ሉቃሳ ምሽራቹዋ 20

የሱሳ ማታ ቦላ ደንዴዳ ኦሻ

(ማቶሳ 21:23-27፤ ማር. 11:27-33)

1እት ጋላስ የሱስ አሳ ጌሻ ጎልያን ታማርሲደነ ምሽራቹዋ ቃላ ኦዲደ ደእያ ዎደ፥ ቄሳቱዋ ካፓቱነ ሙሴ ህግያ ታማርስያዋንቱ ጋድያ ጭማቱዋና እትፐ የሱሳኮ ዬድኖ። 2ኡንቱንቱካ፥ “ሀ የዉዋ ኔን ኦያዌ አይ ማታነንቶ ኦዳ፤ ሀ ማታካ ነዉ እሜዳዌ እ ኦኔ?” ያጊደ ኦቼድኖ። 3እካ፥ “ታ ህንተና እት ኦሻ ኦችያዌ ደእያዋ አነ ዛርተ። 4ዮሃንሳ ጽንቃታይ ጾሳፔ ዎይ አሳፔ?” ያግ ኦቼዳ።

5ኡንቱንቱ ባረ ግዶን ማቀቲደ፥ “ጾሳፐ ጎፐ፥ ሄዋ ግዶፐ ‘አያዉ አማንበይክቴ’ ኑና ያጋናዋ፤ 6‘አሳፐ’ ጎፐ፥ አሳይ ኡባይ ዮሃንስ ናብያ ግድያዋ አማንያ ድራዉ ሹቻን ኑና ደቻናዋንታ” ያጌድኖ። 7ሀዋስ፥ “ሀቃፐ ዬደንቶ ኤሮኮ” ጊደ አዉ ዛሬድኖ። 8የሱስካ፥ “ሀዋ ግዶፐ ታንካ፥ ታን ኦ ማታን ሀ የዉዋ ኦይታንቶ ህንተንቶ ኦድከ” ያጌዳ።

9ሀዋፐ ስሚደ የሱስ አሳዉ ሀ ሌምሱዋ ያግ ኦዱዋ ዶሜዳ:#ኢሳ. 5:1 “እት ብታኒ ዳሮ ዎይንያ ቱራቱዋ ቶኬዳ። ጎሻንቻቶ ኮዉ እሚደ፥ እ ህን ሀራ ጋድያ ቢደ ጮራ ዎድያ ጋምኤዳ። 10ዎይኒ አይፍያ አይፎ ዎደ፥ ዎይንያ ጎሻ ጎዳይ ባረና ጋክያዋ አሀናዳን እት ቆማ ኮዋቱዋኮ ኪቴዳ። ኪተት ቤዳዋካ ኦቢደ፥ መላ ኩሽያ የዴድኖ። 11ሄዋፐ ሀራ ቆማ ኪቴዳ። ኡንቱንቱ ሄዋካ ቃይ ኦቢደ፥ ቶቺደ፥ መላ ኩሽያ የዴድኖ። 12ሀእካ ሀራ ሄዘንያ ቆማ ኪቴዳ። ኡንቱንቱካ ቃይ አ ማሱንደ፥ ህን ካረ ኦሌድኖ።

13“ሄ ዎይንያ ቱራ ጎዳይካ፥ ‘ስም አያ ኦ? አነ ሀእ ታ ዶስያ ናኣ ኪታና፤ ኦን ኤር አ ቦንቾፐነ’ ጌዳ። 14ጎሻንቻቱ ቃይ ናኣ በኤዳ ዎደ፥ ‘ሀዌ አ ላትያዋ ግዶ ድራዉ፥ ሀይተ ዎይተ፤ ሄዋፐ ጉየ፥ ቢታይ ኑሳ ግዳናዋ’ ጊደ ዞረቴድኖ። 15ዎይንያ ቱራ ሳኣፐ፥ ህን ካረዉ ከሲደ አ ዎድኖ።

“ዎይንያ ቱራ ጎዳይካ ኡንቱንታ አያ ኦንዴሻ? 16ዮፐ ሄ ጎሻንቻቱዋ፥ ዎናዋ፤ ዎይንያ ቱራ ሳኣካ ሀራንቶ እማናዋ” ያጌድኖ።

አሳቱካ ሀዋ ስሶ ዎደ፥ “ሀዋ ማላባ አሆፖ” ያጌድኖ። 17የሱስካ ህን ኡንቱንቱኮ ጼሊደ፥

“ ‘ስም ሹቻ ጎልያ ኬጽያዋንቱ ካዳ ሹቻይ፥

እ ዋና ጎልያ ምንስያ ሁጰ ሹቻ ግዴዳ’

ጌተቲደ ጻፈቴዳዋ ብለይ አዬ?#ማዝ. 118:22 18ሀ ሹቻ ቦላን ኩንድያ ኡባይ መኤረቴ፤ ሹቻይካ አ ቦላን ኩንድያ ኡባይ ቡንቼታናዋ” ያጌዳ።

ጊራ፥ ጊራኔ አጋኔ ግያ ኦሻ

(ማቶሳ 22:15-22፤ ማር. 12:13-17)

19ሙሴ ህግያ ጻፍያዋንቱነ ቄሳቱዋ ካፓቱ የሱስ ሃሳዬዳ ሌምሱ፥ ኡንቱንቱ ቦላን ጌተቶዋ ኤሮ ድራዉ፥ ሄ ሳትያንካ አ ኦይቃናዉ ኮዬድኖ። ሽን አሳዉ ያዬድኖ። 20የሱሳ፥ ሄ ጋድያ ሞድያዎነ አ ማታዉ አደ እማናዉ አ ዶናፐ ከስያ ቃላን ኦይቃናዉ እንጀትያ ዎድያ ናጊኖ። ሄዋ ድራዉ ጌሻ ማላቲደ ኦይናዉ ዎችያዋንታ ኪቴድኖ። 21ሄ ኪተቶዋንቱካ የሱሳ፥ “ታማርስያዎ፥ ኔን ቱማ የዉዋ ሃሳይያዋነ ታማርስያዋ፥ ሄዋዳንካ ቃይ ጾሳ ኦግያ ቱማተን ታማርስያዋነ ኦስነ ዱማየናዋ ኑን ኤሬቶ። 22ቃይካ ኡንቱንቱ፥ ሮማ ካትያ ቄሳረዉ ጊራ ጭጋናዉ ኮሺ ዎይ ኮሸኔ?” ያግ ኦቼድኖ።

23እ ቃይ ኡንቱንቱ ደሻተ ኤሪደ፥ 24“አነ ታና እት ዲናርያ#20:24 ድናርያ፦ ሄ ዎደ ሮማ ቢታ አሳይ ጎኤትያ ሚሻ። በስተ፤ ሄዋ ቦላን ደእያ ምስሊነ ጻፈቶዌ ኦና በሲ?” ጌዳ። 25ኡንቱንቱካ፥ “ቄሳረዋ” ጊደ ዛሬድኖ። እኔካ፥ “ሄዋ ግዶፐ: ቄሳረዋ፥ ቄሳረዉ እምተ፤ ጾሳዋ፥ ጾሳዉ እምተ” ያጌዳ። 26ኡንቱንቱካ፥ እ ሃሳዬዳ ቃላን አሳ ስንን ኦይቃናዉ ዳንዳይበይክኖ። አ ዛሩዋን ማላለቲደ ጮኡ ጌድኖ።

ሀይቁዋፐ ደንዱዋባ ኦሻ

(ማቶሳ 22:23-33፤ ማር. 12:18-27)

27ሳዱቃዋናቱፐ እቱ እቱ የሱሳኮ ዪደ፥ ኦሻ አዉ ሺሼድኖ።#ኪታ 23:8 28ኡንቱንቱካ የሱሳ፥#ዛረ. 25:5 “ታማርስያዎ፥ እት ብታኒ ማቻቶ አኪደ ናኣ የለናን ሀይያዋ ግዶፐ፥ ምሽራቶ ሄዋ እሻይ ላታ አክ ናኣ የሊደ ባረ እሻዉ ዘረ ዎና ማላ ሙሴ ኑዉ ጻፌዳ። 29እት ዎድያን ላፑ እሻቱ ደእያዋንቱፐ፥ ባይራይ ማቻቶ አኪደ የለናን ሀይቂ አጌዳ። 30ላኤንያዌካ እዞ ላቴዳ። 31ሄዘንያዌካ ቃይ እዞ አኬዳ፤ ላፑናቱካ እዞ አኪደ ናኣ የለናን ሀይቄድኖ። 32ዉርሰን ምሽራታካ ሀይቃ አጋዱ። 33ስም ላፑናቱካ ሄ ምሽራቶ አኬዳ ድራዉ፥ ሀይቁዋፐ ደንዴዳ ዎደ፥ እዛ ኦስ ማቼ ግዳኔ?” ያግ ኦቼድኖ።

34የሱስካ፥ “ሀ አላምያ ናናይ አኪኖነ አከቲኖ። 35ሽን ሀይቁዋፐ ደንዲደ፥ ስንፐ ይያ ዎድያን ደአናዉ በስያዋንቱ አክክኖነ አከትክኖ። 36ኡንቱንቱ ጾሳ ኪታንቻ ማላቲደ ደእያ ድራዉ፥ ሄዋፐ ስሚደ ሀይቂክኖ። ሀይቁዋፐ ደንድያዋንታ ግድያ ድራዉ ኡንቱንቱ ጾሳ ናና። 37ሙሴ፥ ጾሳይ አዉ ቆንጬዳ ዎራባ ጻፌዳ ታርክያ ጋርሳን፥ ጎዳ ጾሳ፥ ‘አብራሃሞ ጾሳ፥ ይሳቃ ጾሳ፥ ያቆባ ጾሳ’ ያጊደ ጼሱሳይ፥ ሀይቃዋንቱ ደንድያዋ በሴ።#ከሳ 3:6 38ኡባይካ አዉ ሀይቂ ቤናዋንታ ግድያ ድራዉ፥ እ ሀይቂቤናዋንቱ ጾሳፐ አትን፥ ሀይቆዋንቱዋ ግደና” ያጌዳ።

39እት እት ሙሴ ህግያ ጻፌዳዋንቱካ፥ “ታማርስያዎ፥ ሎኡዋ ሃሳያዳ” ያጌድኖ። 40ሀዋፐ ስሚደ፥ እቱካ አ ኦቻናዉ ጻሎዌ ባዋ።

የሱስ ኦኔ ግያ ኦሻ

(ማቶሳ 22:41-46፤ ማር. 12:35-37)

41ሀዋፐ ካላ የሱስ ኡንቱንታ፥ “አሳይ ክርስቶሳ ዎት ‘ዳዊተ ናኣ’ ያጊኖ? 42-43ጋሶተይኔካ፥ ዳዊተ ባረ ሁጰዉ ማዝሙረ ማጻፋ ጋርሳን፥

“ ‘ጎዳይ ታ ጎዳ፥ “ታን ነ ሞርከቱዋ፥

ነ ገድያፐ ጋርሳና ደአናዳን ኦና ጋካናዉ፥

ታ ኡሸቻን ኡታ” ጌዳ’

ያጌዳ።

44“ስም ዳዊተ ክርስቶሳ፥ ‘ጎዳ’፥ ጊደ ጼስያዋ ግዶፐ፥ ዎት አዉ ናኣ ግዳና ዳንዳዪ?” ያጌዳ።

ሙሴ ህግያ ታማርስያዋንቱፐ ናገታና ማላ፥ የሱስ ሴሬዳ ሴራ

(ማቶሳ 23:1-36፤ ማር. 12:38-40)

45አሳይ ኡባይ ስስሽን ባረና ካልያዋንቶ፥ 46“ሙሴ ህግያ ታማርስያዋንቱፐ ናገትተ፤ ኡንቱንቱካ፥ አዱሳ ቃምሽያ ማዪደ ዩያናዉ፥ ገያይ ደእያ ሳን ቦንቾ ሳሮታ አካናዉ፥ ዎስያ ጎለን ቦንቾ ኦይድያን ኡታናዉ፥ ሾበቴዳሳን ቦንቾሳ ኮይያዋንታ። 47ሄዋንቱካ አምአቱዋ ጎልያ ካሎይያዋንታ፤ ባረንታ በሳናዉ ዎሳ አዱስያዋንታ፤ ኡንቱንታ ኢታ ፕርዳይ ናገ” ያጌዳ።

Currently Selected:

ሉቃሳ ምሽራቹዋ 20: DFBE

Highlight

Copy