Mak 4
4
Funaarehu uworhu arúgelo
1Ayikyik bísiba Yensa afak aŋay gukawandinku jamaŋo a bakaranku jakaamo. Agida jamaŋo m’ankolemne anrumunrumun na tip. Baningilay afég na sídeeno k’aŋaf afetila hotir a bakaranku jakaamo ki nim jamaŋo m’angune a gúmeero ampiren anjantenem anfégem. Baŋafi aŋoolinkin gukawandino gaguyerne.
2Kanda Yensa gaŋay kawando gafúnnofunn funaareŋeŋo. Angu dam inini gakawandineeniŋne ayéjeh:
3- Ninkinan nip, janteneŋ baŋ! Ayikyik m'adék ba buworhu pampaŋo. Angu, adék f'adék apút a gurakánam. Bapút na atooŋ buworhu pampaŋo. 4Angu bawori, arúgelo adúko ahupaa agida a bikino. Angu, bahupay a bikino, jatonoŋo annotor k'angu anrocoh.
5Arúgelhu pampaŋo adúkoŋ mungu ahupaa bi didiiraŋo aterne ki yikireŋ jamband. Angu, arúgelo ámár acumb k'awal. 6Kanda bísibaŋo bacukri, alaaf nip, mara ñanlibhu h'acumbne yikireŋ sembe. 7Arúgelhu pampaŋo adúko mees ahupaa ka jakangulo agune. Angu, jakangulo jámár akut akúdin pampaŋo, k'angu pampaŋo nómár fúnnuroŋ haani.
8Abocin ayéjeeniŋ:
- Kanda, arúgelhu pampaŋo adíinem, nómár ahupaa ka didiiraŋo ajónne. Angu, nómár akutkut k'awal n'añantane awal. Angu, f'awalne, kódeg pampaŋ koŋon koŋon afac afúnn inko hamaano buruhur ingi haala (30), inko jamaŋilall (60), inko hamaano keme.
9Yensa balóbi funaareŋo ayéjeeniŋ:
- Angu, moŋon moŋon, jantent hóbun h'éfurumne balóbo k'ukaan a jamméejhen.
10Yensa babollay gukawandino adék adoona. Angu, ñantaalibehinem haalaŋo ingi inako ingi índukoŋo andék anlahunam bim úmár úmánduk. Ammiihem a nintiku funaareŋeŋo f’afúnnáne. 11Yensa ajaabiyeeniŋ ayéj: Ninkinan, Díino anéeroonuŋneer k'upireneŋ úpájuláŋ ho yéegaraŋne fam a gubaarhu maasayahánam, kanda nédeŋ índukoŋo gubaarhu maasayahánam ki funaareŋo ba bareŋ ganyennehinkinehne. 12Nim gakanne ki:
Ganninginkineninginkin funaareŋeŋo k'antíb búfego h'agune
kanda gara anfégeh na honj.
Gúduk ganjantenenejanten
kanda gara anwutoh .
Agi ininkaman anwutwuter angumb antúubor imbi Díino
ki ámár abonkereeniŋ. #4.12 Esay 6:9-10
Fo Yensa akeekulne funaarehu uworhu arúgelo
13Yensa balóbi nim mees, afak ayéjeeniŋ:
- Ninkinan ii íyeji, hóge pirendoŋ k’ukeekileŋ funaareŋo? Angu agi keekiroŋ umfu, neeraŋ gukankánaŋne k’úpájáláŋ fádukoŋo f’édekehne búfunno? 14Túyoreŋ k’ikeekiroonuŋ. Úfegeŋ, uworhu pampaŋo, úmár ingine wúuro m'adékehne gúteekinku jamaŋo Gúloku Díino. Te didiiraŋo, dímár agune jamaŋo m'anjantenehne Gúloku Díino.
15Angu, k'élobne a gubaarhu arúgelo n'ahupaane agida a bikino, na gílobolob a gubaarhu jamaŋo m'anjantenne Gúloku Díino ki Iblisa adék awat h’anjantenne nip k'angu anfiiram hómár. Fégeŋ baŋ, Iblisa síibaaraŋ k'andóm gúlobo gúmár ki Díino apahuneeniŋ. Jamaŋo immereŋ angune iniman didiiraŋo d'agune a bikino.
16Angu, k'éyejne arúgelo adúko n'ahupaane ka didiiraŋo aterne, na gílobolob a gubaarhu jamaŋo m'anjantenne Gúloku Díino, ki banyennehini andóm k'asúumeeniŋ. 17Kanda immereŋ mingu, Gúloku Díino nooroŋ a hafitenkinin mara immereŋ gara anlókiyeh ki gúlobo gúmár acumb k'ayik na ñanlib. Na jamaŋo immereŋ ammíirne ingi didiiraŋo dímár d'aterne. Angu, immereŋ, ni ñanlibhu h'acumbne yikireŋne sembe, gara ammiñeh a binaahu Díino, mara d'anfékinehne baléer a binaalo, anhóobula binaalo bímár.
18Angu k'éyejne arúgelo adúko ahupaahup a didiiraŋo d'ayikne jakangulo, angu didiiraŋo dímár agune jamaŋo m'anyenehinne Gúloku Díino, 19kanda immereŋ, karo bukoriŋo b'anwosenehne atójuntojun jamméejenkinin, karo imme na n'antifilineh básunku duniyaŋo, karo imme na butifilinku kunyikhu duniyaŋo maro anlahlah karo nim anyikhineh básuum a hafitenkinin. Fégeŋ baŋ, hómáráŋ nip upireneŋ úmiirinahineŋ ingi jakangulo. Gúmár ingine, hómáráŋ nip agoobhuneh Gúloku Díino imbi immereŋ. Maŋ ni jakangulo akúdinne pampaŋo ki pirendeŋ k'afúnn, maŋ nim jamaŋo immereŋ dandék ba bukaano h’asúunkánehne Díino.
20Kanda índukoŋo imme na m'ammíir ingi didiiraŋo díjooninno. Angu, arúgelo n'ahupaane a didiiraŋo díjooninno, hómár agune m'anjantenne Gúloku Díino ingi jamméej. Immereŋ, ii, ganyennehini Gúloku Díino, andooh ankaan a jamméejenkinin. Angu immereŋ andék anguyhuneh jamaŋ mi hafitenkinin arenn, k'angu andék ankaan hakaanam h’asúnkánehne Díino. Angu, hakaanamo hámár akankaan ininkaman bídimeren bíjooninno. Immereŋ mingu anlakuneh binaalo aliŋ, haani a waathu baléero. Índukoŋ anfúnn hamaano buruhur ingi haala, índukoŋo anfúnn jamaŋilall, índukoŋo anfúnn keme.
Nim Yensa akawandineeniŋne dam.
Funaareŋo a nintiku lampo
21K'angu Yensa afak ayéj jamaŋo:
- Eke wúur dajakálin lampo k’adék adooh gusiyo ahuuburin na? Wówo! Wola hóge ajakálinkineh lampo k’aŋan bi réeŋununku ránjángálo? Dakaan nim de! Lampo f’onink kantíg k'ópájul ayaaŋárinkineh gufaco nip. 22Gúmár gíyejoonuŋne, hoŋon hoŋon fégiraane waato inno adék afúrokuneh bísiba. Hoŋon hoŋon asuturaane, ayikhineh bísiba bi afúrokunehne a jiyaaŋo. 23M'anyikne ilaaŋo ijantenumo ankaan na jamméejenkinin!
24Yensa afak aŋoolin ayéjeeniŋ:
- Ninkinan m'uŋayeŋne bujantendukum, kanteŋ na ilaahánan. Aji ukaaneŋ na ilaahánan k’úbuuñahaŋ kawandhum, Díino aninghineh n'uhaamiheŋne búpájulo k'aliihuroonuŋ gúpájulo gúmár ka haamhánan amukne. Kanda afak adék abecindukunoonuŋ. 25Aji úfegeŋ n’akankánehne nim maro wúuro m'ahaamine gúpájihu Gúloku Díino adék afaŋununkuneh n'apájul. Ki wúuro mu haamireŋne gúpájihu Gúloku Díino adék aniimunkuneh h'apájulerne. Afúnnhuneh a binaanam h'apájulerne nip.
Nim Yensa alóbne.
Funaareŋo a nintiku jálááfulo
26Yensa afak aŋoolin ayéj:
- Inini, maasayahu Díino, neeraŋ gamíirne? Túyoreŋ k’íteekinoonuŋ: Amímiir ingi údiigeeno m'adékne a gurakánam ba guworhu arúgelo. 27Bapút aworor k'aŋúñor. Jaketo awaana adúuf. Bísibaŋo barenni akeng adék alah doho adúk. Maŋ nim gakaanahne fo arúgelo ámár adék acumb k'awal ni pájiireŋ n'awaloorumne. 28Úpájuleŋ, didiiraŋo fankánam gadékehne gukaano ki arúgelo ámár adím. Guyroŋ karo údiigeeno akankáneh nim. Gúdego acumbhuneh k'adék fo alaamer k’afúnn k'adék fo aboh. 29K'angu arúgelo ámár abohdir, waato nómár údiigeeno adékhineh k’adooh guñiraamo k'adék jafaco.
Nim Yensa alóbne a nintiku maasayahu Díino.
Funaareŋo a nintiku gúdeku mutardo
30Angu Yensa afak aŋoolin ayéj:
- Inini, maasayahu Díino, neeraŋ gamíirne? Funaare fooraŋ gipirenkineh ífunn k’ikeekiroonuŋ ni maasayahu Díino amíirne? Túyoreŋ k'ífunnduroonuŋ unfu: 31Maasayahu Díino amímiir ingi kódeku mutardo. Úpájuleŋ kódeku mutardo n'atiirne yikireŋ. 32Kanda ingi batiirhinem nip, aji urufunem adékhineh fo adék aguy sino síde s'afankánehne múnduko mu naakoŋo nip bafuuh. Símár ii, haani jatonoŋo ampirenkineh angogaa na. Gúduk andék anlepun a hakankánam.
Nim Yensa alóbne. 33Agida Yensa gafúnnofunn funaareŋeŋo jup iniman unfu ba bujellihinkinin a gúbidhu Díino ingi Gúlokunom. Galinninkeeniŋlinnin h'ampirenkinehne ampájul. 34Gaguy a barumuno funaare ba bareŋ galóbohne, kanda ganguy ingi ñantaalibehinem akeekireeniŋ funaareŋeŋo fúmáráŋ nip k'ampiren ampájul.
35Afúrumi na, fítiro baŋani Yensa ayéj ñantaalibehinem:
- Inini, injucoonuŋ!
Yensa afaŋumne n’afuuh bawuco
36Balóbi nim ambénn na barumuno k'anyifa a sídeeno ka Yensa anoone. Banyifay a sídeeno antuŋul hadéko ba bulibilinku Yensa ba a gúbido gu beŋen. Agida índukoŋo mees imme na n’anyifa a múndeeno k’antéejay ingi insi Yensa ingi ñantaalibehinem. 37Iyoo. Angu bantuŋuli, bawuc amalimbin dáde ingi gumbaŋo fo baaruŋo aŋay burumun a sídeeno. 38Agida Yensa n’aguy a mángááro n'alóbun bigokunom a injeginayo k’aŋay sínduufo. Anyéjem:
- Arafaŋ! Ingah, f’ummo na sínduufo, mintor nip inniirohunoŋ! Kengeri! Karo fi inini hómár kaanundo honj baŋ?
39Banlóbi nim Yensa akeng k'asekur bawuco ingi gumbaŋo. Ayéj:
- Wonnor k’úbenn bumalo.
Bawuco abénn, baaruŋo anoohun tum. 40Angu Yensa ayéj ñantaalibehinem:
- Ninkinan, horaŋ akanne k’ubenuheŋ ineeŋ? Karo baman manini ninkinan fiyundumuŋ?
41Angu ambenuh dáde k'anyéjayeh:
- Wuy! Mintor! Ningeŋ baŋ! Ummu hantaŋ? Ingah, galóbi, haani bawuco ingi baaruŋo ambúuñaham.
Nim ganyéjayehne.
Currently Selected:
Mak 4: GD
Highlight
Share
Copy
Want to have your highlights saved across all your devices? Sign up or sign in
Copyright Vision Intégrale, Senegal
