LUKAS 23

Tuhan Yesus ha' unan Pilatus

Mat 27:1-2,11-14; Mk 15:1-5; Yoh 18:28-38

1Pelalau peju nah lim daha' aleng uh pepeng atih, pelalau geri Iha' ha' unan Pilatus. 2#Lk 20:25 Daha' matoh dahun daha' ngema' Iha', ken daha', “Té' pah kelunan anih, uh kitan amé' Iha' meté' pelingo' bengsa' amé', dahin em mun kelunan bayen sukei men Kaisar, dahin kuma' batung Na' Kristus, ji kelunan laja',” ken daha'. 3#1 Tim 6:13 Pilatus pah meteng Iha' dahin kuma', “Ika' kah laja' kelunan Yahudi iah?” Nyu'ei nah Yesus men iha' dahin kuma' “Awi dahum anan kah.” 4Lun ken Pilatus men daha' imam aya' dahin daha' aleng kahum atih, “Akui em pesuk sala nun-nun té' kelunan anih.” 5Bi sa'-sa' kehameng pah daha', ateng daha' kuma', “Iha' nih meté' nian kenep kelunan dahin meté' katuk alem lim daléh Yudea, men Galilea aring Iha' matoh, dahin ateng ha' daléh anih pah lahuh,” ken daha'.

Tuhan Yesus ha' unan Herodes

6Tegu Pilatus kelenghi daho' nutih, en na' teng nah daha' iha' kelunan atih seng men Galilea. 7#Lk 3:1 Tegu iha' jam Iha' alem keligem Herodes, en na' tei nah Iha' ha' Herodes avin iha' pah té' ha' Yerusalem tegu atih. 8#Lk 9:9 Tegu Herodes nyineng Yesus tih, sayu lelan nah kenep na', avin uh dara lan iha' seng ngenep jam Iha', avin iha' uh kelenghi marung dengah Na', dahin nginah iha' seng nyineng Iha' na tada'. 9Lun en na' teng nah Iha' dahin kahum dahun na', bi nusi' nah Yesus nyu'ei iha' nun-nun. 10Daha' imam aya' dahin daha' aleng puboh surat Tuhan nekring nyelema' Iha' dahin bunget lelan na Iha'. 11Herodes dahin lim daha' seladu na' pah muau dahin ngejau Iha', dahin metei kanan aleng kajau lan, pelalau en daha' tei nah Iha' men Pilatus la'an. 12Tegu dau atih, Herodes dahin Pilatus tei piah kenep la'an, avin menuna' dawa' peselingau pedeng dawa'.

Daha' nyihu Pilatus lematei Tuhan Yesus

Mat 27:15-26; Mk 15:6-15; Yoh 18:39—19:16

13Pilatus pah mepeng daha' imam aya' dahin daha' kelunan aya' dahin daha' lim-lim, 14pelalau kuma' men daha', “Ikam uh geri kelunan anih men akui awi Iha' kelunan aleng pelingo' kelunan bangu anih. Té' pah akui anih uh ngetneng Iha' ha' unan kam, ji sala Na' pah em té' aleng kitak marung ket ngavan kam nyelema' Iha', 15nurei pah lahuh Herodes, avin iha' uh menei Iha' la'an ha' itam. Aleng lan-lan na', nusi' peletu té' ji hadui Na' aleng ngavan tam tekep lematei Iha'. 16Avin atih, akui ngenep jeliket Iha', dahin makau Iha',” ken na'. 17(Avin tegu dau aya' atih, adang iha' makau men daha' ji la'ung men alem jin.) 18Bi medéng nah lim daha' atih tugung, ken daha', “Lematei nah kelunan atih, dahin Barabas im akau men kamé',” ken daha'. 19Barabas atih ji kelunan aleng uh daha' tei alem jin avin iha' geri daha' nyudung lawan perintah alem daléh atih, dahin lematei kelunan lahuh. 20Ji hangun la'an Pilatus duan daha', avin iha' ngenep lan makau Yesus, 21bi daha' atih medéng tua, ken daha', “Selepang nah Iha'! Selepang nah Iha'!” 22Ken na' nah ketlo' hangun men daha' atih, “Avin nun? Ket nun aleng ji'ek aleng uh kelunan anih na? Nusi' kui pesuk nun-nun aleng seng tekep avan Na' matei. Avin anan akui ngenep jeliket Iha', uh anan en akau nah Iha',” ken na'. 23Bi sa'-sa' hawen tua nah pedéng daha' akei Iha' en daha' selepang. Alah tua Pilatus té' dahun daha'. 24Pelalau Pilatus mutet daho', ngioh aleng dahun daha'. 25En na' akau nah laké' aleng tei alem jin arei dih, aleng uh geri daha' nyudung perintah dahin lematei kelunan, iha' tih kelunan aleng en daha' akei atih, bi Yesus en na' uk men daha' ngioh aleng kenep daha' atih.

Golgota, Tuhan Yesus matei té' kayo' salip

Mat 27:32-44; Mk 15:21-32; Yoh 19:17-27

26Tegu daha' tei geri Iha', en daha' apuh nah ji kelunan aleng aran na' Simon, kelunan Kirene aleng nei men awang daléh, dahin metei kayo' salip atih té' la'ip na' ja iha' nyi'un na' ngioh Yesus.

27Té' ji peng aya' kelunan ngioh Iha', dahin daha' doh lahuh aleng nangih dahin namu Iha'. 28Bi Yesus ngelisah pala daha' dahin kuma', “U kelo' anak-doh daléh Yerusalem, meng kelo' nangih avin Akui, bi nangih nah avin batung kelo', dahin avin anak kelo'. 29#Lk 21:23 Avin lan, dau na' seng ateng tegu daha' kuma', ‘Sayu lan nah daha' aleng nyalun, dahin doh aleng em peletu nganak aleng em payan puso' anak té' uso' na'.’ 30#Hos 10:8; K Tula 6:16; 9:6 Tegu atih daha' seng kuma' men ngalang aya', ‘Luvin nah té' kamé',’ dahin men ngalang da'uk, ‘Nyavun nah kamé'.’ 31#1 Pet 4:17 Avin iha' daha' na nunih alem pa'un kayo' murip loh, ket nun seng en daha' na tegu kayo' uh matei?”

32Té' pah dua' la'ung kelunan ha' béh, aleng na ji'ek lelan, en daha' geri dahin Na' seng lematei dawa'. 33#Mat 27:33-56; Mk 15:22-41; Yoh 19:17-30 Tegu daha' ateng ngavan aleng aran na' Tulang Kahung, hinan nah daha' nyelepang Iha', dahin dawa' aleng na ji'ek atih lahuh ji bah ta'o ji bah ulei Na'. 34#NDI 22:19; Yes 53:12; Mat 5:44 Lun ken Yesus, “U Amei, Im masi nah daha', avin daha' em jam ket aleng en daha' na anih,” ken Na'.

Dalo' pah tikem surat petulan kanan Na' men dalo'. 35#NDI 22:7 Nekring nah daha' nyineng Iha'. Daha' kelunan aya' pah lahuh meté' nuten Iha', ken daha', “Daha' ha' béh uh en Na' pekurip, sayu nah Iha' pekurip batung Na' dep lahuh, iha' Iha' Kristus aleng men Allah, aleng en Allah mili atih.” 36#NDI 69:21 Nurei pah lahuh daha' seladu nuten Iha', dahin nei geri ata' agun aleng sem men Iha', 37ken daha', “Awi Ika' Laja' daha' Yahudi, pekurip nah batung Ka',” ken daha'. 38Té' nah surat lahuh nyelibau kahung Na', “ANIH NAH LAJA' DAHA' YAHUDI.”

39Ji men dawa' aleng na ji'ek aleng en daha' selepang dahin Na' atih pah nuten na Iha' lahuh, ken na', “Nusi' Ika' Kristus iah? Im pekurip nah batung Ka' dahin batung awa' lahuh.” 40Bi aleng ji men dawa' mano' iha', ken na', “Ika pah té' té' alem ukum anih lahuh. Nusi' ka' takut té' Allah iah? 41Tekep kah itu' ga' ukum, avin itu' ga' hulei hadui tu', bi kelunan anih, nusi' Ha' na nun-nun aleng sala.” 42#Mat 16:28 Ken na' la'an, “U Yesus, hituk nah té' akui tegu Ika' nei alem keligem Ka'.” 43Ken Na' men iha', “Dahuk lan men ika', dau anih ika' seng té' Dahik ha' Firdaus.”

44Tegu ateng pukun pulu-dua' dau negreng, pelalau jadi' lidem lim usun tana ateng pukun telo' levi dau, 45dahin alah dau pah tei lidem, nurei pah liding suluk Uma Allah pah birak marung belua. 46#NDI 31:6; HST 7:59 Tegu Yesus uh medéng dahin pedéng aya', Iha' kuma', “U Amei, alem usu Ka' nah Akui ma'uk Beluak.” Hu'uh Iha' kuma' nunih, pelalau en Na' uk nah hengan Na'. 47Tegu kopral seladu jam hadui nutih, pelalau iha' meju aran Allah, ken na', “Lan anih nah kelunan aleng teneng.”

48Lim daha' aleng kahum atih pah aleng pepeng nyineng ket anan, tegu daha' jam hadui nutih, uli nah daha' dahin nebup usuk daha'.

49 # NDI 38:11; 88:8; Lk 8:2-3 Lim daha' aleng bakéh Na', dahin daha' doh aleng ngioh Iha' men Galilea té' nekring men su nyineng hadui atih.

Yusuf nepiha' Tuhan Yesus

Mat 27:57-61; Mk 15:42-47; Yoh 19:38-42

50Té' ji kelunan aleng aran na' Yusuf, iha' tih ji kelunan kemiti aya', kelunan aleng sayu dahin teneng. 51#Lk 20:19 Nusi' ha' piah kenep té' utet dahun daha' kemiti atih dahin em kaséh té' hadui daha', iha' tih kelunan men Arimatea, ji daléh daha' Yahudi, té' pah lahuh iha' pidah keligem Allah. 52Lun tei nah iha' ha' Pilatus akei patei Yesus. 53En na' ala nah patei Na', dahin nutun Iha' té' balun alut lanih, pelalau metei Iha' alem luvang bato' aleng en daha' ngalé', ngavan aleng em payan daha' nanem kelunan. 54Dau atih dau Petmei kuman aya', Dau Kelarah pah uh jeleng.

55Té' pah dalo' doh aleng uh tugung Iha' men Galilea atih ngioh lahuh, dahin nyineng tanem Na', dahin nyineng lun patei Na' en dalo' lo'. 56#Us 12:16; 30:10; Lewi 23:8 Lun uli nah dalo' doh atih pelalau nemei tuk uro' bu sayu, dahin kenyu mur aleng bu sayu lahuh. Ngelarah nah dalo' té' Dau Kelarah, ngioh tebara.

Currently Selected:

LUKAS 23: TDK1990

Highlight

Copy