YOHANES 14

Tuhan Yesus Iha' nah aleng Alan

1 # Mk 11:22; Yoh 14:27 “Meng nah kelo' kawah kenep. Kelo' nginah té' Allah, nginah té' Akui lahuh. 2Halem uma Tamak té' kahum ngavan melo'; awi ha' em nunan, uh kuma' nah Akui men kelo'. Akui tei nemei ngavan kelo'. 3#Yoh 12:26; 17:24 Iha' Akui tei nemei ngavan kelo', adang Akui nei nekulah ala kelo' melo' Dahik, ja ha' Ngavak té', hinan pah kelo' té' lahuh. 4Kitan kelo' kah alan aleng tei ha' Ngavak seng tei anih.” 5Lun ken Tomas men Iha', “U Tuhan, nusi' kalo' jam Ngavam seng tei anan, nuno' tuk kalo' seng jam alan anan lo?” ken na'. 6#Mat 11:27; Yoh 11:25; Rom 5:1-2; Ib 10:20 Iha' nah Yesus kuma' men iha', “Akui anih nah Alan, dahin Pa'un Teneng, dahin Urip. Ji kelunan pah em deng ateng ha' Tamei iha' ha' em ngejeloh Akui.

7“Iha' kelo' uh jam Akui, adang kelo' uh jam Tamak lahuh. Men dau anih kelo' jam Iha', kelo' pah uh nyineng Iha' lahuh,” ken Na'. 8Ken Filipus men Iha', “U Tuhan, Im bara nah Tamei men kalo', ja kalo' lema kenep nyineng Iha',” ken na'. 9#Mat 17:17; Yoh 12:45; Ib 1:3 Yesus kuma' men iha', “U Filipus, bi dara lelan Kui peji dahin kelo', nusi' ka' jam Akui du? Hi aleng uh nyineng Akui, iha' uh nyineng Tamei kah anan lahuh. Na' nun ka' kuma', ‘Bara nah Tamei men kalo'.’ 10#Yoh 12:49 Nusi' kelo' nginah Akui té' halem Tamei iha, Tamei pah halem Kui? Lim Dahuk men kelo', nusi' anan men kenep Kui dep, bi Tamei aleng té' halem Kui, Iha' nah aleng na hadui Na'. 11#Yoh 10:25,38; 14:20 Sayu kelo' nginah té' Dahuk, avin Akui halem Tamei, Tamei pah halem Kui, awi kelo' em nginah tavit atih, sayu kelo' nginah té' Dahuk avin tavit hadui Kui. 12#Mk 16:19-20 Dahuk lan men kelo', hi-hi aleng nginah té' Akui, daha' pah seng na lim hadui aleng Ek na anih, dahin na hadui aleng dekaya' men'uh hadui anih lahuh, avin Akui tei pala Tamei. 13#Mk 11:24; Yoh 15:7; 1 Yoh 5:14 Ket nun aleng kelo' akei alem aran Kui, atih nah Ek na ja aren Tamei tula halem Anak Na'. 14#Yoh 16:23-24 Iha' kelo' akei nun-nun té' Akui alem aran Kui, atih nah Ek na.

Tuhan Allah seng ma'uk Belua' Ma'ang

15 # Yoh 15:10; 1 Yoh 5:3 “Iha' kelo' halam té' Akui, adang kelo' ngioh lim tebara Kui. 16#Yoh 14:26; 15:26; 16:7; 1 Yoh 2:1 Akui seng akei té' Tamei, Iha' pah seng ma'uk ji aleng ha' béh Aleng Masi kelo', ja Iha' peji dahin kelo' ateng-ateng baya, 17#Mat 10:20; Yoh 7:39; 16:13; Rom 8:26 iha' nah Belua' teneng. Huang usun tana anih em deng ala Iha', avin nusi' daha' nyineng Iha', nusi' pah daha' jam Iha', bi kelo' anih jam Iha', avin Iha' peji dahin kelo', Iha' pah seng té' té' alem kelo'. 18Nusi' Kui seng melek kelo' awi anak ula'. Akui seng nei ha' kelo' nekulah. 19#Yoh 16:16 Nusi' dara la'an huang usun tana anih em jam Akui, bi kelo' anih jam kah kelo' Akui. Avin Akui anih murip, kelo' pah seng murip lahuh. 20#Yoh 17:21-23 Té' dau anan nurei kelo' jam Akui té' halem Tamak, kelo' pah té' alem Kui, Akui pah té' halem kelo'. 21#2 Kor 3:18; 1 Yoh 5:3 Hi-hi aleng puboh tebara Kui dahin ngioh Na', iha' anan nah aleng nyalam Akui. Hi-hi aleng halam té' Akui, Tamak pah seng nyalam iha', Akui pah seng nyalam iha' lahuh, dahin petula Akui té' iha'.”

22 # HST 10:41 Iha' nah Yudas kuma' men Iha', (Nusi' iha' Yudas Iskariot dih), “Tuhan, nuno' tuk Ika' seng tula té' kalo' dahin em tula té' huang usun tana anih?” ken na'. 23#Ivun 8:17; Mat 18:20; 28:20; Yoh 13:34; 14:21; 2 Kor 6:16; Ef 3:17 Iha' nah Yesus kuma' men iha', “Iha' ji kelunan nyalam té' Akui, adang iha' seng ngioh Dahuk, Tamak pah seng nyalam iha', Kawa' pah seng nei pala iha' melo' peji dahin na'. 24#Yoh 7:16; 1 Yoh 2:5 Hi aleng em nyalam Akui, nusi' ha' ngioh Dahuk. Dahuk aleng kam kelenghi pah, nusi' ha' men Akui, té' pah iha' dahun Tamei aleng nyihu akui anih. 25Lim-lim tuk anih uh Ek bara men kelo' alem Kui té' dahin kelo' nih. 26#Mat 10:19; Yoh 14:16 Iha' Aleng Masi kelo' anan, iha' tih Belua' Ma'ang, aleng Tamei seng nyihu alem aran Kui, Iha' seng katuk kelo' ket lim-lim, dahin pehituk kelo' tatah lim-lim ket aleng Ek bara men kelo'.

27 # Yoh 14:1; 16:33; Fil 4:7 “Akui ma'uk dena' kenep men kelo', iha' tih kenep dena' Kui aleng Ek uk kelo', nusi' ha' awi ket aleng huang usun tana anih ih ket aleng Ek ih. Meng kenep kelo' kawah, meng kelo' takut. 28#Lk 24:52; Yoh 14:3,6,18 Kelo' uh kelenghi aleng Ek bara men kelo', Akui tei anih pah, adang Akui nei nekulah ha' kelo'. Iha' kelo' nyalam Akui, adang kelo' melu, avin Akui tei pala Tamei, avin Tamei dekaya' men'uh Akui. 29#Yoh 13:19 Kerei inih Akui uh bara pekuna' men kelo', ja tegu ha' nei la'ung na'a kelo' nginah.

30 # Yoh 12:31; Ef 2:2 “Nusi' Dahuk ngahum men kelo' la'an, avin pengulu' ida langit anih nei. Bi nusi' peletu iha' deng tei bahujung Kui, 31#Mat 26:46; Mk 14:42; Yoh 10:18 bi ketu-ketu aleng dahun Tamei men Akui, anan nah Ek na, ja huang usun tana anih jam Akui nyalam té' Tamei. Biti nah kelo', leka' nah telo' men inih.

Currently Selected:

YOHANES 14: TDK1990

Highlight

Copy