ዎጋ 5
5
ናጋራ ያርሹ ሺቅያ ጋሱዋ
1“ ‘አይ አሳይነ ማርካዉ ጼሰቲደ ባረ በኤዳዋ ዎይ ባረ ኤሬዳዋ ጉታራን ማርካተናን እጾፐ፥ ሄዌ አዉ ናጋራ፤ ሄዋ ድራዉ እ ባረ ናጋራን ኦሸቴ።
2“ ‘ቃይ አይ አሳይነ ኤረናን ደኢደ ቱናባ፥ ዶኣ ባኩታ ዎይ መህያ ባኩታ ዎይ ሳኣና ጎሸትያ ዶአቱዋ ባኩታ ቦቾፐ፥ ቱና ግድያዋ እ ኤሬዳ ዎድያፐ ዶሚደ ባይዛንቻ ግዴዳ።
3“ ‘ቃይካ አይ አሳይነ ኤረናን ደኢደ፥ አሳ ቦላፐ ጎግያ ቱንስያባ አያ ግድናካ ቦቾፐ፥ ሄዌ ቱና ግድያዋ እ ኤሬዳ ዎድያፐ ዶሚደ ባይዛንቻ ግዴዳ።
4“ ‘ዎይ ቃይ አይ አሳይነ ኢታባ ግድና ሎኦባ ኦናዉ ኤለካ ጫቆፐነ ባረ ጫቄዳዋካ እ አኬከናን ዮፐ፥ እ አኬኬዳ ዎድያፐ ዶሚደ ባይዛንቻ ግዴዳ።
5“ ‘አይ አሳይነ ሀ ኦደቴዳ ባይዛቱዋፐ እቱዋ ኦዳዋ ግዶፐ፥ ባረ ኦዳ ናጋራ ፓጾ። 6እ ባረ ኦዳ ናጋራ ድራዉ መና ጎዳዉ ባረ ዉድያ ግዶፐ ማጫ ዶርሳ ዎይ ማጫ ዴሻ ናጋራ ያርሹዋ ኦደ ሺሾ። ቄሲ አኪደ፥ ሄ ብታንያ ናጋራ አቶ ጊሳናዋ።
7“ ‘አሳይ ባረ ኦዳ ናጋራዉ ያርሻናዉ፥ ዶርሳ ዎይ ዴሻ ሻማናዉ አዉ ሻሉ ግዳና ዮፐ፥ ላኡ ሀራጰቱዋ፥ ዎይ ላኡ ዶጎማቱዋ፥ እቱዋ ናጋራ ያርሹዋ ኦደ፥ ቃይ እቱዋ ጹግያ ያርሹዋ ኦደ መና ጎዳዉ አሆ። 8እ ኡንቱንታ ቄስያዉ እሞ። ቄሲ ላኡ ሀራጰቱዋፐ እትንዉ ቆያ ሙጨናን ጮ ምርቂደ፥ ናጋራ ያርሹዋ ኦደ ያርሾ። 9ያቲደ ሄ ናጋራ ያርሹዋ ሱፐ አማሬዳዋ አኪደ፥ ያርሽያ ሳኣ ምይያን ጫጫፎ፤ አቴዳ ሱ ያርሽያ ሳኣፐ ጋርሳ ባጋና ጉሶ፤ ሄዌ ናጋራ ያርሹዋ። 10የንኮ ሀራጳቶ ቃይ ህጊ አዛዝያዋዳን፥ ጹግያ ያርሹዋ ኦደ ጹጎ። ቄሲ ሄዋዳን ኦደ፥ ብታኒ ኦዳ ናጋራ አቶ ጊሳናዉ ያርሹዋ ያርሼ፤ ብታኒካ ባረ ናጋራፐ ማረታናዋ።
11“ ‘ሽን እት ኡራዉ ላኡ ዎጋ ዶጎማቱዋ ዎይ ላኡ ሀራጰቱዋ አሀናዉ ሻሉ ግዳና ዮፐ፥ ላኡ ኪሎ ግራመ ሊቆ ልያ ባረ ናጋራዉ ሺሽያ ያርሹዋ ኦደ አሆ። ሄ ሊ ናጋራ ያርሹዋ ግድያ ድራዉ፥ ዎጋራ ዛይቲ ዎይ እጻናይ አን ጉጀቶፖ። 12እ ሄዋ አሂደ ቄስያዉ እሞ፤ ቄሲ ሄ ልያፐ እት ኩሽያ ኩን አኪደ፥ መና ጎዳዉ ሺሽያ ሀራ ያርሹዋ ቦላ ዎደ፥ ሀሳይስያዋ ኦደ ያርሽያሳን ደእያ ታማን ጹጎ፤ ሄዌ ናጋራ ያርሹዋ። 13ሀ ጌተቴዳዋንቱፐ ሀቃዋንነ ግዶ ብታኒ ኦዳ ናጋራዉ ቄሲ ሀዋዳን ኦደ፥ ብታኒ ኦዳ ናጋራ አቶ ጊሴ፤ ብታኒካ ባረ ናጋራፐ ማረታናዋ። ካ ያርሹዋዳንካ አቴዳዋ ቄሲ አኮ ያጋደ ኦዳ’ ” ያጌዳ።
ናቁዋ ያርሹዋ
14መና ጎዳይ ሙሴዉ ሀዋዳን ያጊደ ኦዴዳ፤ 15“ኦንነ መና ጎዳዉ ጌሽ ዎዳ ሚሻቱዋ ቦላ አማነተናን ዮፐ ቃይ ኤረናን ናጋራ ኦፐ፥ ባረ ናቆ ባረ ዉድያ ግዶፐ ትላ ቦላና ደእያ እት ዶርሳ ኦርግያ መና ጎዳዉ አሆ። አ ጋቲካ መና ጎዳ ዱንካንያን ኤረትያ ሚዛናን ዎና ኤረቶ፤ ሄዌ ናቁዋ ያርሹዋ። 16መና ጎዳዉ ዱማይ ዎዳ ሚሻቱዋ ቦላ እ ናጋራ ኦዳ ድራዉ፥ እ ሄ ሚሻቱዋ ጋትያ ጭጎ፤ ካሰ ጋትያ ቦላ ጼቱዋፐ ላታሙ ኩሽያ ጉጂደ ቄስያዉ እሞ። ቄሲ ሄ ናቁዋ ያርሾ አሄዳ ዶርሳ ያርሺደ፥ ብታንያ ናጋራ አቶ ጊሴ፤ ብታኒካ ባረ ናቁዋፐ ማረታናዋ።
17“አይ አሳይነ ኤረናን ደኢደ፥ መና ጎዳይ፥ ‘ኦፓ’ ጊደ አዛዜዳዋፐ እቱዋ ኦደ ናጋራን ገሎፐ፥ እ ኤራና ዮፐ ባይዛንቻ ግድያ ድራዉ፥ ባረ ናጋራን ኦሸቴ። 18እ ባረ ዉድያፐ ትላ ቦላና ደእያ እት ዶርሳ ኦርግያ ናቁዋ ያርሾ ቄስያኮ አሆ። ሄ ዶርሳይ ናቆ ጭግያ ጋትያ ከስያዋ ግዶ፤ ያቶፐ ቄሲ ሄ ዶርሳ ያርሺደ፥ ብታንያ ናቁዋ አቶ ጊሴ፤ ብታኒካ ባረ ናቁዋፐ ማረቴ። 19ሄዌ ናቁዋ ያርሹዋ። እ ቱሙካ መና ጎዳ ናቄዳ” ያጌዳ።
Currently Selected:
ዎጋ 5: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia