مَرقُس ۱۱
۱۱
مسیح شِه اورشلیمَ
1 او وخت کی فأرٚسِده اورشلیمَ بیت فأجی و بیت عنیا نیزدیکی کی کوه زیتونٚ سٚر نٚهأ بو، عیسا دوتأ جٚه خو شأگردأنَ پیشتر اوسه کوده 2 و اَشأنَ بٚفرمأسته: «بیشید او دیهأتی کی شیمی جولو نٚهأ. او وخت کی بوشؤیید بودورون، ایتأ کُرّه اولأغَ دینیدی کی دٚوٚسته نٚهأ و تأ هسأ هیکس اونَ سوأرَ نوبوسته. اونَ وأزَ کونید و بأوٚرید اَیَه 3 و اگه اینفر شیمی جَا وأوٚرسِه: "چی کودأندریدی؟" بیگید: "خوداوند اونَ ایحتیأج دأره و دفأتن اونَ پٚسَ دِه."»
4 او دوتأ شأگرد بوشؤده کُرّه اولأغَ بیأفتده کی کوچه میأن، ایتأ خأنه دٚرٚ سٚر دٚوٚسته بو. هوطؤ کی کُرّهیَ وأزَ کودأندوبود، 5 ایتأ عیده کی اویَه ایسأ بود، وأوٚرسِئده: «چی کودأندریدی؟ چٚره او کُرّهیَ وأزَ کودأندریدی؟»
6 بأزین اونچی کی عیسا بٚفرمأسته بو، بوگفتٚده. اوشأنم ایجأزه بٚدأده کی کُرّهیَ ببرد.
7 کُرّهیَ بأوٚردٚد عیسا ورجأ و شأگردأن خوشأنی لیوأسأنَ تأوٚدأد اونی سٚر کی اون سوأرَ به. 8 خٚیلی جٚه مردوم خوشأنی لیوأسأنَ اونی جولو، جأده سٚر وأشأدٚد و ایتأ عیده دأرٚ خألأنَ کی کیشأورزی زیمینأنٚ دورون وأوِه بود، اونی جولو جأده سٚر وأشأدٚد.
9 مردوم جٚه هر ور اونَ دؤرَ کوده بود و فریأد زئیدی:
«هوشیعانا!»#۱۱:۹ آرأمی کلمهیأنٚ میأن «هوشیعانا» ینی «خأهیش کونیم نیجأت بٚدٚن». ولی دونبألتر اَ کلمه جَا تعریف تمجید و عیبأدتٚ رِه ایستفأده کودیدی؛ هطؤیٚم آیه ۱۰ میأن.
«مووأرٚک ایسه اون کی خوداوندٚ ایسمٚ جَا اَیِه!»#۱۱:۹ مزمور ۱۱۸:۲۵ و ۲۶.
10 «مووأرٚک ایسه اَمی پئر داوودٚ پأدیشأیی کی فأرٚسئندٚره!»
«هوشیعانا آسمأنأنٚ میأن!»
11 اَطؤیی، عیسا بأمؤ اورشلیمٚ میأن و بوشؤ معبد. اون دیقتٚ اَمرأ همه چییَ فأندرسته و بأمؤ بیرون. غروب دٚمٚ رِه، شهرٚ جَا بٚنأ بوشؤ و خو دوأزدهتأ شأگردٚ اَمرأ بوشؤ بیت عنیا.
عیسا اَنجیل دأرَ لعنت کونه
12 فردأیی صُب، او وخت کی بیت عنیا جَا وأگردستأندوبود، عیسایَ ویشتأ کوده. 13 ایپچه دورتر ایتأ اَنجیل دأرَ بیدِه کی ولگ دأشتی؛ پس بوشؤ اونی ور کی شأید ایتأ اَنجیل بیأفه. امّا جغرز ولگ دِه هیچی دأرٚ رو نیأفته، چونکی هنو مِیوه فصل فأنرٚسه بو. 14 عیسا دأرَ بٚفرمأسته: «بٚبه کی دِه هیوخت، هیکس تی جَا مِیوه نوخوره!» و اونی شأگردأن اَنَ بشتأوستٚده.
عیسا خو دٚسٚ اَمرأ معبدَ پأکٚ کونه
15 او وخت کی ایوأردِه بوشؤده اورشلیم، عیسا بوشؤ معبدٚ دورون و اوشأنییَ کی بیهین بوفروش جَا موشغول بود، بیرونَ کوده و صرّأفأن و کوتٚر فوروشأنَ بیسأطَ فوگوردأنه 16 و ولأشته هیکس اَسبأبی اَمرأ بأیٚه معبدٚ دورون.
17 بأزین مردومَ بوگفته: «موقدسٚ کیتأبأن میأن بینیویشته بوبوسته کی "می خأنه تومأمٚ قومأنٚ وأسی دوعأ خأنه دؤخأده به" امّا شومأن اونَ چأکودیدی دوزدأن لأنه.»
18 او وخت کی پیله کأهینأن و دینٚ عألیمأن عیسا کأرٚ جَا وأخٚوٚرَ بوستٚد، ایتأ فورصتٚ دونبأل دوبود کی اونَ بوکوشٚد. امّا اونی جَا ترسئیدی چونکی همٚتأن اونی آموجهیأنٚ جَا قأقَ بوسته بود.
19 هو روج ظهرٚ پٚسی، البأقی روجأنٚ مأنستَن شهر جَا بوشؤده بیرون. 20 فردأیی صُبٚ رِه، او وخت کی وأگردستأندوبود اورشلیم، شأگردأن اَنجیل دأرَ بیدِده کی جٚه ریشه خوشکَ بوسته بو. 21 پطرس یأد بأوٚرده کی دیروج عیسا او دأرَ نیفرین بوکوده بو. پس تعجوبٚ اَمرأ بوگفته: «اوستأد فأندٚر! اَنجیل دأرییَ کی نیفرین بوکودی، خوشکَ بوسته!»
22 عیسا بوگفته: «خودایَ ایمأن بٚدأرید. 23 رأسرأسِی شٚمٚره گم اگه اینفر اَ کوهَ بٚگه: "تی جأ سٚر بٚکنده بوبو و دریأ دورون دکٚف" و خو دیل دورونی شک نوکونه بلکی ایمأن بٚدأره کی اونچی کی گه ایتفأق دکفه، اونی رِه انجأم به. 24 خُب گوش بدید، اونچی کی دوعأ میأن بٚخأیید، ایمأن بٚدأرید اونَ بٚدٚس اَوٚریدی و شیمی شین به.
25 «ولی او وخت کی دوعأ کودأندریدی، اگه اینفرٚ جَا کینه شیمی دیلٚ میأن دأریدی، اونَ بٚبٚخشید کی آسمأنی پئرم شیمی گونأیأنَ بٚبخشه. 26 امّا اگه شومأن نٚبٚخشید، شیمی آسمأنی پئرم شیمی گونأیأنَ نٚبٚخشه.»
عیسا ایقتدأر و ایختیأرأن
27 اوشأن ایوأردِه بوشؤده اورشلیمٚ دورون. هطؤ کی عیسا خو پأیَ بٚنأ معبدٚ دورون، پیله کأهینأن و دینٚ عألیمأن و پیله کسأن اونَ دؤرَ کودٚد 28 و وأوٚرسِئده: «کو ایختیأرٚ اَمرأ همٚتأ اَ کأرأنَ انجأم دیهی؟ کی تٚرَه وئأشته کی اوشأنَ انجأم بدی؟»
29 عیسا بٚفرمأسته: «من ایتأ شرطٚ اَمرأ شٚمٚره جوأب دٚهٚم کی شومأن اوّل می سؤالَ جوأب بدید. 30 یوحنا ایقتدأر مردومٚ تعمید دئنٚ رِه آسمأن جَا بو یا اینسأنٚ جَا؟ می جوأبَ بدید.» 31 اوشأن اَ مأجیرأ رِه کسکسٚ اَمرأ بوگو بشتأو بوکودٚد، بوگفتد: «اگه بیگیم خودا ور اوسه کوده بوبوسته، خودمأنَ بٚدأم تأوٚدأییم، چونکی وأوٚرسِه پس چٚره اونَ ایمأن نأوٚردیدی؟ 32 و اگه بیگیم اینسأن جَا بو، ایمکأن دأره کی مردوم اَمی ضد قیأم بوکونٚد.» چونکی مردوم همٚتأن یوحنایَ رأسرأسِی پیغمبر دأنستید.
33 بیلأخره بوگفتٚده: «اَمأن نأنیم!»
عیسا بٚفرمأسته: «هسأ کی اَطؤیه منم شیمی سؤالَ جوأب نٚدٚم.»
Currently Selected:
مَرقُس ۱۱: GCB
Highlight
Share
Compare
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org