LUKAS 9

Dahun Tuhan Yesus men dalo' pulu-dua' anak sekulah Na'

Mat 10:5-15; Mk 6:7-13

1Yesus muvui dalo' pulu-dua' anak sekulah Na', dahin ma'uk tingan men dalo' ja dalo' haman duan lim-lim to', dahin petagéh kelunan men na'an-na'an, perah daha'. 2En Na' nyihu nah dalo' atih tei pedengah marung keligem Allah dahin petagéh kelunan aleng perah. 3#Lk 10:4-11 Ken Na' men dalo' atih, “Meng kam geri nun-nun nguyo' anau kam, hekun pah meng, sut ligit pah meng, luti pah meng, ligit pah meng, basung meng ha' dua'. 4Uma hino'-hino' pah ngavan kelo' tei, melo' nah hinan dahin men inan pah la'an kelo' musang. 5#HST 13:51 Hi-hi aleng em ala kelo', tegu kelo' musang men daléh atih, negak nah nek aleng té' ida kudek kam aleng jadi' ji tada' men daha' atih.” 6Lun musang nah dalo' atih tei ha' lim-lim uma dahin bara dengah sayu dahin petagéh kelunan hiréh-hitih.

Kawah kenep Herodes

Mat 14:1-12; Mk 6:14-29

7Tula nah dengah té' Herodes aleng gem hida laja' atih, marung lim tuk aleng uh jadi' atih. Ngeniheng nah kenep na' avin té' balei kelunan aleng kuma' Yohanes uh peju murip men hang kelunan aleng uh matei, 8dahin té' pah lahuh aleng kuma' Elia uh nei tula, dahin té' pah la'an aleng kuma' ji kelunan men hang daha' nabi menuna' uh nei peju. 9Ken Herodes, “Uh ek ngulem nah kahung Yohanes di, bi hi kah kelunan anih la'an marung dengah aleng ek kelenghi nunih?” Pelalau iha' ilau alan seng ngenep nyineng Iha'.

Tuhan Yesus makan lima' libu' kelunan

Mat 14:13-21; Mk 6:30-44; Yoh 6:1-14

10Tegu dalo' aleng sihu Na' nei uli, en dalo' bara nah men Yesus lim-lim aleng uh en dalo' na. En Na' geri nah dalo' atih mukéh tei ha' ji daléh aleng aran na' Betsaida. 11Bi tegu kelunan kahum atih jam Iha' tei nutih, pelalau daha' ngioh Iha', Yesus pah ala daha' atih dahin nengaran men daha' marung tuk keligem Allah, dahin petagéh kelunan aleng em magéh. 12Dau pah uh seng herep, nei nah dalo' pulu-dua' anak sekulah Na' atih kuma' men Iha', “Nyihu nah kelunan kahum anih uli, ja daha' tei uli ha' uma-uma daha' dahin ha' daléh aleng jeleng anih, dahin nyangei ilau ket en daha' kani; avin hinih itam té' ha' ngavan aleng henung.” 13Bi ken Yesus men dalo', “En kelo' makan nah daha' anih.” Bi ken dalo', “Nusi nah té' luti kahum men'uh lima' li'ap dahin masik dua' usau aleng da'uk seng en alo' petulan men daha'. Em kalo' tei melé' nuréh seng deng men daha' aleng kahum anih.” 14Avin té' kio'-kio' lima' libu' daha' laké'. Ken Na' men dalo' anak sekulah Na', “Nyihu nah daha' melo' pelirei-pelirei, ji lirei kio'-kio' lima'-pulu la'ung.” 15Dalo' na na' nunan, dahin nyihu daha' lim melo'. 16Yesus pah ala luti lima' li'ap atih dahi masik dua' usau atih, pelalau neng'o ha' langit dahin bara sayu kenep, men'uh anan en Na' mi'ang nah luti atih dahin ma'uk na' men anak sekulah Na' ja dalo' pejei na' té' unan kelunan kahum atih. 17#2 Laj 4:44 Kuman nah daha' lim, ateng daha' besoh. Pelalau en daha' peng nah lim la'an daha', pulu-dua' dayah penu kenan la'an daha'.

Petrus menglan Yesus Iha' nah Kristus.

