متا 18
18
زأکأنٚ مأنستَن سأده دیل بیبید
1هو وخت، شأگردأن بأمؤده عیسا ورجأ وأورسئده: «کی آسمأنٚ ملکوتٚ میأن جٚه همه کس پیله‌تره.»
2عیسا ایتأ کوجه‌دأنه زأکَ دؤخأده و اونَ بأوٚرده شأگردأنٚ وٚسٚط، 3و بوگفته: «تأ شٚمٚره عوضٚ نوکونید و زأکأنٚ مأنستَن نیبید، هیوخت نتأنید آسمأنٚ ملکوتٚ بودورون بیشید. 4پس، هرکی خؤرَه اَ زأکٚ مأنستَن محجوب چأکونه، آسمأنٚ ملکوتٚ دورون پیله‌تره؛ 5و هر کی می وأسی اَطوچی زأکَ قوبیل بوکونٚه، در اصل مٚرَه قوبیل بوکوده. 6ولی اگه کسی بأعیث بٚبه ایتأ جٚه اَ زأکأن کی مٚرَه ایمأن دأرٚده، خو ایمأنَ جٚه دٚس بٚده، اونٚ رِه بِیتره کی ایتأ پیله سنگ اونی گردنٚ دؤر دٚوٚدٚد و تأوٚدأ بٚبه دریأ دورون.
7«وای بحألٚ اَ دونیأ کی بأعیث به مردوم خوشأنی ایمأنَ جٚه دٚس بٚدٚد! گونأ کودنٚ وسوسه همیشٚک نٚهأ، ولی وای بحألٚ اونی کی مردومَ وسوسه بوکونٚه. 8اگه تی دٚس یا تی پأ، تٚرَه لغزش تأوٚده، اونَ وأوین و فیشأن، چون بِیتره کی ای دٚس و ای پأ اَمرأ بیشی بیهِشت، تأ اَنکی دو دٚس و دو پأ اَمرأ تأوٚدأ بیبی او آتشٚ دورون کی هیوخت خأموشَ نیبه. 9و اگه تی چوم تٚرَه لغزش تأوٚده، اونَ کأسه جَا بیرون بأوٚر و فیشأن، چون بِیتره ایتأ چومٚ اَمرأ بیشی بیهِشت، تأ اَنکی دوتأ چومٚ اَمرأ تأوٚدأ بیبی جهندمٚ آتشٚ دورون.
10«هیوخت اَ کوجه زأکأنَ دٚس پٚرَ نیگیرید، چون اوشأن آسمأنٚ دورونی فٚرٚشته‌یأنی دأرٚده کی همیشٚک می آسمأنی پئرٚ ورجأ حأضیرَ بد. 11چون اینسأنٚ پٚسر بأمؤ تأ اَویرَ بوسته‌یَ نیجأت بٚده.#18:11 همٚتأ یونأنی بینیویشته‌یأن، آیه‌یٚ۱۱ نأرٚده
اَویرَ بوسته گوسوٚندٚ دأستأن
12«اگه ایتأ مردأی صدتأ گوسوٚند بٚدأره، و ایتأ جٚه اوشأن گلّه جَا دورَ بٚه و اَویرَ بٚه، او مردأی چی کونه؟ ینی او نود و نه‌تأ گوسوٚندَ کوه دورون سٚرَ نٚده کی او اَویرَ بوسته گوسوٚندٚ دونبأل بگرده؟ 13هطویه، اون شِه و وختی اونَ بیأفته، او ایتأ گوسوٚندٚ وأسی ویشتر خوشألَ به تأ او نود و نه‌تأ گوسوٚندٚ وأسی کی خطرٚ دورون نئیسأبود. 14اَطویی، شیمی آسمأنی پئر نٚخأیه کی حتّا ایتأ جٚه اَ زأکأن، جٚه دٚس بٚشٚد و هلأکَ بد.
حقٚ سعی بٚزٚن تی برأرٚ اَمرأ آشتی بوکونی
15«اگه تی برأر، تی حق بٚدی بوکونٚه، بوشو و خلوتی اونی اَمرأ گب بٚزٚن و اونَ خو ایشتیوأ جَا وأخٚوٚرَ کون. اگه تی گبَ بشتأوست و بٚگٚردٚن بیگیفت، تی برأرَ دووأره بیأفتی. 16ولی اگه قوبیل نوکود، اَیدٚفأرِه دوتأ یا سه‌تأ شأهیدٚ اَمرأ اونی ورجأ بوشو کی اَ آدمأن تی گبأنٚ شأهید بٚبٚد. 17ولی اگه ایوأردِه شیمی گبأنَ نشتأوٚست، بأزون موضو‌یَ کیلیسا رِه بوگو؛ و اگه کیلیسا تٚرَه حق فأدَه و او برأر بأزم قوبیل نوکوده، بأزون کیلیسا وأستی اونی اَمرأ ایتأ غریبه یا فأسیدٚ بأج‌فأگیرٚ مأنستَن رفتأر بوکونٚه. 18ایطمینأن بٚدأرید اونچی کی زیمینٚ سٚر دٚوٚدید، آسمأنٚ دورونم دٚوٚستٚه به، و اونچی زیمینٚ رو وأکونید، آسمأنٚ دورونم وأزَ به.
19«اَنٚم شٚمٚره گم کی اگه دو نفر جٚه شومأن اَیَه زیمینٚ سٚر ایچی وأسی کی خودا جَا خأیید کس‌کسٚ اَمرأ همدیل بیبید، می آسمأنی پئر اونَ شٚمٚره فأدَه. 20چون هرجأ کی دو یا سه نفر می نأمٚ وأسی جمَ بد، من اویَه اوشأن میأن ایسأم.»
چٚره لأزیمه بٚبخشیم
21هو موقع پطرس بأمؤ و وأوٚرسِه: «آقأ جأن، او برأر کی مٚرَه بدی کونٚه، چن دٚفه وأستی بٚبخشم؟ ینی هفت وأر؟»
22عیسا جوأب بٚدأ:«نه، هفتأد دٚفه هفت وأر.»
23هطویم بوگفته: «آسمأنٚ ملکوتٚ ایتفأقأن او پأدیشأ ماجیرأیَ مأنه کی تصمیم بیگیفت خو حیسأبأنَ صأفَ کونه 24اَ کأرٚ موقع، ایتأ جٚه قرضدأرأنَ بأوٚردٚد دربأرٚ دورون کی ایتأ پیله پول دراصل «ده هیزأر قنطأر»#18:24 ای قنطأر ۶۰۰۰ دینأرٚ مأنستَن اَرزِه کی ایتأ سأده کأرٚگٚرٚ ۲۰ سألٚ دسمزدٚ اَندر بو. پأدیشأیَ قرضدأر بو. 25ولی چون پول نأشتی خو قرضٚ فأدٚه، پأدیشأ دستور بٚدأ اونی قرضٚ عوض، خودش و اونی زن و زأکأنَ، تومأمٚ مأل و مینألٚ اَمرأ بوفروشٚد. 26ولی او مردأی پأدیشأ پأ جیر بٚکٚفت و ایلتیمأس بوکود و بوگفته: "اَی پأدیشأ خأهیش کونم مٚرَه فورصت بدید کی می قرضَ تأ آخر همّه فأدٚم." 27پأدیشأ دیل اونٚ رِه بوسوخته و اونَ آزأدَ کود و اونی قرضَ بٚبخشه. 28ولی وختی اَ قرضدأر، پأدیشأ دربأرٚ جَا بیرون بأمؤ، توندأ توند خو همکأرٚ دونبأل بوشؤ کی فقد صد دینأر،#18:28 دینأر ایتأ سکه بو کی،ایتأ سأده کأرٚگٚرٚ روزمزدٚ دسمزدٚ اَندر بو.اونی جَا طلب دأشتی. پس اونی گولی‌یَ فیچأل بٚدأ و بوگفته: "آها زود، تی قرضَ فأدٚن!" 29قرضدأر اونی پأ جیر بٚکٚفت و ایلتیمأس بوکود: "خأهیش کونم مٚرَه فورصت بٚدٚن کی تومأمٚ می بٚدٚهی‌یَ تٚرَه فأدٚم." 30ولی طلبکأر رأضی نوبو و اونَ تأودأ زندأن کی اونی پولٚ تومأم و کمأل فأدَه. 31وختی او شخصٚ ریفِقأن اَ مأجیرأیَ بشتأوستٚد، خٚیلی دیلخورَ بوستٚد و بوشؤده پأدیشأ ورجأ و تومأمٚ مأجیرأیَ اونی عرض فأرٚسأنِده. 32پأدیشأ دفأتن او مردأکٚ بٚخأست و اونَ بٚفرمأسته: "اَی ظألیمٚ بدذأت! من تی خأهیش کودنٚ وأسی او پیله قرضٚ بٚبخشِم. 33ینی تی همکأرٚ حق نوبو کی اونَ رحم بوکوده‌بی، هوطو کی من تٚرَه رحم بوکودم؟" 34پأدیشأ خٚیلی توند برزخَ بو و دستور بٚدأ اونَ تأوٚدٚد زندأن و شکنجه بٚدٚد، و تأ آخرٚ دینأر خو قرضَ فأندأ، اونَ آزأدَ نوکونٚد.
35«هطویه، می آسمأنی پئر اَطویی شیمی اَمرأ رفتأر کونه اگه شومأن شیمی برأرَ جأنٚ دیلٚ اَمرأ نٚبٚخشید.»
Currently Selected:
متا 18: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran
