متا ۱۵
۱۵
خودا حوکمأن یا اینسأنٚ رسم و روسومأن
1 بأزون ایتأ عیده جٚه فریسیأن و دینٚ عألیمأن جٚه اورشلیم بأمؤده کی عیسا اَمرأ بوگو موگو بوکونٚد. اوشأن وأورسئده: 2 «چٚره تی شأگردأن او رسم و روسومَ کی اَمی پیله بأبأیأنٚ جَا اَمٚرَه فأرٚسه‌یَ، محل نٚنٚده و قبلٚ اَنکی غذأ بوخورٚد، خوشأنٚ دٚسأنَ نوشؤرٚده؟» 3 عیسا جوأب بٚدأ: «چٚره شومأن خودتأن شیمی قدیمٚ رسم و روسومأنٚ دأشتٚنٚ رِه، خودا حوکمأنَ لقد دٚمٚج کونیدی؟ 4 ایتأ جٚه خودا حوکمأن اَنه کی "تی پئر و مأرَ ایحترأم بٚنه" #۱۵:۴ خروج ۲۰:۱۲ و تثنیه ۵:۱۶.هطؤیٚم "هرکی خو پئر و مأرٚ فأش بٚده، وأستی اونَ کوشتٚن".#۱۵:۴ خروج ۲۱:۱۷ و لاویأن ۲۰:۹. 5 ولی شومأن گیدی عأیب نأرِه اگه اینفر خو پئر و مأرَ بٚگه: "بٚبٚخشید، نتأنٚم شٚمٚره یاور بدم، چونکی اونچی کی وأستی شٚمٚره فأدٚم، خودا رِه صدقه فأدأم." 6 پس شومأن اَ قأنونٚ اَمرأ کی بٚنأییدی، اوشأنَ گیدی دِه وأجٚب نییٚه شیمی پئر و مأرَ ایحترأم بنید. اَطؤیی شومأن شیمی سونّتٚ دأشتٚنٚ رِه، خودا کلامَ لقد دٚمٚج کونیدی. 7 اَی ریأکأرأن، اشعیایٚ نبی شیمی جَا چی خُب بوگفته کی 8 "اَ قوم خوشأنٚ زٚوأنٚ اَمرأ، مٚرَه ایحترأم نٚهٚده، ولی اَشأنٚ دیل می جَا دور ایسه. 9 اوشأنٚ عیبأدت قوبیل نییٚه چونکی خودا حوکمأنٚ آمؤختٚنٚ عوض، آدمأنٚ رسم و روسومأنَ، مردومَ آموجٚده."»#۱۵:۹ اِشعیا ۲۹:۱۳ (یونأنی ترجومه بوبوسته).
اون چیسه کی آدمَ نٚجٚستَ کونِه؟
10 بأزین عیسا مردومَ خو ورجأ دؤخأده و بٚفرمأسته: «خُب بشتأوید و حقٚ سعی بٚزنید کی بفأمید. 11 اونچی کی دٚهٚنٚ دورون شِه، اوچی نییٚه کی آدمَ نٚجٚستَ کونه، بلکی اونچی کی آدمٚ دٚهٚنٚ جَا بیرون اَیِه، هونی ایسه کی اونَ نٚجٚستَ کونه.»
12 هه زمأت دورون اونٚ شأگردأن بأمؤده اونٚ ورجأ و بوگفتٚده: «فریسیأن شیمی گبأنٚ جَا نأرأحتَ بوستٚد.»
13 عیسا جوأب بٚدأ: «هرتأ نهأل کی می آسمأنی پئر نکأشته بی، ریشه جَا بٚکنده به. 14 پس، اوشأنی اَمرأ کأر نوأدأشتنید. اَشأن او کورأن ایسٚد کی البأقی کورأنَ عصأکٚش بوبوستده، و اگه ایتأ دکفه چأه دورون، اویتأیٚم خو دونبأل فأکشه.»
15 بأزین پطرس عیسا جَا بٚخأسته، کی وأشکأفأنٚه کی چوطؤ بِه، اینسأن نأپأکٚ چی بوخوره و نٚجٚستَ نٚبه.
16 عیسا بوگفته: «ینی شومأنم هنو نفأمیدی؟! 17 وأخٚوٚر نیئیدی اینسأن اونچی کی خوره، شِه اونی مأدٚه دورون، و بأزون بدنٚ جَا بیرون شِه؟ 18 ولی نأجورٚ گبأن، نأجورٚ دیلٚ جَا بیرون اَیِه و اونی بوگفته کسَ نٚجٚستَ کونه. 19 چونکی اَجور چیأن جٚه دیلٚ دورون بیرون اَیِه: پٚلیدٚ فیکرأن، آدم کوشتٚن، زٚنأ، دوزدی، دورُغ شهأدت دٚئن و ایفترأ زِئن. 20 هطؤیه، اَ چیأن ایسٚد کی اینسأنَ نٚجٚستَ کونه، نه نوشؤسته دٚسٚ اَمرأ غذأ خوردن!»
کنعانی زنأکٚ ایمأن
21 بأزون عیسا جلیلَ بٚنأ بوشؤ صور و صیدونٚ ور. 22 اویَه ایتأ کنعانی زنأی بأمؤ اونی ورجأ و ایلتمأسٚ اَمرأ بوگفته: «اَی آقأ جأن، اَی داوودٚ پٚسر، مٚرَه رحم بوکون! می دؤختر گریفتأرٚ ایتأ پٚلیدٚ روح ایسه. روح ای دٚقّه‌یٚم اونَ وِلَ نوکونِه.»
23 ولی عیسا هیچی نوگفته، تأ اَنکی شأگردأن اونٚ جَا خأهیشٚ بوکودٚد و بوگفتٚده: «اونَ ایتأ جوأب فأدٚن کی بشه، چونکی خو زٚهأر زِئنٚ اَمرأ، اَمٚرَه خستَه کوده.»
24 عیسا بٚفرمأسته: «خودا مٚرَه اوسه کوده کی یوهودیأنَ یاور بدم، نه غیرٚیوهودیأنَ، چونکی یوهودیأن، خودا اَویرَ بوسته گوسوٚندٚده.»
25 بأزون او زنأی عیسا پأ ور خأکٚ سٚر بٚکٚفت و ایلتمأس بوکوده، بوگفته: «آقأ جأن، خأهیش کونم مٚرَه یاور بٚدٚن.» 26 عیسا بٚفرمأسته: «دوروست نییٚه کی می زأکأنٚ دٚسٚ جَا نأنَ فأگیرٚم و سٚکأنٚ ورجأ تأوٚدم.»
27 زنأی جوأب بٚدأ: «هطؤیه، آقأ جأن، شومأن حق دأریدی؛ ولی سکأنٚم خوشأنٚ صأبٚ سٚفره جَا، بیجیر فووُسته خورده نأنَ خورٚده.»
28 عیسا اونَ بٚفرمأسته: «اَی زنأی، تی ایمأن خٚیلی زیأده. بوشو کی تی آروزو انجأم بوبو.» هو دٚقّه اونٚ دؤختر شفأ بیأفت.
همٚتأ مٚرٚضأنَ شفأ دٚئن
29 عیسا جٚه اویَه رأ دکفت و جلیلٚ دریأ کنأر فأرٚسٚه. بأزین بوشؤ کوه جؤر، هویه بینیشت. 30 بأزون مردوم دسته دسته بأمؤده، شٚلأن و کورأن و ایفلیجأن و لال و همٚتأ جور نأخوشأنَ بأوٚردٚد اونی ورجأ و اون اوشأنٚ همّه شفأ بٚدأ. 31 اوشأن کی خوشأنی عمرٚ دورون هیذره گب نٚزِه بود، ذوق اَمرأ گب زِئندوبود؛ شٚلأن رأ بوشؤده؛ ایفلیجأن وأز وأز کودأندوبود؛ و اوشأنی کی کور بود تعجوبٚ اَمرأ دؤرٚوٚرَ فأندرستیدی! مردوم قأقَ بوستٚد و ایسرأییلٚ خودایَ شوکر کودیدی.
چأر هیزأر نفرَ غذأ دٚئن
32 هو زمأتٚ میأن، عیسا خو شأگردأنٚ دؤخأده و اَشأنَ بٚفرمأسته: «می دیل اَ مردومٚ رِه سوجه، اَسه سه روج ایسه کی می اَمرأ ایسأده و ده هیچی اَشأنٚ خوردنٚ رِه نمأنسته. نخأم اوشأنَ ویشتأیی اوسه کونم بٚشٚد بٚخأنه، ایمکأن دأره رأ دورون ضعف بوکونٚد.»
33 اونٚ شأگردأن جوأب بٚدأده: «اَ بیأبأنٚ دورون اَن همه مردومٚ سِئرَ کودنٚ رِه کؤیَه شأ نأن بیگیر اَوٚردٚن؟»
34 عیسا وأوٚرسِه: «چندر نأن دأریدی؟» جوأب بٚدأده: «هفت‌تأ نأن و چن‌تأ کوجه مائی!»
35 پس مردومَ بٚفرمأسته زیمینٚ سٚر بینیشینٚد. 36 بأزین هفت‌تأ نأن و چن‌تأ مأئی‌یَ اوسأده و خودایَ شوکر بوکود و خوردَ کوده فأدأ خو شأگردأنَ. اوشأنم نأنأنَ فأدأده مردومَ. 37 همه بوخوردٚد و سِئرَ بوستٚد. بأزین شأگردأن، بمأنسته خورده‌یأنٚ جَا، هفت‌تأ زیبیل اوسأدٚد. 38 اوشأنی کی غذأ بوخوردٚد، جغرز زنأکأن و زأکأن، چأر هیزأرتأ مردأی بود.
39 بأزون عیسا مردومَ وئأشته کی بٚشد، ولی خودش لوتکأ بینیشته، بوشؤ مجدلٚ سأمأن.
Currently Selected:
متا ۱۵: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran