ሉቃሳ ምሽራቹዋ 23
23
ጵላጾስ የሱሳ ኦቼዳ
(ማቶሳ 27:1፣ 2፣ 11-14፤ ማር. 15:1-5፤ ዮሃ. 18:28-38)
1ሄዋን ሺቄዳ ኡባቱካ እትፐ ደንዲደ፥ የሱሳ ጵላጾሳኮ አፌድኖ። 2ኡንቱንቱካ፥ “ሀ ብታኒ ኑ አሳ ባለደ፥ አሳይ ሮመ ቢታ ካትያ ቄሳራዉ ጊራ እመና ማላ ድጊደ፥ ቃይ፥ ‘ታን ካትያ’ ያግሽን ደሜዶ” ያጊደ ሞቱዋ ዶሜድኖ።
3ጵላጾስካ የሱሳ፥ “ሀዎ፥ አይሁዳቱዋ ካቲ ኔኔ?” ያጊደ ኦቼዳ።
የሱስ ዛሪደ አ፥ “ኔን ጋ ደኣሳ” ያጌዳ። 4ጵላጾስ ቄሳቱዋ ካፓቶነ አሳዉ ኦዲደ፥ “ታን ሀ ብታንያ ቦላን አይነ ኢታ ኦሱዋ ደማበይከ” ያጌዳ።
5ግዶፐ አትን ኡንቱንቱ፥ “ሀ ብታኒ ጋሊላፐ ዶሚደ፥ ሀራይ አቶ ሀዋ ጋካናዉካ፥ ይሁዳ ጋድያ ኡባ ባረ ትምርትያን ቃደ ደኤ” ያጊደ ምንስ ኦዴድኖ።
የሱስ ሄሮድሳ ስን ሺቄዳ
6ጵላጾስካ ሀዋ ስሲደ፥ “እ ጋሊላ አሴ?” ያጊደ ኤራናዉ ኦቼዳ። 7ጵላጾስ ሄሮድሰ ሞድያ ጋድያፐ የሱስ ዬዳዋ ኤሬዳ ዎደ፥ ሄሮድሰካ ቃይ ሄ ዎድያን የሩሳላመን ደእያ ድራዉ፥ አኮ የሱሳ የዴዳ።
8ሄሮድሰ ዳሮ ዎድያፐ ዶሚደ የሱሳ በአናዉ አሞት ደእያ ድራዉ፥ አ በኤዳ ዎደ ዳሮፐ ናሸቴዳ። የሱሳ ዋርያ ስሴዳዋ ድራዉ፥ እ ኦራባ ኦሽን በአናዉ ህዶታን ጋምኤዳ። 9ሄሮድሰ የሱሳ ዳሮባ ኦቼዳ፤ ሽን የሱስ አዉ አያነ ዛርቤና። 10ቄሳቱዋ ካፓቱነ ሙሴ ህግያ ታማርስያዋንቱ ሄዋን ኤቂደ፥ የሱሳ ሎይ ሞቲደ ደኢኖ። 11ሄሮድሰነ አ ዎታዳራቱ የሱሳ ካደ፥ አ ቦላ ቅሊጬድኖ። ቦንቼቴዳ ማዩዋ አ ማይዚደ፥ ጵላጾሳኮ ዛሪደ የዴድኖ። 12ሄሮድሰነ ጵላጾስ ሀዋፐ ካሰና ሞርክያን ደኢኖ፤ ሽን ሄ ጋላስ ስገቴድኖ።
የሱሳ ሀይቃና ማላ ሞቴድኖ
(ማቶሳ 27:15-26፤ ማር. 15:6-15፤ ዮሃ. 18:39—19:16)
13ጵላጾስ ቄሳቱዋ ካፓቱዋ፥ አይስያዋንታነ ሀራ ጮራ አሳ እትፐ ጼሲደ፥ 14ሀዋዳን ያጌዳ፥ “ ‘ሀ ብታኒ አሳ ማካላተዉ ደን’፥ ያጊደ ታኮ አሄድታ፤ ታንካ ህንተንቱ ስንን ብዳ ጼላደ፥ ህንተንቱ ሺሼዳ ሞቱዋን እት ባላነ አ ቦላን ደማበይከ። 15ቃይ ሄሮድሰካ አ ቦላን አይነ ደምቤና ድራዉ፥ ሃ ኑኮ ዛር የዴዳ፤ ህንተንቱ በእያዋዳንካ፥ ሀ ብታኒ አ ሀይቆ ጋያባ አይነ ኦቤና። 16ሀዋ ድራዉ ታን አ ሙራደ ብላና” ያጌዳ። 17#23:17 ሀ ፓይዱ፦ “ጵላጾሳዉ ፓስጋ ባላ ቦንቹዋ ጋላሳን እት ኡራ ቃሹዋፐ ብልያ ዶያይ ደኤ” ያጌ። ሽን፥ ዳዉሮዋ ጌሻ ማጻፋ ኦራ ጫቁዋ ግዱዋን ሀ ፓይዱ ጻፈትቤና ጋሱ፥ ሀራ ጌሻ ማጻፋቱዋ ብለቱዋን ኡባቱዋንካ ጻፈትቤና ድራሳ።
18አሳይ ኡባይ እትፐ ግዲደ፥ “ሀ ብታንያ ያ ድጋ! ባርባና ግያ የሱሳ ኑዉ ብላ!” ያጊደ ጫቦቴድኖ። 19ባርባን ካታማን ዋላሳ ደንደ፥ አሳ ዎዳ ድራዉ፥ ቃሸቴዳዋ።
20ጵላጾስ የሱሳ ብላናዉ ኮዪደ፥ አሳዉ ላኤንዋ ጉጂደ ሃሳዬዳ። 21ሽን ኡንቱንቱ፥ “ማስቃልያ ቦላ ምስማርያን ሻደ ካቃ! ካቃ!” ያግ ዋሴድኖ።
22ጵላጾስካ ሄዘንዋ ኡንቱንታ፥ “አያዉ? ሀ ብታኒ ኦዳ ኢታ ኦሱ አዬ? ታን አ ሀይቆ ጋያ ናቁዋ አይነ አፐ ደማበይከ፤ ሀዋ ድራዉ፥ አ ሙራደ ብላ የዳና” ያጌዳ። 23ሽን ኡንቱንቱ ባረንቱ ኮሻ ቁ ኦደ፥ ካቀታናዳን ዳሪ ዋሴድኖ። ኡንቱንቱ ዋሱካ ጵላጾሳ ቆፋ ላሜዳ። 24ሀዋ ድራዉ፥ ጵላጾስካ ኡንቱንቱ ኦሻይ ስማናዳን የሱሳ ቦላን ፕርዴዳ። 25አሳ ማካላዉ ደንደነ ሸምፑዋ ዎደ፥ ቃሸቴዳ ብታንያ ብለታናዳን ኡንቱንቱ ዎሶ ድራዉ፥ ሄ ብታንያ ብሌዳ። ሽን የሱሳ ባረንቱ ሸንያዳን ኮዮዋ ኦና ማላ፥ አ እሜዳ።
የሱስ ማስቃልያን ካቀቴዳ
(ማቶሳ 27:31-44፤ ማር. 15:21-32፤ ዮሃ. 19:17-27)
26የሱሳ ኦይቂ አፊደ ደእሽን፥ ስሞና ጌተትያ ቀሬና ብታኒ ሄራፐ ዪደ ደእሽን ደሚደ፥ ማስቃልያ ቶሲደ የሱሳና ባና ማላ ኦድኖ። 27ዳሮ ጮራ አሳይነ ዬክያ ማጫዋንቱ ጉየና ካሊኖ። 28የሱስ ጉየ ስሚደ ኡንቱንቶ፥ “ህንተኖ፥ የሩሳላመ ማጫዋንቶ፥ ህንተንቱ ሁጰዉነ ህንተንቱ ናናዉ ዬክተፐ አትን፥ ታዉ ዬኮፕተ፤ 29‘ማን ግዴዳዋንቱነ የልቤና ኡሉ፥ ንቤና ንይ፥ አንጀቴዳዋንታ’ ጌተትያ ዎዲ ያናዋ። 30ሄ ዎድያን፥ ‘ዞዛቶ፥ ኑ ቦላ ዎድተ፤ ዙኩላቱዋካ፥ ኑና ቆስተ’ ያጋንታ።#ሆሰ 10:8፤ ሳፃ 6:16 31ስም ቃየ ምን ሀዋዳን ሀኖፐ፥ መላ ምን ዋናናዌ?” ያጌዳ።
32የሱሳና እትፐ ካቀታና ማላ፥ ኢታ ኦሱዋ ኦዳ ሀራ ላኡ አሳቱዋካ አፌድኖ። 33ቄራነዉ ጌተትያሳ ጋኬዳ ዎድያን፥ የሱሳ ካቄድኖ። ኢታ ኦዋንታካ፥ እቱዋ ኡሸቻና፥ የኩዋ ሀድርሳና ካቄድኖ።
34የሱስ፥ “ታ አቦ፥ ኡንቱንቱ ባረንቱ ኦያዋ ኤረና ድራዉ፥ ኡንቱንቱ ናጋራ አቶ ጋ” ያጌዳ።
ኡንቱንቱካ አ ማዩዋ ሳማ የገቲደ ግሸት አኬድኖ። 35አሳይ ኤቂ ጼልሽን፥ ጋድያ ሞድያዋንቱ፥ “ሀራንታ አሼ፤ ጾሳን ዶረቴዳ ክርስቶስ አ ግዶፐ፥ አነ ባረ ሁጲያ አሸኔ?” ያጊደ ቅሊጬድኖ።
36ቃይ ዎታዳራቱካ ሺቂደ ቅሊጬድኖ፤ ጫሜዳ ዎይንያ ኤሳ አዉ አህ እሚደ፥ 37“ሀዎ፥ ኔን አይሁዳ ካትያ ግዶፐ፥ ነ ሁጲያ አሻ!” ያጌድኖ።
38ሁጲሳናካ፥ “ሀዌ አይሁዳ ካትያ” ያግያ ጻፉዋ ጻፌድኖ። 39ኢታ ኦደ ካቀቴዳዋንቱፐ እቱ፥ ቦሪድነ ቶቺደ፥ “ሀዎ ኔን ክርስቶሳ ግድኪ? አነ አ ግዶፐ፥ ነ ሁጲያነ ኑና አሻ” ያጌዳ።
40የኩ ቃይ አ፥ “ኔን ሀዋ ማላትያ ፕርዳ ቦላ ደኣደካ ጾሳዉ ያይኪ? 41ኑን ኪተቴዳ ባላን ሙራ አኪደ ደኤቶ፤ ኑዉ በስያ ሙራ ቦላን ደኤቶ፤ ሽን ሀ ብታኒ እት ኢታባነ ኦቤና” ያግ ዛሬዳ።
42እ የሱሳ፥ “ኔን ነ ካዉተ ዎልቃን ይያ ዎደ፥ ታና ቆፓ” ያጌዳ። 43የሱስካ፥ “ታን ነዉ ቱሙዋ ኦዳይ፥ ሀቼ ታናና እትፐ ጋናትያን ደአናሳ” ያጌዳ።
የሱሳ ሀይቁዋ
(ማቶሳ 27:45-56፤ ማር. 15:33-41፤ ዮሃ. 19:28-30)
44ሄ ዎደ ኡሱፑን ሳተ ግድያ ኬና፤ ሄዋፐ ኡዱፑ ሳትያ ጋካናዉ፥ ቢታ ኡባ ቦላን ማ ግዴዳ። 45አዋይካ ባረ ፖኡዋ ድጌዳ፤ ጌሻ ጎልያ ጋርዱካ ፔቲደ ላኡዋ ከሴዳ። 46የሱስካ ዳሮ ቁ ጌዳ ቃላን ዋሲደ፥ “ታ አቦ፥ ታን ታ ሸምፑዋ ነ ኩሽያን አ እማይ!” ያግ ስሞዋፐ ጉይያን እ ሀይቄዳ።
47ጼቱዋ ካፑ ሀኔዳ የዉዋ በኤዳ ዎደ፥ “ሀ ብታኒ ቱማካ ጽሎ አሳ” ያጊደ ጾሳ ጋላቴዳ። 48ሀዋ በአናዉ እትሳ ሺቄዳ አሳይ ኡባይ ሀኔዳ የዉዋ በኢደ፥ ባረንቱ ትራ ባቂደ ስሜድኖ። 49የሱሳ ኤርያ አሳይ ኡባይነ ጋሊላፐ ዶሚደ አ ካሌዳ ማጫዋንቱ ሀዋ ጼሊደ፥ ሃኩዋን ኤቄድኖ።
የሱስ ሞገቴዳ
(ማቶሳ 27:57-61፤ ማር. 15:42-47፤ ዮሃ. 19:38-42)
50አይሁዳ ሻንጋቱዋ ግዴዳዋንቱፐ እቱ፥ ዮሴፎ ጌተትያ ሎአነ ጽሎ ብታኒ ደኤ። 51ሀ ብታኒ ሻንጋቱዋ ማቁዋነ ኡንቱንቱ ኦሱዋን እትፐተ ኦቤና። ጾሳ ካዉተ ዩሳ ህዶታን ናጊደ ደኤ። 52ዮሴፎካ ጵላጾሳኮ ቢደ፥ የሱሳ አሃ አካናዉ ዎሴዳ። 53አካናዳን ጌተቶዋፐ ጉየ፥ አሃ ቦላፐ ዎደ፥ ሎኦ ሞጉዋ ማዩዋን ጻጺደ፥ ሹቻፐ ዎጨቲደ መቴዳ፥ ኦንነ ካሰ ሞገትቤና ኦላ ግዶን ዎዳ። 54ጋላሳይካ ሳምባታ ሞካናዉ ጊግያ ጋላሳ፤ ሳምባታይካ ገላና ሀኔ።
55ጋሊላፐ ዶሚደ የሱሳና እትፐ ዬዳ ማጫዋንቱ ካሊደ፥ ዱፉዋን አ አሃ ዎቲደ ዎድኖንቶ በኤድኖ። 56ኡንቱንቱ ሀዋፐ ሶይ ስሚደ፥ ሽቱዋነ ኦክያዋ አንሀዉ ጊግሴድኖ።
ህግያ ማራዳን ሳምባታ ጋላስ ሸምፔድኖ።
Currently Selected:
ሉቃሳ ምሽራቹዋ 23: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
