ ትላ ግደና ድራዉ፥ እ ታ ዱንካንያ ቱንሰናዳን፥ ጋርዱዋኮ ዎይ ያርሽያ ሳኣኮ ሺቆፖ። አያዉ ጎፐ፥ ኡንቱንታ ጌሽያዌ ታን መና ጎዳ ያጋ’ ” ያጌዳ።
24ሙሴ አሮናዉ፥ አ አቱማ ናናዉነ እስራኤልያ አሳዉ ኡባዉ ሀዋ ኦዴዳ።
Currently Selected:
ዎጋ 21: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia