Saŋ 10
10
Funaareŋo fu ukooño ingi saahaŋaŋo
1Yensa ayéji:
- Janteneŋ baŋ k'íteekinoonuŋ marigeno!
Ingah! Údugo wola urifa, gasíibay hódugo dadékum a burukumbaano k'aŋan a kooreŋo. Wówo! Údugo ajokálahuneh k'aŋaf alibila sínlodo k'apiren aŋan a kooreŋo ba hódugo. Nim gankaanahne. 2Ayéjeeniŋ:
- Kanda ukooño mungu dalibila sínlodo deh! Afeero mara ukooño adékunkuneh a burukumbaano k'aŋan a kooreŋo, k’alahun na m’amarahne kooreŋo. 3Umarahu kooreŋo, aji úfegi ukooño n'adékirehne ba imbi saahaŋankánam, fo ukimbirem gúbángááro. Inini ukooño aŋandir a kooreŋo, saahaŋankánam ganyiteheyit maro ganyiteyit síngiirhinem. Ukooño gahuyoheeniŋhuy noŋon noŋon ingi gurethinem. Gahuyeeniŋ andék a binaanam. Banjógunay nip a binaanam, afúnneeniŋ a kooreŋo. 4Gafúnneeniŋ a kooreŋo, úmár anohula hadéko k'andék. Kanda ganohulay, saahaŋaŋo gantifhemtif maro n’anyitne síngiirhinem.
5Ayéjeeniŋ:
- Kanda aji ininkaman úduk apútor mu guyroŋne ukooñhánin, saahaŋaŋo dantifem deh! Gahuyeeniŋ dandék. Angírhinem f’aŋŋantin maro yitireŋeŋ síngiirhinem.
6Nim Yensa afúnnáreeniŋne funaareŋo, kanda pirendeŋeŋ k’anwut. 7Angu Yensa, bafégi maro wuturoŋoŋ funaareŋo, akeekireeniŋ ayéjeeniŋ:
- Ninkinan! Janteneŋ baŋ k'íteekinoonuŋ marigeno! Me igune burukumbanku kooreŋo bu saahaŋaŋo aŋŋanunkunehne. 8M'annohumne andéker nip, immereŋ angune ñandúgo ingi ñanrifaŋo.#10.8 Karo na Yensa galóbolob a nintiku m’anyéjehne immereŋ Ñammaasaŋo mi Díino Acaabenne wola m’anyéjeh Díino abúuñureeniŋne, agida nim gireŋ. Kanda f’ampúturne, saahaŋankum jahárindeeniŋ.
Yensa aŋoolinkin ayéj:
9- Me ingine burukumbanku kooreŋo. Moŋon moŋon aŋanumne a kooreŋo a gubaarhu me, Díino apahánkánam. Apiren afúror k'adék atíbila gufoola, k’akir aŋooliner. 10Kanda, údugo mungu, neeraŋ gakaanahne? Úmár ii, aji apútri, ba hódugo gadékuntne ingi bubuj ingi bukoomun. Kanda me mungu ki jamaŋo anyik kanjéb k’afaŋunum n’asúum gídekuntne.
11Ayéjeeniŋ:
- Me ingine ukooño m'afaŋumne n’apokun saahaŋankánam. Ukooño m'apokunne saahaŋankánam, neeraŋ gadékehne bukaano? Úmár ii, akarafaháneh ñankindenkinem a gubaarhu saahaŋankánam. 12Kanda údoolo mu muyroŋne saahaŋaŋo, úmár ii, aji afégi mudumo, agírhineh k’ahoobálaheeniŋ na. Angu, mudumo afisfisinkineh kooreŋo k’alah saahaŋaŋo adúkoŋo. 13Angu, afeero mara údoolo ahoobálaháneh saahaŋaŋo maro bacaamo gadékuntne, guyroŋ karo apokunpokun saahaŋaŋo. Úmár ii, dayohenoora a gúbidhu ámáráŋ.
14-15Abocin ayéjeeniŋ:
- Kanda me ingine ukooño m'apokunne dáde saahaŋankum. Me ípájulaymiŋpájulay ingi Bááho arenn fet. Maŋ nim gakanne imbi saahaŋankum. Maŋ ni ípájuleeniŋne, maŋ nim ámáráŋ mees ampájuleemne arenn. Me ílokiloki bukarafahu ñankindenkum a gubaarhu saahaŋankum. 16Kanda, ingah! Agida iyikyik saahaŋaŋ adúkoŋ no tohuroŋoŋ a kooreŋo inno.#10.16 Nim ingine jamaŋo índukoŋo mi guyroŋoŋne Ñanyahud m'anfiyumemne. Nómáráŋ mees iñantay ikooñeeniŋ. Ankankáneh bulaahánin a gúlokum ki nim ayik koore amánduk ingi ukooño úmánduko.
17Ayéjeeniŋ:
- Ingah! Bááhum Díino faŋo apokuneempokun. Aji úfegeŋ n'apokuneemne, a gubaarhu n'ídekehne bukarafahu ñankindenkum a gubaarhu saahaŋankum. Kanda ikandir mees, ifak ijakáneh háteerhum k’íjeb. 18Ingah! Wúur dapiren budoku háteerhum, fo aji me ílokihi. Kanda ílokiloki bukarafahu ñankindenkum a gubaarhu saahaŋankum. Me ipirenkineh ikarafa ñankindenkum, maŋ nim gipirenkinehne ídek ijah háteerhum. Agida Bááhum nim gayéjeemne ikaan.
19Fo Yensa alóbne nim, fam sinficilayo afak atoŋurne imbi Ñanyahudo. 20Ñanlabahi angu ankomb búyejo:
- Ingah! Ummu fáguh aruuremruur! Alóbálalobála. Horaŋ akanne k'ujantendikemeŋ h'alóbohne?
21Índukoŋo anyéjeh:
-Ingah! Mu fáguho aruurne dalób nim. Ingi faka, hóge fáguh apirenkineh ajébun úpimi?
Nim gaŋŋane siññopunayo dam.
Hóge Yensa agune Umaasaŋo Mu Díino Acaabenne?
22Angu afúrumi na, gankaanakaan gújuŋo g’ayéjuhne Hanukah.#10.22 A gújuŋo gúmár ganlentálamahne d’ankimbulne Jaameŋo Adénno. Anfak anlentála mara kantígo kámár anlódlod ba buramunku Díino bareŋ. Angu Hanukah a bukooro b'aretuhne Jerusalem gankaanahne. 23Agida waato nómár agune waathu gugilleno. Angu dam Yensa n’adék a Jaameŋo Adénno. Apúti aŋay rándekinaŋo a ranjaho r'ayéjuhne Ranjaku Sulemaani. 24F’agune na, ayikyik Ñanyahud índukoŋ m'andéker andak ankoolom na. Bankoolem mees anyéjem:
- K’angu, fi daaraŋ gúdekehne guyohálinkint kamantero? Ingah! Aji fi Umaasaŋo Mu Díino Acaabenne, téekint mint arenn!
25Yensa aŋoyindeeniŋ ayéjeeniŋ:
- Eke íteekinoonuŋteekin kanda dómároŋ. Agida ninkinan úfegeŋfeg tamaseereŋo n'ekaanahne a gurethu Bááhum Díino. Nómáráŋ gaséediyahumne. 26F'ófegeŋne tamaseereŋo, ninkinan fiyundumuŋ. Aji úfegeŋ ni fiyundumuŋne, maro ninkinan tohároŋ a saahaŋankum.
27Ayéjeeniŋ:
- Úfegeŋ, me saahaŋankum ganyennehindukumyennehind. Me ípájuleeniŋpájul. Gantifhumtif. 28Te me gínekeeniŋneer kanjébo ka bandór. Danniirohar. Faka wúur dapiren k’awatumeeniŋ a silakum. 29Ingah! Bááhum Díino m'anéereemne saahaŋaŋo, úmár afaŋunumne n'afuuh nip. Angu gúmár akanne íyejoonuŋ, wúur dapiren k’awat saahaŋaŋo a silaku Bááho m'aŋane bukooñhánin. 30Úpájuleŋ, me ingi Bááhum ikaanmiŋkaan iniman wúur úmánduk.
31Yensa balóbi nim, Ñanyahudo antot bawaalo ba bugikinem. 32Yensa bafégi hómár ayéjeeniŋ:
- Ninkinan! Tamaseereŋo jup no ikaanahne ingi bahathu Bááhum Díino, ninkinan úfegeŋfeg. Angu, a tamaseer nooraŋ gugihumkumne bawaalo imba?
33K'anyéjem:
- Mint dipadomiŋ bawaalo mara ukankaan hójooni. Aji úfegi n’ísiibaminne bubujhon maro n'upuñohne gurethu Díino. Fi úyejeh, fi ugune Díino. Agida fi uraagof bareŋ.
34K' ayéjeeniŋ:
- Eke aññañaañ a luwaŋankánan maro Díino ayéji ñankitiŋo mi famo: «Ninkinan úmiireŋmiireŋ ingi díineŋ.» Úfegeŋ, Díino faŋo ahuyeeniŋne «díineŋ.»#10.34 Aji ukaraŋi Bákimo 82 úfekineh na maro Díino ahuyhuy ñankitiŋo mi fam «díineŋo.» Angu, aji úfegi ahuyeeniŋ nim maro immereŋ ganlekelek balóbo maŋ ni Díino fankanam alekehne balóbo. 35Inini ímpájuloonuŋpájul maro h'aññaañne a Hañaañeno, hómár marigen no dabayahar. Kanda na Díino ahuyne maŋ maamaamankintor m’anjahne gúlokunom «díineŋo.» 36Inini me, f'éyejne «Me Úbáku Díino,» neeraŋ gupirenkineŋne úyejeŋ ipuñpuñ gurethu Díino?#10.36 Na Yensa aŋane balóbo ingi ñanlaameku Ñanyahudo. Agida immereŋ angune ñankitumo mi jamaanihinem. Angu, atéekineeniŋteekin mara aji Díino Amunduko ahuyeeniŋ díineŋo, horaŋ akanne k’aññuumul fo úmár ahuyoorane Úbáku Díino? Agida n'akaan tamaseereŋ alabayeŋ ba bujellihinkinin maro úmár agune maŋ úmár Agida Bááhum Díino, úmár acaabeneemne k'abúuñuroom a duniyaŋo inno ba budohokunom. 37Inini, aji ininkaman ŋayri bukanku dohoŋo no Bááhum abúuñeemne, na mungu uyikeŋyik marigen! Dahu ufiyumemuŋ. 38Kanda úfegeŋfeg dohoŋo n’ekanne a gurethu Bááhum Díino. Úfegeŋfeg tamaseereŋo n'ekanne. Angu inini, haani pirendoŋ k'ufiyumemuŋ, kanda kuku údomoŋ mara tamaseereŋo n'ekanne, a bahathu Díino gikanne. Nim ungu, aji údomeŋ hómár, úpájihineŋ maro Díino abúuñureemne . Aji ufiyumeŋ tamaseereŋo n’ekanne úpájihineŋ bandór maro Bááho ummo na a binaam, me moo na a binaanam.
39Yensa balóbi nim, ñanlaameku Ñanyahudo anfak ansíiba bulakánam, angu apaheeniŋ k’adék. 40Afúr a Jaameŋo Adénno k’adék ajuc jakanku Joodan k’adék bi Yaya ayicehne fam jamaŋo. Bapúti anooh bim f’amiñila 41ki jamaŋo andak anlahunkam bim fo anrumun. Anyéjayeh:
-Ingah! Yaya kaanahadaŋ tamaseereŋo maŋ ni ummu akaanahne. Kanda ho Yaya alóbne a gubaarhu údiigeeno ummu, kaama marigen.
42Angu na ñanlabahi anfiyumemne.
Currently Selected:
Saŋ 10: GD
Highlight
Share
Copy
Want to have your highlights saved across all your devices? Sign up or sign in
Copyright Vision Intégrale, Senegal
