ARING KELESING 2
2
1Nunan nah Allah uh pela'ung langit dahin usun tana, dahin huang na' lim. 2#Ib 4:4,10 #Us 20:11Tegu ketusu dau Tuhan Allah uh pek'uh hadui Na' aleng Na' na anan, ngelarah nah Iha' té' dau aleng ketusu anan men lim-lim hadui Na' atih. 3Pelalau en Allah ju nah dau aleng ketusu anan dahin ngem'ang na', avin té' dau anan nah Iha' ngelarah men lim hadui Na' aleng uh Na' na anan. 4Nunan nah Tuhan na langit dahin tana.
Lida Eden
Men aring-aring Tuhan na usun tana dahin langit, 5nusi' payan té' nun-nun uro' murip té' usun tana anih, nusi' pah payan té' tuvuh nun-nun, avin nusi' payan Tuhan Allah menei usan té' usun tana anih dahin nusi' pah payan kelunan té' nyadui té' iha' lahuh. 6Bi té' kah ep peju men usun tana masa lim-lim usun tana anih.
7 #
1 Kor 15:45
Tegu anan nah Tuhan Allah na kelunan men pup tana dahin mahen hengan Na' tei men alem urung na', nunan nah aring kelunan té' henga' aleng murip.
8Pejoh nah Tuhan Allah na lida ha' Eden, ha' matan dau pa'un, tinan nah Iha' metei kelunan aleng Na' na anan. 9#K Tula 2:7; 22:2,14 Iha' nah Tuhan Allah na ha'ut-ha'ut na'an kayo' nei murip té' usun tana aleng sayu en daha' nyineng, dahin sayu en daha' kani bua na' lahuh. Marung belua lida atih té' nah ji iung bua aleng ma'uk urip aleng pa'en, té' pah ji iung bua lahuh aleng ngavan daha' jam aleng sayu dahin jam aleng ji'ek, ji iung bua atih té' alem lida anan lahuh.
10Té' pah ji hungei anyun na' nei alem lida Eden atih aleng masa tana anan, men inan hungei pehangat pat. Ji aleng aring hangat na', aran na' Pison. 11Iha' nah aleng manyun teliling ji usun tana Hawila, tinan nah té' met. 12Sayu lan met té' daléh anan, té' pah lutung tumo' dahin bato' unam lahuh. 13Aleng kedua' hangat na' iha' nah Gihon aran na', iha' nah aleng manyun teliling lim tana Kusy. 14Aran hangat na' aleng ketlo' iha' nah Tigris, anan aleng tei manyun pala matan dau pa'un ha' Asyur. Aleng kepat hangat hungei anan Efrat.
15Tuhan Allah geri nah kelunan anan tei melo' iha' alem lida Eden, ja iha' puboh na' dahin nyadui té' lida anan. 16Pelalau Tuhan Allah ma'uk ji tebara men kelunan anan, “Lim iung bua alem lida anih deng kah ika' kani bua na', ano'-ano' aleng kenep ka' tua, 17bi té' ji iung bua aleng haman menei sayu dahin haman menei ji'ek anan meng im kani na', avin tegu ika' kani na', adang ika' matei.”
18Iha' nah Tuhan Allah kuma' la'an, “Nusi' sayu iha' ji la'ung tua kelunan nunih. Sayu nah Akui na ji aleng lengep iha', aleng awi jam iha' nih.” 19En Tuhan Allah na men tana lim-lim na'an tulan dahin manuk aleng madang té' usun tana. Uh anan en Na' geri nah lim ket atih men kelunan anan ja iha' nyineng na', nuno' si' iha' na aran daha'. Awi jam tuk aran aleng uh en na' na men ha'ut-ha'ut na'an tulan aleng murip, nunan nah aran daha' kenan na'. 20Iha' nah kelunan anan na aran lim hulung aleng en na' puboh dahin manuk aleng madang dahin lim tulan aleng alem uro', bi laké' anan dih, iha' dep tua nah, nusi' payan té' aleng awi jam iha' aleng seng lengep na' masi iha'.
21Avin anan en Tuhan Allah na nah laké' anan tudu aya'. Alem iha' tudu, en Tuhan Allah ala nah ji tulang hah na', pelalau metei sin kalui na' ja ha' pelapit la'an. 22Men tulang hah aleng en Tuhan Allah ala té' laké' anan dih, en Na' na nah ji doh, pelalau en Na' geri men laké' anan. 23Pelalau laké' anan kuma',
“Anih nah tulang men tulang kui
dahin sin aleng men sin kui.
Akui seng na aran na' doh, avin
helung na' nei men laké'.”
24 #
Mat 19:5; Mk 10:7-8; 1 Kor 6:16; Ef 5:31 Avin anan laké' seng melek taman na' dahin hinan na' tei peji dahin doh na', dawa' dua' anan pah jadi' ji sin tua.
25Dawa' dua' kelunan aleng pehawa' anan utoh tua nah dawa', bi nusi' nah dawa' jam ha'éh.
Currently Selected:
ARING KELESING 2: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
