YOHANES 11

Lazarus matei

1 # Lk 10:38-39 Té' ji laké' perah aran na' Lazarus, kelunan Betania, iha' tih daléh Maria dahin harin na' Marta. 2#Yoh 12:3 Maria atih iha' aleng musut kenyu bu sayu té' Yesus, dahin mepin kudek Na' té' buk na', harin na' nah aleng perah atih aleng aran Lazarus atih. 3Iha' nah dawa' doh harin na' atih nyihu daha' tei pala Yesus, kuma', “Guru, laké' aleng Ngavam dekaya' kenep arei dih perah ha'.” 4#Yoh 9:3 Kitan Yesus dahun dalo' nutih, iha' nah Iha' kuma', “Nusi' perah atih na iha' matei, té' pah atih ja aren Allah tula, ja Anak Allah pah en daha' ju avin tuk anan.” 5Yesus nyalam Marta, dahin harin na', dahin Lazarus. 6Kitan Yesus nah iha' uh perah nutih, sa' melo' pah Iha' dua' dau la'an ha' ngavan Na' atih.

7Men'uh anan Iha' kuma' men dalo' anak sekulah Na', “Tei nah telo' ha' daléh Yudea nekulah.” 8#Yoh 8:59; 10:31 Lun ken dalo' anak sekulah Na' men Iha', “U Guru, bi seng en daha' Yahudi lematei Ika' dih. Seng tei Ka' hitih la'an iah?” 9#Yoh 9:4-5; 1 Yoh 2:10 Pelalau nyu'ei nah Yesus, “Pulu-dua' jam alem ji dau dih keta'? Iha' ji la'ung panau ngedau nusi' ha' netung, avin tula alah dau. 10#Yoh 12:35; 1 Yoh 2:11 Bi iha' ji la'ung panau malem sikah adang iha' netung, avin nusi' té' alah halem na'.”

11 # Mat 9:24; Lk 8:52 Nunan nah dahun Na', men'uh atih Iha' kuma' men dalo', “Uh tudu nah bakéh telo', Lazarus dih. Akui seng tei megoh iha' nah anih,” ken Na'. 12Iha' dalo' anak sekulah kuma' men Iha', “Guru, awi iha tudu, ju sayu kah iha' na'a.” 13Yesus kuma' nunan, Iha' bara marung Lazarus uh matei dih atih, seng tudu lan Lazarus kio' dalo' kelenghi dahun Yesus tih. 14Iha' nah Yesus bara tula lelan men dalo', “Uh matei nah Lazarus. 15Bi sayu lan nah kenep Kui avin Aku em té' hitih tegu anan dih, sayu lan pah iha' nunan té' kelo' ja si' kelo' nginah. Nei nah kelo', tei nah telo' pala iha',” ken Na'. 16#Mk 10:32-34; 14:31 Lun ken Tomas aleng daha' kuma' Didimus atih men dalo' bakéh na' anak sekulah atih, “Tei nah telo' lahuh, bei telo' em matei dahin Na',” ken na'.

Yesus aleng Avan kelunan nei murip

17Tegu Yesus ateng hitih, kitan Na' Lazarus pat dau uh halem tanem. 18Té' pah Betania atih jeleng daléh Yerusalem, té' awi dua' bato' su na'. 19Kahum pah kelunan Yahudi uh pepeng dahin Marta dawa' Maria ngenep nei pehalau kenep ji'ek dawa' avin harin dawa' uh matei. 20Kelenghen Marta nah Yesus uh ateng, pelalau tei nah iha' japa' Iha'. Bi Maria melo' loh ha' uma.

21 # Yoh 11:3,23 Pelalau Marta kuma' men Yesus, “U Tuhan, awi Ika' té' hinih dih, nusi' nah harik dih matei. 22Bi kerei inih pah akui jam ket nun-nun aleng Im kahi té' Allah, adang Allah ma'uk na' men Ika',” ken na'. 23Yesus kuma' men iha', “Harim seng nei peju nekulah,” ken Na'. 24#Lk 14:14; Yoh 5:29-34; 6:40 Iha' Marta nyu'ei Iha', “Kitak kah iha' seng nei peju mruip nekulah tegu daha' peju murip té' dau aleng baya loh,” ken na'. 25Iha' nah Yesus kuma', “Akui anih nah Avan daha' nei peju murip, Akui pah aleng Urip atih. Hi-hi aleng nginah té' Akui, lan pah daha' matei, bi daha' seng murip loh. 26#Yoh 5:24; 8:51 Hi-hi aleng murip dahin nginah té' Akui, nusi' peletu daha' matei. Nginah ka' té Dahuk anih iah?” ken Na'. 27#Yoh 6:69 Lun ken na' men Iha', “Lan, Tuhan, nginah kah akui té' Ika', Ika' nah aleng Kristus Anak Allah aleng nei té' usun tana anih,” ken na'.

28Uh ha' kuma' nunan, tei nah iha' nyivuk harin na' Maria dih, “Guru uh ateng, Iha' murui ika',” ken na'. 29Kelenghen na' nah pelalau biti nah iha', tei pala Yesus. 30#Yoh 11:20 Nusi' payan Yesus tei lebau huma, bi té' loh kah Iha' té' ngavan Marta pesuk Iha' atih. 31Té' pah daha' Yahudi aleng pehalau Maria alem uma anan dih, tegu daha' nyineng Maria petimah peju tei musang, pelalau daha' ngioh iha', avin kio' daha' iha' seng tei ha' tanem, seng nangih hinan.

