مَرقُس ۲
۲
چولأقٚ مردأکٚ شفأ
1 چن روجٚ پٚسی، عیسا وأگردسته کفرناحوم و مردوم وأخٚوٚرَ بوستٚد کی اون بٚخأنه ایسأ. 2 خٚیلی زمأت نوبو کی خأنه مردومٚ جَا پورَ بوسته جوری کی خأنه بیرونم بٚپأ ایسأنٚ رِه جأ ننأبو. هوطؤیی اون خودا پیغأمٚ مردومٚ رِه وأگویا کودی.
3 هه زمأتٚ میأن، چأر نفر بأمؤد و ایتأ چولأقٚ مردأکَ تختٚ رو بأوٚردٚد، 4 ولی نتأنستٚد جٚه جِمئیتٚ میأن خوشأنَ عیسایَ فأرٚسأنٚد. بأزین بوشؤده پوشتٚ بأمٚ سٚر و عیسا سٚرٚ جؤرٚ سقفَ اوسأدٚد و او چولأقَ اونی دوشکٚ اَمرأ عیسا پأ ورجأ اوسه کودٚد بیجیر.
5 او وخت کی عیسا بیدِه کی چندر اوشأنی ایمأن قویه، او چولأقَ بٚفرمأسته: «اَی زأی، تی گونأیأن بٚبخشه بوبوسته!»
6 چنتأ جٚه دینی عألیمأن کی اویَه نیشته بود، خوشأنی اَمرأ فیکر بوکودٚد: 7 «مگه اون خودایه کی اَجور گب زٚنِه؟ اَن کوفره! جغرز خودا کی تأنه اینسأنٚ گونأیأنَ بٚبخشه.»
8 عیسا هو دٚقّه بٚفأمٚسته کی اوشأن چی فیکری کودأندرد، بأزین خو دیمَ وأگردأنِه اوشأنی ور و بٚفرمأسته: «چٚره شیمی دیلٚ دورون اَطؤ فیکر کونیدی؟ 9 کویتأ گبَ اَ چولأقَ گفتن رأحتتره، اَنکی بٚگم "تی گونأیأن بٚبخشه بوبوسته" یا اَنکی بٚگم "ویریز تی دوشکَ اوسأن و رأ بوشو؟" 10 اَسه شٚمٚره نیشأن دٚهٚم کی اینسأنٚ پٚسر#۲:۱۰«اینسأنٚ پٚسر» لقبی ایسه کی عیسا خؤرَه ایستفأده کونه. اَ دونیأ دورون اَ ایختیأرَ دأره کی گونأیأنَ بٚبخشه.» بأزین وأگردسته و هو چولأقٚ مردأکَ بوگفته: 11 «ویریز و تی جأیَ جمَ کون و بوشو بٚخأنه!»
12 او چولأقٚ مردأی جٚه خو جأ سٚر وأز بوکوده و دفأتن خو جأیَ جمَ کوده و مردومَ قأق بٚزِه چومأنٚ ورجأ او خأنه جَا بوشؤ بیرون. همٚتأن خودایَ شوکر کودیدی و کسکسَ گفتیدی: «تأ هسأ اَطؤچی نیدِبیم!»
ایتأ گونأکأر، عیسا شأگرد بِه
13 عیسا ایوأردِه بوشؤ دریأ کنأر و مردوم اونی دؤر جمَ بوستٚد. عیسایٚم اَشأنَ آمؤختی. 14 بأزین هوطؤ کی شؤئؤندوبو، حلفی پٚسر، لاوییَ بیدِه؛ اون مأمور بو کی مألیأتَ جمَ کونه و خو کأر کودنٚ جأ میأن نیشته بو. عیسا اونَ بٚفرمأسته: «بیأ و می جَا ایطأعت بوکون.» لاوییٚم دفأتن عیسا دونبألسر رأ دکفته.
15 ایروج کی لاوی خأنه جشن بو، عیسا و اونی شأگردأن سٚفره سٚر نیشته بود. خٚیلی جٚه باجفأگیرأن و شهرٚ نأجورٚ آدمأنٚم اونی میهمأن بود. (عیسا پیروأنٚ میأن اَ جور آدمأنٚ جَا فوج بو.) 16 ولی بعضیتأ جٚه دینی عألیمأن کی فریسی بود، او وخت کی بیدِده کی عیسا باجفأگیرأن و البأقی گونأکأرأنٚ اَمرأ ایتأ سٚفره سٚر نیشته، اونی شأگردأن بوگفتٚده: «چٚره اون اَ یونأنی پٚستٚ آدمأنٚ #۲:۱۶باجفأگیرأن و گونأکأرأنٚ.اَمرأ غذأ خوره؟»
17 او وخت کی عیسا اوشأنی گبأنَ بشتأوسته، اَشأنَ بٚفرمأسته: «نأخوش آدمأن، دوکتور ایحتیأج دأریدی، نه اوشأنی کی سألیمیدی! من بأمؤم کی گونأکأرأنٚ جَا دعوت بوکونم کی توبه بوکونٚد، نه اوشأنی کی خوشأنَ عأدیل دأنٚده!»
روزه جَا وأوٚرسِئن
18 یوحنا شأگردأن و فریسیأنٚم عأدت دأشتیدی کی همیشٚک روزه بٚدأرٚد، بأزین چن نفر بأمؤده عیسا ورجأ و اونی جَا وأوٚرسِئده: «چٚره یوحنا شأگردأن و فریسیأنٚ شأگردأن روزه دأرٚده، امّا تی شأگردأن روزه ندأرٚده؟»
19 عیسا اَشأنَ بٚفرمأسته: «مگه ایمکأن دأره تأ او زمأتی کی زأمأ، جشن عروسی میهمأنأنٚ اَمرأ ایسأ، اوشأن روزه بٚدأرٚد؟ تأ او وخت کی زأمأ اوشأنی اَمرأ ایسأ، نٚتأنٚده روزه بٚدأرٚد. 20 امّا ایروج اَیِه کی زأمأیَ اوشأنی جَا فأگیرٚده و او زمأت تأنٚده روزه بٚدأرٚد.
21 «هیکس خو بوپوخوسته لیوأسَ، تأزه پارچه اَمرأ کی هنو بشور نؤشؤ، پینیک نٚزٚنِه، چونکی او وخت کی او پینیک بشور بشه جٚه او کُئنه لیوأس سیوأ وأبه و اونی پارگی بدترَ به. 22 هطؤیٚم، هیکس تأزه شرأبَ کُئنه مشکٚ میأن دوئونکونه، چونکی شرأب مشکأنَ پأرَه کونه، بأزین شرأب و مشکأنٚم جٚه بین شٚده. تأزه شرأبأنَ وأستی تأزه مشکأنٚ دورونی دوکودن.»
دین اینسأنٚ رِه یا اینسأن دینٚ رِه
23 ایتأ جٚه شبّأت روجأن#۲:۲۳«شبّأت» (هو شنبه ایسه) یوهودیأنٚ تقویمٚ میأن، هفته هفتومی روج بو کی خودا فرمأنٚ وأسی موقدسٚ روج بوگفته بوستی و یوهودیأن نوأستی هیکأری بوکوده بید، بلکی وأستی ایسترأحت و عیبأدت بوکوده بید.. عیسا و اونی شأگردأن جٚه ایتأ گندم زیمینٚ میأن دٚوأرٚستأندوبود. هطؤ کی شؤئؤندوبود، شأگردأن گندمٚ خوشهیأنَ چئیدی کی بوخورٚد. 24 فریسیأن عیسایَ بوگفتٚده: «چٚره تی شأگردأن شبّأت روجٚ میأن خوشه چینی اَمرأ، مذهبی حوکمأنَ لقد دٚمٚج کونٚده.»
25 امّا عیسا جوأب بٚدأ: «مگه تأ هسأ موقدسٚ کیتأبأنٚ میأن نٚخأندیدی او وخت کی داوودٚ پأدیشأ و اونی سروأزأن ویشتأ و موحتأج بود، چی بوکودٚد؟ 26 او وخت کی اَبیّاتار، پیله کأهین بو، بؤشؤ معبدٚ میأن و نأنٚ حوضورٚ خوردنٚ اَمرأ دینی حوکمأنَ لقد دٚمٚج بوکوده، چونکی فقد کأهینأن ایجأزه دأشتیدی کی او نأنَ بوخورٚد. اون جٚه او نأن خو سروأزأنٚم فأدأ.» 27 بأزین ایضأفه کوده: «شَبّأتٚ روج اینسأنٚ رِه بوجود بأمؤ، نه اینسأن شبّأت روجٚ رِه. 28 پس، حتّا اینسأنٚ پٚسر شَبّأتٚ صأب ایختیأرم ایسه.»
Currently Selected:
مَرقُس ۲: GCB
Highlight
Share
Compare
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org