ARING KELESING 38
38
Yehuda dahin Tamar
1Tegu anan Yehuda pah tei leka' melek dalo' harin na', tei piwei dahin ji la'ung bengsa' Adulam, aleng aren na' Hira. 2Pesuk Yehuda nah ji doh Kanaan, aran taman doh anan Syua. Pelalau Yehuda tei pala iha' ngehawa' doh anan. 3Doh anan pah nei mali, iha' ha' nganak ji anak aké', aran na' Er. 4Uh anan mali pah iha' nekulah, iha' pah nganak ji anak laké' en na' na aran anak anan Onan. 5Men'uh anan nganak pah iha' la'an ji anak laké', en na' na aran na' Syela. Tegu Yehuda té' ha' Kezib iha' anak anan nei musang.
6Men'uh anan en Yehuda ala nah ji doh men Er aleng anak una' na' atih, jadi' hawan na'. Aran doh atih Tamar. 7Bi Er, anak una' Yehuda nan kelalau ji'ek ha' ha' unan Tuhan, iha' nah Tuhan lematei iha'. 8Lun kuma' nah Yehuda men Onan, “Tei nah im tudu peji dahin doh harim anan, ja ka' ngehawa' iha' itung kalui harim ji'ek dih, ja ha' té' pahu men harim dih.” 9Bi avin Onan jam iha' seng em anun na' anak atih baya, ha'ut-ha'ut ha' tei tudu dahin doh harin na' anan, en na' bet hawang tua nah ata' ketanun na', ja doh anan em nei mali, avin duyah ha' na pahu men harin na' aleng uh matei anan. 10Bi barik aleng nunan ji'ek lan atih ha' unan Tuhan, iha' pah Tuhan lematei iha' lahuh. 11Lun kuma' nah Yehuda men Tamar doh divan na' anan, “Melo' nah im bareng debalo' tengau tua nunan alem uma anih jarun pidah anak kui Syela nih nei dekaya'.” Avin ken kenep na', “Meng-meng ha' tei matei tua awi dawa' harin na' aleng dekaya' arei dih.” Iha' nah Tamar uli ha' amin taman na' anan.
12Dara men'uh anan beka' matei nah hawan Yehuda nan, aleng anak Syua dih. Tegu kenep Yehuda uh tei halau, iha' nah iha' tei ha' Timna, tei dahin daha' aleng nguting bulun-bulun duba na', dawa' Hira bakéh na' atih lim tei, laké' bakéh na' atih kelunan Adulam. 13Tegu daha' bara dengah men Tamar, ken daha' men iha', “Tamam divan seng tei ha' Timna nah anan kerei inih, iha' ngenep tei nguting bulun duba na'.” 14Tegu iha' kelenghi dahun daha' nunan, pelalau ha' melek basung debalo' na', pelalau nepulo' kahung na', dahin nabun lim neng na', pelalau tei melo' té' béh ketamen aleng tei ha' Enaim, té' alan aleng tei ha' Timna, avin iha' jam Syela uh dekaya', beka' nusi' loh kah taman na' ma'uk iha' hawan na'.
15Tegu Yehuda nyineng iha', en na' lo' ji doh pedayang tua ha' avin iha' nabun lim neng na' nutih. 16Pelalau Yehuda tei pala doh aleng melo' té' béh alan anan dih, pelalau kuma' men iha', “Nei im dahik, ja si' akui nei tudu dahim,” avin nusi' ha' jam doh atih seng divan na'. En doh anan teng nah iha', “Nun aleng seng im uk men akui, iha' ika' nei tudu dahik sika?”
17Iha' ha' nyu'ei, “Té' ah hulung kui, ek kato' kah men ika' ji anak kading.” Ken doh anan pah nyu'ei, “Em ika' ma'uk kaput na' una' men em payan ika' kato' na' men akui uréh ha'.”
18Iha' pah laké' anan meteng, “Ket nun aleng itung kaput na' ek uk men ika' kurim atih du?” Nyu'ei doh anan iha', “Selegem aleng té' aran ka' té' iha' anan, jet ka', dahin hekun aleng té' usu ka' anan im lo' ha' akui.” Pelalau en na' uk iha' lim-lim nah ket anan, iha' nah iha' tei tudu dahin na', doh anan pah nei mali kenan na'. 19Peju nah doh anan tei leka', en na' uéh nah tepulo' na' dahin meté' kanan debalo' na' anan dih la'an.
20Té' nah Yehuda anan dih, en na' kato' nah ji anak kading tugung laké' bakéh na' anan, aleng kelunan Adulam atih, ja iha' ala ket aleng en na' lo' ha' doh anan dih uli ha' iha' la'an, bi nusi' bakéh na' atih tei pesuk doh anan dih la'an. 21Iha' nah iha' meteng-meteng daha', hino' ngavan doh anan melo', “No' nah doh pedayang aleng té' melo' té' béh alan aleng tei ha' Enaim arei dih?” ken na'. Daha' pah nyu'ei iha', “Nusi' té' doh pedayang hinih.”
22Lun uli nah iha' pala Yehuda la'an bara men iha', “Nusi' kui tei pesuk iha', té' pah daha' laké' aleng melo' tinan bara men akui, ken daha', ‘Nusi' té' doh pedayang hinih,’ ken daha' atih pah men akui.”
23Iha' nah Yehuda kuma', “Bei nah bareng anan em té' ha' iha', sukun ta' em tei ha'éh kenan kelunan, bareng si' akui uh em kato' men iha' lan anak kading anan iah, bi nuno' na ta' ika' em tei pesuk iha' nunan.”
24Kio'-kio' alem telo' bulan nunan, en daha' bara nah men Yehuda. Ken daha', “Tamar aleng doh divan ka' dih uh tei pedayang nah iha', hu'uh mali nah iha' kenan hadui na' tei pedayang nunan.” Pelalau Yehuda kuma', “Kelo' geri nah doh anan, en kam pahun nah iha'.”
25Alem daha' geri iha', iha' nah doh anan nyihu daha' bara men taman divan na', nunih, “Té' pah akui mali nih kenan laké' aleng hipun bareng anih kah anih.” En na' duan nah daha' la'an, “Sek kelo' ilau hi si' aleng hipun selegem aleng té' aran té' iha' anih dahin jet anih, dahin hekun anih lahuh.”
26Iha' nah Yehuda nyineng bareng anan, tegu iha' nyineng na', pelalau ha' kuma', “Nusi' ha' akui aleng teneng, doh anih aleng teneng, avin nusi' lan kui ma'uk iha' men Syela anak kui anih dih.” Nusi' nah iha' tei peji dahin doh anan la'an.
27Tegu doh anan seng nganak, tula nah anak na' papin alem butit na'. 28Tegu iha' nei nganak, beka' ji men dawa' anak na' anan nei musang usu na', pelalau en doh bidan gem nah usu na', dahin ngaput na' té' ketian bela' iha' ha' kuma', “Anih aleng una' nei musang.” 29Bi anak anan mahin usu na' halem nekulah, iha' nah ji harin na anak aké' nei musang, iha' nah bidan anan kuma', “Kelalau mahnga' ka' nei musang.” Iha' nah iha' na aran anak anan Peres. 30Men'uh anan musang pah harin na' aleng té' kaput ketian bela men'a dih, laké' loh kah iha', aran na' en na' na Zerah.
Currently Selected:
ARING KELESING 38: TDK1990
Highlight
Share
Compare
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
