LUKAS 2

Marung tuk kanak Tuhan Yesus Kristus

Mat 1:18-25

1Tegu anan pah té' ji daho' Kaisar Agustus nyihu lim-lim kelunan ha' usun tana tei bara aran daha'. 2Atih nah aring-aring daha' bara aran daha', iha' tih tegu Kirenius gabnur daléh Siria. 3Lim-lim daha' pah tei uli ha' daléh pa'un daha' men'a ja bara aran daha'. 4Yusuf pah tei leka' men daléh Nazaret aleng ha' tana Galilea tih, tei ha' daléh Daud aleng aran na' Betlehem, aleng ha' tana Yudea, avin iha' adang pahu Daud kah, 5#Lk 1:27 ja bara aran na' piah-piah dahin Maria doh teng na' atih aleng mali aya'. 6Alem dawa' melo' hitih, jaka' Maria pah seng nganak. 7#Mat 1:25 Pelalau nganak nah iha' ji anak laké', iha' nah anak una' na'. Lun en na' tei nah keluma' hapeng té' Iha', dahin miri Iha' alem bungan sapi', avin nusi' té' ngavan dalo' alem uma hakei.

Dalo' aleng pian duba tei jam Yesus

8Alem daléh anan pah té' dalo' aleng pian hulung duba dalo' ha' padang duba tegu malem. 9Beka' nyeman-nyeman ji meliket Tuhan nekring té' béh dalo'. Aren Tuhan pah malah teliling dalo' atih. Pelalau takut lelan nah dalo' lim. 10Ken meliket atih men dalo', “Meng kelo' takut, avin akui geri dengah aleng sayu men kelo', ngavan kelunan lim-lim melu lelan. 11Avin dau anih alem daléh Daud té' nah ji anak maring men ikam, ji Aleng seng Pekurip ikam, iha' nah Kristus Tuhan. 12Anih nah tada' men kelo': kelo' seng pesuk dahin anak anan ngetutuk té' keluma' hapeng miri alem bungan sapi',” ken na'. 13#Dan 7:10 Beka' nyeman-nyeman té' kuri-kuri kahum daha' meliket dahin na', nei men Surga, aleng mahek Allah dahin kuma',

14 # Yes 57:19; Lk 19:38; Ef 2:14,17 “Lim-lim aren men Allah alem ngavan aleng kelalau lalé' bau,

dahin dena' kenep ha' usun tana té' hang daha' aleng ngavan kenep Na' melu.”

15Tegu daha' meliket atih uli men dalo' atih, tei ha' Surga, iha' nah dalo' kuma' pedeng dalo', “Tei nah telo' ha' Betlehem nyineng lim-lim hadui aleng uh jadi' anan aleng Tuhan uh bara men telo'.” 16Tei nah dalo' salet, pelalau dalo' pesuk Maria dahin Yusuf, dahin anak atih pah té' miri alem bungan. 17Tegu dalo' nyineng Iha', pelalau dalo' bara nah lim-lim tuk aleng hu'uh daha' bara men dalo' marung anak atih. 18Lim-lim daha' aleng kelenghi tira dalo' atih pah ngeniheng avin tuk aleng en dalo' aleng pian duba atih bara men daha'. 19Bi Maria melo' lim-lim daho' anih dahin pelemana' na' alem kenep na'. 20Dalo' aleng pian duba atih pah uli dahin meju Allah dahin mahek Iha', avin lim-lim tuk aleng uh dalo' kelenghi dahin nyineng, awi aleng hu'uh en meliket anan bara men dalo'.

Taman Na' dahin hinan Na' geri Iha' alem Uma Allah.

Sebayang Simeon dawa' Hana

21 # Lewi 12:3; Lk 1:31,59 Tegu uh saya' dau, tegu daha' nyunat Iha', pelalau en dawa' na aran Na' Yesus, awi jam tuk aleng kurin meliket em payan Iha' jadi' ali alem butit.

22 # Lewi 12:1-8 Tegu Maria hu'uh nei tagéh, ngioh tebara Musa, en dawa' geri nah Iha' ha' Yerusalem, ma'uk Iha' men Tuhan, 23#Us 13:2,12,15 awi aleng uh kalung alem tebara Tuhan, “Ha'ut-ha'ut anak-aké' aleng una' seng en daha' telesen men Tuhan.” 24Dawa' ngenep ma'uk bun usu dawa' lahuh, ngioh awi alem tebara Tuhan, iha' tih awi dua' manuk sepukun, iha' em nunan ké' dua' punei kah.

