YOHANES 17
17
Sebayang Tuhan Yesus
1 #
Yoh 11:41; 13:1 Nengo' nah Yesus ha' langit, dahin kuma', nunih dahun Na', “U Amei, uh ateng nah jaka' na'. Im petula nah aren Anak Ka' anih ja Anak Ka' anih pah petula aren Ka', 2#Mat 11:27 nuno' pah Ika' uh ma'uk tingan men Akui ujung kelunan lim-lim, ja Akui ma'ih urip aleng pa'en men ha'ut-ha'ut daha' aleng uh Im ih men Akui. 3#1 Tes 1:9; 1 Yoh 5:20 Anih nah urip aleng pa'en, iha' atih, ja daha' jam Ika' aleng ji tua Allah aleng lan, dahin Akui aleng Yesus Kristus aleng Im nyihu anih.
4 #
Yoh 4:34
“Akui uh petula aren Ka' ha' usun tana anih dahin pek'uh hadui aleng Im nyihu Ek na. 5#Yoh 1:1; 17:24; Ef 2:6 Kerei inih, Amei, Im ju nah Akui maren Dahim té' aren Tu' aleng Ek sengayan Dahim men em payan usun tana anih té'.
6 #
Mat 6:9; Yoh 17:9 “Akui uh petula aran Ka' men kelunan aleng uh Im ih men Akui men hang kelunan ha' usun tana anih. Dalo' anan pah Anum, Ika' pah uh ma'ih dalo' men Akui, dalo' pah uh ngioh Dahum. 7Kerei inih dalo' jam Ika' aleng pa'un ket lim-lim aleng uh Im ih men Akui. 8#Yoh 16:30 Avin lim-lim daho' aleng uh Im ih men Akui, anan nah uh Ek bara men dalo', dalo' pah uh ala na', dalo' pah jam lan Akui nei men Ika', dahin nginah Ika' aleng nyihu Akui.
9 #
Yoh 6:37,44 Akui kahi asi marung dalo'. Nusi' Kui kahi asi marung huang usun tana anih, bi men dalo' aleng uh Im ih men Akui kah tua, avin dalo' anan nah Anum. 10#Lk 15:31; Yoh 16:15 Lim-lim ket Anuk, Anum kah anan, lim-lim ket Anum pah, Anuk kah anan lahuh, aren Kui pah tula kenan dalo'.
11 #
Mat 6:13; Yoh 10:30 ‘Nusi' Kui té' ha' usun tana la'an, bi dalo' anan nah aleng té' ha' usun tana, Akui anih nei pala Ika'. U Amei aleng ma'ang, kuri-kuri pah Ika' em puboh dalo' alem aran Ka', aleng uh Im ih men Akui, ja dalo' peji alem ji awi Itu' anih lahuh. 12#NDI 41:10; 109:8; Yoh 6:39; 2 Tes 2:3 Alem Akui peji dahin dalo', Akui aleng puboh dalo' alem aran Ka', aleng uh Im ih men Akui, Akui pah uh puboh dalo', nusi' pah té' aleng padé' men dalo', bi ji kah tua, iha' nah aleng adang seng tasa', ja Dahum aleng en daha' ngalung atih dih nei la'ung.
13 #
Yoh 15:11
“Bi kerei inih Akui nei pala Ika', tuk-tuk anih Ek bara ha' usun tana naih ja dalo' jam lu Kui la'ung alem kenep dalo'. 14#Yoh 15:19 Akui uh bara Dahum men dalo', bi huang usun tana anih perah kenep té' dalo', avin nusi' dalo' men usun tana anih, awi Akui pah lahuh nusi' Kui men usun tana anih. 15#Mat 6:13; Lk 22:32; 2 Tes 3:3; 1 Yoh 5:18 Nusi' Akui akei Ika' ala dalo' men usun tana anih, té' pah anih ja Ka' puboh dalo' men iha' aleng ji'ek atih. 16Nusi' dalo men usun tana anih, piah Akui pah lahuh nusi' Kui men usun tana anih. 17#Yoh 6:63 Nelesen nah dalo' alem aleng teneng, Dahum atih nah aleng teneng. 18#Yoh 20:21 Piah awi Ika' uh nyihu Akui nei ha' usun tana anih, nunan pah Akui uh nyihu dalo' tei ha' ji usun tana. 19#Ib 10:10 Avin tavit dalo' nah Akui nelesen batung Kui, ja dalo' pah telesen alem aleng teneng.
20 #
Yoh 17:9
“Nusi' pah Akui akei asi anih men dalo anih dep, bi men lim-lim kelunan aleng nginah té' Akui avin kenan katuk dalo' pah lahuh, 21#Gal 3:28 ja lim-lim daha' jadi' ji tua, piah awi Ika' halem Kui, Amei, Akui pah halem Ka', ja daha' jadi' ji tua halem Tu', ja huang usun tana anih nginah Ika' aleng nyihu Akui. 22#HST 4:32 Aren aleng uh Im ih men Akui pah uh Ek ih men daha' ja daha' jadi' ji lahuh, awi Itu' pah ji. 23#1 Kor 6:17; Gal 2:20 Akui halem daha', Ika' halem Kui, ja daha' atek peji té' alem ji, ja huang usun tana jam Ika' aleng nyihu Akui, Ika' pah nyalam daha' piah Ika' nyalam Akui.
24 #
Yoh 10:29; 12:26; Ef 1:4 “U Amei, anih nah kenep Kui, ja kelunan aleng uh Im ih men Akui anan peji Dahik ha' Ngavak té', ja daha' nyineng aren Kui aleng Im ih men Akui avin Ika' nyalam Akui men em payan kelengunan usun tana. 25U Amei aleng teneng, huang usun tana anih em jam Ika', bi Akui jam Ika', daha' pah jam Ika' aleng nyihu Akui. 26Akui uh bara aran Ka' men daha', Akui seng bara na' lahuh, ja halam aleng Ngavam nyalam Akui té' melo' halem daha', Akui pah halem daha' lahuh.”
Currently Selected:
YOHANES 17: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
