YOHANES 6

Tuhan Yesus makan lima' libu' kelunan

Mat 14:13-21; Mk 6:30-44; Lk 9:10-17

1Men'uh anan, Yesus tei ha' dipah bawang Galilea, iha' nah bawang Tiberias. 2Kahum lelan daha' tei ngioh Iha' avin daha' nyineng tada' aleng en Na' na té' kelunan aleng perah. 3Yesus tei ma'un hujung ji ngalang, pelalau melo' nah Iha' dahin dalo' anak sekulah Na' tinan. 4#Lk 22:1; Yoh 2:13; 11:55 Tegu anan jeleng dau Paskah, iha' tih dau aya' daha' Yahudi. 5Yesus meting matan Na' dahin nyineng ji peng aya' kelunan nei pala Iha', iha' nah Iha' kuma' men Filipus, “Men ino' telo' melé' kanen daha' kelunan ngahum anih lo?” ken Na'. 6Té' pah Yesus kuma' nunan, avin Iha' ngenep pesek iha', avin Iha' jam ket aleng seng en Na' na. 7Lun ken Filipus nyu'ei Iha', “Dua' atuh li'ap pirek pah ngavan melé' kanen, nusi' loh kah deng en daha' pehiget uk,” ken na'. 8Té' ji la'ung men dalo' anak sekulah Na', iha' atih Andrias, aleng harin Simon Petrus, kuma' men Iha', 9#2 Laj 4:42-43 “Té' ji laké' uk tinih aleng hipun lima' li'ap luti dahin dua' masik, bi seng nun bang na' men kelunan aleng ngahum anih?” 10Pelalau Yesus kuma', “Nyihu nah daha' lim melo',” ken Na'. Tatah ngavan uro' kahum pah ngavan daha' titih. Pelalau melo' nah daha' lim, kio'-kio' lima' libu' kahum daha'. 11Uh anan, en Yesus ala nah luti atih dahin bara sayu kenep, iha' nah Iha' petulan na' dahin daha' aleng melo' tinan, nunan pah masik atih lahuh, tuken deng kenep daha'. 12Uh besoh nah daha' lim, iha' nah Iha' kuma' men dalo' anak sekulah Na', “En kelo' peng nah lim-lim la'an daha', ja ha' em té' java' nun-nun.” 13En dalo' peng nah penu pulu-dua' dayah la'an luti aleng lima' la'ung atih dih, la'an daha' aleng uh kuman atih.

14 # Kel d M 18:15 Tegu daha' nyineng tada' en Yesus na atih, iha' daha' kuma', “Lan kah Iha' anih nabi atih aleng seng nei ha' usun tana anih di.” 15#Yoh 18:36 Kitan Yesus nah daha' ngenep ngepden Iha' laja', iha' nah Iha' ngesahun men daha' la'an, tei hujung ngalang, Iha' dep tua.

Tuhan Yesus panau té' ujung ata' bawang

Mat 14:22-23; Mk 6:45-52

16Tegu dau uh levi, tei nah dalo' anak sekulah Na' ngiléh ha' bawang. 17Pelalau dalo' eti hujung haruk ngenep tei lawat pala Kapernaum ha' dipah bawang atih. Dau pah uh lidem lahuh bi nusi' payan Yesus ateng ha' dalo'. 18Bawang atih pah ngelupak aya' avin kelalau bahui. 19Té' awi dua' telo' bato' su na' dalo' uh mesei, kitan dalo' nah Yesus panau hujung ata'. Nei nah Iha' jeleng pala haruk dalo', pelalau dalo' takut. 20Bi Yesus kuma' men dalo', “akui kah anih, meng kelo' takut,” ken Na'. 21Avin ha' nunan dalo' ngenep ala Iha' nei hujung haruk dalo', pelalau haruk dalo' pah ateng ha' benghé' aleng ngavan dalo' ngenep tei anan.

Dahun Tuhan Yesus marung Kanen Urip dahin marung kuman batung Na'

22Dau malah ji, tegu kelunan ngahum nekring ha' dipah bawang atih, kitan daha' kah haruk em té' tinan dih, ji tua kah, Yesus pah em tei hujung haruk dahin dalo' anak sekulah Na' lahuh, bi dalo' anak sekulah Na' dep tua aleng leka'. 23#Yoh 6:11 Lan kah té' haruk ha' béh nei men Tiberias, jeleng ngavan daha' kuman luti men'uh Tuhan bara sayu kenep atih dih. 24Tegu daha' kelunan ngahum atih nyineng Yesus em té' tinan dahin dalo' anak sekulah Na' pah lim em té', daha' atih pah tei hujung haruk, tei ha' Kapernaum ilau Yesus.

