Mak 15

F’andékurne Yensa imbi gúfánááro

1Gucunkunom harennaamo, ñanlaameku alimaamaŋo, ñanlaamero, ñankeekihu Hañaañeno, Tilibinaalo Adénno nip anrahrah ba bulekhu balóbo k'anfohun gúlokánin. Bambollay andooh ceeneŋo k’anceen Yensa k’andékirem imbi gúfánááro m'aretuhne Pilat k’ambénnem a halakánam. 2Bampút, Pilat amiih Yensa ayéjem:

- Hóge fi ingine Umaasahu Ñanyahudo?

Aŋoyindem ayéjem:

- Maŋ ni úyejne, maŋ nim.

3K'angu ñanlaameku alimaamaŋo anjodamam halabahi, 4ki Pilat afak amiihem:

- Ingah, anyéjyej fi ukankaan hójondoŋo jup. Hóge fi inini dúlob honj?

5F'alóbne nim Yensa akota sii, kantígo na abinnáne Pilat dáde.

F’anyéjne Yensa añantay aniiro

6Inini a Gújunku Guwusunaamo goŋon goŋon jamaŋo gankiinakiina ki Pilat gúfánááro abénner ukimbenaa úmánduk. 7Agida a waato nómár ayikyik údiigeen úduk a kasoŋo m'aretuh Barabas. Ankimbenemkimben ingi rebeleŋ adúkoŋ m'ambuj úduk a waathu biñaamo. 8Angu bísibahu gújuŋo, jamaŋo andék anjóg imbi Pilat ba bukiinahánam k'akaan iniman n'akaanahne díin díin a gújuŋo gúmár. 9Bankiinahem mees, Pilat ayéjeeniŋ:

- Inini, karo úsiibaheŋsiib k'íbendutoonuŋ umaasahánan, umaasahu Ñanyahudo?

10Nim gamiihne jamaŋo m’anjógne na, maro úmár Pilat apápájul maro ñanlaameku alimaamaŋo andékutidekut Yensa a halakánam a gubaarhu kenkaare. 11Kanda ñanlaameku alimaamaŋo anjoofund barumuno ki Pilat abénditeeniŋ Barabas buruhu Yensa. 12F'ankiinane nim Pilat, Pilat afak amiih barumuno, ayéjeeniŋ:

- Inini, aji íbendutoonuŋ Barabas, neeraŋ gikankánehne údiigeeno m'úyejheŋne umaasahánan?

13Balóbi nim, barumuno awaala anyéj:

- Faaŋuntemeŋ a dinlihano!

14Pilat aŋoyindeeniŋ ayéjeeniŋ:

- Horaŋ akanne k'úyejeŋ nim? Hójondoŋ horaŋ gakanne?

Banyennehini hómár, anfaŋunum n’ampeej anyéjeh:

- Faaŋuntemeŋ a dinlihano!

15F'anlóbne nim, Pilat n'asíibane búsuumurinku barumuno, abénduteeniŋ Barabas. Ayéj ñammi básedeŋo andooh Yensa k’ammalam dáde ingi ñanhonjo. Angu ammalam. Bambollay, Pilat abénduteeniŋ Yensa k’andékirem ba bufaaŋunahinkinem a dinlihano.

Fo ñammi básedeŋo anyeefulne Yensa

16Fo Pilat abéndureeniŋne Yensa, ñammi básedeŋo andoohom ba a jégenenku díku gúfánááro k'anhuyor gusiirhu ñammi básedeŋo nip. 17Bampút, angáágám tabéno takeeno, agida fam n'anfúnn gusolhunom mees. Andooh jalihano j’ayikne jálindo k'angoolumbin k’anhooburindem a bigof. 18Bambollay angu, anyeefihem anyéjehem:

-Ii! Umaasahu Ñanyahudo, Díin akaan usimaya!

19Andooh ñanhonjo k’ammaham a bigof, anlotunkom, anruŋah a jannokunom. 20Banyeefulem mees, anwatam tabéno takeeno t'angáágemne k’ankandáram bayakánam k’anfúnnom a bílido k'antuŋul hadéko b’andékehne bufaaŋunahinkinem a dinlihano.

F’anfaaŋunahinne Yensa a dinlihano

21Baŋŋay hadéko, anlahun údiigeen úduk m’afúruntoh a kanaŋaŋo. Gurethinem Simon mu didiirahu Siren. Úmár bááhu Aleksand ingi Rufus. Ñammi básedo, banfégi Simon, anlaham andoohálinem dinlihano ha Yensa añantane adooher, k’annohálinay aŋŋay hadéko. 22Andék f’andék ampút a kantígo k'aretuhne Golgota. Gureto gúmár agune «Kantíku jahunku agofoŋo.» 23Bampút kantígo, andooh kunnoŋo k'angatahinne ingi sihano s'aretuhne mááro pur k’annéerem k’aruuh. Kanda afoy, ruuhuroŋ. 24K’angu andooh dinlihano k’andoohom anfaŋánahinem na. Banfaaŋunahinem mees, anwóoj gusuno anwonnun na dinlihano. Bankaani nim mees, annink bayakánam b’anwuraŋemne k'aŋŋay bukanku tuuro m'ajakunehne. 25Bi waathu guraaso gudikaamo ganfaŋánahinemne a dinlihano.

26Banfaaŋánahinem mees, ankaan maŋ ni ankaanahne. Angu ayikyik m'andooher tamaseer k’anñaañ na h’akanne anfaaŋánahinem a dinlihano. Aññaañeriñaañ na anyéj: «Ummu Umaasahu Ñanyahudo.» Baññaañi nim mees, anfaaŋánahin tamaseero na a dinlihano. 27Dam, d’anfaaŋánahinne Yensa, anfak anfaaŋánahin na ñanrifa inak, úduko a sigondiŋo, úduko a siyaaho.

[28#15.28 A kayereŋo kalabahi werseŋo inno gireŋ na.] 29Angu dam ñanwusunaŋo anlíklikineh agofonkánin k’ansutunkom anyéjehem:

- Hey! Eke úyejyej ufilihineh Jaamehintor Adénno, k'úlod adúk buruhu ásibaŋ alallaŋ? 30Inini, pahun baŋ bigokon k'ukucor a dinlihano!

Nim ganyeefihemne. 31Angu dam ñanlaameku alimaamaŋo ingi ñankeekihu Hañaañeno, immereŋ mees anyeefihem k'anyéjayeh:

- Ingah! Úmár ii ahathat gupahunku jamaŋo kanda határaŋ bupahunku bigokunom! 32Inini m’ayéjuhne Umaasaŋo Mu Díino Acaabenne, umaasahu Israyel, inini akuc baŋ a dinlihano ki nim índomoŋ h’alóbne!

Nim jamaŋo ganlóbohne dam. Ñanrifaŋo inako m'anfaaŋánahinne na antéejay ingi Yensa, immereŋ mees ansutunkom.

Fo Yensa aniirone

33Afúrumi na, waathu báárigo, bumurul búde akucor a didiiraŋo nip amurul bim baman rayiibo. 34Angu, waathu rayiibo Yensa alób kabaŋ, ayéj:

- Eluwi! Eluwi! Lamah sabak tani?!

(Gúmár ingine ingi gúlokánin «Dínkum! Dínkum! Horaŋ akanne k’uhoobálaham ineeŋ?!»)

35Angu índukoŋo m'anwonnáne na, banyennehini n'alóbne kabaŋ, anyéj:

- Yennehineŋ baŋ! Anabila Eli gahuyohne!

36Udínhinin úduk agír adék adooh kolekilenku eponso k'anum a bineegaro k'agír adék ajohund Yensa a gulihan k'apiren asos. Aŋoolin ayéj:

- Túyoreŋ baŋ k'ínfegoŋ karo Anabila Eli adékekineh adék afúnnom a dinlihano.

37Kanda Yensa awuuga dáde k’akira aniiro. 38F’aniirone, waato amánduko beŋen a gufachu Jaameŋo Adénno, ridoŋo n'agune na afaca, káriman a raafo baman a réeŋo gafacane, akaan habíd hanak. 39Ulaameku ñammi básedeŋo m'awonnáne a dinlihano k'aŋay buninghu Yensa, f'afégne n’aniirorumne, ayéj:

- Hah! Marigen! Ummu kaama Úbáku Díino.

40Ayikyik indikaam índukoŋ m'ansor, kanda anwonnwonn aŋŋantin k'anningeh. Imbi immereŋ m'ansorne dam, Mariyama m'afúruntne Magdala ummo na ingi Mariyama nunku Jak utiirinno ingi Joses. Salome mees asosor. 41Immereŋ antifilintifilint Yensa k'antopotokom biriman waato f'agune a didiirahu Galile. Ayikyik na mees indikaam índukoŋ jup m'ankokayer ingi Yensa ba Jerusalem.

F’anninkne búgáku Yensa a búyindo

42-43Afúrumi na, bísibaŋo bañuuni, ayikyik údiigeen m’apútor m’ayéjuh Isuf, Isuf m’afúruntne saariŋo n’aretuhne Arimate. Údiigeeno úmár ambúuñahembuuña nip a gubaarhu dohoŋo n'adohohne a Tilibinaalo Adénno. Agida Isuf gúputhu maasayahu Díino gatúyohne. Angu n'agune bísibahu kapareŋo, gúmár ingine gucunkunom ingine bísibaŋo bi guyohálaŋo, Isuf ingi babollen gadékne imbi Pilat úgufánááro. Bapút, akiinaham búgáku Yensa. 44F'akiinahemne, Pilat alaalemlaal guyennehino maro Yensa aniironiiro mees. Angu ahuyor ulaameku ñammi básedeŋo k’amiihem k'apájul karo Yensa amiñmiñ f'aniirone. 45Fo ulaameku ñammi básedeŋo ayéjemne: «Yensa aniironiiro mees,» fam Pilat alókine ki Isuf adooh búgááro. 46K’angu adék gugilahu kasankeŋo k'adak alahun búgáku Yensa b’anfaaŋánahinemne. Bapúti akucun búgááro k’agúubin. Bagúubinem mees, adék asuuturaham a gusun g’úpájulne g’anfiline a bawaalo akankaan ininkaman ránkáb. Babollay adooh dawaal arok buruhu búyindo k’adék adoona. 47Angu f’akanne nim, Mariyama m’afúruntne Magdala ingi Mariyama nunku Joses anfégemfeg a gusuno gúmár.

Currently Selected:

Mak 15: GD

Highlight

Copy