25Té' nah ji la'ung aleng ha' Yerusalem aleng aran na' Simeon. Té' pah kelunan atih teneng dahin takut té' Allah, dahin nekyang dau daha' Israel atih nei temei, Belua' Ma'ang pah té' ujung na'. 26Uh té' nah tula té' iha' men Belua' Ma'ang nusi' nah iha' seng matei em payan iha' nyineng Kristus Tuhan atih. 27Tegu taman dawa' hinan Na' tei geri Iha' alem Uma Allah ngioh tebara menuna', Belua' Ma'ang pah geri Simeon nan halem Uma Allah lahuh. 28Pelalau Simeon pah ala Iha' dahin meju Allah, ken na',

29“U Tuhan, kerei inih bei nah panyin Ka' em leka' dahin dena',

ngioh aleng Dahum,

30avin matak uh nyineng urip aleng nei men Ika',

31aleng hu'uh Im petmei ha' unan lim bengsa',

32Iha' tih ji alah aleng malah aleng netan té' kelunan aleng alem adet ha' béh,

dahin aren men pahu Ka' Israel.”

33Taman Na' dahin hinan Na' pah ngeniheng marung tuk aleng en na' tira marung Iha'. 34Pelalau Simeon sebayang akei sayu tei té' dalo' atih, dahin kuma' men Maria hinan Na'.

“Nyineng nah, anak anih uh en Tuhan petneng ngavan kuri-kuri kelunan Israel seng payah dahin nei peju,

Iha' pah seng jadi' ji tada' en Allah na ngavan kelunan seng petuten tua,

35ja petula ket aleng sihuk en daha' pelemana' alem kenep daha'.

Lan, ji bakin seng mutang té' kenep ka' lahuh.”

36Té' pah la'an ji nabi doh aleng aran na' Hana, aleng anak Panuil, aleng men pahu Asyer, iha' pah uh muku aya' lelan. Tusu duman kah dara iha' peji dahin laké' na', 37men'uh anan matei nah laké' na', kerei inih urip na' saya'-pulu-pat duman. Nusi' peletu iha' melek Uma Allah, iha' sebayang dahin pelien dahin akei asi ngedau dahin malem. 38Men tegu atih lahuh ateng nah iha' lahuh bara sayu kenep men Allah, dahin bara marung anak atih men lim daha' aleng pidah dau Yerusalem seng takau.

39Tegu dalo' uh na lim-lim ngioh tebara Tuhan, uli nah dalo' atih ha' Galilea, iha' tih daléh dalo' ha' Nazaret. 40Anak atih pah nei-nei dekaya' dahin nei-nei tu'a dahin kelalau nyemugen dahin asi Allah pah té' té' Iha'.

Marung Tuhan Yesus alem Uma Allah tegu Iha' pulu-dua' duman urip Na'

41Ha'ut-ha'ut duman hinan na' dahin taman Na' tei ha' Yerusalem tegu dau aya' Paskah. 42Tegu urip Yesus pulu-dua' duman, dalo' hinan Na' dahin taman Na' tei ha' Yerusalem ngioh adet na dau aya' atih. 43Tegu uh lepek dau aya' atih, taman Na' dahin hinan Na' pah leka', melek nah Yesus nyemaké' anan ha' Yerusalem, taman dahin hinan Na' pah em jam Iha' melo' tinan. 44Avin dawa' kuma' Iha' uh té' té' hang daha' aleng tei uli atih, panau nah dawa' ji dau. Uh anan iha' dawa ilau Iha' té' hang daha' harin dawa' dahin té' hang daha' ha' béh lahuh, 45bi tegu dawa' em pesuk Iha', nepulet nah dawa' tei ha' Yerusalem ilau Iha'. 46Uh telo' dau, iha' dawa' pesuk Iha' halem Uma Allah melo' té' hang daha' guru-guru, tebei kelenghi dahun dalo' dahin meteng dalo'. 47Lim-lim daha' aleng kelenghi dahun Na' ngeniheng tua jam nyemugen kenep Na' dahin hu'ei Na'. 48Tegu dawa' nyineng Iha', ngeniheng pah dawa'. Ken hinan Na' men Iha', “U anak kui, na' nun Ika' na nunih té' kawa'? Nyineng kawa' Tamam ngihau lelan ilau Ika'.” 49Lun ken Na' men dawa', “Na' nun kua' ilau Akui? Nusi' kua' jam adang Akui alem Uma Tamak iah?” ken Na'. 50Bi nusi' taman dawa' hinan Na' jam alem dahun Na' kuma' nutih men dawa'. 51Uli nah Iha' tugung dawa' tei ha' Nazaret, Iha' pah nyepida lelan té' dawa'. Hinan Na' pah pelemana' lim daho' atih alem kenep na'. 52Yesus pah nei-nei dekaya' dahin nyemugen, Iha' pah mega' lan té' kenep Allah dahin té' kelunan lahuh.

Currently Selected:

LUKAS 2: TDK1990

Highlight

Copy