YOHANES 1

Daho' aleng té' dahin Allah men aring lelan

1 # Yoh 17:4; 1 Yoh 1:1-2; K Tula 19:13 Men aring lelan uh té' nah Daho'. Daho' ati nah té' dahin Allah, Daho' anan nah Allah lahuh. 2#Ivun 8:22 Men aring-aring Iha' té' peji dahin Allah. 3#Kol 1:16-17; Ib 1:2 Lim-lim ket nun-nun Iha' aleng na na'. Awi Iha' em té', ji nun-nun pah em té' nei la'ung. 4#Yoh 5:26 Halem Na' Urip té', Urip atih nah aleng alah kelunan. 5#Yoh 3:19 Malah nah alah atih alem lidem, lidem atih pah em deng pekalah na'.

6 # Mat 3:1; Mk 1:4; Lk 1:13-17,57-80 Té' nah ji kelunan en Allah nyihu, aran na' Yohanes. 7#Lk 3:3 Iha' nah aleng nei jadi' teksi' ja iha' bara marung alah atih, ja lim-lim kelunan deng nginah kenan na'. 8#Yoh 1:20 Nusi' batung na' aleng alah atih, bi iha' nei ja iha' bara marung alah atih. 9Alah aleng lan atih, aleng na malah ha'ut-ha'ut la'ung, Iha' aleng uh té' nei té' usun tana anih.

10 # Yoh 1:3-5 Iha' té' té' usun tana, Iha' nah aleng pela'ung usun tana anih, bi huang usun tana anih em jam Iha'. 11Iha' nei ateng ha' ket aleng anun Na', bi daha' aleng anun Na' em ala Iha'. 12#Gal 3:26 Bi hi-hi aleng ala Iha', daha' atih nah en Na' na jadi' anak Allah, iha' tih daha' aleng nginah té' aran Na'. 13#Yoh 3:5-6 Aleng pa'un daha' atih, nusi' nah daha' men daha', nusi' pah men barik batung, nusi' pah men kenep kelunan, bi men Allah. 14#Yes 7:14; 60:1; Lk 9:32; 2 Pet 1:16-17 Daho' atih balui kelunan, dahin melo' té' hang tam, (itam pah uh nyineng aren Na', aren awi Anak aleng ji tua aleng nei men Taman tam,) Iha' pah penu té' asi dahin teneng.

15 # Mat 3:11; Yoh 1:27,30 Yohanes bara marung Iha', dahin medéng, ken na', “Anih nah Iha' aleng uh ek kuma' dih, ‘Iha' aleng nei ngebaya té' akui, Iha' nah aleng tei una' té' akui, avin adang Iha' uh té' una' té' akui,’ ”

16 # Yoh 3:34; Kol 1:19 Avin men asi Na' aleng nyungei itam lim uh ala tulan asi, dahin asi aleng em tei ketapah. 17#Us 34:6; NDI 25:10; 40:10; 85:10; Rom 6:14; 10:4 Avin Allah ma'ih tebara menuna' men Musa, bi asi dahin teneng nei kenan Yesus Kristus. 18#Mat 11:27; Lk 10:22; Yoh 6:46; 1 Tim 6:16; 1 Yoh 4:12 Ji la'ung pah em payan nyineng Allah, men aring-aring ateng kerei inih pah, bi Anak aleng ji tua atih aleng alem sepakang Taman tam, Iha' nah aleng uh petula Iha'.

Yohanes bara iha' dep men'uh Yesus

Mat 3:1-12; Mk 1:1-8; Lk 3:1-18

19Anih nah dahun Yohanes tegu daha' Yahudi nyihu kuri-kuri imam dahin kelunan Lewi men Yerusalem tei meteng iha', “Hi kah ika'?” 20#HST 13:25 Pelalau iha' bara dahin em mahuk. Nunih dahun na' bara, “Akui anih nusi' akui Kristus atih.” 21#Kel d M 18:15,18; Mat 17:10; Yoh 6:14; 7:40 Lun ken daha', “Iha' nunan, hi nah ika' sikah? Ika' aleng Elias iah?” “Nusi',” ken na'. “Ika' aleng nabi atih iah?” “Nusi',” ken na' pah. 22Lun ken daha' nah men iha', “Hi nah ika' sikah, ja si' kamé' deng bara daha' aleng nyihu kamé' anih dih. Nun dahum marung batung ka' sikah?” 23#Yes 40:3; Mat 3:3; Mk 1:3; Lk 3:4 Ken na', “Akui anih nah ji daho' aleng medéng ha' tana ngahit, ‘Nutau nah alan Tuhan,’ awi aleng uh en Yesaya tira dih,” ken na.

24Té' pah kelunan aleng tei hu'en daha' Farisi. 25#Mat 21:25 En daha' teng nah iha', dahin kuma' men iha', “Iha' ika' em Kristus, iha' ika' em Elias, nusi' pah ika' nabi atih lahuh, ja ka' meduh kelunan sikah?” ken daha'. 26#Mat 3:11; Mk 1:7-8 Lun nyu'ei nah Yohanes, ken na', “Akui anih meduh daha' té' ata', bi té' ji la'ung aleng nekring té' hang kam nan, nusi' kam jam Iha', 27#Yoh 3:26; HST 13:25 iha' tih Iha' aleng ateng ngebaya té' akui, aleng dekaya' men'uh akui. Muvan talé' kasut Na' pah akui em tekep,” ken na'. 28#Mat 3:6,13 Lim-lim tuk atih jadi' ha' Betania, ha' dipah hungei Yordan, ngavan Yohanes meduh kelunan.