Aring-aring Tuhan Yesus bara katé' Na'

Mat 16:13-28; Mk 8:27-29

18Té' ji hangun alem Yesus sebayang, dalo' anak sekulah Na' atih pah té' dahin Na', iha' nah Iha' meteng dalo' atih, ken Na', “Awi ngioh dahun kelunan aleng kahum, hi kah Akui anih kurin daha' ré'?” 19#Mat 4:1-2; Mk 6:14-15; Lk 9:7-8 Nyu'ei nah dalo' atih, ken dalo', “Yohanes aleng Meduh, bi té' aleng kuma' Elia, té' pah aleng kuma' ji kelunan aleng men hang daha' nabi menuna' uh nei peju.” 20#Yoh 6:68-69 Ken Na' men dalo', “Bi kurin kelo' anih ké' hi kah Akui sika?” Nyu'ei nah Petrus, ken na', “Kristus aleng nei men Allah.” 21En Na' nangen nah dalo' lelan dahin em mun dalo' bara nunih men ji kelunan pah aleng ha' béh. 22#Lk 9:44; 18:32-33 Ken Na', “Adang Anak-kelunan seng ga' kahum na'an katé', dahin seng en harang kenan daha' aleng dekaya' dahin daha' imam aya' dahin kenan daha' aleng puboh surat Tuhan, ateng daha' lematei Iha', men'uh anan Iha' seng nei peju murip la'an té' dau aleng ketlo'.”

23 # Mat 10:38; Lk 14:27 Ken Na' men dalo' lim atih, “Awi hi aleng ngenep ngioh Akui, sayu nah iha' muau batung na' dep dahin nyi'un salip na' ha'ut-ha'ut dau, pelalau ngioh Akui. 24#Mat 10:39; Lk 17:33; Yoh 12:25 Avin hi aleng ngenep puboh hengan na', iha' seng madé' na' anan, bi hi aleng em pari madé' hengan na' avin Akui, iha' nah aleng seng puboh na'. 25Nun kah bang na' men kelunan awi iha' ala lim usun tana anih, bi hengan na' seng padé' dahin seng tasa'. 26#Mat 10:33 Avin hi aleng ha'éh Akui dahin ha'éh té' tebara Kui, Anak-kelunan pah seng ha'éh iha' tegu Iha' nei alem aran Na' dahin alem aren Taman Na' dahin aren lim meliket aleng ma'ang. 27Dahuk lan men kelo', té' balei men hang kelo' aleng nekring hinih aleng em havah matei em payan dalo' nyineng keligem Allah.”

Aren Tuhan Yesus tula té' ujung ngalang

Mat 17:1-8; Mk 9:2-8

28Té' kio'-kio' saya' dau men'uh dahun Na' nutih, en Yesus geri nah Petrus dahin Yohanes dahin Yakobus dahin Na', pelalau tei hujung ngalang ngenep sebayang. 29Alem Iha' sebayang atih, beka' neng Na' nei balui jam na', dahin kanan Na' pah lahuh puti dahin ngetalah. 30Té' nah dua' la'ung kelunan tengaran dahin Na', iha' tih Musa dahin Elia, 31#Lk 9:22 aleng tula alem aren. Dawa' tengaran marung patei Yesus, aleng seng em nuno' dara la'an seng la'ung ha' Yerusalem. 32#Yoh 1:14; 2 Pet 1:16-18 Té' pah Petrus dahin dawa' aleng dahin na' nyekudau lelan, bi tegu dalo' nei ma'un lan, kitan dalo' nah aren Yesus dahin dawa' dua' la'ung kelunan aleng nekring dahin Na'. 33Alem dawa' kelunan atih leka' men béh Na', iha' nah petrus kuma' men Yesus, “Guru, sayu lan nah telo' té' tinih. Sayu nah kalo' na telo' lepau, ji men Ika', ji men Musa, ji la'an men Elia,” ken na'. Bi nusi' Petrus jam seng nuno' tuk usang dahun na' atih dih. 34Alem iha' kuma' nunan, nei nah ji avun pehingau dalo'. Takut lan dalo' alem dalo' tei halem avun anan. 35#Yes 42:1; Mat 3:17; 12:18; Mk 1:11; Lk 3:22 Kelenghen dalo' nah daho' men alem avun atih aleng kuma', “Anih nah Anak Kui aleng uh Ek mili. Kelenghi nah kelo' dahun Na'.” 36Uh nah daho' atih, kitan dalo' nah Yesus ji la'ung tua. Anak sekulah Na' atih pah tepaka' tua, ji la'ung pah em musang daho' tegu anan marung ket aleng uh kitan dalo' atih.

Iha' petagéh ji nyam aleng ngavan to' nilung.

Kedua' hangun Iha' bara marung katé' Na'

Mat 17:14-21; Mk 9:14-27

37Dau malah ji la'an tegu dalo' uh ngiléh men ngalang atih, kahum kelunan nei pehura' Yesus. 38Té' nah ji kelunan men hang daha' kahum atih medéng, ken na', “U Guru, akui akei asi lelan té' Ika', nei Im nyineng anak kui, avin ji-ji iha' kah anak kui. 39Tipan lelan to' atih nei nesun té' iha', pedung-pedung nyeman tua ha' nei medéng ateng iha' nekjen dahin ngelurek tua ba na'. Katé' lelan ha', em apen loh jam na' kenan to' atih. 40Akui uh akei anak sekulah Ka' muga to' atih, bi nusi' dalo' deng.” 41Nyu'ei nah Yesus dahin kuma', “U bengsa' aleng em nginah dahin aleng uh nyayang anih, seng kuri dara kah la'an Akui seng té' dahin kam dahin la'ei pelemana' ikam. Geri nah anak ka' anak ké'.” 42#Lk 7:15 Alem iha' nei, en to' atih ayah nah iha' ha' tana, dahin nekjen lelan nah iha'. Bi Yesus mano' nah to' atih, dahin petagéh nyam atih, en Na' uk nah iha' sayu men taman na'. 43Ngeniheng nah lim daha' té' aren Allah.

Ketlo' hangun Iha' bara marung katé' Na'

Mat 17:22-23; Mk 9:30-32

Alem lim kelunan atih ngeniheng marung tuk lim hadui Na' na anan, Iha' kuma' men anak sekulah Na', 44#Lk 9:22 “En kelo' ting nah iling kelo' té' Dahuk anih, avin Anak-kelunan seng en daha' uk alem usu kelunan.” 45#Mk 9:32; Lk 18:34 Bi dalo' atih em tei ateng té' alem dahun Na' atih, daho' atih sihuk té' dalo' ja dalo' em jam halem na'. Tuhan nah dalo' meteng Iha' té' daho' atih.

Dalo' anak sekulah pepteng, hi kah aleng seng dekaya'?

Mat 18:1-5; Mk 9:33-40

46 # Lk 22:24 Nei nah ji kenep pepteng pedeng dalo' atih, hi kah aleng seng dekaya' té' hang dalo'. 47Bi tegu Yesus jam marung kenep dalo' nutih, pelalau Iha' ala ji nyam dahin nekring iha' té' béh Na', 48#Mat 10:40; Lk 10:16; Yoh 13:20 dahin kuma' men dalo', “Hi aleng ala nyam anih alem aran Kui, iha' nah aleng ala Akui, dahin hi aleng ala Akui, iha' ala Iha' aleng nyihu Akui kah anan. Avin aleng kelalau da'uk té' hang kelo', iha' nah aleng dekaya'.”

49Nyu'ei nah Yohanes dahin kuma', “U Guru, kelo' uh nyineng ji la'ung mesau to' alem aran Ka', kalo' pah ma'eng iha', avin iha' em ngioh telo'.” 50#Lk 11:23; Fil 1:18 Bi ken Yesus men iha', “Meng ma'eng iha', avin hi aleng em nyura' kelo' iha' nah aleng bakéh kelo'.”

Daha' Samaria em ngenep ala Tuhan Yesus

51 # Mk 10:32; Yoh 7:1 Tegu uh jeleng jaka' Tuhan Yesus seng peju ha' Surga, menangen tua nah kenep Na' pejoh anau Na' tei ha' Yerusalem. 52#Yoh 4:4 En Na' nyihu nah kuri-kuri men dalo' sihu Na' tei una'. Tei nah dalo' atih pelalau tei alem ji uma kelunan Samaria, seng nemei ngavan Na' lebau. 53#Yoh 4:9 Bi nusi' nah daha' atih kaséh ala Iha' avin daha' jam anau Na' seng tei ha' Yerusalem. 54#2 Laj 1:9-16 Bi tegu anak sekulah Na' Yakobus dahin Yohanes jam tuk atih, kuma' nah dawa' atih, “Tuhan, mun Ka' kalo' nyihu apui nei men langit dahin nutung daha' anih iah?” 55Bi Yesus ngelisah pala dawa' dahin mano' dawa'. 56Tei nah dalo' ha' uma aleng ha' béh.

Telo' la'ung aleng ngenep ngioh Tuhan

Mat 8:19-22

57Alem dalo' atih pejoh panau, té' ji la'ung kuma' men Yesus, “Akui ngenep ngioh Guru hino'-hino' Guru tei.” 58Ken Yesus men iha', “Men lim lejau danum té' kah luvang na', dahin men lim manuk hida kelekawah pak té' kah halah daha', bi men Anak-kelunan, ngavan Na' nyelen kahung Na' pah em té'. 59Ken Na' men ji aleng ha' béh, “Nei nah ngioh Akui,” bi ken kelunan atih, “U Tuhan, bei nah akui em tei nepiha' tamak una'.” 60Bi ken Yesus men iha', “Bei nah kelunan aleng matei nepiha' kelunan daha' aleng matei, bi ika' anih tei nah pedengah keligem Allah.”

61 # 1 Laj 19:20 Ken ji la'ung aleng ha' béh la'an, “Akui ngenep ngioh Ika', Tuhan, bi bei nah akui tei uli una' dahin bara sayu kenep men daha' huma kui.” 62Ken Yesus men iha', “Iha' té' ji la'ung aleng gem hadui ngelisah tana dahin nyili ha' la'ung, nusi' nah iha' tekep men keligem Allah.”

Currently Selected:

LUKAS 9: TDK1990

Highlight

Copy