25Uh daha' pesuk Iha' ha' dipah bawang atih, iha' daha' kuma' men Iha', “U Rabbi, hiran Ka' nei ateng hinih du?” ken daha'. 26Lun ken Yesus nyu'ei daha', “Dahuk lan men ikam, té' pah ikam ilau Akui nunan pa, nusi' ha' avin ikam uh nyineng tada', té' pah anan avin ikam uh besoh kani luti dau arei dih. 27#Mat 16:12; Yoh 4:14; 5:36 Meng kam nyadui ilau ket kam kani aleng melei maram, bi sayu kam nyadui ilau kanen aleng té' pa'en ateng urip pa'en aleng sayu, aleng en Anak-kelunan ih men ikam; avin Iha' nah aleng uh en Taman Na' petneng, iha' tih Allah.

28Avin atih daha' meteng Iha', “Nun aleng tekep en amé' na ja kamé' na hadui aleng tei té' kenep Allah?” ken daha'. 29#1 Yoh 3:23 Iha' nah Yesus nyu'ei dahin kuma' men daha', “Anih nah hadui aleng kenep Allah, sayu nah ikam nginah té' Iha' aleng uh nei hu'en Allah,” ken Na'.

30 # Mk 8:11; Yoh 2:18 Avin ha' nunan daha' kuma' men Iha', “Nun tada' Im na, ja si' kamé' nyineng na', pelalau nah kamé' nginah té' Ika'? Ket nun seng Im na nan? 31#Us 16:13-14; NDI 78:24 Sepun tam menuna' kuman mana daha' ha' tana ngahit, awi daho' aleng halem surat, ‘Iha' ma'ih kanen daha' men langit.’ ” 32#Yoh 6:49 Iha' nah Yesus kuma' men daha', “Dahuk lan men ikam, nusi' ha' Musa aleng ma'uk kanen atih men langit men ikam, bi Tamak aleng ma'ih men ikam kanen aleng kanen lan men Surga. 33#Yoh 6:51 Avin kanen Allah, iha' nah Iha' aleng nei ngiléh men Surga aleng ma'ih urip men kelunan ha' usun tana anih.” 34Iha' daha' kuma' men Iha', “U Tuhan, sayu im ma'ih pa'en-pa'en kanen atih men kamé' sikah.” 35#Yoh 4:14; 6:48; 7:37 Lun ken Yesus men daha', “Akui anih nah Kanen Urip atih. Hi-hi aleng nei ha' Akui, nusi' ha' seng jam la'o, nurei pah hi-hi aleng nginah té' Akui, nusi' ha' seng jam megang ba. 36#Yoh 6:26,29 Uh kuma' kah Akui men ikam, di: Lan pah ikam uh jam Akui, bi em té' loh pah ikam nginah. 37#Mat 11:28; Yoh 17:6-8 Lim nun-nun aleng en Tamak ih men Akui, atih pah seng nei ateng ha' Akui, kelunan aleng nei ha' Akui lahuh, nusi' peletu Kui nyarang daha'. 38#Mat 26:39; Yoh 4:34 Avin Akui uh nei ngiléh men Surga anih, nusi' Kui seng na kenep Kui dep, bi ja Kui ngioh kenep Na' aleng nyihu Akui. 39#Yoh 10:28-29; 17:12 Anih nah kenep Tamak aleng nyihu Akui, iha' tih lim-lim aleng uh Na' ih men Akui, nusi' té' nun-nun aleng padé', bi Ek pekurip nah lim té' dau aleng baya loh. 40#Yoh 5:29; 11:24 Avin nunih nah kenep Tamak, ha'ut-ha'ut la'ung aleng nyineng Anak dahin nginah té' Iha' iha' pah seng hipun urip pa'en aleng sayu, Akui pah seng pekurip iha' té' dau aleng baya loh.”

41Avin ha' nunan daha' Yahudi ngelebeng Iha' avin Iha' kuma', “Akui nah Kanen aleng nei ngiléh men Surga,” atih dih. 42#Lk 4:22 Ken daha', “Yesus anak Yusuf dih kah anih keta'? Kitan tam kah taman dahin hinan Na' dih. Nuno' tuk Iha' kuma', ‘Akui uh nei ngiléh men Surga” ré?” ken daha'. 43Iha' nah Yesus nyu'ei daha', Meng kam pekelebeng pedeng kam nunan, ken Na'. 44#Yoh 6:65 “Ji la'ung pah em deng nei ha' Akui iha' Tamak aleng nyihu Akui em mejat iha'. Akui pah seng pekurip iha' té' dau aleng baya loh. 45#Yes 54:13; Yer 31:33-34 Té' kah uh kalung alem surat nabi dih, ‘Lim daha' pah en Allah katuk,’ ken surat arei dih. Ha'ut la'ung aleng uh kelenghi dahin pekalei té' Tamak, daha' atih nah nei pala Akui.