32 # Yoh 11:21 Ateng nah Maria ha' Yesus, pelalau ngelu'ep nah iha' béh kudek Na', dahin kuma' men Iha', “Awi Ika' té' hinih dih, nusi' harik dih matei,” ken na'. 33#Yoh 13:21 Tegu Yesus jam iha' nangih, dahin daha' Yahudi aleng nei tugung iha' pah nangih lahuh, perah henga' pah Iha' ji'ek kenep, 34dahin kuma', “Hino' kelo' metei iha'?” “Nei nah Im nyineng, Tuhan,” ken dalo'. 35#Lk 19:41 Nangih nah Yesus. 36Iha' nah daha' Yahudi kuma', “Nyineng, nuno' si' tuk Iha' dekaya' kenep té' iha',” ken daha'. 37Té' pah balei aleng kuma', “Haman kah Iha' meting matan kelunan buta', mina haman loh kah Iha' na kelunan anih em matei,” ken daha'.

Yesus meju Lazarus men hang kelunan aleng uh matei

38 # Mat 27:60 Ateng nah Yesus ha' tanem, perah henga' loh kah alem kenep Na'. Té' pah tanem atih ji luvang bato', ben na' pah bato'. 39#Yoh 20:1 Ken Yesus, “Asan nah bato' anan.” Iha' nah Marta aleng harin kelunan aleng uh matei atih kuma', “Tuhan, uh butung nah iha', avin pat dau dara na' uh,” ken na'. 40#Yoh 11:4,23,25-26 Yesus kuma' men iha', “Nusi' Kui kuma' men ika' men'adih iah, iha' ika' nginah, ika' seng nyineng aren Allah?” ken Na'. 41En daha' asan nah bato' atih.

Neng'o nah Yesus, dahin kuma' “U Amei, sayu lelan kenep Kui avin Ika' kelenghi Dahuk. 42#Yoh 12:30 Kitak kah Ika' pa'en kelenghi Dahuk. Té' pah Akui kuma' nunih avin daha' kahum aleng nekring teliling Akui, ja si' daha' nginah Ika' aleng nyihu Akui anih,” ken Na'.

43Tegu Iha' uh kuma' nunan, Iha' ngahuk dahin medéng, “U Lazarus, nei nah musang,” ken Na'. 44Lun musang nah kelunan aleng uh matei anan dih, usu dahin kudek na' nutun té' balun patei, pelasa' pah ngelilit neng na' lahuh. Iha' nah Yesus kuma' men daha', “Kelo' uvan nah ket anan, makau iha',” ken Na'.

Dalo' imam aya' mutet daho' ngenep lematei Tuhan Yesus

Mat 26:1-5; Mk 14:1-2; Lk 22:1-2

45 # Lk 16:31; Yoh 10:42; 12:42 Kahum men daha' Yahudi aleng tei jam Maria dahin nyineng hadui Yesus atih nginah té' Iha'. 46Bi balei men daha' tei pala daha' Farisi, pelalau bara ket aleng en Yesus na atih.

47Avin ha' nunan daha' imam aya' dahin daha' Farisi pah mepeng daha' kemiti, dahin kuma', “Nuno' tuk telo' na, avin laké' anih na tada' ngahum anih. 48Telo' pah seng kelung Iha' nunih ké', lim daha' pah nginah té' Iha' na'a, daha' Roma pah nei ala ngavan tam dahin aran bengsa' tam men hang kelunan,” ken daha'. 49Bi ji men hang daha' aleng aran na' Kayafas, iha' aleng imam aya' duman atih, Iha' kuma' men daha', “Nusi' kelo' jam nun-nun. 50#Yoh 18:14 Nusi' pah kelo' jam pelemana', pulang sayu ji kelunan matei men itam ja kalui kelunan lim-lim, men'uh lim bengsa' tam anih tei tasa',” ken na'. 51#Ar Kel 50:20; Us 28:30; Kah d Is 27:21 Bi iha' kuma' nunan anan, nusi ha' men kenep na' dep, bi avin iha' imam aya' duman atih, iha' bara pekuna' marung Yesus seng matei kalui bengsa' atih. 52#Mat 12:30; Yoh 10:16; 1 Yoh 2:2 Nusi' pah Iha' kalui bengsa' anan dep, ja lim-lim anak Allah aleng petat-purat pah lahuh en Na' peng peji. 53Men dau anan nah daha' pakat seng lematei Iha'.

54Avin ha' nunan, nusi' nah Yesus panau tula té' hang daha' Yahudi la'an, bi leka' nah Iha' tei pala daléh aleng jeleng tana hit atih, tei pala daléh Efraim. Hinan nah Iha melo' dahin dalo' anak sekulah Na'.

55 # 2 Tuk 30:17; Mk 10:32; HST 21:24,26 Tegu anan jeleng nah dau aya' Paskah daha' Yahudi. Kelunan kahum men daléh atih tei ha' Yerusalem tei una' té' dau aya' anan ja daha' ngem'ang daha'. 56En daha' ilau nah Yesus, dahin kuma' pedeng daha' dep, alem daha' nekring alem Uma Allah, “Nuno' kio' kelo'? Seng nei Ha' té' dau aya' anih iah?” ken daha'. 57Alem ha' nunan dih daha imam aya' dahin daha' Farisi uh nebara daha', iha ji la'ung jam ngavan Yesus, sayu nah iha' bara na' ja daha' deng mapuh Iha'.

Currently Selected:

YOHANES 11: TDK1990

Highlight

Copy