Yesus Anak-duba Allah

29 # Yes 53:7; Yoh 1:36 Dau malah ji iha' nyineng Yesus nei pala iha', pelalau ha' kuma', “Nyineng kelo' Anak-duba Allah aleng mebet sala kelunan ha' usun tana anih! 30#Yoh 1:15,27 Anih nah Iha' aleng kurik arei dih, ‘Té' ji la'ung nei ngebaya té' akui aleng tei una' té' akui, avin adang Iha' uh té' una' té' akui.’ 31Akui pah em jam Iha' men'a, bi anih nah ngavak nei meduh ikam té' ata' nih, ja Iha' nei tula té' daha' Israel.”

32 # Mat 3:16; Mk 1:10; Lk 3:22 Lun bara nah Yohanes la'an, dahin kuma', “Té' Belua' kitak ngiléh men langit, awi jam manuk sepukun dih, pelalau melo' té' ujung Na'. 33#Mat 3:16; Lk 3:2 Akui pah em payan jam Iha' dih, bi Iha' aleng nyihu akui nei meduh té' ata' anih, uh kuma' men akui, ‘Tegu ika' nyineng Belua' nei ngiléh dahin melo hujung ji kelunan, Iha' anan nah aleng meduh té' Belua' Ma'ang.’ 34#Mat 3:17 Akui uh nyineng na', iha' nah akui bara, Iha' anih nah Anak Allah.”

Tuhan Yesus ilau lima' la'ung anak sekulah Na'

35Dau malah ji nekring nah Yohanes dahin dua' la'ung anak sekulah na'. 36#Yes 53:7; Yoh 1:29 Iha' ha' nyineng Yesus alem Iha' panau, dahin kuma', “Nyineng nah Anak-duba Allah!” 37Dawa' anak sekulah na' kelenghi dahun na' nunan, pelalau dawa' ngioh Yesus. 38Nyili nah Yesus, kitan Na' dawa' ngioh Iha', pelalau Iha' kuma' men dawa', “Ket nun kua' ilau?” ken Na'. “Rabbi (Rabbi anan, aran na' Guru), hino' Ngavam melo' di du?” ken dawa'. 39“Nei kua' nyineng na' ké',” ken Na' men dawa'. Pelalau tei nah dawa' nyineng ngavan Na' melo', melo' nah dawa' dahin Yesus dau anan. Té' awi pukun pat levi anan.

40 # Mat 4:18-22 Ji men dawa' aleng kelenghi dahun Yohanes dahin ngioh Yesus iha' nah Andreas aleng harin Petrus. 41#1 Sam 2:10; NDI 2:2 Pelalau Andreas tei ilau harin na' Simon una', dahin kuma' men iha', “Kawa' uh pesuk dahin Mesias” (Mesias anan aran na' Kristus). 42#Mat 16:18; Mk 3:16 En na' geri nah Simon pala Yesus. En Yesus ineng nah iha', pelalau Iha' kuma', “Ika' aleng Simon, anak Yohanes, Kefas nah aran ka' la'an” (Kefas anan aran na' Petrus).

43 # Mat 8:22; Mk 2:14 Dau malah ji Yesus ngenep tei ha' Galilea. Pepsuk nah Iha' dahin Filipus, dahin kuma' men iha', “Nei nah im ngioh Akui,” ken Na'. 44Filipus anan kelunan Betsaida, peji daléh dahin Andreas dawa' Petrus. 45#Kel d M 18:18; Yes 7:14; 53:2; Yer 23:5; Yehez 34:23 Uh anan Filipus pesuk dahin Natanael, pelalau ha' kuma' men iha', “Té' kalo' uh jam Iha' aleng en Musa bara halem tebara menuna' dih, dahin lim-lim nabi lahuh, Yesus anak Yusuf, kelunan Nazaret,” ken na'. 46#Yoh 7:41,52 “Seng deng ket aleng sayu musang men Nazaret du?” ken Natanael men iha'. “Sek im nei nyineng ké',” ken Filipus. 47#Ar Kel 25:27; NDI 32:2; 73:1 Kitan Yesus Natanael nei pala Iha', pelalau Iha' kuma' marung iha', “Nyineng laké' Israel aleng lan atih, aleng em té' amoh nun-nun halem na',” ken Na'. 48“Nuno' tuk Ika' jam akui pa,” ken Natanael men Iha'. “Men Filipus em payan duan ika', tegu ika' hida bua ara#1:48 Bua ara Anih ji na'an bua alem daléh daha' aleng awi bua a jam na', bi ha' mih sayu en daha' kani, en daha' na lida na' lahuh. atih di, uh Kitak nah ika',” ken Yesus nyu'ei iha'. 49#2 Sam 7:14; NDI 2:7; Mat 14:33; 16:16; Yoh 6:69 Lun ken Natanael nyu'ei Iha', “U Rabbi, Ika' aleng Anak Allah. Ika' aleng laja' bengsa' Israel.” 50Lun ken Yesus nyu'ei dahin kuma' men iha', “Nginah kah ika' avin Akui kuma' Akui jam ika' hida pa'un bua ara atih dih iah? Lalau dekaya' men'uh anan pah ket kitam na'a.” 51#Ar Kel 28:12; Mat 4:11; Mk 1:13 Pelalau Iha' kuma' men iha' la'an, “Dahuk lan men ikam, ikam seng nyineng langit neng'ap dahin meliket Allah pah ma'un ngiléh té' Anak-kelunan,” ken Na'.

Currently Selected:

YOHANES 1: TDK1990

Highlight

Copy