46 # Yoh 1:18 “Ji la'ung pah em payan nyineng Tamak, bi Iha' aleng uh nei men Allah, Iha' dep kah aleng uh nyineng Tamak. 47#Yoh 3:16 Dahuk lelan men kelo', hi-hi aleng nginah, daha' anan nah aleng hipun urip pa'en aleng sayu. 48#Yoh 6:35 Akui anih nah Kanen urip. 49#Yoh 6:31-32; 1 Kor 10:3,5 Sepun kam menuna' kuman mana ha' tana henung, matei loh kah daha'. 50Anih nah Kanen aleng nei ngiléh men Surga ja daha' kani na' dahin em matei. 51#Ib 10:5,10 Akui anih nah Kanen aleng murip, aleng nei ngiléh men Surga. Kelunan hi-hi aleng kuman kanen anih, daha' anan pah seng murip pa'en-pa'en. Lan, Kanen aleng Ek ih anih, iha' tih batung Kui aleng Ek uk avin urip kelunan té' usun tana anih,” ken Na'.

52 # Yoh 6:60 Pelalau pehagen tua nah daha' Yahudi pedeng daha', dahin kuma', “Nuno' tuk kelunan anih seng ma'uk batung Na' en tam kani pa?” ken daha'. 53Iha' nah Yesus kuma' men daha', “Dahuk lan men kelo', iha' kelo' em kuman batung Anak-kelunan dahin du'i daha Na', nusi' té' urip halem kelo'. 54Hi-hi aleng kuman batung Kui dahin du'i daha Kui, daha' atih nah aleng hipun urip aleng pa'en, Akui pah seng pekurip daha' té dau aleng baya loh. 55Avin batung Kui aleng atek kanen lan, dahin daha Kui, iha' aleng atek ket du'i lan. 56#Yoh 15:4; 1 Yoh 2:24; 3:24 Hi-hi aleng kuman batung Kui dahin du'i daha Kui, daha' anan nah melo' halem Kui, Akui pah halem daha'. 57Awi Tamak aleng murip nyihu Akui, Akui pah murip kenan Tamak, unan kah hi-hi aleng kuman Akui, daha' pah seng murip Kenak. 58Anih nah Kanen aleng nei ngiléh men Surga, nusi' ha' awi kanen aleng en sepun kam kani arei dih, ka'uh na' matei loh kah. Hi-hi aleng kuman Kanen anih, daha' seng murip pa'en-pa'en,” ken Na'.

59Lim-lim tuk anan en Na' bara alem uma sebayang alem Iha' katuk ha' Kapernaum. 60Ngahum dalo' anak sekulah Na' aleng kelenghi dahun Na' nunan anan kuma', “Dalem lelan daho' anih. Hi seng deng kelenghi na' ré?” 61Bi kitan Yesus alem la'ung Na' dalo' anak sekulah Na' ngelebeng marung tuk atih, iha' Iha' kuma', “Na kenep kelo' bahat katuk Kui anih iah? 62#Yoh 3:13 Nuno' awi kelo' nyineng Anak-kelunan ma'un ha' ngavan Na' men'a? 63#2 Kor 3:6 Belua' aleng ma'uk urip. Batung ji nun pah em té' bang na'. Té' pah daho' aleng Ek kuma' men kelo' atih, iha' nah belua' dahin urip, 64#Yoh 13:11 beka' té' pah balei men kelo' aleng em nginah,” ken Na'. Avin men aring na' Yesus jam daha' aleng em nginah, dahin hi aleng seng nebau ma'uk Iha'. 65#Yoh 6:44 Ken Na', “Anih nah tavit Kui kuma' men kelo', ji la'ung pah em deng nei ha' Akui iha' ha' em kenep Tamak,” ken Na'.

66Avin tuk atih ngahum daha' anak sekulah Na' ngesahun, nusi' daha' panau dahin Na' la'an.

Petrus menglan Yesus aleng Ma'ang

67Avin ha' nunan Yesus kuma' men dalo' pulu-dua', “Kelo' pah ngenep tei lahuh iah?” 68#Yoh 6:63 Simon Petrus pah nyu'ei Iha', “U Tuhan, té' daha' ha' béh ngavan alo' tei iah? Ika' kah aleng hipun daho' urip aleng pa'en. 69#Mat 14:33; 16:16; Yoh 1:49; 11:27 Kalo' anih uh nginah, kalo' pah jam lan, Ika' kah Iha' aleng Ma'ang aleng men Allah,” ken na'. 70Yesus pah nyu'ei dalo', “Nusi' Kui mili kelo' pulu-dua' la'ung anih iah, bi ji la'ung men kelo' aleng ji Iblis,” ken Na'. 71Iha' kuma' nunan anan marung Yudas anak Simon Iskariot, avin iha' nah aleng seng nebau ma'uk Yesus, iha' pah ji men dalo' pulu-dua' la'ung atih.

Currently Selected:

YOHANES 6: TDK1990

Highlight

Copy