متا ۴
۴
عیسا ایمتحأن بوستن
1 بأزون خودا روح، عیسایَ ببرده بیأبأنٚ دورون کی اویَه شیطان اونَ وسوسه و ایمتحأن بوکونه. 2 اون چهل شبندروجٚ پٚسی کی روزه دأشتی، خٚیلی اونَ ویشتأ کوده. 3 اَ حألٚ میأن، اونی کی وسوسه کونه بأمؤ اونی دونبأل و بوگفته: «اگه خودا پٚسری، اَ سنگأنَ بوگو نأن بٚبٚد.»
4 ولی عیسا اونَ بٚفرمأسته: «بینیویشته بوبوسته کی: "اینسأن فقد نأن اَمرأ زٚنده نییٚه، بلکی هر ایتأ کلمه اَمرأ کی خودا دٚهٚنٚ جَا بیرون اَیِه."»#۴:۴ تثنیه ۸:۳.
5 بأزون شیطان اونَ ببرده او موقدسٚ شهر، اورشلیم و معبدٚ پوشتٚ‌بأمٚ جؤر بدأشته، 6 و بوگفته: «اگه خودا پٚسری، تٚرَه جٚه اَ جؤر تأوٚد بیجیر، چونکی بینیویشته بوبوسته: "خو فٚرٚشته‌یأنَ فرمأن دِهه و اوشأن تٚرَه خوشأنی دٚسأنٚ جؤر رأستَ گیرده کی حتأ تی پأ ایتأ سنگَ نوخورٚه."»#۴:۶ مزمور ۹۱:۱۱-۱۲.
7 عیسا جوأب بٚدأ: «هطؤیه، ولی اَنٚم بینیویشته بوبوسته کی: " تی خوداوند، خودای ایمتحأن نوأکودٚن."»#۴:۷ تثنیه ۶:۱۶.
8 بأزین شیطان اونَ ایتأ پیله کوه قُله جؤر ببرد و تومأمٚ دونیأ کیشورأن و اوشأنٚ شوکو و جلالَ اونَ نیشأن بٚدأ، 9 و بوگفته: «اگه زانو بزنی و مٚرَه پرستٚش بوکونی، اَشأنٚ همه‌یَ تٚرَه فأدٚم.»
10 عیسا اونَ بوگفته: «اَی شیطان، می جَا دورَ بو! چونکی موقدسٚ کیتأبأنٚ دورون بأمؤ: "خوداوند، تی خودایَ پرستٚش بوکون و فقد اونَ عیبأدت بوکون."»
11 بأزون شیطان اونی جَا دورَ بوسته و فٚرٚشته‌یأن بأمؤده و اونَ خیدمت بوکودٚد.
عیسا خیدمتأنٚ شورو بوستن
12 او وخت کی عیسا، یوحنا دسگیرَ بوستنٚ جَا وأخٚوٚرَ بوست، یوهودیه‌یَ ترکَ کود و وأگردسته جلیل. 13 اوّل بوشؤ ناصره شهر و بأزون، کَفَرناحومٚ شؤئؤنٚ رِه رأ دکفت، شهری کی جلیلٚ دریأچه کنأره، زبولون و نفتالی سأمأنٚ ور نٚهأ بو. 14 اَطؤیی، اونچی کی خودا اشعیای نبی زٚوأنٚ جَا بوگفته بو، انجأم بوسته: 15 «زبولون و نفتالی سأمأن، دریأچه کنأر، اُردنٚ او سٚر و تأ جلیل ور، کی غریبه‌یأن اونی دورون زٚندیگی کونٚده؛ 16 آدمأنی کی تأریکی دورون ایسأبود، ایتأ پیله نور بیدِده، و اوشأنی سٚر کی سرزیمینی میأن ایسأبود کی مرگ اوشأنی سٚر سأیه تأوٚدأ بو، ایتأ نور دٚتأوٚسته.»#۴:۱۶ اِشعیا ۹:۱ و ۲ (یونأنی بینیویشته). 17 اونٚ پٚسی، عیسا شورو بوکوده خودا پیغأمَ موعیظه بوکوده و بوگفته: «شیمی گونأیأنٚ جَا توبه بوکونید، چونکی آسمأنٚ پأدیشأیی فأرٚسئندٚره.»
عیسا اوّلی شأگردأن
18 ایروج عیسا جلیلٚ دریأچه کنأره دٚوأرٚستأندوبو کی دوتأ برأرَ بیدِه، اوشأنی نأم شمعون، کی پطرس معروف بو، و اونی برأر آندریاس کی دریأ دورون دأم تأوٚدأندوبود، چونکی هر دوتأ مأئیگیر بود.
19 عیسا اوشأنَ دؤخأده، بوگفته: «می دونبأل سٚر بأیید و من شٚمٚره نیشأن دٚهٚم کی چوطؤ خودا رِه آدمأنَ صید بوکونید.» 20 اَشأنٚم بی معطلی خوشأنی دأمأنٚ زیمینٚ سٚر بٚنأده و اونی دونبألسر رأ دکفتد.
21 ایپچه پیشتر جٚه اویَه، دو تأ دِه برأر ینی یعقوب و یوحنایَ بیدِه کی خوشأنی پئر زِبِدی اَمرأ لوتکأ دورون نیشته بود و خوشأنٚ دأمأنَ چأکودأندوبود. اون اَشأنٚم دعوت بوکوده کی اونی دونبأل بٚشٚد. 22 اَشأن بی‌معطلی، لوتکأ و خوشأنی پئرَ وِلَ کودٚد، اونی دونبألسر رأ دکفتد.
عیسا خیدمتأن جلیل میأن
23 عیسا جلیلٚ سرزیمینٚ همٚتأ سأمأنَ گردستی و کنیسه‌یأنٚ دورون آمؤختی و خودا پأدیشأیی خورومٚ خٚوٚرَ وأگویأ کودی و هرتأ مرض و نأخوشی‌یَ شفأ دٚئی. 24 اونی آوأزه سوریه میأن جٚه اَسٚر تأ اوسٚر بیپیچسته، و مردوم همٚتأ نأخوش احوألأنی کی جوروأجور درد و مرض دأشتید، و دیو بٚزِکأن، غشی آدمأن و معلولأنَ عیسا ورجأ اَوٚردیدی و اون اوشأنَ شفأ دٚئی. 25 اون هر جأ کی خو پأیَ نأیی، ایتأ پیله جِمئیت جلیلٚ سرزیمینٚ جَا، دکاپولیسٚ منطقه، اورشلیمٚ شهر و یوهودیه سرزیمینٚ سرتأسر، و اُردنٚ روخأنٚ شرقٚ جَا، اونی دونبألسر رأ دکفتیدی.
Currently Selected:
متا ۴: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran