یوحنا ۱۵
۱۵
عیسا رأس‌رأسِی انگور رٚز ایسه
1 «من رأس‌رأسِی انگور رٚز ایسٚم و می پئرم بأغبأنه.» 2 اون هرتأ خألَ کی مِیوه نٚده، وأوینه و خألأنی‌یَ کی مِیوه دِهه، هرس کونه کی ویشتر مِیوه فأدَه. 3 او حوکمأنٚ اَمرأ کی شٚمٚره فأدَم، خودا شٚمٚره پأکٚ کوده کی قویتر و موفیدتر بیبید. 4 می میأن بئیسید و وئألید منم شیمی میأن بئیسم، چونکی او وخت کی خأل درختٚ جَا بٚکفه، دِه نتأنه مِیوه فأده. شومأنم نتأنیدی بودونٚ من خوروم مِیوه بأوٚرید و موفید بیبید.
5 «هطؤیه، من انگور رٚز ایسٚم، شومأنم می خألأن. هر کی در من بئیسه و منم در اون، ویشتر مِیوه دِهه چونکی بودونٚ من هیتأ کأری نتأنیدی بوکونید.» 6 اگه اینفر جٚه من سیوأ بٚبه، ایتأ بیمصرفٚ خألٚ مأنه کی اونَ وأوینٚده و فیشأنٚد و او خأل خوشکَ به و بأزون، اونَ البأقی خألأنٚ اَمرأ جمَ کونٚد کی آتشٚ میأن بوسوجأنٚد. 7 ولی اگه در من بئیسید و می کلامٚ جَا ایطأعت بوکونید، هرچی بٚخأیید شٚمٚره فأدأ به. 8 می رأس‌رأسِی شأگردأن خٚیلی حأصیل دیهیدی و اَن می پئرَ جلال دِهه و اونَ پیلّه کونه.
9 «هوطؤ کی پئر مٚرَه دوس دأره، منم شٚمٚره دوس دأرم. پس می محبتٚ میأن بئیسید.» 10 اگه می کلامٚ جَا ایطأعت بوکونید، می محبتٚ میأن ایسأییدی، هوطؤیی کی من می پئرٚ حوکمأنٚ جَا ایطأعت کونم و اونی محبتٚ میأن ایسٚم. 11 اَنَ بوگفتم کی شومأنم پورجٚه می خوشألی بیبید؛ هطؤیه، تأ خوشی جَا لبألب پورَ بید. 12 شیمی جَا خأیم کی هوندر کی من شٚمٚره دوس دأرم، شومأنم کس‌کسٚ دوس بٚدأرید. 13 پیله‌ترین محبتی کی اینفر تأنه خو ریفِقأنٚ رِه بوکونه، اَنٚ کی خو جأنَ اوشأنٚ رِه فأدَه. محبتَ وأستی اَطؤ ایمتحأن کودن. 14 و شومأن می رِیفِقأنید اگه جٚه اونچی کی گم ایطأعت بوکونید. 15 دِه شٚمٚره غولأم دونخأنٚم، چونکی اربأب نتأنه خو غولأمَ ایعتمأد بوکونه. من شٚمٚره"می ریفِقأن " دأنٚم، چونکی شٚمٚره ایعتمأد بوکودم و هر چی‌یَ کی می پئر بوگفته، همّه شٚمٚره بوگفتم.
عیسا جٚه دونیأ مردومٚ نیفرت گب زٚنِه
16 «شومأن مٚرَه اینتخأب نوکودیدی، من شٚمٚره اینتخأب بوکودم و شٚمٚره اوسه کودم کی بیشید و مِیویأنی بأوٚرید کی بمأنه، تأ هر چی خأییدی، می نأم اَمرأ بیگید و می پئرٚ جَا فأگیرید.» 17 شیمی جَا خأیم کی کس‌کسٚ محبت بوکونید، 18 چونکی دونیأ مردوم شیمی جَا بیزأرَ بٚدأ. ولی اَنَ بدأنید پیشتر جٚه اَنکی شیمی جَا بیزأر بٚبٚد، می جَا بیزأر بود. 19 اگه اَ دونیأیَ دیل دٚوٚسته بید، دونیأ شٚمٚره دوس دأشتی، ولی شومأن اونَ دیل دئنوستیدی، چونکی شٚمٚره دونیأ مردومٚ جَا سیوأ بوکودم. هنٚ وأسی شیمی جَا بیزأرٚده. 20 شٚمٚره خأطر نٚهأ کی چی بوگفتم؟ خیدمتکأرٚ موقأم جٚه اونی اربأب بوجؤرتر نییٚه. پس اگه مٚرَه اَذِت و آزأر بوکودٚد، شٚمٚره‌یٚم آزأر دٚهٚده و اگه می گبأنَ نشتأوستٚده، شیمی گبأنٚم نشتأوٚده. 21 دونیأ مردوم شٚمٚره آزأر دٚهٚده، جٚه اَ خأطر کی شومأن میشینیدی و هطویی‌یٚم اَنٚ وأسی کی اوشأن خودایَ نشنأسٚده، هو خودایی کی مٚرَه اوسه کوده.
22 «اگه من اَ دونیأ میأن نأمؤ بوم و مردومٚ اَمرأ گب نٚزه بوم، تقصیرکأر نوبود. ولی هسأ کی بأمؤم، دِه خوشأنی گونأیأنٚ رِه بهأنه نأرٚده.» 23 هر کی می جَا بیزأره، می پئرٚ جأیٚم بیزأره. 24 اگه من اَ مردومٚ چومأنٚ ورجأ کأری نوکوده بوم کی جغرز من هیکس تأ هسأ نوکوده بو، تقصیرکأر نوبود، امّا اَسه تومأمٚ اَ موجیزه‌یأنٚ دِئنٚ اَمرأ، هنو می جَا و می پئرٚ جَا بیزأرٚده؛ 25 اَطؤیی به، اونچی کی اَشأنٚ تورأتٚ دورون بینیویشته بوبوسته، انجأم بِه کی فٚرمأیه: "بیخودی می جَا بیزأر بود."
26 «ولی من او روحَ کی تسلی دِهه شیمی یاور اوسه کونم. تومأمٚ رأستیأن اونٚ اَمرأ شورو به و می "پئرٚ" ور بأمؤ، و جٚه من همه چی‌یَ شٚمٚره گه. 27 شومأنم وأستی جٚه من تومأمٚ مردومٚ اَمرأ گب بٚزنید، چونکی جٚه اوّل می اَمرأ ایسأبید.»
Currently Selected:
یوحنا ۱۵: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran