روسولأنٚ کأرأن ۱۰
۱۰
کُرنیلیوس خأیه پطرسَ بیدینه
1 قیصریه شهر میأن ایتأ رومی افسر کُرنیلیوس نأم زٚندیگی کودی اون ایتأ هنگٚ فرمأنده بو، کی «ایتألیأیی هنگ» معروف بو. 2 اون و اونی خأنه آدمأن جٚه گونأ دؤر بود و خودایَ عیبأدت کودید. کُرنیلیوس همیشٚک دٚس و دیلوأزی اَمرأ یوهودٚ فِقِرأنَ یاور دٚئی، خودا حوضور دوعأ کودی. 3 ایتأ روج، سأعتٚ سه ظهرٚ پٚسی، خودا فٚرٚشته‌یَ رویأ میأن بیدِه. فٚرٚشته اونی ورجأ بأمؤ و بوگفته: «کُرنیلیوس!»
4 کُرنیلیوس وأشٚتٚ اَمرأ اونَ فأندرسته و وأوٚرسِه: «آقأ جأن، چی فرمأیشی دأری؟»
فٚرٚشته جوأب بٚدأ: «تی دوعأیأن و خوروم کأرأن، ایتأ یأدگأری پیشکشی مأنستَن خودا ورجأ بأمؤ! 5 اَسه ایتأ عیدّه‌یَ اوسه کون یافا کی شمعون پطرسَ اَیَه بأوٚرٚد. 6 اون شمعونٚ خأنه میأن کی چرم چأکونه، کی اونی خأنه دریأ کنأر نٚهأ، میهمأن ایسه.»
7 او وخت کی فٚرٚشته غیبَ بوسته، کُرنیلیوس دوتأ خو خیدمتکأرأنَ ایتأ سروأزٚ اَمرأ کی اونی موحأفظ بو و خودایَ شنأختی، دؤخأده 8 و تومأمٚ اَ ایتفأقأنَ اَشأنی رِه وأگویا بوکوده و اوشأنَ اوسه کوده یافا.
پطرس کُرنیلیوس اَمرأ مولأقأت کونه
9 فردأیی، او وخت کی اَ آدمأن یافا شهرَ فأرٚسئندوبود، پطرس بوشؤ پوشت بأمٚ جؤر کی دوعأ بوکونه. ظهر بو 10 و پطرسَ ویشتأ کوده. هطؤ کی غذأیَ چأکودأندوبود، پطرس رویأ میأنی بیدِه کی 11 آسمأن وأزَ بوسته و ایچی پیله سٚفره مأنستَن زیمینٚ ور بأمؤ کی جٚه چأر گوشٚه آویزأن بو. 12 جوروأجور جأنورأن و خزنده‌یأن و پرنده‌یأن او سٚفره میأن نٚهأ بو.
13 بأزون ایتأ صدا پطرسَ بوگفته: «ویریز و هرتأیَ کی خأیی سٚر وأوین و بوخور!»
14 پطرس بوگفته: «اَی خوداوند، من اَطؤچی کأرَ نوکونم، چونکی تومأمٚ می زٚندیگی میأنی هیوخت حرأمٚ چی‌یَ لب نٚزئم!»
15 ایوأردِه او صدا بوگفته: «اونچی‌یَ کی خودا پأک چأکوده، تو اونَ نجست نوأدأنستن!»
16 اَ رویأ سه وأر تکرار بوبوسته. بأزون، او سٚفره بوشؤ بوجؤر آسمأنٚ ور. 17 پطرس گیجَ بوسته بو، چونکی نه اَ رویأ مأنی‌یَ فأمستی و نه دأنستی چی وأبوکونه.
هه زمأتٚ میأن، او سه‌تأ آدم کی کُرنیلیوس اوسه کوده بو، خأنه‌یَ بیأفتده، و در ورجأ فأرٚسِه بود، 18 و گفتیدی: «آیا شمعون کی پطرس لقب دأره اَیَه زٚندیگی کونه؟»
19 هطؤ کی پطرس او رویأ دروأره فیکر کودأندوبو، روح‌القدس اونَ بوگفته: «سه نفر بأمؤده کی تٚرَه بیدینٚد. 20 ویریز و بوشو بیجیر، و شک نوأکودٚن و بوشو اَشأنٚ اَمرأ، چونکی اَشأنَ من اوسه کودم.»
21 پطرس بوشؤ بیجیر و اَشأنَ بوگفته: «من پطرسٚم. چیکأر دأریدی؟»
22 جوأب بٚدأده: «اَمأن جٚه ایتأ رومی افسر ور، کُرنیلیوس نأم بأمؤییم. اون خوروم آدم ایسه و خودا جَا حیسأب بٚره و یوهودیأنٚم اونَ ایحترأم نٚهٚده. ایتأ فٚرٚشته‌یٚم اونَ ظأهیرَ بوسته و بوگفته کی شیمی دونبأل اوسه کونه و شٚمٚره خو خأنه دعوت بوکونه، و شیمی گبأنَ بشتأوه.»
23 پطرس اوشأنَ دعوت گیفتنٚ وأسی ببرده خأنه دورون و فردأیی اَشأنٚ اَمرأ بوشؤ قیصریه. ایتأ عیده جٚه «یافا» ایمأندأرأن اونی اَمرأ بوشؤده.
24 فردأیی فأرٚسِده قیصریه. کُرنیلیوس خو نیزدیکٚ فأمیلأن و ریفِقأنَ جمَ کوده بو و اَشأنَ رأفأ ایسأ بود. 25 هطؤ کی پطرس بوشؤ خأنه دورونی، کُرنیلیوس اونی جولو زیمین سٚر بٚکفته و اونَ عیبأدت بوکود.
26 امّا پطرس اونَ ویریزأنه و بوگفته: «ویریز! منم تی مأنستَن ایتأ آدمٚم.»
27 پس ویریشته، گب گب زئِنٚ اَمرأ بوشؤده ایتأ اوتأقٚ میأن کی خٚیلی آدمأن اویَه ایسأ بود.
28 پطرس اَشأنَ بوگفته: «شومأن خودتأن دأنیدی کی یوهود قأنونأن ولأنه کی من بأیٚم ایتأ آدمٚ خأنه کی یوهودی نییٚه. ولی خودا رویأ میأن مٚرَه نیشأن بٚدأ کی هیوخت نوأستی کسی‌یَ نجست بدأنم 29 جٚه اَ خأطر او وخت کی شومأن می دونبأل اوسه کودید، هیچی وأنورسئم و بأمؤم. هسأ بفرمأیید چی وأسی مٚرَه دؤخأدید؟»
30 کُرنیلیوس جوأب بٚدأ: «چأر روج پیشتر، هه وخت دورون ینی سأعتٚ سه ظهرٚ پٚسی، همیشٚکٚ عأدتٚ مأنستَن خأنه میأن دوعأ کودأندوبوم کی نأخٚوٚرکی اینفرَ بیدِم کی ایتأ رخت دوکوده دأشتی کی سوسو زِئی و می جولو بٚپأ ایسأ! 31 اون مٚرَه بوگفته: کُرنیلیوس، خودا تی دوعأیأنَ بشتأوسته و تی یاور دٚئن کی مردومَ بوکودی‌یَ قوبیل بوکوده! 32 هسأ چن نفرَ اوسه کون یافا ور و شمعونٚ پطرسَ دعوت بوکون کی اَیَه بأیٚه. اون شمعونٚ خأنه میأن کی چرم چأکونه، کی اونی خأنه دریأ کنأر نٚهأ، میهمأن ایسه.
33 «پس دفأتن شیمی دونبألسر اوسه کودم و شومأنم لوطف بوکودید، دفأتن بأمؤیید. هسأ، همٚتأن اَیَه خودا حوضور رأفأ ایسأییم کی پیغأمی‌یَ کی خوداوند بٚفرمأسته کی اَمٚرَه بیگید، بشتأویم.»
اوشأنی کی یوهودی نییٚدم اینجیلٚ بشأرتَ ایشتأوده
34 او وخت پطرس جوأب بٚدأ: «هسأ فأمم کی فقد خودا یوهودیأنَ خوش نأرِه! 35 بلکی هرکی جٚه هر نتأج و قوم کی خودایَ پرستٚش بوکونه و خوروم کأرأن بوکونه، اونی رِه قأبیلٚ قوبیل به. 36 شومأن رأس‌رأسِی خودا اَ خورومٚ خٚوٚر و بشأرتَ کی ایسرأییلٚ قومَ فأدأ جَا وأخٚوٚر ایسید، ینی اَ خورومٚ خٚوٚر کی آدم تأنه عیسا مسیحٚ اَمرأ کی همٚتأنٚ خودا ایسه، خودا ور وأگرده. 37 شومأن دأنیدی کی اَ کأر چوطؤ او تعمیدٚ پٚسی کی یوحنا جٚه اون موعیظه کودی، جلیلٚ میأن سٚر بیگیفته بوبو و تومأمٚ یوهودیه شرأ فأرٚسِه. 38 و رأس‌رأسِی دأنیدی کی خودا عیسای ناصری‌یَ خو روح‌القدس و قودرتٚ اَمرأ مَسح بوکوده. اون همٚتأ جیگأ شؤیی و خورومٚ کأرأن کودی و تومأمٚ اوشأنی‌یَ کی شیطان اوشأنَ ظولم و ستم کودی شفأ دٚئی، چونکی خودا اونی اَمرأ بو.
39 «و اَمأن روسولأن تومأمٚ کأرأنی‌یَ کی اون یوهودٚ سرزیمین و اورشلیمٚ میأن انجأم بٚدأ شأهید ایسیم و هو شهرٚ میأن بو کی اونَ صلیبٚ سٚر بوکوشتٚد. 40 ولی سه روجٚ پٚسی، خودا اونَ زٚنده کوده و ظأهیرَ کود، 41 ولی نه همٚتأنٚ رِه، بلکی فقد او شأهیدأنَ رِه کی جٚه پیشتر اینتخأب بوکوده بو، ینی اَمأن کی اونی زٚنده بوستنٚ پٚسی، اونی اَمرأ بوخوردیم و وأخوردیم. 42 و خودا اَمٚرَه اوسه کوده کی اَ خورومٚ خٚوٚرَ همٚتأنَ فأرٚسأنیم و بیگیم کی خودا عیسایَ اینتخأب بوکوده کی مورده‌یأن و زٚنده‌یأنٚ رِه دأور بٚبه. 43 تومأمٚ پیغمبرأنم بینیویشتٚده کی هرکی اونَ ایمأن بأوٚره، اونی گونأیأن بٚبخشه به.»
اوشأنی کی یوهودی نییٚد روح‌القدسَ فأگیرٚده
44 پطرسٚ گب هنو تومأنَ نوبوسته بو کی روح‌القدس تومأمٚ اوشأنی کی ایشتأوستیدی سٚر فووُسته! 45 او یوهودیأن کی پطرسٚ اَمرأ بأمؤ بود، او وخت کی بیدِده کی روح‌القدس اوشأنی کی یوهودی نییٚدم فأدأ بوبوسته، قأق بئیسأده 46 چونکی بشتأوستٚده کی اَشأن غیرٚ زٚوأنأنٚ اَمرأ گب زِئن دٚرٚد و خودایَ پرستٚش کونٚده. #۱۰:۴۶ «غیرٚ زٚوأنأنٚ» کلمه او زوأنأنٚ ایشأره کونه کی آدم اوشأنَ نأمؤخته و نأنِه؛ هطؤیٚم آیه ۱۹:۶میأن.او وخت پطرس بوگفته: 47 «هسأ کی اَشأن اَمی مأنستَن روح‌القدسَ بیأفتده، مگه هیکس تأنه اَشأنٚ آبٚ تعمید گیفتنٚ جَا مأنع بٚبه؟» 48 پس عیسا مسیحٚ نأم اَمرأ اَشأنَ تعمید بٚدأ. او وخت کُرنیلیوس ایلتمأس بوکوده کی پطرس چن روج اوشأنی ورجأ بئیسه.
Currently Selected:
روسولأنٚ کأرأن ۱۰: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran