روسولأنٚ کأرأن ۷
۷
ایستیفانٚ موعیظه یوهودٚ شورأ ورجأ
1 او وخت پیله کأهین ایستیفانٚ جَا وأوٚرسِه: «آیا اَ بوهتأنأن حِئقت دأره؟»
2 ایستیفان بوگفته: «اَی برأرأن و پئرأن بشتأوید. خودایٚ پورجلال و شوکو، پیشتر جٚه اَنکی اَمی پیله بأبأ ایبرأهیم کوچ بوکونه حرانٚ ور، بین‌النهرینٚ میأن خؤرَه اونَ نیشأن بٚدأ. 3 خودا اونَ بٚفرمأسته: تی ولأیت، پئرٚ خأنه و تی قومٚ خیشأنَ وِلَ کون و بوشو او سرزیمین میأن کی من تٚرَه اویَه رأنمأیی کونم.»
4 «پس ایبرأهیم کلدانیأنٚ سأمأنٚ جَا بیرون بأمؤ و بوشؤ حرانٚ ور و تأ خو پئرٚ مٚردنٚ اویَه بئیسأ. بأزون خودا اونَ بأوٚرده اَیَه، او سرزیمینی کی شومأن اَسه اونی میأن زٚندیگی کودأندرید. 5 ولی او زمأتٚ میأن، حتّا ای وجب جٚه او زیمینَ اونَ فأندأ. ولی اونَ قول بٚدأ کی آخرپٚسی اَ سرزیمین، اون و اونی نتأجٚ شین به، و اَن او زمأتٚ میأن بو کی ایبرأهیم رِه هنو زأی نوبوسته بو. 6 جٚه ایوٚر دِه، خودا ایبرأهیمَ بٚفرمأسته: "تی نتأج چأرصٚد سأل ایتأ غریبٚ مملکتٚ میأن رعیتی کونه و اَشأنَ ظولم و ستم به. 7 و هطؤیٚم بٚفرمأسته: من او قومی‌یَ کی اَشأنَ اسیرَ کونٚده، موجأزأت کونم و اونٚ پٚسی می قومَ اَ سرزیمینٚ میأن وأگردأنم کی مٚرَه عیبأدت بوکونٚد."»
8 «او وختٚ میأن، خودا، ختنه کودنَ رسمٚم ایبرأهیمَ فأدأ کی اونی نتأج و خودا میأن ایتأ قول و قرأرٚ نیشأنه بٚبه. پس ایبرأهیمٚ پٚسر، ایسحأق، او وخت کی هشت روج دأشتی، ختنه بوبوسته. ایسحأق، یعقوبٚ پئر بو و یعقوبٚ رِه دوأزده‌تأ پٚسر بوبوسته کی هرتأ جٚه اوشأن ایتأ جٚه ایسرأییلٚ مردوم قبیله‌یأنَ بأنی بوبوستٚد. 9 یعقوبٚ زأکأن یوسفٚ اَمرأ حسودی بوکودٚد و اونَ بوفروختٚده کی مصر میأن غولأم بٚبه. ولی خودا یوسفٚ اَمرأ بو، 10 و اونَ جٚه تومأمٚ اونی غم و غورصه‌یأن آزأدَ کوده و کأری بوکود کی فرعون، مصر پأدیشأ اونَ لوطف بوکونه. خودا یوسفَ ایتأ پیله حیکمت فأدأ، تأ اویَه کی فرعون اونَ مصرٚ نخست وزیر و خو قصرٚ وزیر چأکود.»
11 «او وخت ایتأ پیله قحطی و نکبتی مصر و کنعانٚ میأن بیرون بأمؤ، جوری کی اَمی پیله بأبأیأن ایچی خوردنٚ رِه نأشتیدی. 12 او وخت کی یعقوب بشتأوسته کی مصرٚ میأن هنو گندم بیأفته به، خو پٚسرأنَ اوسه کوده کی گندم بیهینٚد. 13 دویُمی وأر کی بوشؤده مصر، یوسف خؤرَه خو برأرأنَ بشنأسأنه، بأزون اَشأنَ فرعونٚ ورجأ معرّفی بوکوده. 14 اونٚ پٚسی، یوسف خو پئر یعقوب و خو برأرأنٚ خأنوأر کی همٚتأنٚ اَمرأ هفتأد و پنج نفر بوستیدی بأوٚرده مصر. 15 اَطؤیی بو کی، یعقوب و تومأمٚ اونی پٚسرأن بوشؤده مصر ور و آخرپٚسی هویه بٚمٚردٚد، 16 و اَشأنٚ جنأزه‌یأنٚ ببردٚد شکیمٚ میأن و او مقبٚره کی ایبرأهیم جٚه حمور پٚسرأن، شکیمٚ پئر بیهه بو، بیگیلَ کودٚد.»
17 «یوأش یوأش او وعده انجأم بوستنٚ زمأت فأرٚسِئندوبو، کی خودا ایبرأهیمَ فأدأ بو، کی اونی زأکأنَ مصرٚ جَا آزأدَ کونه و اَشأنٚ نفرأنم مصر میأن توندأ توند زیأدَ بوستی. 18 بأزون، اینفر مصرٚ میأن پأدیشأ بوبوسته کی یوسفَ نٚشنأختی و اونی خیدمتأنٚ جَا خٚوٚر نأشتی. 19 اَ پأدیشأ اَمی قوم اَمرأ دوشمن بو و عبرأنی پئر و مأرأنَ وأدأشتی کی خوشأنٚ قوندأقه زأکأنَ بیأبأنٚ میأن سٚرأدٚد کی بیمیرٚد.»
20 «هو زمأتٚ میأن بو کی موسا بودونیأ بأمؤ. اون خٚیلی خوشکیلٚ زأی بو. اونی پئر و مأر اونَ سه مأه خأنه میأن جیگأ بٚدأد. 21 آخرپٚسی او وخت کی مجبور بوبوستٚد اونَ سٚرأدٚد، مصر پأدیشأ دؤختر، اونَ بیأفته و خو زأی چأکوده. 22 موسا تومأمٚ مصرٚ حیکمت و عیلمَ بأمؤخت تأ اویَه کی ایتأ شأهزأده بوبوسته کی قودرت دأشتی و گب زِئن میأن پیله کس بوبوسته بو.»
23 «او وخت کی موسا چهل سأل دأشتی، ایتأ روج اونی سٚرٚ دورون دکفته کی خو ایسرأییلی برأرأنَ بیدینه. 24 اَ دِئنٚ میأن ایتأ مصری‌یَ بیدِه کی ایتأ ایسرأییلی‌یَ ظولم کودأندٚره. پس موسا اونی بألأخأیی بوشؤ و او مصری‌یَ بوکوشته. 25 موسا خیأل بوکوده کی اونی ایسرأییلی برأرأن بفأمٚستٚده کی خودا اونَ اَشأنَ یاور اوسه کوده. ولی اَشأن هیذره اَ موضو‌یَ نفأمسته بود.»
26 «فردأیی، ایوأردِه بوشؤ اوشأنَ بیدینه. اَیدٚفأرِه بیدِه کی دوتأ ایسرأییلی کس‌کسٚ اَمرأ بوگو موگو کودأندوبود. پس سعی بوکوده کی اَشأنَ آشتی بٚدأ و بوگفته: اَی جأنٚ دیلأن، شومأن کس‌کسٚ اَمرأ برأر ایسید و نوأستی اَطؤیی کس‌کسٚ اَمرأ بوگو موگو بوکونید! اَ کردکأر خُب نییٚه!»
27 «ولی اونی کی تقصیر دأشتی موسایَ بوگفته: کی تٚرَه اَمی حأکیم و دأور چأکوده؟ 28 نوکونه کی خأیی مٚرَه‌یٚم بوکوشی، هوطؤیی کی دیروج او مصری‌یَ بوکوشتی؟»
29 «او وخت کی موسا اَنَ بشتأوسته، بٚتٚرسه و بوگروخته مِدیانٚ سرزیمین ور و اویَه زن ببرده و دوتأ پٚسر اَنی رِه بوبوسته.»
30 «چهل سأل بوبوسته پٚسی، ایتأ روج بیأبأنٚ میأن سینا کوه فأنرٚسه، ایتأ فٚرٚشته خؤرَه ایتأ بوته میأن کی شوأله زِئی اونَ نیشأن بٚدأ. 31 موسا اَ منظره دِئنٚ اَمرأ، قأقَ بوسته و بودووٚسته کی اونَ جٚه نیزدیک بیدینه. ولی نأخٚوٚرکی خوداوندٚ صدایَ بشتأوسته کی گفتی: 32 من تی پیله بأبأیأنٚ خودا ایسٚم، ایبرأهیمٚ خودا، ایسحأقٚ خودا، و یعقوبٚ خودا.»
«موسا ترسٚ جَا خؤرَه بپرکسته و دِه نیأرسته بوته‌یَ فأندٚره. 33 خوداوند اونَ بٚفرمأسته: تی پأاَفزأرَ بٚکن، چونکی او جیگأ میأن کی ایسأیی، موقدسٚ زیمین ایسه. 34 من مصر میأن می قومٚ غم و غورصه‌یَ بیدِم و اوشأنی زٚهأر زِئنٚ بشتأوستم و بأمؤم کی اوشأنَ نیجأت بدم. پس بیأ کی تٚرَه اوسه کونم مصرٚ ور.»
35 «اَطؤیی بو کی خودا هو کسی‌یَ وأگردأنِه مصر کی ایسرأییلٚ قوم اونَ رٚدَ کوده و اونَ بوگفته بود: کی تٚرَه حأکیم و اَمی دأور چأکوده؟ خودا ایتأ فٚرٚشته اَمرأ کی آتشٚ بوته میأن ظأهیرَ بوسته بو موسایَ اوسه کوده کی اَشأنٚ رِه حأکیم و نیجأت بٚدأ کسٚم بٚبه. 36 موسا خٚیلی موجیزه‌یأنٚ اَمرأ ایسرأییلٚ قومَ مصر جَا بیرون بأوٚرٚد، و جٚه سورخٚ دریأ میأن دٚوأرأنه و چهل سأل اَشأنَ بیأبأنٚ میأن رأ نیشأن بٚدأ.»
37 «هه موسا ایسرأییلٚ قومَ بوگفت: خودا جٚه شیمی برأرأنٚ میأن، ایتأ پیغمبر می مأنستَن شِمِره اوسه کونه.»
38 «موسا بیأبأنٚ میأن اَمی پیله بأبأیأنٚ اَمرأ بو، ینی خودا قومٚ جمأعتٚ اَمرأ. اون ایتأ میأنجی بو ایسرأییلٚ قوم میأن و او فٚرٚشته کی سینا کوه دورون او کلمه‌یأن کی زٚندیگی دٚئی‌یَ اونَ فأدأ کی اوشأنَ اَمٚرَه فأرٚسأنه. 39 ولی اَمی پیله بأبأیأن نخأستٚد موسا جَا ایطأعت بوکونٚد. اوشأن اونَ قوبیل نوکودٚد و بٚخأستٚد مصر میأن وأگردٚد. 40 اَشأن هارونَ بوگفتٚده: اَمِرِه چنتأ بُت چأکون کی اَمی خودایأن بٚبٚد و اَمٚرَه مصرٚ ور وأگردأنٚد، چونکی نأنیم اَ موسا سٚر، کی اَمٚرَه جٚه مصر بیرون بأوٚرده، چی بأمؤ!»
41 «پس ایتأ بُت گأبٚ مأندأکٚ مأنستَن چأکودٚد و اونی رِه قوربأنی بوکودٚد و اوچی وأسی کی چأکوده بید. رِه، جشن بیگیفتٚد. 42 اَنٚ وأسی خودا اَشأنٚ جَا بیزأرَ بوسته و اَشأنَ بٚنأ بحألٚ خودشأن کی آفتأب، مأه و ستأره‌یأنَ عیبأدت بوکونٚد! پیغمبرأنٚ کیتأبٚ میأن خوداوند فٚرمأیه: اَی ایسرأییلٚ مردوم، او چهل سألٚ دورون کی بیأبأنٚ میأن نأنستید کؤرأ بیشید، آیا مِرِه قوربأنی و پیشکش بأوٚردید؟ 43 نه، شیمی رأس‌رأسِی عشق و علأقه شیمی بُتأنٚ شین بو، مولِکٚ بُتٚ پرستٚش جیگأ، رِفانٚ بُتٚ ستأره، و تومأمٚ او بُتأنی‌یَ کی چأکوده بید کی اوشأنَ پرستٚش بوکونید. پس منم شٚمٚره بابِلٚ او سٚر تبعید کونم.»
44 «اَمی پیله بأبأیأن بیأبأنٚ میأن عیبأدتٚ چأدرَ خوشأنی اَمرأ بٚردیدی. اَ چأدر تومأم او نقشه مأنستَن چأکوده بوسته بو کی خودا موسایَ نیشأن بٚدأ بو. 45 او سالأنٚ پٚسی، او وخت کی یوشع وعده بٚدأ سرزیمینٚ میأن، بُت پرستٚ آدمأنٚ اَمرأ جنگستأندوبو، اَ چأدرَ بأوٚرده اویَه. ایسرأییلٚ مردومٚم تأ داوودٚ پأدیشأ زمأت، اونی میأن عیبأدت کودید.»
46 «خودا داوودَ ایجور دِه فأندرستی. داوودم خودا جَا بٚخأسته کی اَ گولأز اونی شین بٚبه کی یعقوبٚ خودا رِه ایتأ جأجیگأ چأکونه. 47 ولی رأس‌رأسِی سولیمأن بو کی هو معبدَ چأکوده. 48 ولی حِئقت اَن ایسه کی خودای موتعأل اینسأنٚ دٚس چأکوده معبدأنٚ میأن، نئیسه، هوطؤ کی اون پیغمبرٚ زٚوأنٚ جَا بٚفرمأسته: 49 آسمأن می پأدیشأیی تخت ایسه، و زیمین می پأ جیرٚ چأرپأیه. آیا تأنیدی اَطؤچی معبد مِرِه چأکونید؟ آیا تأنیدی اَجور جأجیگأ می آسأیشٚ رِه چأکونید؟ 50 مگه تومأمٚ اَ دونیأیَ می دٚسٚ اَمرأ چأنکودم؟»
51 «اَی شومأن کی خودایَ نشنأسیدی، اَی شورشیأن! تأ چی زمأت خأییدی شیمی پیله بأبأیأنٚ مأنستَن روح‌القدس اَمرأ موقأومت بوکونید؟ 52 کویتأ پیغمبر ایسه کی شیمی پیله بأبأیأن اونَ اَذِت آزأر نوکوده بید، او پیغمبرأن کی او عأدیل مردأی، ینی مسیح اَمؤنَ، پیشگویی کودیدی؟ و آخرپٚسیٚم مسیحَ بیگیفتید و بوکوشتید! 53 هطؤیه، شومأن دأنسته‌بو خودا و اونی حوکمأنَ قوبیل نوکودیدی، اگه چی کی اَ حوکمأنَ فٚرٚشته‌یأنٚ جَا فأگیفتیدی.»
54 یوهود قوم پیله کسأن اَ گبأن ایشتأوٚستٚن جَا خٚیلی پریشأنَ بوستٚد و خٚیلی اوشأنَ غیظَ گیفته. 55 ولی ایستیفأن پور جٚه روح‌القدس آسمأنَ فأندرسته و خودا جلالَ بیدِه و هطؤیٚم عیسایَ بیدِه کی خودا رأستٚ دٚسٚ ور ایسأبو. 56 پس اَشأنَ بوگفته: «فأندرید! من آسمأنَ دینم کی وأزَ بوسته و مسیحَ فأندرم کی خودا رأستٚ دٚسٚ ور ایسأ!»
57 اوشأنی کی اویَه ایسأبید دِه اَ گبأنٚ ایشتأوستٚنَ طأقت نأشتیدی، خوشأنٚ گوشأنَ بیگیفتٚده، ایجگره بٚزِئده و ایستیفأنٚ سٚر فووُستٚده، 58 و فأکش فأکش اَمرأ اونَ شهر جَا بیرون ببردٚد کی سنگسأر بوکوند. اوشأنی کی اونَ موتهم بوکودٚد و شأهید بود خوشأنٚ ردأیأنَ بکندٚد و ایتأ جوأن پأجیر کی سولُس نأم دأشتی بٚنأده.
59 هو وخت کی ایستیفأنَ سنگسأر کودأندوبود، اون اَطؤ دوعأ بوکود: «اَی خوداوند عیسا، می روحَ قوبیل بوکون!» 60 بأزون خو زأنویأنٚ رو بٚکفته و فریأد بٚزِه و بوگفته: «خوداوندا، اَ گونأیَ اوشأنَ حیسأب نٚنَه!» اَ دوعأ کودن پٚسی، بٚمٚرده.
Currently Selected:
روسولأنٚ کأرأن ۷: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran