ARING KELESING 25
25
Pahu Abraham aleng ha' béh
1 Tuk 1:32-33
1Abraham ala ji doh la'an, aran na' Ketura. 2Iha' doh atih nganak Zimran, Yoksan, Medan, Midian, Isybak, dahin suah. 3Yoksan nganak Syeba dahin Dedan. Pahu Dedan, iha' nah daha' Asyur, daha' Letus dahin daha' Leum. 4Anak Midian aran daha' Efa, Efer, Henokh, Abida dahin Eldaa. Anih nah daha' aleng pahu Ketura.
5Abraham ma'uk lim daven na' men Ishak, 6bi men anak na' aleng té' doh na' aleng baya atih en na' nulan uk tua men daha'. Men alem ha' té' loh murip anan, en na' nyihu nah daha' tei ha' tana aleng men béh matan dau pa'un, tei bulak men béh Ishak.
Abraham matei dahin en daha' tepiha'
7Urip Abraham ji atuh tusu-pulu-lima' duman iha' ha' matei. 8Iha' matei tegu ha' uh muku aya'-aya' uh puti tua nah buk na', uh muku aya' lan-lan, tegu iha' tei matei anan. 9En Ishak dawa' Ismael tepiha' nah iha' ha' luvang bato' Makhpela, luvang bato' aleng alem luma' Efron anak Zohar kelunan pahu Het atih dih, tana atih pah ha' Mamre pedah matan dau pa'un. 10#Ar Kel 23:3-16 Tana anan aleng en Abraham melé' té' daha' pahu Het atih dih. Hinan nah daha' nepiha' Abraham dahin matei Sara hawan na' dih. 11Men'uh Abraham matei, Allah masi Ishak anak Abraham atih, Ishak pah murip jeleng lesung Lahai-Roi.
Pahu Ismael
1 Tuk 1:28-31
12Anih nah pahu Ismael anak Abraham té' Hagar aleng doh daha' pahu Mesir aleng nyam alem amin Sara arei dih. 13Anih nah aran anak-anak Ismael, ngioh awi tuk kanak daha'. Nebayot, anak na' aleng una', 14uh anan Kedar, Adbeel, Mibsam, Misyma, Duma, Masa, 15Hadad, Tema, Yetur, Nafisy dahin Kedma. 16Atih nah lim anak Ismael, dahin aran-aran daha', dahin aran-aran uma dahin lepau-lepau daha'. Daha' nah pulu-dua' kelunan asen laja', ngioh ha'ut-ha'ut na'an daha' atih. 17Urip Ismael ji atuh telo'-pulu-tusu duman, iha' ha' matei, tei pala daha' sepun-sepun na', 18Daha' atih té' murip men daléh Hawila ateng ha' daléh Syur, aleng pedah matan dau pa'un té' Mesir, ha' avan alan aleng tei pala Asyur. Daha' murip hinan peji dahin harin-harin daha'.
Kanak Esau dawa' Yakub
19Anih nah lung marung pahu Ishak, anak Abraham. Abraham nganak Ishak, 20urip Ihak pat-pulu duman tegu iha' ala Ribka, anak Betuel, daha' aleng men pahu Aram men Padan-Aram, doh aleng harin Laban daha' aleng men Aram atih, en na ala jadi' hawan na'. 21Sebayang nah Ishak té' Tuhan men hawan na', avin hawan na' atih nyalun. Tuhan pah nyu'ei sebayang Ishak, Ribka hawan na' anan pah nei mali. 22Tegu dawa' hapeng anan pehiko'-pehiko' alem butit hinan dawa', ken Ribka nah, “Tana' ha' nunih-nunih tuk na' pa'en, nusi' kui ji'ek deng.” Pelalau ha' ji'ek tei meteng kenep Tuhan. 23#Rom 9:12 Ken Tuhan men iha',
“Dua' na'an bengsa' té' alem butit ka',
dua' pahu aleng seng in nganak atih pah seng sekdep kenep.
Ji pahu men dawa' seng lalau tu'a men'uh aleng ha' béh,
anak aleng una' pah seng jadi' liva men'uh anak aleng baya.”
24Tegu jaka' ha' nganak, bi lan kah iha' papin anak na'. 25Aleng musang una', lah na' bela, dahin awi basung bulo' dih. Avin lah na' nunan daha' na aran na Esau#25:25 ESAU aran na' “ngebulo'”.. 26Uh anan musang nah harin na' aleng baya, beka' usu na' gem tumin Esau. Avin ha' nutih daha' na' aran na' Yakub#25:26 YAKUB aran na' atih “iha' gem tumin”. Té' pah aran na' lahuh, “iha' peluvat”.. Urip Ishak nem-pulu duman tegu Ribka nganak dawa' anak na' anan.
Esau mebet daven na' daven aleng itung tulan anak una'
27Nei-nei dekaya' nah dawa'. Esau ji kelunan aleng haman ilau tulan, kaséh tei panau alem uro', bi Yakub ji kelunan aleng lemen sayu barik, ngenep melo' té' uma tua. 28Ishak nyalam lan té' Esau, avin iha' ngenep kuman sin tulan aleng kelan na', bi Ribka nyalam lan ha' té' Yakub.
29Ji hangun Yakub na ket en na' kani, nei nah Esau uli men alem uro', la'o lelan ha' ji'ek. 30Ken Esau nah men Yakub, “Im uk kui uk-iduk beletek bela aleng im pesak anan, avin la'o lan-lan kui nih.” Anan tavit daha' na aran na' Edom#25:30 EDOM Halem aran atih “bela”..
31Bi ken Yakub, “Em tuken ika' ma'uk akui tulan ka' aleng tulan anak una' nan, uréh kui ma'uk ika' iah.”
32Ken Esau nyu'ei, “Akui nih jeleng seng matei nah anih. Seng nun bang tulan anak una' anan té' akui du?”
33 #
Ib 12:16
Ken Yakub men iha', “Supah im una' ma'uk na' men akui, uréh kui ma'uk ika'.” Lun tevah nah iha', dahin ma'uk tulan na' anan men Yakub, iha' tih tulan daha' aleng anak una'. 34Iha' nah Yakub ma'uk luti dahin na telang beletek bela anan men Esau. Kuman nah iha' dahin du'i, uh anan iha' peju pelalau tei panau. Nunan nah tuk Esau muau té' tulan na' atih.
Currently Selected:
ARING KELESING 25: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
