ዎጋ 8
8
አሮነነ አ ናናቱ ቄስያ ግድያ ዎጋነ ኡንቱንቱ ኦሱዋ
(8:1—10:20፤ ከሳ 29:1-37)
1መና ጎዳይ ሙሴዉ ሀዋዳን ያጊደ ኦዴዳ፤ 2“አሮናነ አ አቱማ ናናቱዋ ቃይ ኡንቱንቱና እትፐ፥ ቄሳተ ማዩዋ፥ ኦክያ ዛይትያ፥ ናጋራ ያርሾ ሹክያ ኮሩማ፥ ላኡ ዶርሳ ኦርገቱዋነ፥ እርሹዋ የገናን ኡኬዳ ኡክ ዎዳ ማሶፍያ አካደ ያ። 3ቃይ እስራኤልያ አሳ ኡባካ ጼሳደ፥ ዱንካንያ ካረ ሺሻ” ያጌዳ።
4ሙሴ መና ጎዳይ አዛዜዳዋዳን ኦዳ፤ አሳይካ ኡባይ ዱንካንያ ካረን ሺቄዳ። 5ሙሴ አሳዉ፥ “ኦና ማላ መና ጎዳይ አዛዜዳዌ ሀዋ” ያጌዳ።
6ሙሴ አሮናነ አ አቱማ ናናቱዋ አሂደ፥ ሃን ሜጬዳ። 7አሮና ቃምሽያ ማይዜዳ፤ ዳንጩዋካ ዳንጭሴዳ። ቃይ አዱሳ ቃምሽያ ማይዚደ፥ አ ቦላን ኤፉድያ ማይዜዳ። ኤፉድያ ሂላቲደ ዳዴዳ ሳቂያን አሮናና ጋደ ቃቼዳ። 8ቃይ ትራን ዎያዋ አሮና ቦላን አደ፥ አ ግዶን ኡሪምያነ ቱሚምያ ዎዳ። 9ቃይካ አሮና ሁጲያን ሻሽያ ኤንጩርሳ ዎዳ። መና ጎዳይ ሙሳ አዛዜዳዋዳን ሄ ኤንጩርሳ ቦላን ስን ባጋና ዎርቃ ማዳልያ፥ ዎርቃፐ መዳ ካላቻ ምስልያ ዎዳ።
10ያቶዋፐ ጉይያን ሙሴ ኦክያ ዛይትያ አኪደ፥ ዱንካንያነ ዱንካንያ ግዶን ደእያ ሚሻ ኡባ ኦኬዳ፤ ኡንቱንታ ጌሼዳ። 11ቃይ ሄ ዛይትያፐ አኪደ፥ ያርሽያ ሳኣ ቦላ ላፑ ገደ ጫጫፌዳ፤ ያርሽያ ሳኣ፥ አ ሚሻቱዋ፥ ሜቻ ከርያነ አ ዎያዋ፥ ጌሻናዉ ሄ ዛይትያን ኦኬዳ። 12ቃይ ሄ ኦክያ ዛይትያፐ አማራ አሮና ሁጲያን ትጊደ፥ አ ጌሼዳ። 13መና ጎዳይ ሙሳ አዛዜዳዋዳን፥ ሙሴ አሮና አቱማ ናናቱዋ ስንዉ አደ፥ ቃምሽያ ማይዜዳ፤ ዳንጩዋን ዳንጭሴዳ። ኡንቱንቱ ሻሽያ ኤንጩርሳ ዎዳ።
14ሄዋፐ ጉይያን፥ ናጋራ ያርሾ ኮሩማ ሙሴ አዳ፤ አሮንነ አ አቱማ ናናይ ሄ ኮሩማ ሁጲያን ባረንቱ ኩሽያ ዎድኖ። 15ሙሴ ሄ ኮሩማ ሹኬዳ፤ አ ሱፐ ባረ ብራያን አኪደ፥ ያርሽያ ሳኣ ካጨቱዋ ኦኪደ፥ ያርሽያ ሳኣ ጌሼዳ፤ ቃይ ያርሽያ ሳኣ ናጋራ አቶ ጊሳናዉ አቴዳ ሱ አፐ ጋርሳና ጉሲደ፥ ጾሳዉ ጌሼዳ። 16ቃን አሹዋ ካሜዳ ሀንዳ ኡባ፥ ትርያ ጼራ ቦላ ደእያ ሞያ፥ ላኡ ክላሆቱዋነ ኡንቱንታ ካሜዳ ሀንዳ አኪደ፥ ሙሴ ያርሽያ ሳኣ ቦላን ዎደ ጹጌዳ። 17ሽን መና ጎዳይ ሙሳ አዛዜዳዋዳን፥ ጋልባ፥ ኮሩማፐ አቴዳዋነ ቶጭያ ዱንካኔዳ ሳኣፐ ጋጻ ከሲደ፥ ታማን ጹጌዳ።
18ያት ስሚደ ሙሴ ጹግያ ያርሾ ሀንያ ዶርሳ ኦርግያ አሄዳ፤ አሮንነ አ አቱማ ናናይ ሄ ዶርሳ ኦርግያ ሁጲያን ባረንቱ ኩሽያ ዎድኖ። 19ሙሴ ሄ ዶርሳ ኦርግያ ሹኬዳ፤ አ ሱ ያርሽያ ሳኣ ምይያ ኡባን ጉሴዳ። 20ቃይ ዶርሳ ኦርግያ አሹዋካ አ ቆሙዋን ቆሙዋን ቃንጼዳ፤ ቃንጸ፥ ሁጲያነ ሞያ ያርሽያ ሳኣ ቦላ ዎደ ሙሴ ጹጌዳ። 21ቃን አሹዋነ ገደቱዋ ሃን ሜጮዋፐ ጉይያን፥ ዶርሳ ኡባና መና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ኦደ፥ መና ጎዳይ ሙሳ አዛዜዳዋዳን ያርሽያ ሳኣ ቦላን ዎደ ጹጌዳ።
22ሄዋፐ ጉይያን፥ ቄሰተዉ ኦከትያ ዎደ ሺሽያ ላኤን ዶርሳ ሙሴ አሄዳ፤ አሮንነ አ አቱማ ናናይ ሄ ዶርሳ ሁጲያን ባረንቱ ኩሽያ ዎድኖ። 23ሙሴ ሄ ዶርሳ ሹኬዳ፤ አ ሱፐ አኪደ፥ አሮናዉ ኡሸቻ ሀይ ጼራ፥ ኡሸቻ ኩሽያ ዎጋ ብራያነ፥ ኡሸቻ ገድያ ዎጋ ብራያ ኦኬዳ። 24ቃይ ሙሴ አሮና አቱማ ናናቱዋካ ስንዉ አሂደ፥ ሄ ሱፐ አኪደ፥ ኡንቱንቱ ኡሸቻ ሀይ ጼራ፥ ኡንቱንቱ ኡሸቻ ኩሽያ ዎጋ ብራያነ ኡንቱንቱ ኡሸቻ ገድያ ዎጋ ብራያ ኦኬዳ። ሄዋፐ ጉይያን፥ ሙሴ አቴዳ ሱ ያርሽያ ሳኣ ምይያ ኡባን ጉሴዳ።
25ያቲደ ሞዋ፥ ናስያ፥ ቃን አሹዋ ማዬዳ ሞያ፥ ትርያ ጼራ ቦላ ደእያ ሞያ፥ ላኡ ክላሆቱዋነ ኡንቱንታ ማዬዳ ሀንዳነ ኡሸቻ ገድያ አኬዳ። 26ቃይ እርሹዋ የገናን ኡኬዳ ኡክ ዎያ መና ጎዳ ስንን ደእያ ማሶፍያፐ እት ኮምፑዋ፥ ዛይትያና ኡኬዳ እት ኡክነ እት ሌኦ ኡክ አኪደ፥ ሀዋንታ ሞያ ቦላንነ ኡሸቻ ገድያ ቦላን ዎዳ። 27እ ሀ ቁማ ኡባ አሮና ኩሽያንነ አ አቱማ ናናቱዋ ኩሽያን ዎዳ፤ ኡንቱንቱ መና ጎዳ ስንን ቃያ ያርሹዋ ኦደ ቃድኖ። 28ሄዋፐ ጉይያን፥ ሙሴ ሄ ቁማ ኡንቱንቱ ኩሽያፐ አክ፥ ጹግያ ያርሹዋና ጋደ፥ ቄሰተዉ ኦከትያ ዎደ መና ጎዳዉ ታማን ጹጊደ ሺሽያ፥ ሳዉዋ ቶሹኩ ግያ ያርሹዋዳን፥ ያርሽያ ሳኣ ቦላን ዎደ ጹጌዳ። 29ቃይ ሙሴ አንጎሱዋ አኪደ፥ ቃያ ያርሹዋ ኦደ መና ጎዳ ስንን ቃዳ፤ መና ጎዳይ ሙሳ አዛዜዳዋዳን፥ ቄሳተዉ ኦከትያ ዎደ ያርሽያ ዶርሳ ኦርግያ አሹዋፐ ሄዌ ሙሳ ጋክያ አ ግሹዋ።
30ሙሴ ኦክያ ዛይትያፐነ ያርሽያ ሳኣ ቦላን ደእያ ሱፐ አኪደ፥ አሮና ቦላነ አ ማዩዋ ቦላ፥ ቃይ አ አቱማ ናናቱዋ ቦላነ፥ ኡንቱንቱ ማዩዋ ቦላካ ጫጫፌዳ፤ ያቲደ አሮናነ አ ማዩዋ ቃይ አ ናናቱዋነ አ ናናቱዋ ማዩዋካ ጌሼዳ።
31ሙሴ አሮናነ አ አቱማ ናናቱዋ ሀዋዳን ያጌዳ፤ “አሹዋ ጋከትያ ዱንካንያ ካረን ዶይስተ፤ ‘አሮንነ አ ናናይ ሄዋ ሚኖ’ ያጋደ ታን አዛዜዳዋዳን፥ ቄሳተዉ ኦከትያ ዎደ ሺሽያ ያርሹዋ ዎያ ማሶፍያ ግዶን ደእያ ያርሹዋ ኡክና ሄዋን ሚተ። 32ሄ አሹዋፐነ ኡክፐ ፓላሄዳዌ ደኦፐ ታማን ጹግተ። 33ቄሳተዉ ኦክያ ዎጋይ ላፑን ጋላሳ አክያ ድራዉ፥ ሄ ህንተ ቄሳተዉ ኦከትያ ላፑን ጋላሳይ ዉራናዉ፥ ዱንካንያ ፐንገፐ ካረ ከሶፕተ። 34ሀ ሀች ኦሰቴዳዌ መና ጎዳይ አዛዝና፥ ህንተ ናጋራ አቶ ጊሳናዉ ኦሰቴዳ። 35ዱንካንያ ፐንግያን ላፑን ጋላሳ ኩመን ጋላስነ ቃማነ ታክተ፤ መና ጎዳ ዎጋካ ናግተ፤ እጾፐ ህንተ ሀይቃና። ታና መና ጎዳይ አዛዜዳዌ ሀዋ” ያጌዳ። 36አሮንነ አ ናናይ መና ጎዳይ ሙሴ ባጋና አዛዜዳዋ ኡባ ኦድኖ።
Currently Selected:
ዎጋ 8: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia