متا 4
4
عیسا ایمتحأن بوستن
1بأزون خودا روح، عیسایَ ببرده بیأبأنٚ دورون کی اویَه شیطان اونَ وسوسه و ایمتحأن بوکونه. 2اون چهل شبندروج پٚسی کی روزه دأشتی، خٚیلی اونَ ویشتأ کوده. 3اَ حأل میأن، اونی کی وسوسه کونه بأمؤ اونی دونبأل و بوگفته: «اگه خودا پٚسری، اَ سنگأنَ بوگو نأن بٚبٚد.»
4ولی عیسا اونَ بٚفرمأسته: «بینیویشته بوبوسته کی: "اینسأن فقد نأن اَمرأ زٚنده نییٚه، بلکی هر ایتأ کلمه اَمرأ کی خودا دٚهٚنٚ جَا بیرون اَیِه."»#4:4 تثنیه ۸:۳
5بأزون شیطان اونَ ببرده او موقدسٚ شهر، اورشلیم و معبدٚ پوشتٚ‌بأمٚ جؤر بدأشته، 6و بوگفته: «اگه خودا پٚسری، تٚرَه جٚه اَ جؤر تأوٚد بیجیر، چون بینیویشته بوبوسته: " خو فٚرٚشته‌یأنَ فرمأن دِهه و اوشأن تٚرَه خوشأنی دٚسأنٚ جؤر رأستَ گیرده کی تی پأ ایتأ سنگَ نوخورٚه."»#4:6 مزمور۹۱:۱۱-۱۲
7عیسا جوأب بٚدأ: «هطویه، ولی اَنٚم بینیویشته بوبوسته کی:" تی خوداوند، خودای ایمتحأن نوأکودٚن."»#4:7 تثنیه ۱۶:۶
8بأزین شیطان اونَ ایتأ پیله کوه قُله جؤر ببرد و تومأمٚ دونیأ کیشورأن و اوشأنٚ شوکو و جلالَ اونَ نیشأن بٚدأ، 9و بوگفته: «اگه زانو بزنی و مٚرَه پرستٚش بوکونی، اَشأنٚ همه‌یَ تٚرَه فأدٚم.»
10عیسا اونَ بوگفته: «اَی شیطان، می جَا دورَ بو! چونکی موقدسٚ کیتأبأنٚ دورون بأمؤ:"تی خوداوند، خودایَ پرستٚش بوکون و فقد اونَ عیبأدت بوکون."»
11بأزون شیطان اونی جَا دورَ بوسته و فٚرٚشته‌یأن بأمؤده و اونَ خیدمت بوکودٚد.
عیسا خیدمتأنٚ شورو بوستن
12وختی عیسا، یوحنا دسگیرَ بوستنٚ جَا وأخٚوٚرَ بوست، یوهودیه‌یَ ترکَ کود و وأگردسته جلیل. 13اوّل بوشؤ ناصره شهر و بأزون، کَفَرناحومٚ شؤئؤنٚ رِه رأ دکفت، شهری کی جلیلٚ دریأچه کنأره، زبولون و نفتالی شرأ نٚهأ بو. 14اَطویی، اونچی کی خودا اشعیای نبی زٚوأنٚ جَا بوگفته بو، انجأم بوبو: 15«زبولون و نفتالی شرأ، دریأچه کنأر، اُردنٚ او سٚر و تأ جلیل ور، کی غریبه‌یأن اونی دورون زٚندیگی کونٚده؛ 16آدمأنی کی تأریکی دورون ایسأبود، ایتأ پیله نور بیدِد، و اوشأنی سٚر کی سرزیمینی میأن ایسأبود کی مرگ اوشأنی سٚر سأیه تأوٚدأ بو، ایتأ نور دٚتأوٚست.»#4:16 اشعیا۹:۱-۲ (یونأنی بینیویشته). 17اونٚ پٚسی، عیسا شورو بوکوده خودا پیغأمَ اعلام کودن، کی: «شیمی گونأیأنٚ جَا توبه بوکونید، چونکی آسمأنٚ ملکوت فأرٚسئندٚره.»
عیسا اوّلی شأگردأن
18ای روج عیسا جلیلٚ دریأچه کنأره دٚوأرٚستأندوبو کی دوتأ برأرَ بیدِه، اوشأنی نأم شمعون، کی پطرس معروف بو، و اونی برأر آندریاس کی دریأ دورون دأم تأوٚدأندوبود، چون هر دوتأ مأئیگیر بید.
19عیسا اوشأنَ دؤخأده، بوگفته: «می دونبأل سٚر بأیید و من شٚمٚره نیشأن دٚهٚم کی چوطو خودا رِه آدمأنَ صید بوکونید.» 20اَشأنٚم بی معطلی خوشأنی دأمأنٚ زیمینٚ سٚر بٚنأده و اونی دونبألسر رأ دکفتد.
21ایپچه پیشتر جٚه اویَه، دو تأ دِه برأر ینی یعقوب و یوحنایَ بیدِه کی خوشأنی پئر زِبِدی اَمرأ لوتکأ دورون نیشته بود و خوشأنٚ دأمأنَ چأکودأندوبود. اون اَشأنٚم دعوت بوکوده کی اونی دونبأل بٚشٚد. 22اَشأن بی‌معطلی، لوتکأ و خوشأنی پئرَ وِلَ کودٚد، اونی دونبألسر رأ دکفتد.
عیسا خیدمتأن جلیل میأن
23عیسا جلیلٚ سرزیمینٚ همٚتأ شرأ گردستی و کنیسه‌یأنٚ دورون آمؤختی و خودا ملکوتٚ خورم خٚوٚرَ اعلام کودی و هرتأ مرض و نأخوشی‌یَ شفأ دٚئی. 24اونی آوأزه سوریه همٚتأ شرأنٚ جَا بیپیچسته، و مردوم همٚتأ نأخوش احوألأنی کی جوروأجور درد و مرض دأشتید، و دیو بٚزِکأن، غشی آدمأن و معلولأنَ عیسا ورجأ اَوٚردیدی و اون اوشأنَ شفأ دٚئی. 25اون هر جأ کی خو پأیَ نأیی، ایتأ پیله جِمئیت جلیلٚ سرزیمینٚ جَا، دکاپولیسٚ منطقه، اورشلیمٚ شهر و یوهودیه سرزیمینٚ سرتأسر، و اُردنٚ روخأنٚ شرقٚ جَا، اونی دونبألسر رأ دکفتیدی.
Currently Selected:
متا 4: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran
