HADUI DAHA' SIHU TUHAN 7
7
Hu'ei Stefanus
1Lun ken imam aya', “Lan kah dahun kelunan anih, du?” 2Lun nyu'ei nah Stefanus, “U kelo' harik dahin tamak lim, kelenghi nah kelo'. Allah aleng maren lelan uh petula Iha' men sepun tam Abraham tegu iha' té' ha' daléh Mesopotamia, em payan tei ha' daléh Haran. 3Tuhan pah kuma' men iha', ‘Musang nah im men daléh ka' dahin men daha' harim lahuh, tei nah im ha' ji daléh aleng seng Ek bara men ika'.’ 4Uh anan musang nah iha' men daléh daha' Kasdim, tei melo' ha' Haran. Men'uh taman na' matei, en Allah geri nah iha' bulak men inan nei ha' tana anih, aleng ngavan tam melo' kerei inih. 5Bi nusi' nah Iha' ma'uk tulan men iha' ha' tana anih, ji kaja pah em té', bi Iha' pejaji seng ma'ih na' men iha' dahin men sau-sau na'. Bi tegu anan iha' em payan nganak. 6Nunih dahun Allah, sau-sau Abraham seng daméh alem daléh sawih, uh anan kelunan atih seng na daha' dipen, daha' pah na ji'ek té' daha' pat atuh duman dara na'. 7Lun kuma' nah Allah la'an, ken Na', ‘Bengsa' aleng na daha' dipen atih, seng Ek ukum. Uh anan ikam seng musang men inan, dahin sebayang té' Akui té' ngavan anih,’ ken Na'. 8Uh anan Iha' na adet sunat, tada' jaji Na'. Men'uh anan Abraham na Ishak, dahin nyunat iha' té' kesaya' dau na'. Ishak pah na Yakub, dahin Yakub pah na pulu-dua' pahu tam anih.
9“Bi sepun tam atih mi'en té' Yusuf, pelalau mebet iha' ha' daléh Mesir. Bi Allah tugung iha', 10dahin mebet Iha' men lim-lim katé' na', uh anan Iha' ma'uk asi Na' dahin ma'uk ugé' Na' men iha' ha' unan Firaun, laja' Mesir atih. Iha' nah Firaun meju iha' gabnur alem lim daléh Mesir dahin lim-lim huang uma na'.
11“Nei nah ji lien aya' alem lim-lim daléh Mesir dahin Kanaan, dahin katé' lelan, ateng sepun tam em deng ala ket daha' kani. 12Bi tegu Yakub kelenghi marung parei té' ha' daléh Mesir, anan nah iha' nyihu sepun tam tei hinan, atih nah aring daha' tei. 13#Ar Kel 45:1-3,16 Tegu kedua' hangun na' daha' tei, Yusuf petula iha' men harin-harin na', iha' nah Firaun jam bengsa' Yusuf. 14#Ar Kel 45:9-11; 46:27; Us 1:5; Kel d M 10:22Yusuf nah nyihu daha' tei muvui taman na' nei dahin lim-lim daha' harin na' aleng tusu-pulu-lima' ngahum daha'. 15#Ar Kel 46:1-7; 49:33; Us 1:6 Lun tei nah Yakub ha' Mesir, hinan nah iha' matei, dahin lim-lim sepun tam atih pah lahuh. 16#Ar Kel 23:16-17; 33:19; 50:7-13; Yos 24:32 Patei dawa'#7:16 Patei dawa' iha' tih patei Yakub dawa' Yusuf. Nyineng Ar Kel 50:4-7, 25; Usang 13:19. en daha' geri ha' Sikhem, en daha' tanem alem tanem aleng uh en Abraham melé' té' ligit pirek té' daha' pahu Hemor ha' Sikhem.
17 #
Us 1:7-8
“Tegu seng jeleng ateng jaji aleng en Allah pejaji dahin Abraham, sa'-sa' kapan pah daha' nei alem daléh Mesir, 18ateng ji laja' aleng dep nei nyemau alem daléh Mesir aleng em jam marung Yusuf. 19#Ar Kel 24:7; Us 1:9,22 Lun en laja' atih peluvat nah bengsa' tam, dahin na ji'ek té' sepun tam dahin ngepden nyihu mesau anak-anak daha' ja daha' em murip. 20#Us 2:2; Ib 11:23 Tegu anan Musa pah uh en kanak, iha' pah kajau lelan jam na', en hinan na' puboh nah iha' telo' bulan alem uma taman na'. 21#Us 2:5,10 Hu'uh nah iha' nei tula hawang, en anak-doh Laja' Firaun ala nah iha', en na' puboh nah iha' piah awi puboh anak la'ung na'. 22En daha' katuk nah Musa lim-lim ugé' kelunan Mesir. Dekaya' nah hadui na' dahin dahun na' pah la'it.
23 #
Us 2:11-15
“U pat-pulu duman urip na', kenep na' ngenep seng tei nesek harin-harin na', iha' atih bengsa' Israel. 24Tegu iha' nyineng ji kelunan ga' katé' aleng em tekep, pelalau iha' masi iha', pelalau nyulei té' kelunan aleng pekaté' laké' atih dih dahin lematei kelunan Mesir anan. 25Kio' Musa tih, uh jam nah daha' harin na' Allah pakei iha' ja makau daha', bi nusi' daha' atih jam. 26Dau malah la'an té' dawa' dua' la'ung pano'. Musa pah tei ha' dawa' ngenep pehalau dawa', ken na', ‘U kua' harik, kua' anih peharin, beka' na' nun kua' pekaté' ji la'ung dahin ji la'ung?’ 27Bi kelunan aleng pekaté' bakéh na' atih nyarang iha', ken na', ‘Hi aleng na ika' pengulu' aleng mutet daho' marung kamé' anih? 28Ika' seng ngenep lematei akui lahuh iah, awi jam tuk ika' lematei kelunan Mesir atih dehalem di?’ 29#Us 2:22; 18:3-4; Lk 12:14 Lun lap nah Musa kelenghi daho' anan. Uh anan iha' tei liung-liung ateng ha' murip ha' daléh Midian, hinan nah iha' na anak, dua' anak laké'.
30 #
Us 3:1-10; Kel d M 33:16 “Hu'uh pat-pulu duman iha' té' tinan, tula nah ji meliket kitan na' alem kelat apui té' uket ha' tana ngahit jeleng ngalang Sinai. 31Lun en Musa ineng, pelalau ngeniheng nah iha' nyineng. Tegu iha' tei jeleng ngenep nyineng, tula nah dahun Tuhan, kuma', 32‘Akui anih nah Allah sepum dih, iha' tih Allah Abraham, dahin Ishak, dahin Yakub.’ Ngetiwet nah Musa, em makang nyineng. 33Dahun Tuhan men iha', ‘Bet nah kasut ka' men kudek ka' anan, avin ngavam nekring anan tana aleng ma'ang. 34#Us 2:24; 3:7,10 Lan, uh dara lan nah Akui uh nyineng katé' kelunan Kui ha' daléh Mesir dahin kenihem daha' uh Kitak, Akui pah nei ngiléh seng tei makau daha'. Kerei inih, nei nah im, Akui ngenep nyihu ika' tei ha' Mesir.’
35 #
Us 2:14
“Té' pah Musa anih aleng en daha' sau atih dahin kuma', ‘Hi kah aleng uh na ika' jadi' pengulu' dahin mutet daho', du?’ iha' nah aleng en Allah nyihu jadi' pengulu' dahin makau daha' kenan usu meliket aleng tula té' iha' alem uket atih. 36#Us 7:3,10; 14:21; Kah d Is 14:33 Laké' anan nah aleng geri daha' atih musang, dahin na kuri-kuri hadui ngavan daha' ngeniheng dahin kuri-kuri tada' ha' daléh Mesir, té' pah lahuh ha' banget Bela dahin alem tana ngahit anan, pat-pulu duman dara na'. 37#Kel d M 18:15,18; HST 3:22 Musa nih nah aleng bara men daha' bengsa' Israel. ‘Allah seng meju men ikam ji la'ung nabi men hang harin kam awi akui anih.’ 38#Us 19:1—20:17; Kel d M 5:1-33; 9:10; HST 7:53 Iha' nah aleng té' dahin daha' ha' tana ngahit atih dih, iha' té' dahin lim-lim sepun tam, iha' té' dahin meliket aleng tengaran dahin na' ha' ngalang Sinai atih lahuh. Iha' nah aleng ala lim-lim daho' aleng murip atih ja iha' bara na' men itam.
39 #
Kah d Is 14:3
“Bi nusi' nah sepun tam ngioh iha', bi en daha' muau tua nah iha', avin kenep daha' atih nekyang ngenep nepulet tei ha' Mesir. 40#Us 32:1,23 Ken daha' men Harun, ‘Na nah men kamé' hudo' aleng tei una' té' kamé', avin Musa aleng uh geri kamé' musang men daléh Mesir dih, nusi' nah kamé' jam nuno tuk marung iha' la'an.’ 41#Us 32:2-6 Tegu anan lahuh daha' na hudo' anak sapi', dahin geri bun usu daha' men hudo' atih, dahin pekelu'an marung hadui usu daha'. 42#Yer 19:13; Am 5:25-27 Bi Allah nelikun nah, dahin melek daha', ja daha' sebayang té' ket lim-lim aleng ha' langit, awi aleng hu'uh kalung alem surat nabi-nabi,
‘U pahu Israel, té' kah ikam ma'uk men Akui laluh aleng en kam tevek atih,
dahin ket aleng en kam uk bun usu kam atih dih,
alem dara pat-pulu duman arei dih ha' tana ngahit atih dih iah.
43Ikam pah sa' uh geri uma sebayang Molokh tugung ikam,
dahin hudo' kelawing Refan,
iha' atih hudo' aleng en kam na ja ikam ngetalau na'.
Akui pah seng masan ikam ha' pedah atih Babel.’
44 #
Us 25:9,40 “Sepun tam té' lepau ngavan tebara Tuhan atih alem tana ngahit ngioh dahun Tuhan aleng duan Musa, nyihu iha' na na' ngioh awi katah aleng uh na' nyineng. 45#Ar Kel 17:8; 48:4; Kel d M 32:49; Yos 3:14; 18:1 Lepau avan tebara anan pah en sepun tam aleng baya geri tugung Yosua tegu daha' ala tana' daha' aleng alem adet ha' béh, daha' anan en Allah uga men unan sepun tam anan. Nunan nah lepau avan tebara atih ateng tegu urip Daud. 46#2 Sam 7:1-16; 1 Tuk 17:1-14; NDI 132:5 Daud, iha' aleng sayu ha' unan Allah, dahin akei ngenep na uma avan Allah Yakub atih melo'. 47#1 Laj 6:1-38; 2 Tuk 3:1-17 Bi Salomo nah aleng meju uma men Allah. 48#Yes 66:1-2 Bi aleng lan na' Tuhan aleng Kelalau Bau atih em melo' alem uma kenan usu kelunan; awi dahun nabi,
49‘Té' pah Surga atih, iha' aleng ladung aren Kui,
dahin usun tana anih iha' aleng hamak kudek Kui.
Nuno' uma aleng seng en kam ju men Akui anan? Ken Tuhan;
dahin hino' aleng Ngavak melo'?
50Nusi' ha' usu Kui aleng uh na lim ket anih iah?’
51 #
Us 32:9; Lewi 26:41; Kah d Is 27:14; Yes 63:10; Yer 9:26 “U ikam aleng mahing kenep aleng em sunat alem kenep kam dahin alem iling kam, ikam pa'en melawan Belua' Ma'ang: awi aleng en sepun kam na, nunan pah ikam na lahuh. 52#2 Tuk 36:16; Mat 23:31 Té' hang daha' nabi atih dih hi aleng em té' katé' kenan sepun kam atih? Lun en daha' lematei nah kelunan aleng uh bara menuna' marung tuk Kelunan aleng Teneng atih seng ateng. Iha' nah aleng uh kam uk dahin uh kam lematei. 53#Us 20:1-26; Gal 3:19; Ib 2:2 Ikam aleng uh ala tebara Musa aleng uh en meliket geri, bi nusi' kam ngioh na'.”
Patei Stefanus
54 #
HST 5:33
Tegu daha' atih kelenghi daho' aleng nunan, perah nah kenep daha', pelalau begasin tua ipen daha' té' iha'. 55#Lk 22:69 Bi Stefanus penu dahin Belua' Ma'ang, neng'o nah iha' ha' langit, pelalau nyineng aren Allah, dahin Yesus pah té' nekring bah ta'o Allah. 56Lun ken na', “Ineng nah, akui nyineng langit neng'ap, dahin Anak-kelunan atih nekring bah ta'o Allah.” 57Bi medéng nah kelunan atih dahin dekaya' dahun daha', en daha' madet nah iling daha', pelalau dahin ji kenep daha' nekjet gem iha', 58#HST 22:20 en daha' sau hawang daléh, uh anan daha' nyeparik bato' té' iha'. Lim kelunan aleng jam na' atih melo' ketanun daha' té' kudek ji nyemaké' aleng aran na' Saulus. 59#NDI 31:5; Lk 23:46 En kelunan atih separik nah Stefanus alem ha' ngetalau Tuhan, ken na', “U Yesus, Tuhan Yesus kui, ala nah beluak.” 60#Lk 23:34 Lun nyepukun nah iha', pelalau medéng dahin dekaya' dahun na', ken na', “U Tuhan, meng mega' sala anih té' daha'.” Uh ha' kuma' nunan tudu nah iha'.
Currently Selected:
HADUI DAHA' SIHU TUHAN 7: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
