Seb 3
3
UPetro usilisa umuntu oyisiqhuli
1UPetro loJohane bakhuphukela ethempelini emini yantambama ngesikhathi sokukhuleka. 2Kwakulethwa indoda ethile eyisiqhuli kusukela ekuzalweni kwayo, ababeyibeka insuku ngensuku esangweni lethempeli elithiwa iSango eliHle ukuba icele iziphiwo kulabo abangenayo ethempelini. 3Yabona uPetro loJohane bezakungena ethempelini, yacela ukuba iphiwe isiphiwo. 4UPetro wayijolozela eloJohane, wathi: Sikhangele! 5Yasibakhangela ithemba ukuba izakwamukeliswa ulutho yibo. 6Kodwa uPetro wathi: Isiliva legolide kangilakho; kodwa ngizakukunika lokho engilakho; ebizweni likaJesu Kristu waseNazaretha, sukuma uhambe. 7Wambamba ngesandla sokunene, wamlulamisa; kwaqina masinyane inyawo lenqagala zakhe, 8wasukuma wathi lothu, wema, waqala ukuhamba, wangena labo ethempelini, ehamba, eseqa, edumisa uNkulunkulu. 9Bonke abantu bambona ehamba, edumisa uNkulunkulu. 10Bamazi ukuba nguye owayehlalela ukucela iziphiwo eSangweni eliHle lethempeli, behlelwa yikwesaba lokumangala ngalokho okwenzeka kuye.
UPetro ukhuluma ngoKristu ukuthi uyiNkosi yokuphila
11Esabambelele kuPetro loJohane, bonke abantu bagijimela kubo ndawonye ethulini elithiwa elikaSolomoni, bemangala kakhulu. 12Kwang’khona uPetro ebona lokho wathi ebantwini: Madoda akoIsrayeli, limangalelani ngalokhu na? Lisijolozelelani ngokungathi ngamandla ethu ingabe ngokukholwa kwethu simenze ukuba ahambe lumuntu na? 13UNkulunkulu kaAbrahama lokaIsaka lokaJakobe, uNkulunkulu wabokhokho uyiphe udumo iNceku yakhe uJesu elayinikelayo, layiphika phambi kukaPilatu, yena esethanda ukuyikhulula;#Eks 3:15 14kodwa lina lamphika oNgcwele loLungileyo, lacela ukuba liphiwe umbulali,#Mat 27:15–23; Mark 15:6–14; Luka 23:13–23; Joha 19:12–15 15labulala iNkosi yokuphila ayivusayo uNkulunkulu kwabafileyo, esingofakazi bakho thina. 16Ngokukholwa ebizweni layo lumuntu elimbonayo lelimaziyo wenziwe waqina, langokukholwa okungoJesu wamukeliswe ukuphila okupheleleyo phambi kwenu lonke.
17Kodwa, bazalwane, ngiyazi ukuba lakwenza lokhu ngokungazi njengababusi benu. 18Kodwa lokho uNkulunkulu akukhuluma ngaphambili ngomlomo wabaprofethi bonke ukuthi uKristu wakhe uzakuhlupheka, ukwenze kwagcwaliseka. 19Ngakho phendukani, libuye futhi ukuze kuhlanjululwe izono zenu, ukuze kufike izikhathi zokuhlumelela ezivela ebusweni beNkosi, 20ukuze ithumele uKristu elimmiselweyo, uJesu, 21okumele ukuba izulu limamukele, kuze kufike isikhathi sokubuyisela konke lokhu uNkulunkulu akutshoyo endulo ngomlomo wabaprofethi bakhe abangcwele. 22UMose wathi: INkosi uNkulunkulu izakulivusela umprofethi kubazalwane benu onjengami; lizakumlalela kukho konke azakukukhuluma kini.#Dute 18:15, 18 23Kuzakuthi wonke umuntu ongayikumlalela lowomprofethi achithwe ebantwini.#Dute 18:19 24Yebo, labaprofethi bonke, kusukela kuSamuweli labalandelayo, bonke batshumayela ngalezinsuku. 25Lina lingamadodana abaprofethi lawesivumelwano uNkulunkulu asenza labokhokho benu, esithi kuAbrahama: Ngenzalo yakho zizakubusiswa zonke izizukulwana zomhlaba.#Gen 22:18 26UNkulunkulu eseyivusile iNceku yakhe wayithumela kini kuqala ukulibusisa ngokuliphendula, ilowo lalowo ebubini bakhe.
Currently Selected:
Seb 3: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
