Saŋ 14
14
Yensa agune binaalo b’adékunkuhne ba imbi Díino
1Angu, Yensa ayéjyej ñantaalibehinem:
- Inini ninkinan, waaninteŋ ilaahánan. Fiyinteŋ Díino k’uŋoolineŋ ufiyumemuŋ. 2Inini, díku Bááhum awayway dáde. Ingah! Ídekhineh, ídek íjoonindoonuŋ kannokánan. Marigen. Aji hómár yikireŋer díloboonuŋ. 3Inini, túyoreŋ k'ídek íjooninditoonuŋ kannokánan. Íjooninditoonuŋ mees, iŋooliner ídek idoohoonuŋ ba bim k'inguyoŋ kantíg ínkánduk. Waaninteŋ ilaahánan mara nim gídekehne bukaano. 4Inini ninkinan, úpájuleŋpájul binaalo b’uñantaheŋne údekumeŋ bam bim.
5Balóbi nim, utaalibeŋo m’aretuhne Toma ayéj:
- Umuyhint, mint pájiirimiŋ b'údekehne hadéko. Inini neeraŋ gikankáneminne k'ípájulmiŋ binaalo b’ídekunkuneminne bam bim?
6Balóbi nim Yensa aŋoyindem ayéjem:
- Ingah! Maŋ me me faŋo ingine binaalo, me ingine marigeno, me ingine kanjébo. Wúur dapiren k'adékum binaal bíduk k'apút imbi Bááhum Díino, fo adékum a binaam. 7Inini, ninkinan nip, n’úpájulemuŋne, ufak úpájihineŋ Bááhum. Kanda ingah! Ninkinan úpájulemeŋpájul, úfegemeŋfeg mees.#14.7 Ginningoŋ hakaananku Yensa ingi n'aniirone a dinlihano a gubaarhu mintor, impirenoŋ ímpájulumoŋne na ni Díino Báábám amíirne.
8Fo Yensa alóbne nim, Filip aŋoyindem ayéjem:
- Umuyhint, ufant ujellihin mint Bááhán, ki nim abárum mint.
9Balóbi nim Yensa aŋoyindem ayéjem:
- Jeh Filip! Me amiñmiñ f'egune ingi ninkinan, kanda haani maŋ nim karo fi pájiirum? Ingah! Wúuro m'afégeemne, aféfeg Bááhum Díino mees. Inini horaŋ akanne k'úyej ijellihinoonuŋ Bááhum? 10Karo dómáro maro me mo na ingi Bááhum, ki Bááhum mees aguy ingi me? Ingah! Balóbo imba b'éloboonuŋne, fúrunturoŋ a binaam. Imbi Bááhum Díino gafúruntne. Agida Bááho m'agune a binaam, úmár gakaanahne dohohunom a gubaarhu h’élobohne. 11Ninkinan, fiyimemuŋ! Me mo na ingi Bááhum, ki Bááhum mees ummo na ingi me. Aji ininkaman pirendoŋ k'ufiyumemuŋ a gubaarhu h'élobne, uñantaheŋ ufiyumemuŋ a gubaarhu tamaseereŋo ingi hakaanamo nip h’ófegeŋne a binaam.
Yensa abocin ayéj ñantaalibehinem:
12Janteneŋ baŋ k'íteekinoonuŋ marigeno. Wúuro m’afiyumeemne akankáneh hakaanamo maŋ ni maŋ ikanne. Te akankáneh h’afaŋ hámár dáde, maro me ba imbi Bááhum Díino gídekehne. 13Ingah! Ninkinan ñantaalibehum, aji ukiinaheŋ Bááhum hogurumaareŋ a barakehum, ikandukunoonuŋ hómár. Nim gikankánehne. Gikaani nim, jamaŋo nip anfékineh bafuku Bááhum a gubaarhu me Úbárám. 14Túyor k'iŋoolinkin: Aji ukiinaheŋ Díino hogurumaareŋ a barakehum ikandukunoonuŋ.
Ka Yensa ayéjne maro Báábám abúuñokuneh Úkááñinumo
15Yensa abocin ayéj:
- Inini ninkinan, aji upokunemuŋpokun, úbuuñahánaŋ kawandhum. 16Te, aji úbuuñaheŋ kawandhum, ikiinaháneh Bááho k'anétoonuŋ Úkááñinum úduk. Úkááñinumo úmár m'ílobumohne aguyhuneh ingi ninkinan baman dagurumaareŋ. 17Úpájuleŋ, Úkááñinumo úmár, úmár agune Jamméejhu Díino Jarenninno. Jamméejhu Díino Jarenninno, jámár gadékehne bujellihinku moŋon moŋon marigeno ingi ho guyroŋne marigeno imbi ámár Díino. Ingah! Ñammi duniyaŋo m’anjutiyeemne dampiren k’anjah Úkááñinumo, maro dampiren k’anfégem, dampiren k’ampájulám. Kanda ninkinan mungu, úpájuleŋpájul Úkááñinumo úmár, maro ingi ninkinan gagune. Ingah! Ayikhineh bísiba Úkááñinumo aguyhunehne a hafitenkinan.
18Yensa abocin ayéj:
- Inini, me ba hadék gídekehne, kanda dihoobálahoonuŋ k’uguyoŋ ininkaman ñansúgáren. Ídek iŋoolinekineh bísiba bíduk. 19Damiñ ñammi duniyaŋo m’anjutiyeemne danfak anfégahaaram, kanda ninkinan mungu úfekunumuŋ. Ninkinan mees újebhineŋ maro me mees íjebhineh. 20Da bísibaŋo bímár apútokunehne, úpájihineŋ arenn maro me mees, me mo na imbi Bááhum. Dam faka úpájihineŋ maro ninkinan uguyeŋne a binaam, me mees, me mo na a binanan. 21Ingah! Wúuro m'alahne kawandhum k'abúuña kawando nómár, úmár agune wúuro m'apokuneemne. Wúuro m'apokuneemne, Bááhum mees apokunkunom. Me mees ipokunkuneh wúuro m’alahne kawandhum. Ijellihinkinem faka n'ímiirne.
22Yensa balóbi nim, utaalibeŋo m’aretuhne Judas alób, kanda úmár Judas Iskariyot m'ajuliyane bigoku Yensa gireŋ. Ummu úduk. Angu, Judas ayéj Yensa:
- Umuyhum, neeraŋ gakankunehne k'úyej ujellihinkineh mint n'úmiirne ki dujellihin índukoŋo n’úmiirne?
23Ayéjem:
- Ingah! Afeerofeer mara wúuro m'apokuneemne abúuñaháneh kawandhum. Faka wúuro, aji úbuuñay kawandhum, Bááhum mees apokunkuno. Me ingi Bááhum ídekhinemiŋ k’iguymiŋ ingi wúuro úmár. 24Kanda wúuro mu pokundumne, úmár dabúuña kawandhum. Úpájuleŋ, kawando n'uyennehinkeŋne fúrunturoŋ a bigokum me umorahum. Imbi Bááhum Díino gafúruntne! Kawando n'uyennehinkeŋne, nómár agune inno Bááho m'abúuñureemne.
Yensa abocin ayéj:
25- Me, inho nip íteekinoonuŋteekin ni ifant iroŋne ingi ninkinan, 26kanda, inini, ii, me ba hadék gídekehne. Ingah! Idoonadir, Bááhum akucundutokunoonuŋ Úkááñinumo m’íloboonuŋe. Úkááñinumo úmár m’íloboonuŋe, úmár ingine Jamméejhu Díino Jarenninno. Aji úfegeŋ n'adékehne bukucundukánan Úkááñinumo, mara n'uguyeŋne ingi me, Úbárám. Angu Úkááñinumo apútodir a binanan, alinninkunoonuŋ a h'élobne nip. Afak alentinkunoonuŋ h'éteekinoonuŋne nip ki nim buku ufiiramaŋ honj.
27Me angu, ba hadéko gídekehne, kanda básuumo gíbendukunoonuŋne a hafitenkinan. Básuumo bámár a binaam gafúruntne. Básuumo b’afúruntne a binaam, duniyaŋo inno dapiren anéeroonuŋ. Ninkinan! Waaninteŋ ilaahánan! Dahu ubenuheŋ! 28Eke íyejoonuŋyej: «Me ba imbi Bááhum Díino gídekehne, kanda ídek iŋoolinekineh bísiba bíduk.» Inini, aji ininkaman upokunemuŋpokuner hadékum imbi Bááhum, uñantaheŋñanta usewohoŋer, mara Bááho afaŋi me bafuuh. 29Inini, hómár nip, íteekinoonuŋteekin gu bandór ki nim da hómár ayikhinehne, ufiyumemuŋ. Gúmár gíteekinoonuŋne manini. 30Kanda inini, yikinaari dáde ki k’inwooñoonuŋ, maro uŋanhu jamaŋo a hójondoŋo,#14.30 Na Yensa a gubaarhu Iblisa galóbumohne. ummo bim n'adékireh. Úmár dapiren bukankum honj, kanda ummo bim n'adékireh deh! 31Me mungu ba bukaan ho Bááhum ayéjeemne. Jamaŋo nip aññantay ampájul maro ipokunpokun Bááhum. Gúmár akanne me ba bukaan h'ayéjeemne bareŋ.
Yensa abocin ayéj:
Inini, kengereŋ k'ínfuroonuŋ nanka.
Angu ankaan maŋ nim k’ankeng andek.
Currently Selected:
Saŋ 14: GD
Highlight
Share
Copy
Want to have your highlights saved across all your devices? Sign up or sign in
Copyright Vision Intégrale, Senegal
